ऑपरेशन सिंदूर-01
भारतीय सशस्त्रत बल कोति ले पाछू रतिहा चलाय गे ऑपरेसन सिंदूर पच्चीस मिनट के रिहीस अउ ए जवाबी कार्रवाई म पाकिस्तान अउ पाकिस्तान अधिकृत जम्मू कश्मीर म नौ ठिन आतंकी ठिकाना ल नष्ट कर दे गीस। नई दिल्ली म भारतीय सेना, भारतीय वायु सेना अउ विदेस मंत्रालय के संयुक्त प्रेसवार्ता म भारतीय सेना के कर्नल सोफिया कुरैशी अउ भारतीय वायु सेना के वींग कमांडर व्योमिका सिंह ह बतइन कि पहलगाम आतंकी हमला के पीड़ित मन ल न्याय देवाय बर ऑपरेसन सिंदूर सुरू करे गे रिहीस। ओमन बतइन कि पाछू रतिहा एक बजके पांच मिनट ले एक बजके तीस मिनट तक चलाय गीस। प्रेसवार्ता म सैन्य अउ नागरिक प्रतिष्ठान ल निसाना बनाय बिना सफलता पूर्वक चलाय गे ऑपरेसन सिंदूर के विस्तार ले जानकारी दे गीस। कर्नल सोफिया कुरैशी अउ वींग कमांडर व्योमिका सिंह ह किहीन कि भारतीय सशस्त्र बल भविष्य म पाकिस्तान के कोनो भी कीसम के कार्रवाई के मुहतोड़ जुवाब दे खातिर तियार हे। कर्नल सोफिया कुरैशी ह ऑपरेसन सिंदूर के विवरण देत पाकिस्तान अधिकृत जम्मू कश्मीर म स्थित आतंकी ठिकाना के नाम बताय हे, जिंहा भारतीय सेना ह कार्रवाई करे हे।
ऑपरेशन सिंदूर-02
प्रधानमंत्री नरेंद्र मोदी ह राष्ट्रपति द्रौपदी मुर्मू अउ कैबिनेट ल ऑपरेसन के संबंध म जानकारी दीन। श्री मोदी रातभर ऑपरेसन सिंदूर के जानकारी लेत रिहीन। प्रधानमंत्री ह किहीन कि भारतीय सेना ह सफलता पूर्वक ए कार्रवाई ल अंजाम दीन हे। प्रधानमंत्री ह ऑपरेसन सिंदूर बर सशस्त्र बल के प्रसंसा करीन। ऑपरेसन सिंदूर के सेति कतकोन घरेलू उड़ान रद्द कर दे गेहे। एयर इंडिया ह जानकारी दे हे कि जम्मू श्रीनगर, ले जोधपुर, अमृतसर, गुज, जामनगर, चंडीगढ़ अउ राजकोट ले अवइया-जवइया उड़ान ए महिना के दस तारीख तक बर रद्द कर दे गेहे। इंडिगो ह घलो आज श्रीनगर, जम्मू, अमृतसर ले चंडीगढ़ धर्मसाला ले अवइया-जवइया उड़ान रद्द करे हे।
मुख्यमंत्री विष्णुदेव साय ह ऑपरेसन सिंदूर के सफलता बर सेना के जवान मन ल बधई अउ सुभकामना दीन हे। ओमन किहीन कि पहलगाम म होय आतंकी हमला के हमर सेना ह जुवाब दे देहे।सुरक्षा-मॉकड्रिल
इही बीच, सुरक्षा तियारी के जांच बर आज प्रदेस के दुरूग समेत देसभर के दू सौ चौवालिस जिला म नागरिक सुरक्षा मॉकड्रिल राखे गीस। ए सबो जिला म हवई हमला के चेतावनी वाले सायरन बजाय गीस। संगेसंग आज संझा सहर भर म ब्लैक ऑउट करे जाही। केंद्रीय गृह मंत्रालय ह भिलई स्टील प्लांट जइसन राष्ट्रीय महत्ता के औद्योगिक संस्थान ल देखत छत्तीसगढ़ ले दुरूग ल मॉकड्रिल बर चुने हे। भिलाई इस्पात संयंत्र समेत दुरूग के आने-आने क्षेत्र म सायरन लगाय गेहे। संगेसंग लोगन के मदद खातिर एनडीआरएफ, एसडीआरएफ,सीआईएसएफ, होमगार्ड अउ जिला पुलिस के टीम तैनात करे गेहे। अग्निसमन सेवा, नागरिक सुरक्षा अउ होमगार्ड के महानिदेसक विवेक श्रीवास्तव ह किहीन कि लोगन ल एखर ले डर्राना नइ चाही, काबर कि ए ह अभ्यास हरय।
माओवादी-मुठभेड़
बीजापुर जिला के कर्रेगुट्टा पहाड़ी म सुरक्षाबल अउ माओवादी मनके बीच होय मुठभेड़ म बाईस झिन माओवादी मनके मारे जाय के खबर हे। एमा ले अट्ठारा झिन माओवादी मनके शव बरामद कर ले गेहे। कर्रेगुट्टा के पहाड़ी ल डीआरजी कोबरा बटालियन, सीआरपीएफ अउ एसटीएफ के जवान घेरे हे। ए आपरेसन म दिल्ली ले केंद्रीय रिजर्व पुलिस बल सीआरपीएफ के डीजी ज्ञानेन्द्र प्रताप सिंह सरलग नजर राखत हे। एखर संगेसंग छत्तीसगढ़ के एडीजी नक्सल आपरेसन विवेकानंद सिन्हा, सीआरपीएफ आईजी राकेश अग्रवाल अउ बस्तर आईजी पी.सुंदरराज मॉनिटरिंग करत हे।
खबर के मुताबिक बीजापुर जिला के कर्रेगुट्टा पहाड़ी म सुरक्षाबल के ए ऑपरेसन दू हफ्ता ले चलत हे। ऑपरेसन के दउरान पहिली चार महिला माओवादी के शव बरामद करे गे रिहीस।
मुख्यमंत्री विष्णुदेव साय ह किहीन हे कि बीजापुर जिला के कर्रेगुट्टा पहाड़ी म चलत माओवाद विरोधी अभियान म सुरक्षाबल ह बड़े सफलता हासिल करे हे। श्री साय ह किहीन कि प्रधानमंत्री नरेंद्र मोदी अउ केंद्रीय गृहमंत्री अमित शाह ह संकलप लेहे कि इकतीस मार्च तक देस ल माओवाद ले मुक्त कराना हे अउ हमन ए लक्ष्य कोति तेजी ले आगू बढ़त हन।
दसवीं/बारहवीं-परिणाम
छत्तीसगढ़ माध्यमिक शिक्षा मंडल ह आज दसवीं अउ बारहवीं बोर्ड परीक्षा के नतीजा जारी कर देहे। दसवीं के परीक्षा म करीबन छिहत्तर प्रतिसत विद्यार्थी पास होय हे। उहे, बारहवीं परीक्षा म करीबन बयासी प्रतिसत विद्यार्थी सफल होय हे। मुख्यमंत्री विष्णुदेव साय छत्तीसगढ़ माध्यमिक शिक्षा मंडल के अध्यक्ष रेणुजी पिल्ले अउ सचिव पुष्पा साहू ह आज परीक्षा परिणाम जारी करीन। ओमन बतइन कि एसो दूनों परीक्षा म नोनी मन ह बाजी मारे हे। दसवीं के प्रावीण्य सूची म कांकेर जिला के शासकीय उत्तर माध्यमिक विद्यालय गोंडाहूर के छात्रा ईशिका बाला अउ स्वामी आत्मानंद शासकीय उत्कृष्ट अंग्रेजी माध्यम स्कूल जशपुर के नमन कुमार खुटिया ह निन्यानवे दसमलव एक सात प्रतिसत अंक पाके अव्वल जघा बनाय हे। बलौदाबाजार जिला के सिमगा के स्वामी आत्मानंद शासकीय उत्कृष्ट अंग्रेजी माध्यम स्कूल के लिव्यांश देवांगन ह निन्यानवे प्रतिसत लाके दूसर अउ बालोद जिला के डौंडी के रिया केंवट, रायगढ़ जिला के लैलूंगा के हेमलता पटेल अउ जशपुर म इही स्कूल के टिपेश प्रसाद यादव ह तीसर स्थान पाय हे। दसवीं के टापटेन सूची म पच्चीस झिन विद्यार्थी मन अपन जघा बनाय हे।
उहें, बारहवीं के परीक्षा म कांकरे जिला के शासकीय स्कूल कोंडागांव के अखिल सेन अंठानवे दसमलव दू सून्य प्रतिसत लाके अव्वल स्थान म हवय। मनेन्द्रगढ़ के श्रुति मंगतानी ह संतानवे दसमलव चार सून्य प्रतिसत के संग दूसर स्थान अउ बेमेतरा जिला के बेरला के वैशाली साहू संतानवे दसमलव दू सून्य प्रतिसत नंबर लाके तीसर स्थान हासिल करे हे। बारहवीं के टापटेन सूची म उन्नीस झिन विद्यार्थी सामिल हे।
राज्यपाल रमेन डेका अउ मुख्यमंत्री विष्णुदेव साय ह बोर्ड परीक्षा म पास होय विद्यार्थी मन ल बधई अउ सुभकामना दीन हे। उहें, जउन विद्यार्थी पाय नइ होय हे, ओमन ल अउ मिहनत ले पढ़ई करे के समझइस दीन।
केन्द्रीय मंत्रिमंडल-निर्णय
प्रधानमंत्री नरेंद्र मोदी के अगुवई म केन्द्रीय मंत्रिमंडल ह औद्योगिक प्रसिक्षण संस्थान आईटीआई बर राष्ट्रीय योजना के बढ़वार अउ कौशल विकास खातिर पांच राष्ट्रीय सबले बने केंद्र के स्थापना के मंजूरी दे देहे। ए योजना के एक हजार सरकारी आईटीआई ल हब म बढ़वार करे अउ पांच राष्ट्रीय कौशल प्रसिक्षण संस्थान के क्षमता बढ़ाय म धियान दिही। एमा कौशल विकास बर पांच राष्ट्रीय उकृष्टता केंद्र के स्थापना घलो सामिल होही। कौशल विकास अउ उद्यमिता मंत्रालय ह केहे हे कि ए प्रतिष्ठान मन ल केंद्र प्रायोजित योजना के रूप म साठ हजार करोड़ रूपिया के परिवय संग लागू करे जाही। उहें, मंत्रिमंडल ह छत्तीसगढ़ समेत आंध्रप्रदेस, जम्मू कश्मीर, कर्नाटक अउ केरल म स्थापित पांच भारतीय प्रौद्योगिकीय संस्थान सैक्षणिक अउ बुनियादी ढांचा के क्षमता के बढ़वार ल घलो मंजूरी देहे।
कर्मचारी-बर्खास्त
राज्य सरकार ह सुशासन तिहार के तीसर चरण के दउरान बेमेतरा जिला म प्रधानमंत्री आवास योजना ले जुड़े तीन झिन संविदा करमचारी मन ल हितग्राही मनले रिस्वत मांगे के आरोप म सेवा ले बर्खास्त कर देहे। उहें, ए करमचारी मनके खिलाफ नांदघाट थाना म एफआईआर घलो दरज करे गेहे। जनपद पंचायत नवागढ़ के मुख्य कार्यपालन अधिकारी के लिखित रिपोर्ट अउ नांदघाट थाना म दरज एफआईआर के आधार म आवास मित्र नीरा साहू, रोजगार सहायक नारायण साहू अउ ईश्वरी साहू ल तत्काल प्रभाव ले सेवा ले अलग करे गेहे।
मुख्यमंत्री-वक्फ सुधार कार्यक्रम
मुख्यमंत्री विष्णुदेव साय ह किहीन हे कि वक्फ संशोधन कानून मुस्लिम समाज के खिलाफ नइ भलूक उंखर हित म हवय। हम सबो के परयास अउ उद्देस्य होना चाही कि वक्फ कानून ल लेके समाज म कोनो कीसम के भरम झन फैलय। सबो ल सही स्थिति ल समझना चाही अउ दिगर मन ल घलो एखर जानकारी देना चाही। वक्फ संशोधन कानून ल लेके देसभर म जनजागरण अभियान चलाय जात हे अउ ए कड़ी म आज मुख्यमंत्री ह अपन निवास कार्यालय म राखे गे वक्फ सुधार जनजागरण कार्यक्रम म ए बात किहीन।