ऑपरेशन सिंदूर उपर आज बुलाय गे सर्वदलीय बइठका म जम्मांं राजनीतिक दल मन ह आतंकवाद के खिलाफ भारतीय सेना के जवाबी कार्रवाई के प्रसंसा करीन। रक्षामंत्री राजनाथ सिंह के अगुवई म होय ए बइठका म जम्मों दल के कतकोन नेता सामिल होइन। रक्षामंत्री ह पाकिस्तान अउ पाकिस्तान अधिकृत जम्मू कश्मीर म नौ आतंकी ठिकाना उपर भारत के हमला के बारे म बतईन।
कांग्रेस नेता मल्लिकार्जुन खरगे ह कहिन कि ओमन सरकार ल अपन पूरा समर्थन देहे। उहें, ए.आई.एम.आई.एम. नेता औवेसी ह घलो ऑपरेशन सिंदूर म सरकार अउ सशस्त्र सेना के प्रसंसा करीन।
बइठका म केन्द्रीय गृहमंत्री अमित शाह, विदेश मंत्री डॉक्टर एस. जयशंकर, भाजपा अध्यक्ष जे.पी. नड्डा, लोकसभा म विपक्ष के नेता राहुल गांधी के संगेसंग कतकोन नेता सामिल होइन।
राजनाथ सिंह-ऑपरेशन सिंदूर
भारतीय सशस्त्र बल ह ऑपरेशन सिंदूर म उच्च गुणवत्ता वाले मसीन के प्रयोग करे हे, जेखरे सेती पाकिस्तान अउ पाकिस्तानी कब्जा वाले कश्मीर म बड़ संख्या म आतंकवादी मारे गीस। रक्षामंत्री राजनाथ सिंह किहीन कि सशस्त्र बल ह जइसे पाकिस्तान अउ पाकिस्तानी कब्जा वाले कश्मीर म सिविर मन ल नष्ट करे हे, ओखर मन बर देस ह गर्व करत हे। आज नई दिल्ली म राष्ट्रीय गुणवत्ता सम्मेलन ल संबोधित करत ओमन देस के सशस्त्र बल ल साहस अउ वीरता के संग कार्रवाई करे बर बधाई दीन। रक्षामंत्री ह किहीन कि ए कार्रवाई कोनो भी निर्दोष मनखे ल नकसान पहुंचाय बिना करे गेहे।
रक्षामंत्री ह देस के लोगन मन ल किहीन कि भारत के संप्रभुता के रक्षा करे म सरकार बर कोनो सीमा ह बाधा नइ बनीस। ओमन किहीन कि भारत ह आगू घलो जिम्मेदारी ले कार्रवाई करे बर तियार हे। रक्षामंत्री ह किहीन कि भारत के विस्तारित रक्षा औद्योगिक क्षेत्र ह भारत ल बड़का सक्ति देवात हे।
सुशासन तिहार-मुख्यमंत्री
उहें, मुख्यमंत्री विष्णुदेव साय ह आज कोरिया जिला के गांव छिंदिया गीन। ए दउरान ओमन गांव म चौपाल लगाके गांव के लोगन मन ले गोठबात करीन। संगेसंग प्रधानमंत्री आवास योजना, महतारी वंदन योजना, मुख्यमंत्री तीर्थ यात्रा दर्शन योजना अउ धान बोनस के संगेसंग कतकोन जनकल्याणकारी योजना के बारे म गांव के लोगन मन ले जानबा लीन। ए मउका म गांव के लोगन मन ह घलो मुख्यमंत्री ल अपन समस्या बतईन। मुख्यमंत्री ह छिंदिया म उप-स्वास्थ्य केन्द्र, सीसी रोड, सामुदायिक भवन अउ पुलिया बनाय के मंजूरी दीन।
हाई सिक्योरिटी नंबर प्लेट
परिवहन विभाग के सचिव अउ आयुक्त एस. प्रकाश ह परिवहन अधिकारी अउ अनुबंधित कंपनी मनके प्रतिनिधि मन संग वर्चुअल बइठका लेके गाड़ी मन म हाई सिक्योरिटी नंबर प्लेट लगाय के काम म तेजी लाय के निरदेस देहे। ओमन बतईन कि हाई सिक्योरिटी नंबर प्लेट बर गाड़ी के मालिक मन परिवहन सुविधा केन्द्र के माध्यम ले घलो अरजी कर सकथे। परिवहन आयुक्त ह हाई सिक्योरिटी नंबर प्लेट म कोनो प्रकार के समस्या या असुविधा होय उपर अनुबंधित कंपनी के कंट्रोल रूम के नंबर ले संपर्क करे बर केहे हे।
व्यापमं-भर्ती परीक्षा कैलेंडर
छत्तीसगढ़ व्यावसायिक परीक्षा मंडल ह अवइया साल जनवरी ले मार्च महीना के बीच होवइया भर्ती परीक्षा के कैलेंडर जारी कर देहे। जारी कैलेंडर म स्वास्थ्य, सिक्षा, पर्यावरण के संगेसंग आठ विभाग मन म भर्ती परीक्षा के तारीख घोसित कर दे गेहे। अरजी प्रक्रिया के बारे म पूरा अधिसूचना व्यावसायिक परीक्षा मंडल के वेबसाइट म जारी करे जाही।
जनजातीय संग्रहालय
नवा रायपुर अटल नगर के आदिवासी अनुसंधान अउ प्रशिक्षण संस्थान परिसर म जनजातीय संग्रहालय बन गेहे। करीबन नौ करोड़ रूपिया के लागत ले बने ए संग्रहालय म जनजातीय संस्कृति के झलक देखे बर मिलही। मुख्यमंत्री विष्णुदेव साय ह चौदह मई के ए संग्रहालय के लोकार्पण करही। आदिम जाति विकास विभाग के प्रमुख सचिव सोनमणि बोरा ह बतईन कि संग्रहालय म डिजिटल अउ एआई तकनीक के माध्यम ले जनजातीय संस्कृति के प्रदर्शन करे जाही। संग्रहालय म कुल चौदह गैलरी हवय, जेमा जनजातीय जीवनशैली के जम्मों पहलु मनके सुघ्घर ढंग ले प्रदर्शन करे गेहे।
खेलो इंडिया यूथ गेम्स
बिहार के बोधगया म होय सातवां खेलो इंडिया यूथ गेम्स म छत्तीसगढ़ के खिलाड़ी मन ह अब तक ग्यारह पदक जीते हे। जेमा एक रजत अउ दस कांस्य पदक सामिल हे। व्यक्तिगत चैंपियनशिप म राकेश कुमार वढ़दा ह पोल मलखंब म एक रजत अउ दू कांस्य पदक जीते हे। त उहें, मोनू नेताम ह पोल मलखंब म ही संयुक्त रूप ले कांस्य पदक जीते हे। उहें, दुर्गेश्वरी कुमेटी ल घलो पोल मलखंब म कांस्य पदक मिले हे।
कृषि विवि-निबंध लेखन प्रतियोगिता
रईपुर के इंदिरा गांधी कृषि विश्वविद्यालय डहार ले आज ‘‘राष्ट्रीय शिक्षा नीति दो हजार बीस – भारत की शिक्षा प्रणाली के लिए एक परिवर्तनकारी दृष्टिकोट‘‘ बिसय उपर निबंध लेखन प्रतियोगिता के आयोजन करे गीस। ए प्रतियोगिता म कृषि महाविद्यालय, स्वामी विवेकानंद कृषि अभियांत्रिकी अउ प्रौद्योगिकी महाविद्यालय के संगेसंग खाद्य प्रौद्योगिकी महाविद्यालय के छात्र मन सामिल होइन। ए प्रतियोगिता के उद्देश्य छात्र मन म आलोचनात्मक चिंतन अउ राष्ट्रीय शिक्षा नीति उपर विचारशीलता ल आगू बढ़ाना हे। प्रतियोगिता के विजेता प्रतिभागी मन ल प्रशस्ति पत्र देके सम्मानित करे गीस।
कांग्रेस-तिरंगा यात्रा
छत्तीसगढ़ कांग्रेस ह काली नौ मई के सैनिक मनके वीरता अउ सौर्य के सम्मान म तिरंगा यात्रा निकालही। पार्टी के प्रदेस अध्यक्ष दीपक बैज ह बतईन कि रायपुर के राजीव भवन ले राज्य स्तरीय तिरंगा यात्रा सुरू होही। ओमन किहीन कि ए तिरंगा यात्रा हमर देश के सैनिक मनके वीरता अउ सौर्य ल समर्पित होही। रायपुर के संगेसंग प्रदेस के आने-आने जिला मन म घलो तिरंगा यात्रा निकाली जाही।
माओवादी विस्फोट-जवान शहीद
छत्तीसगढ़ के बीजापुर जिला म स्थित करेगुट्टा पहाड़ी म जारी ऑपरेशन के बीच तेलंगाना म माओवादी मन डहार ले करे गे आईईडी विस्फोट म पांच जवान शहीद होगे हे। उहें, एक झिन आने जवान गंभीर रूप ले घायल होगे हे। जानबा के मुताबिक तेलंगाना पुलिस के जवान मन सर्चिंग अभियान म निकले रिहीन। इही दउरान माओवादी मन ह वाजेड के तीर आईईडी विस्फोट कर दीन, जेखर बाद जवान मन ह मोर्चा संभालत जवाबी कार्रवाई करीन।
अउ अब मौसम के हाल…
अवइया चौबीस घंटा के दउरान प्रदेस के कतकोन जघा म हल्का बरसा होय या फेर गरज-चमक के संग बूंदाबादी पड़े के संभावना हे। मौसम विभाग ह प्रदेस के एक-दू जघा म हवा गरेर चले या कोनो-कोनो जघा म गाज गिरे के चेतावनी देहे। एखरे संग प्रदेस के अधिकतम तापमान म बढ़ोतरी के दउर जारी रइही।
अउ अब थोरकुन समाचार सार म –
– खेल मंत्री टंकराम वर्मा ह काली सारंगढ़ म जिला स्तरीय ग्रीष्मकालीन खेल प्रशिक्षण सिविर के सुभारंभ करीन। एक महीना तक चलइया ए सिविर म कराटे, क्रिकेट, फुटबॉल, बैडमिंटन, वॉलीबॉल अउ टेबल टेनिस जइसन खेल म खिलाड़ी मन ल प्रसिक्षण दे जाही।
– छत्तीसगढ़ व्यावसायिक परीक्षा मंडल डहार ले इंजीनियरिंग के सीट मन म प्रवेस बर आज प्री-इंजीनियरिंग टेस्ट-पीईटी परीक्षा दू पाली म होइस।
– छत्तीसगढ़ व्यावसायिक परीक्षा मंडल डहार ले नगर सैनिक के भर्ती बर अवइया बाईस जून के परीक्षा होही। एखर बर अभ्यर्थी मन तीस मई तक अरजी कर सकथे।
– रायपुर के महंत घासीदास स्मारक संग्रहालय परिसर म पन्द्रह ले इकतीस मई तक पारंपरिक शिल्प अउ विविध कला प्रशिक्षण सिविर-आकार के आयोजन करे जाही। सिविर म कैनवास पेंटिंग, जूट शिल्प, मेहंदी, गोदना, पारंपरिक नृत्य-गीत अउ छत्तीसगढ़ी व्यंजन के संगेसंग कतकोन विधा म प्रशक्षिण दे जाही।