रक्षामंत्री राजनाथ सिंह ह आज नई दिल्ली म पश्चिमी सीमा उपर सुरक्षा स्थिति अउ भारतीय सशस्त्र बल के परिचालन तियारी मनके समीक्षा बर ए उच्च स्तरीय बइठका के अध्यक्षता करीन। बइठका म चीफ ऑफ डिफेंस स्टाफ जनरल अनिल चौहान, सेना प्रमुख जनरल उपेन्द्र द्विवेदी, एयर चीफ मार्सल अमर प्रीत सिंह अउ नौसेना प्रमुख एडमिरल दिनेश के. त्रिपाठी सामिल होइन। बइठका म रक्षा सचिव आर.के. सिंह घलो मौजूद रिहीन।
केंद्रीय गृह मंत्री अमित शाह घलो सीमा सुरक्षा बल, केंद्रीय औद्योगिक सुरक्षा बल अउ नागरिक उड्डयन सुरक्षा ब्यूरो के महानिदेसक मन संग बइठका करीन।
उहें, केंद्र सरकार ह जम्मों मीडिया चैनल, डिजीटल प्लेटफार्म अउ नागरिक मनले रक्षा अभियान अउ सुरक्षा बल के अवई-जवई लाइव कवरेज या वास्तविक समय के रिपोर्टिंग नइ करे बर किहीन।
ऑपरेशन सिंदूर-02
इही बीच, भारतीय सशस्त्र बल ह काली रतिहा पाकिस्तान कोति ले उत्तरी अउ पश्चिमी सहर मन ल निसाना बनाय बर ड्रोन अउ मिसाइल मन ले करे गे जम्मों हमला ल विफल कर देहे। रक्षा मंत्रालय के अनुसार पाकिस्तान ह जम्मू पठानकोट अउ उधमपुर संघरा अंतर्राष्ट्रीय सीमा करा कई जघा अउ सैन्य ठिकाना मन ल नुकसान पहुंचाय के परयास करे रिहीस। हालांकि भारतीय सशस्त्र बल ह हरेक पाकिस्तानी हमला ल नकाम कर दीस। ए दउरान जनहानि के कोनो सूचना नइ मिले हे।
पाकिस्तान ले सतवारी, सांबा, जम्मू अउ कश्मीर के आरएस पुरा अउ अरनिया कोति आठ मिसाइल मन ल भेजे गीस। भारतीय हवाई रक्षा इकाई ह ए जम्मों मिसाइल ल चिन्हित अउ नष्ट कर दीस। पाकिस्तान कोति ले ए तरह के हमला आतंकवादी संगठन हमास डहार ले इजराइल उपर करे गे हमला जइसन ही हे।
इही बीच, सीमा सुरक्षा बल ह जम्मू अउ कश्मीर के सांबा जिला म अंतर्राष्ट्रीय सीमा म घुसपैठ के बड़का परयास ल विफल करत कम से कम सात आतंकवादी मन ल ढेर कर देहे। सूत्र ह बतइस कि आतंकवादी मनके एक बड़का समूह घुसपैठ के कोसिस म रिहीस, जेला भारतीय सुरक्षा कर्मी मन असफल कर दीन। ए दउरान ढांढर चौकी म पाकिस्तान कोति ले गोलीबारी करे जात रिहीस। सीमा सुरक्षा बल के सजग सैनिक मन पाकिस्तान के हर प्रयास ल विफल कर दीन।
बातों-बातों में
कांग्रेस-तिरंगा यात्रा
छत्तीसगढ़ कांग्रेस ह आज भारतीय सेना के सम्मान म तिरंगा यात्रा निकालीस। राजधानी रईपुर म प्रदेस कांग्रेस कमेटी के अध्यक्ष दीपक बैज के अगुवई म ए यात्रा कालीबाड़ी चौक ले जयस्तंभ चौक निकाले गीस। ए मउका म श्री बैज ह बतइन कि तिरंगा यात्रा के उद्देस्य देस के सैनिक मनके वीरता अउ सौर्य ल नमन करना हे। ए तिरंगा यात्रा म नेता प्रतिपक्ष चरणदास महंत समेत कई प्रमुख नेता अउ कार्यकर्ता सामिल होइन। प्रदेस के दूसर जिला म घलो कांग्रेस कार्यकर्ता मन डहार ले तिरंगा यात्रा निकाले गीस।
‘विकसित कृषि संकल्प अभियान‘
केन्द्रीय कृषि मंत्री शिवराज सिंह चौहान ह किहीन हे कि किसान मन म आधुनिक तकनीक अउ नवा बीजा के कीसम के बारे म जागरूकता फैलाय बर उनतीस मई ले बारह जून तक देसव्यापी अभियान विकसित कृषि संकल्प अभियान चलाय जाही। नई दिल्ली म राष्ट्रीय कृषि सम्मेलन-खरीफ अभियान के दउरान श्री चौहान ह बतइन कि ए अभियान के अंतर्गत देसभर के सात सौ जिला मनके करीबन डेढ़ करोड़ किसान तक पहुंचे जाही। ए दउरान वैज्ञानिक मनके चार-चार सदस्यीय टीम गांव-गांव पहुंच के किसान मन ल उन्नत तकनीक, नवा कीसम अउ आधुनिक कृषि पध्दति मनके जानकारी दिही।
पंचायत बैंकिंग-सुविधा
मुख्यमंत्री विष्णुदेव साय ह किहीन कि प्रदेस के जम्मों ग्यारा हजार ले जादा पंचायत मन म एक साल के अंदर बैंकिंग सुविधा उपलब्ध कराय जाही। ओमन किहीन कि भ्रष्टाचार ल रोके बर भूमि रजिस्ट्री के क्षेत्र म क्रांतिकारी बदलाव करे गेहे। श्री साय काली सुशासन तिहार के तहत सूरजपुर जिला के ग्राम पटना म राखे गे समाधान सिविर ल संबोधित करत रिहीन। श्री साय ह किहीन कि अब भूमि के ऑनलाइन रजिस्ट्री के संघरा नामांतरण घलो उही दिन होवत हे। ओमन किहीन कि पंचायत म बैंकिंग सुविधा देवाय के पहिली चरण म राज्य म चौबीस अप्रैल राष्ट्रीय पंचायत दिवस के दिन ले चौदह सौ साठ ग्राम पंचायत मन म अटल डिजिटल सेवा केंद्र सुरू करे गेहे, जेखर माध्यम ले ग्रामीण मन ल रासि के लेनदेन अउ आने-आने तरह के प्रमाण पत्र देवाय जात हे। श्री साय ह किहीन कि दूसरइया चरण म छै माह के भीतर पांच हजार ग्राम पंचायत मन म ए सुविधा देवाय जाही। ओमन किहीन कि आवासहीन लोगन मन ल प्रधानमंत्री आवास दिलाय बर आवास-प्लस-प्लस बर सर्वे करे जात हे। जम्मों आवास हीन सर्वे करा लेवय, ताकि ओमन ल आवास मिल सकय। ए मउका म मुख्यमंत्री ह कुमेलीघाट ल पर्यटन केंद्र के रूप म विकसित करे बर करीबन बयासी लाख रूपिया दे जाय के घोसना करीन।
मुख्यमंत्री-सुशासन तिहार
मुख्यमंत्री विष्णुदेव साय सुशासन तिहार के अंतर्गत आज बलौदाबाजार-भाटापारा जिला के ग्राम बल्दाकछार म बरगद के रूख के नीचे चौपाल लगाके गांव वाला मन ले गोठबात करीन अउ जमीनी स्तर म योजना मनके क्रियान्वयन के फीडबैक लीन। ए दउरान श्री साय ह अटल डिजीटल सेवा केंद्र के अवलोकन करीन अउ केंद्र संचालक ले सेवा केंद्र म मौजूद सेवा मनके जानकारी लीन।
उहें, मुख्यमंत्री विष्णुदेव साय ह काली सूरजपुर जिला मुख्यालय म सूरजपुर, कोरिया अउ मनेन्द्रगढ़-चिरिमरी-भरतपुर जिला के अधिकारी मनके संयुक्त समीक्षा बइठका लीन। बइठका म मुख्यमंत्री ह सुशासन तिहार के दउरान मिले सिकायत मनके प्राथमिकता के आधार म निराकरण करे के निरदेस दीन। ओमन किहीन कि प्रधानमंत्री आवास योजना के प्रगति उपर बिसेस रूप ले धियान दे जाय।
माओवादी-आत्मसमर्पण
कोंडागांव जिला म आज एक इनामी माओवादी दंपत्ति ह पुलिस के आगू आत्मसमर्पण कर देहे। एमन उपर सोलह लाख रूपिया के इनाम घोसित रिहीस। ए दंपत्ति बछर दू हजार नौ म राजनांदगांव के मदनवाड़ा म होय माओवादी घटना म सामिल रिहीन। ए घटना म उनतीस झिन जवान सहीद होय रिहीन। एखर अलावा ए माओवादी दंपत्ति कई ठिन दूसर गंभीर घटना म सामिल रिहीन। जिला के पुलिस अधीक्षक वाय. अक्षय कुमार ह बतइन कि शासन के माओवाद उन्मूलन नीति ले प्रभावित होके ए दंपत्ति ह नक्सल संगठन ल छोड़ के समाज के मुख्यधारा म सामिल होय के निर्णय लीन। दूनों आत्मसमर्पित माओवादी मन ल प्रोत्साहन रासि के रूप म पचास-पचास हजार रूपिया के रासि दे गेहे।
उच्च न्यायालय-निर्वाचन चुनौती
पूर्व मुख्यमंत्री अउ पाटन विधायक भूपेश बघेल के निर्वाचन ल चुनौती देने वाला याचिका उपर छत्तीसगढ़ उच्च न्यायालय म सुनवाई जारी रइही। कोर्ट ह याचिका के तकनीकी बिंदु ल लेके एला खारिज करे के मांग ल खारिज कर देहे। न्यायाधीश न्यायमूर्ति रवीन्द्र कुमार अग्रवाल के अदालत ह सुनवाई के दउरान किहीन कि याचिका म पर्याप्त सामग्री मौजूद हे अउ ए एला ए स्तर म खारिज नइ करे जा सकय। ए मामला के अगला सुनवाई अब अट्ठारा जून के होही।
बतादन कि पाटन विधानसभा चुनाव म आदर्स आचार संहिता अउ चुनाव आयोग के निरदेस के अवहेलना करे के आरोप लगावत दुरूग सांसद विजय बघेल ह हाईकोर्ट म चुनाव याचिका लगाय हे। याचिका म भूपेश बघेल के निर्वाचन ल रद्द करे के मांग करे गेहे।