राज्य अउ केन्द्रसासित प्रदेस मन म सुरक्षा तैयारी के मूल्यांकन करे बर काली सात मई के होवइया मॉकड्रिल के तैयारी सुरू होगे हे। ए तैयारी के समीक्षा बर केन्द्रीय गृह सचिव गोविंद मोहन ह आज राज्य अउ केन्द्रसासित प्रदेस के मुख्य सचिव मन संग वीडियो कांफ्रेंस के माध्यम ले बइठका लीन। गृह मंत्रालय ह छत्तीसगढ़ के दुरूग समेत देस के दू सौ चवालीस वर्गीकृत नागरिक सुरक्षा जिला मन म नागरिक सुरक्षा अभ्यास अउ पूर्वाभ्यास आयोजित करे के फइसला लेहे। ए मॉकड्रिल के मुख्य उद्देश्य हवाई हमला के चेतावनी प्रणाली ल परखना हे।
एखर माध्यम ले हवाई हमला के चेतावनी देवइया प्रणाली के प्रभावशीलता के आंकलन करे जाही। संगेसंग वायुसेना के संग हॉटलाइन अउ रेडियो संचार लिंक के संचालन घलो करे जाही। एखर संगेसंग नियंत्रण कक्ष के कार्यक्षमता के परीक्षण होही अउ अभ्यास के दउरान हमला के स्थिति म खुद ल बचाय बर नागरिक सुरक्षा पहलु म नागरिक अउ छात्र मन ल प्रसिक्षण घलो दे जाही। मॉकड्रिल म क्रैश ब्लैकआउट होय म एखर ले निपटे के उपाय, महत्वपूर्ण प्रतिष्ठान ल छिपाए अउ निकासी योजना ल उन्नत बनाय के पूर्वाभ्यास करे जाही। ए मॉकड्रिल म एनसीसी कैडेट मन ह घलो भाग लीही।
केन्द्रीय गृह मंत्रालय ह भिलाई स्टील प्लांट औद्योगिक संस्थान ल देखत छत्तीसगढ़ ले दुरूग ल मॉकड्रिल बर चुने गेहे, जेला देखत आज संझा दुरूग के कलेक्टर आफिस म तैयारी ल लेके बइठका राखे गेहे।
सुशासन तिहार-मुख्यमंत्री
सुशासन तिहार के तीसरइया अउ आखिरी चरण के दूसरइया दिन आज घलो मुख्यमंत्री विष्णुदेव साय ह गांव मनके निरीक्षण करके गांव वाले मनके समस्या जानीन। मुख्यमंत्री ह आज बेमेतरा जिला के सहसपुर गांव म चौपाल लगईन अउ क्षेत्र के विकास बर कई ठिन घोसना करीन। एमा हायर सेकंडरी स्कूल बर नवा भवन, शिव अउ हनुमान मंदिर के परिसर के सौंदर्यीकरण, विद्युत सब स्टेशन के निर्माण अउ सहसपुर के मंदिर ल पर्यटन स्थल के रूप म विकसित करना सामिल हे।
एखर बाद मुख्यमंत्री ह कबीरधाम जिला के दलदली गांव पहुंचीन, जिहां विशेष पिछड़ी जनजाति बैगा समाज के लोगन मन ह मुख्यमंत्री के स्वागत करीन।
नगरीय प्रशासन विभाग-कार्यशाला
प्रदेस के नवा बने जनप्रतिनिधि मन बर नगरीय प्रसासन विभाग डहार ले रईपुर म राखे गे दू दिन के नगर सुराज संगम कार्यशाला ह आज सिरा गे। कार्यसाला के दूसर अउ आखिरी दिन नगरीय प्रसासन विकास मंत्री अरूण साव ह जनप्रतिनिधि मन ल सहर के विकास अउ जनता मनके सुविधा ल बढ़ाय बर कहिन। ओमन किहन कि शहर के विकास होय ले सहर ह सुंदर लागही। श्री साव ह प्रस्तुतिकरण के माध्यम ले अटल विश्वास पत्र के मुख्य बिन्दु म सामिल नगरीय निकाय के चुनौती, नागरिक के अपेक्षा, निर्वाचित जनप्रतिनिधि के जिम्मेदारी अउ स्वच्छता अउ साफ-सफाई के संगेसंग आने-आने मुद्दा म विस्तार ले गोठबात करीन। श्री साव ह सहर के हरेक घर मन म जल आपूर्ति ल बड़े चुनौती बतावत रेन वाटर हार्वेस्टिंग म कड़ाई ले अमल करे म जोर दीन।
माओवादी-मुठभेड़/सरपंच हत्या
बीजापुर जिला के दक्षिण-पश्चिम सीमावर्ती क्षेत्र म सुरक्षा बल मन डहार ले माओवादी मनके खिलाफ चलाय जावत अभियान अभी घलो जारी हे। ए क्षेत्र म काली होय मुठभेड़ म एक झिन महिला माओवादी मारे गेहे। मउका ले महिला माओवादी के लास अउ बंदूक बरामद करे गेहे। छत्तीसगढ़-तेलंगाना अंतराज्यीय सीमा क्षेत्र म पाछु करीब बारा दिन ले जारी ए अभियान के तहत होय मुठभेड़ म अब तक चार झन माओवादी मारे गेहे। उहें, कतकोन ठन हथियार बरामद करे के संगेसंग माओवादी मनके कई ठिन ठिकाना अउ बंकर ल घलो नष्ट करे गेहे।
उहें, माओवादी मन डहार ले सुकमा जिला के तारलागुड़ा के उपसरपंच मूचाकी रामा के हत्या कर दे गेहे। खबर के मुताबिक जगरगुंडा थाना क्षेत्र के आश्रित गांव बैनपल्ली ले माओवादी मन ह उप सरपंच ल काली ओखर घर ले अगुवा करे रिहीन, जेखर लास ल आज जंगल म पाय गीस।
मुख्य सचिव-निर्देश
राज्य के मुख्य सचिव अमिताभ जैन ह पंजीयन विभाग डहार ले संपत्ति रजिस्ट्री म करे गे दस ठन बदलाव मन ल जिला स्तर म लागू करे के निरदेस दीन। ए संबंध म मुख्य सचिव ह जिला कलेक्टर मन ले अपील करीन हे कि ओमन ए सुधार मन ल प्रभावी रूप ले लागू करे खातिर कार्यसाला करे जाय। श्री जैन ह कहिन कि ए सुधार करे ले आम लोगन मन ल बहुत जादा फायदा मिलही। मुख्य सचिव ह यहू बतईन कि पंजीयन विभाग डहार ले करे गे सुधार के मुख्य उद्देश्य संपत्ति पंजीयन प्रक्रिया ल अउ जादा पारदर्शी, सरल, डिजिटल अउ आम लोगन मन बर बनाना हे।
पंजीयन विभाग डहार ले करे गे सुधार म फर्जी रजिस्ट्री ल रोकना, आधार सत्यापन, रजिस्ट्री खोज अउ डाउनलोड, ऑनलाइन भार मुक्त प्रमाण पत्र, स्टांप, पंजीयन शुल्क ल कैशलेस भुगतान अउ स्वतः नामांतरण जइसन सुविधा सामिल हे।
तेंदूपत्ता प्रोत्साहन राशि-कार्रवाई
सुकमा जिला म तेंदूपत्ता सकलइया मनखे मन ल देवइया प्रोत्साहन रासि के बांटे म गड़बड़ी के आरोप म ग्यारह झन प्राथमिक वनोपज समिति के प्रबंधक मन ल हटा दे गेहे। एखर अलावा समिति के संचालक मंडल मन ल घलो भंग कर दे गेहे। ए मामला म पहिली सुकमा जिला के डीएफओ अशोक पटेल ल निलंबित करे गेहे।
मिले खबर के मुताबिक सुकमा जिला म तेंदूपत्ता संग्रहण बछर दू हजार इक्कीस अउ बाईस म देवइया प्रोत्साहन राशि के वितरण म ग्यारह ठन समिति मन उपर लाखों रूपिया के गड़बड़ी करे के आरोप हे।
दुर्ग मारपीट-आरोपी गिरफ्तार
दुरूग जिला म अकोला गांव के तीर एक कार चालक ल अगवा अउ उंखर परिवार के संग मारपीट करे के आरोप म पुलिस ह ग्यारह झन आरोपी मन ल गिरफ्तार करे हे। खबर के मुताबिक पाछु दू मई के राजेन्द्र कुमार शर्मा ह अपन परिवार के संग रायपुर ले गांव लहुटत रिहीन। उहीं, बेरा अकोला गांव के तीर दू झन जवान लइका मन ह मामूली बात ल लेके राजेन्द्र कुमार ल अगवा कर लीन। संगेसंग उंखर गोसइन अउ उंखर बेटी संग मारपीट करे के समाचार मिले हे। घटना के जानकारी मिलतेच पुलिस के टीम ह ग्यारह झन आरोपी मन ल गिरफ्तार करके जेल भेज देहे।
विश्वविद्यालय खेलकूद-प्रतियोगिता
बाईसवां अखिल भारतीय अंतर कृषि विश्वविद्यालय खेलकूद प्रतियोगिता म रायपुर के इंदिरा गांधी कृषि विश्वविद्यालय के खिलाड़ी मन ह बढ़िया खेल के प्रदर्सन करत एक ठन स्वर्ण, एक ठन रजत अउ दू ठन कांस्य पदक जीतीन हे। भारतीय कृषि अनुसंधान संस्थान डहार ले उत्तरप्रदेश के अयोध्या के कुमार गंज के आचार्य नरेन्द्र देव कृषि अउ प्रौद्योगिकी महाविद्यालय म दू ले पांच मई तक ए प्रतियोगिता करे गीस, जेमा देशभर के कृषि विश्वविद्यालय के टीम सामिल होइन।
अउ अब मौसम के हाल….
राज्य म काली कोनो-कोनो जघा म हल्का बरसा अउ गरज-चमक के संग पानी गिरे के संभावना हे। उहें, कोनो-कोनो जघा म हवा-गरेर के संगेसंग बिजली गिरे के चेतावनी घलो दे गेहे। अवइया चौबीस घंटा के दउरान सरगुजा अउ बस्तर संभाग म बरसा हो सकत हे। उहें, अवइया एक-दू के बाद तापमान म बढ़ोतरी होय के संभावना हे।
अउ अब थोरकुन समाचार सार म –
– नगरीय प्रसासन विभाग ह काम म लापरवाही करे के आरोप म दुरूग जिला के भिंभौरी नगर पंचायत के प्रभारी मुख्य नगर पालिका अधिकारी श्रीनिवास द्विवेदी ल निलंबित कर देहे।
– जगदलपुर के जिला रोजगार अउ स्वरोजगार मार्गदर्शन केन्द्र म काली सात मई के बिहनिया ग्यारह बजे ले निजी क्षेत्र म नौकरी बर प्लसेमेंट कैम्प के आयोजन करे जाही।
अउ
– गौरेला-पेंड्रा-मरवाही जिला म चलाय जात एकलव्य आदर्श आवासीय विद्यालय मन म कक्षा छठवीं म दाखिल पाय खातिर आठ ले दस मई तक काउंसिलिंग राखे गेहे।