मुख्यमंत्री कोरबा जिला के मदनपुर पहुंचिन इंहा समाधान सिविर ल संबोधित करत मुख्यमंत्री ह किहीन कि सुशासन तिहार के उद्देस्य ए सुनिश्चित करना हे कि शासन के योजना के लाभ समाज म आखिरी मनखे तक पहुंचे।
उहें, सुशासन तिहार के तहत जांजगीर म नवा तहसील कार्यालय भवन के लोकार्पण करीन। ए भवन बने ले चौव्वन गांव अउ चौबीस पटवारी हल्का के नागरिक मन के राजस्व ले जुड़े सबो सेवा एके परिसर म उपलब्ध होही।
नगर सुराज संगम-अरूण साव
प्रदेस म नगरीय निकाय के जनप्रतिनिधि बर आज ले राजधानी रईपुर म दू दिवसीय कार्यसाला सुरू होइस। ‘‘नगर सुराज संगम‘‘ नाव के ए कारीकरम के उद्देस्य अवइया पांच बछर के कार्ययोजना बनाय उपर चर्चा करना हे। संगेसंग जनप्रतिनिधि मन ल नगरीय प्रशासन विभाग अउ सूडा के योजना के बारे म जानकारी देना हे।
कार्यसाला के पहिली दिन आज मुख्यमंत्री अउ नगरीय प्रशासन विकास मंत्री अरूण साव ह खुदे प्रसिक्षण के कमान संभालिन। ओमन ह पावर प्वाइंट प्रेजेंटेसन के जरिया ले सहर के विकास के रोडमैप आने-आने नगर निगम के महापौर, सभापति, एम.आई.सी. सदस्य, आयुक्त अउ वरिष्ठ अभियंता मन संग साझा करीन। श्री साव ह ए दउरान अटल विश्वास पत्र के प्रमुख बिंदू, नगरीय निकाय के चुनौती, नागरिक मनके अपेक्षा अउ निर्वाचित जनप्रतिनिधि मनके जिम्मेदारी के संगेसंग कर संग्रहण अउ सहरी विकास योजना के आने-आने आयाम उपर विस्तार ले चर्चा करीन।
निर्वाचन आयोग-पहल
भारत निर्वाचन आयोग ह मतदाता सूची के सटीकता म सुधार लाय अउ मतदान प्रक्रिया ल नागरिक मन बर जादा सुविधाजनक बनाय के उद्देस्य ले नवा पहल सुरू करीन। आयोग अब मृत्यु पंजीकरण संबंधी आंकड़ा भारत के महा पंजीयक ले सीधा इलेक्ट्रानिक रूप म पाही। एखर ले सुनिश्चित हो सकही कि मतदाता पंजीकरण अधिकारी मन ल पंजीकृत मउत के बारे म समय म सूचना मिल सकही। एखर ले बूथ स्तर के अधिकारी-बीएलओ ल घलो क्षेत्रीय दउरा के जरिया ले सूचना के दुबारा जांच करे म सुविधा होही अउ ओला फार्म-सात म अवइया औपचारिक अनुरोध के इंतजार नइ करना होही।
मतदाता सूचना पर्ची ल जादा मतदाता-अनुकूल बनाय बर, आयोग ह ओखर डिजाइन ल संशोधित करे के निर्णय लेहे। मतदाता के क्रम संख्या अउ भाग संख्या अब जादा प्रमुखता ले प्रदर्सित करे जाही, जेमा फॉन्ट के आकार बढ़ाय जाही। एखर ले मतदाता मन बर अपन मतदान केंद्र के पहिचान करना अउ मतदान अधिकारी मन बर मतदाता सूची म उंखर नाव ल कुशलता पूर्वक खोजना आसान हो जाही।
चुनाव आयोग ह ए निरदेस घलो दे हे कि ईआरओ डहार ले नियुक्त सबो बीएलओ ल मानक फोटो पहिचान पत्र जारी करे जाय, जेखर ले ए सुनिश्चित हो सके कि नागरिक मतदाता सत्यापन अउ पंजीकरण अभियान के दउरान बीएलओ ल पहिचान सकय अउ उंखर संग आत्मविश्वास ले बातचीत कर सकय।
तेंदूपत्ता बोनस घोटाला मामला म गिरफ्तार डीएफओ अशोक पटेल ल राज्य आर्थिक अपराध अन्वेषण ब्यूरो-ईओडब्ल्यू ह रईपुर के बिसेस कोर्ट के निरदेस के बाद दंतेवाड़ा बिसेस कोर्ट म पेस करे हे। जिंहा ले आरोपी ल नौ मई तक न्यायिक हिरासत म जेल भेज दे गेहे।
एखर पहिली ईओडब्ल्यू ह आरोपी डीएफओ ल रईपुर कोर्ट म पेस करके रिमांड म ले रिहीन। फेर बाद म रईपुर बिसेस कोर्ट ह आरोपी ल दंतेवाड़ा न्यायालय म पेस करे के निरदेस दीन।
माओवादी सहयोगी-गिरफ्तार
नारायणपुर जिला म सुरक्षाबल मन ह आईईडी लगाय के आरोप म दू नक्सल समर्थक मन ल गिरफ्तार करीन। जानबा के मुताबिक कड़ेमेटरा सिविर ले डिस्ट्रिक्ट रिजर्व गार्ड-डीआरजी अउ जिला पुलिस के संयुक्त टीम सर्चिंग म निकले रिहीस। ए दउरान छोटे बुरगुम गांव तीर जंगल म रद्दा के किनारे एक कुकर आईईडी बरामद करे गीस। मउका म पुलिस ह दू संदिग्ध ल घेराबंदी करके पकड़िन। आरोपी मनके पहिचान तुशवाल निवासी सुकमन अउ बुधराम कोर्राम के रूप म होय हे।
बाद म बम निरोधक दस्ता ह ए आईईडी ल नष्ट कर दीन।
एसीबी-कार्रवाई
एंटी करप्शन ब्यूरो-एसीबी ह रायगढ़ जिला शिक्षा अधिकारी कार्यालय म पदस्थ एक क्लर्क ल रिस्वत लेवत रंगेहाथ गिरफ्तार करीन। जानबा के मुताबिक संविदा म भर्ती एक चपरासी के वेतन के मामला म बिलासपुर उच्च न्यायालय ह आदेस पारित करे रिहीन। आरोप हे कि एम.एफ. फारूखी नाव के ए क्लर्क हाईकोर्ट के आदेस के बावजूद बिना रिस्वत के वेतन देबर तियार नइ रिहीस। ए बात के सिकायत संबंधित चपरासी ह एसीबी ले करीन। जेखर बाद आज एसीबी ह जाल बिछाइन अउ आरोपी क्लर्क ल पंद्रह हजार रूपिया के रिस्वत लेवत रंगेहाथ गिरफ्तार करीन।
जीनोम संवर्धित चावल
भारत, जीनोम-संवर्धित चांउर के कीसम विकसित करइया दुनिया के पहिली देस बनगे हे। केंद्रीय कृषि मंत्री शिवराज सिंह चौहान ह भारतीय कृषि अनुसंधान परिषर-आईसीएआर डहार ले विकसित चांउर के दू कीसम लांच करीन। नई दिल्ली म आयोजित कारीकरम म श्री चौहान ह किहीन कि ए सोध प्रधानमंत्री नरेंद्र मोदी के विकसित भारत के संकल्प म मील के पत्थर साबित होही। ए कीसम मन ल छत्तीसगढ़ के संग आंध्रप्रदेस, बिहार, उत्तरप्रदेस, तेलांगाना, कर्नाटक, तमिलनाडु, महाराष्ट्र, पश्चिम बंगाल अउ मध्यप्रदेस बर विकसित करे गेहे।
धान के पहिली कीसम डी.आर.आर. धन 100 कमला हे, जउन सांबा माहेश्वरी कीसम ले बनाय गेहे। ए कीसम पंद्रह ले बीस दिन पहिली पक जाथे अउ पच्चीस प्रतिसत जादा उपज देथे। उहें, दुसर कीसम के नाव पूसा डी.एस.टी.- वन हे, जउन खारा मिट्टी म घलो अच्छा उपज देथे अउ अइसन स्थिति म तीस प्रतिसत जादा उत्पादन करथे।
रेलवे-क्लॉक डिजाइन
भारतीय रेलवे डहार ले सबो स्टेसन म नवा डिजाइन के डिजीटल क्लॉक बनाय बर राष्ट्रीय प्रतियोगिता के आयोजन करे जात हे। एखर बर पेसेवर-कॉलेज अउ स्कूल के छात्र-छात्रा मन बर तीन आने-आने श्रेणी बनाय गेहे। तीनों श्रेणी ल मिलाके भारतीय रेल म उपयोग बर चयनित डिजाइन बनइया कोनो एक विजेता ल पांच लाख रूपिया के पहिली पुरस्कार दे जाही। तीनों श्रेणी म पचास-पचास हजार रूपिया के पांच-पांच सांत्वना पुरस्कार घलो दे जाही। ए प्रतियोगिता के तहत आज ले इकतीस मई तक प्रतिभागी मन ल डिजीटल घड़ी के डिजाइन ऑनलाइन जमा करना हे।
अउ अब थोरकुन समाचार सार म –
– जशपुर जिला के कांसाबेल म पुलिस ह यूनिसेफ के सहयोग ले ‘‘आपकी पुलिस आपके द्वार‘‘ कारीकरम के आयोजन करीन। ए कारीकरम के मुख्य अतिथि मुख्यमंत्री के धर्मपत्नी श्रीमती कौशल्या साय रिहीन।
– मुंगेली म कलेक्टर ह जिला कलेक्टोरेट म हर मंगलवार के होवइया जनदर्शन कारीकरम अवइया आदेस तक अस्थाई रूप ले रोक दे गेहे।
– जगदलपुर जिला रोजगार अउ स्व-रोजगार मार्गदर्सन केंद्र म परसो सात मई के बिहनिया ग्यारा बजे ले प्लेसमेंट कैंप के आयोजन करे जाही।
अउ
– राष्ट्रीय विचार मंच डहार ले एक राष्ट्र- एक चुनाव बिसय म काली रईपुर पश्चिम विधानसभा क्षेत्र म विचार संगोष्ठी के आयोजन करे गीस। एमा मुख्य वक्ता के रूप म राजनांदगांव सांसद संतोष पांडेय, विधायक राजेश मूणत अउ रईपुर महापौर मीनल चौबे सामिल होइन।