सैन्य कार्रवाई रोक-01
पाछू चार दिन ले भारत अउ पाकिस्तान के बीच चलत तनाव के बाद आज दूनों देस सीज फायर उपर सहमत हो गेहे। भारत अउ पाकिस्तान ह तुरते प्रभाव ले गोलीबारी अउ सैन्य कार्रवाई रोके उपर सहमति जताय हे। विदेश मंत्री डॉक्टर एसत्र जयशंकर ह सोशल मीडिया म जारी एक पोस्ट म किहीन कि भारत अउ पाकिस्तान आज गोलीबारी अउ सैन्य कार्रवाई रोके उपर सहमति बनाय हे। डॉक्टर जयशंकर ह किहीन कि भारत ह आतंकवाद के सबो रूप अउ अभिव्यक्ति मनके खिलाफ सरलग दृढ़ अउ अडिग रूख अपनाय हे। ओमन किहीन कि ओहा अइसे करना जारी रखही।
सैन्य कार्रवाई रोक-02इही बीच, अब ले कुछेक देर पहिली रक्षा मंत्रालय ह एक ठन प्रेस बीफिंग म कर्नल सोफिया कुरैशी अउ विंग कमांडर व्योमिका सिंह ह बतइन कि भारत डहार ले करे गे पाकिस्तान ल काफी नुकसान पहुंचे हे। ओमन किहीन कि भारतीय सेना तैयार अउ सतर्क हे। एखर अलावा पाकिस्तान डहार फैलाय जात फर्जी खबर के खंडन करत कर्नल सोफिया ह किहीन कि ब्रम्ह्रोस मिसाइल ल नुकसान पहुंचाय अउ हवाई रक्षा प्रणाली-एस.फोर हंड्रेड ल नुकसान पहुंचाय के दावा गलत हे। एखर अलावा पाकिस्तान डहार फैलाय जात ए खबर घलो झूठ हे कि भारत ह पाकिस्तान म मस्जिद मन ल नुकसान पहुंचाय हे।
मुख्यमंत्री-हाइड्रोजन फ्यूल ट्रक
मुख्यमंत्री विष्णुदेव साय ह आज रायपुर म देस के पहिली हाइड्रोजन फ्यूल लॉजिस्टिक ट्रक ल हरी झंडी देखा के रवाना करीन। ए मउका म मुख्यमंत्री ह किहीन कि ए पहल ह छत्तीसगढ़ अउ देस ल हरित ऊर्जा डहार अग्रसर करइया क्रांतिकारी कदम होही। ओमन किहीन कि प्रधानमंत्री नरेंद्र मोदी के ग्रीन एनर्जी ल बढ़ावा दे उपर बिसेस फोकस हे अउ ओमन बछर दू हजार सत्तर तक देस ल सून्य कार्बन उत्सर्जन वाला देस बनाय के जउन संकल्प लेहे, ओला पाय के दिसा म ए पहल महत्वपूर्ण हे। श्री साय ह किहीन कि पर्यावरण संरक्षण अउ औद्योगिक विकास के बीच संतुलन साधे म घलो एक कदम कारगर सिध्द होही।
ए मउका म अडानी इंटरप्राइजेस के नेचुरल रिसोर्सेस के सीईओ डॉक्टर विनय प्रकाश ह ए पहल ल खनन क्षेत्र म विकास बर मील के पत्थर बतइन।
राष्ट्रीय लोक अदालत
राज्य विधिक सेवा प्राधिकरण डहार ले आज प्रदेस के जम्मों जिला अउ व्यवहार न्यायालय म राष्ट्रीय लोक अदालत के आयोजन करे गीस। लोक अदालत के माध्यम ले मोटर दुर्घटना दावा प्रकरण, बैंक रिकवरी, सिविल, विद्युत संबंधी मामला या पारिवारिक विवाद के मामला के आपसी राजीनामा ले निराकरण करे गीस। एखर अलावा राजस्व, बैंक, दूरसंचार, नगर निगम, नगर पालिका अउ नगर पंचायत मन म वसूली संबंधी लंबित प्रकरण के घलो निराकरण होइस।
सुशासन-तिहार
सुशासन तिहार के तीसरइया चरण के तहत मुख्यमंत्री विष्णुदेव साय ह काली महासमुंद जिला मुख्यालय म गरियाबंद, महासमुंद अउ बलौदाबाजार-भाटापारा जिला के कलेक्टर, पुलिस अधीक्षक अउ डीएफओ समेत दूसर अधिकारी मनके बइठका लीन। ए दउरान श्री साय ह जिला म सुशासन तिहार के अंतर्गत मिले आवेदन अउ उंखर निराकरण के स्थिति के जानकारी लेके संगेसंग शासन के फ्लैगशिप योजना मनके क्रियान्वयन के समीक्षा घलो करीन। मुख्यमंत्री ह कलेक्टर अउ पुलिस अधीक्षक मन ल संबंधित जिला मनके दउरा कर आम लोगन मनके समस्या के निराकरण करे के निरदेस दीन।
एखर पहिली मुख्यमंत्री ह गरियाबंद जिला के सुदूर वनांचल मड़ेली म आयोजित चौपाल म पाछू पैंतालिस बछर ले अधूरा पड़े पीपरछेड़ी सिंचाई परियोजना ल पूरा करे के घोसना करीन। श्री साय ह किहीन कि ए ह सिरिफ एक परियोजना नोहय बल्कि किसान मनके संघर्ष प्रतीक्षा अउ उम्मीद के जीत हरय अउ इही सुशासन तिहार के असली अर्थ आय।
हाईकोर्ट-वेकेशन शुड्यूल परिवर्तन
छत्तीसगढ़ उच्च न्यायालय ह समर वेकेशन शेड्यूल म बदलाव कर देहे। उच्च न्यायालय के रजिस्ट्रार जनरल मनीष कुमार ठाकुर डहार ले जारी आदेस म केहे गेहे कि अब हाईकोर्ट म अवइया दू जून ले अट्ठाईस जून के बीच गर्मी के छुट्टी रइही। पहिली गर्मी के छुट्टी बारह मई ले छै जून तक निर्धारित राहय।
हाईकोर्ट बार एसोसिएसन ह शेड्यूल म बदलाव के विरोध करे हे। बार एसोसिएसन के अध्यक्ष उमाकांत चंदेल अउ सचिव वरूणेन्द्र मिश्रा ह मुख्य न्यायाधीश रमेश सिन्हा ल पत्र लिखके पूर्व म जारी आदेस के अनुरूप समर वेकेशन रखे के मांग करे हे।
औषधि दर्पण ऐपराज्य सरकार ह सार्वजनिक स्वास्थ्य सेवा ल पारदर्शी, उत्तरदायी अउ तकनीकी रूप ले दक्ष बनाय के दिसा म पहल करत हुए ‘‘औषधि दर्पण‘‘ नामक डिजिटल प्लेटफार्म के सुभारंभ करे हे। छत्तीसगढ़ मेडिकल सर्विसेस कार्पोरेसन लिमिटेड- सी.जी.एम.एस.सी.एल. डहार ले विकसित ए ऐप दवा आपूर्ति श्रृंखला ल सुव्यवस्थित करे, निगरानी ल मजबूत करे अउ वितरण व्यवस्था ल सही समय म संचालित करे बर तैयार करे गेहे।
माओवादी-गिरफ्तार
नारायणपुर जिला म सुरक्षाबल ह आज दू झन माओवादी मन ल गिरफ्तार करे हे। उंखर करा ले दू नग डेटोनेटर, एक कुकर अउ बिजली वायर समेत दूसर माओवादी सामग्री बरामद करे गेहे।
मिले जानकारी के अनुसार ओरछा थाना ले डिस्ट्रिक्ट रिजर्व गार्ड-डीआरजी, भारत-तिब्बत सीमा पुलिस बल-आईटीबीपी अउ जिला पुलिस बल के संयुक्त टीम तलासी अभियान बर निकले रिहीन। इही दउरान ग्राम कोडोली, छोटेपलनार अउ रेंगाबेड़ा के जंगल म घेराबंदी कर दूनों माओवादी मन ल गिरफ्तार करे गीस। ए माओवादी मनके खिलाफ बिस्फोट, फायरिंग अउ आईईडी प्लांट करे समेत कई ठन दूसर वारदात म सामिल रेहे के आरोप हे।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘गौरेला-पेण्ड्रा-मरवाही‘‘ जिला के गतिविधि के उपर जानकारी दे जाही।
पैरा-आर्म रेसलिंग चैंपियनशिप
भारत के नंबर-वन पैरा एथलीट श्रीमंत झा ह नई दिल्ली म आयोजित पैरा-आर्म रेसलिंग चैंपियनशिप के पचासी किलोग्राम के वर्ग म कांस्य पदक हासिल करे हे। श्रीमंत झा ह अपन मैडल ल भारत के सहीद जवान मन ल समर्पित करे हे। अपन जीत ले उत्साहित श्रीमंत झा ह किहीन कि ए जीत ह मोर बर बिसेस हे। अवइया अंतर्राष्ट्रीय प्रतियोगिता के तैयारी जोर-सोर ले जारी हे।
बतादन कि श्रीमंत झा अब तक पचपन अंतर्राष्ट्रीय पदक हासिल कर चुके हे। ओमन दुनिया के तीसरइया अउ एशिया के नंबर एक पैरा-आर्म रेसलर आय।
साइबर सुरक्षा-कार्यशाला
राज्य म सुरक्षित डिजिटल व्यवहार ल सरकारी कार्यप्रणाली म प्रोत्साहित करे बर काली नवा रायपुर म एक दिवसीय कार्यसाला के आयोजन करे गीस। साइबर सुरक्षा बिसय उपर आयोजित ए कार्यसाला ल साइबर सिक्युरिटी सेंटर ऑफ एक्सीलेंस हैदराबाद के मुख्य कार्यपालन अधिकारी डॉक्टर श्रीराम बिरूदावोलू ह संबोधित करीन। ओमन किहीन कि सरकारी कार्यप्रणाली म सुशासन स्थापित करे बर साइबर सुरक्षा उपर ध्यान देना जरूरी हे, नही त एहा सुनामी जइसे संकट पैदा कर सकत हे। एखरे सेति जरूरी हे कि राज्य सरकार साइबर सुरक्षा बर दिसा-निरदेस के पालन सुनिश्चित करय।
अउ अब मौसम के हाल…
मौसम विभाग ह अवइया चौबीस घंटा के दउरान प्रदेस म कुछेक जघा म हल्का बरसा होय अउ एक-दू जघा म अंधड़ चले के संग ही गाज गिरे के चेतावनी देहे। मौसम विभाग के मुताबिक कर्नाटक ले बंगाल के खाड़ी तक एक द्रोणिका बने हुए हे। एखर असर ले प्रदेस म बदली बरसा के स्थिति बनत हे।