सूचना और प्रसारण सचिव संजय जाजू ह किहीन हे कि वेव्स म भाग लेवइया हर क्रिएटर स्टार बनके जावत हे। श्री जाजू ह ए बात ल मुंबई म वेव्स के दउरान एक ठिक सांस्कृतिक सत्र ल संबोधित करत हुए किहीन। ओमन क्रिएट इन इंडिया चैलेंज-सीआईसी म भाग लेवइया संगीतकार मन के उल्लेख करीन, जउन मन ह अपन प्रदर्सन के माध्यम ले भारत के मूलतत्व ल दर्साय हे। ओमन बतइन कि सरकार ह भविष्य के अंतरराष्ट्रीय दउरा अउ प्रदर्सन बर जादा स्थापित नाम के जघा सीआईसी के सबो संगीत प्रतियोगिता के विजेता मन ल ले जाही। श्री जाजू ह बतइन कि वेव्स ह अइसे समय म अनूठी प्रतिभा ल आगू लाय म मदद करे हे। जब भारत म अइसने पेसेवर बैंड के कमी हवय, जउन कि वैश्विक मंच म मूलतत्व ल प्रदर्सित कर सकय। आकाशवाणी समाचार ले बिसेस गोठ करत हुए श्री जाजू ह किहीन कि वेव्स ह निवेस, व्यापार, कला अउ संस्कृति बर एक अविश्वनीय मंच बनगे, जउन ह खुद ल एक जन आंदोलन के रूप म स्थापित करे हे।
मुंबई म चलत वर्ल्ड ऑडियो विजुअल एंटरटेनमेंट समिट-वेव्स के आज समापन होवत हे। आखिरी दिन फिल्म निर्माण ल लेक सत्र अउ सांस्कृतिक कारीकरम आयोजित करे जात हे। चार दिन के सम्मेलन के उद्घाटन प्रधानमंत्री नरेंद्र मोदी ह एक मई के करे रिहीन।
‘‘कनेक्टिंग क्रिएटर्स, कनेक्टिंग कंट्रिस‘‘ टैग लाइन वाले ए शिखर सम्मेलन भारत के मीडिया मनोरंजन अउ डिजीटल नवाचार बर वैश्विक केंद्र के रूप म स्थापित करे के एक प्रयास रिहीस। ए आयोजन म नब्बे ले जादा देस के दस हजार ले जादा प्रतिनिधि मन सामिल होइन।
वेव्स-छत्तीसगढ़
मुंबई म आयोजित वेव्स म छत्तीसगढ़ के राजधानी रईपुर के युवा मनके टीम एनटैनजल्ड स्टूडियो ह एनिमे श्रेणी म पहिली स्थान हासिल करे हे अउ ओमन ल जापान म भारत के प्रतिनिधित्व करे के मउका घलो मिलही।
वेव्स के चलत एनिमेशन श्रेणी म पहिली पुरस्कार जीतइया रईपुर के ए टीम के सदस्य शुभ्रांशु िंसंह ह आकाशवाणी समाचार ले गोठ करत हुए बतइन कि देसभर के करीबन एक हजार प्रतिभागी मन के बीच होय प्रतियोगिता के बाद उंखर टीम ह पहिली स्थान हासिल करे हे।
शुभ्रांशु के कहना हे कि देस के रचनात्मक लोगन मन बर वेव्स, उम्मीद अउ अपेक्षा ले घलो बड़का प्लेटफार्म साबित होय हे।
सुशासन तिहार-तीसरा चरण
प्रदेस म सुशासन तिहार के तीसर चरण म काली पांच मई ले सुरू होही जउन कि इकतीस मई तक चलही। ए बेरा म आठ ले पंद्रह ठिन ग्राम पंचायत के बीच समाधान सिविर लगाय जाही। जेमा आवेदक मन ल उंखर आवेदन के स्थिति के जानकारी दे जाही। उहें, नगरीय निकाय म घलो समाधान सिविर लगाय जाही। जिहां मिले आवेदन के प्रविष्टी पोर्टल म करे जाही अउ बांकी बांचे आवेदन के समाधान एक महिना के भीतरी म करके आवेदक मन ल बता दे जाही। ए जम्मों सिविर म शासन के जन-कल्याणकारी योजना के आवेदन दे जाही। समाधान सिविर म विकासखंड अउ अनुभाग स्तर के अधिकारी मन मौजूद रइही। संगेसंग मुख्यमंत्री विष्णुदेव साय समेत सबो मंत्री सांसद, विधायक अउ आने जनप्रतिनिधि मन घलो समाधान सिविर म सामिल होही।
जानबा के अनुसार सुशासन तिहार के पहिली चरण ह आठ ले ग्यारा अप्रैल तक होही। पहिली चरण म मांग अउ समस्या ले संबंधित लगभग इकतालीस लाख आवेदन मिल चुके हे। उहें, दूसर चरण म जिला प्रशासन कोति ले ए सबो आवेदन के निराकरण करे गीस।
निर्वाचन आयोग-एकल बिंदु ऐप
भारत निर्वाचन आयोग ह एक ठिन सिंगल-प्लेटफार्म ऐप ई.सी.आई.एन.ई.टी. के सुरूआत करही, जउन कि चुनई ले संबंधित सबो सेवा ल एके जघा म उपलब्ध कराही। ए ऐप ह निर्वाचन आयोग के मौजूदा चालीस ले जादा मोबाइल अउ ऐप एप्लीकेशन ल एक संघरा लाही। ए ह मतदाता, चुनई अधिकारी, राजनीतिक दल अउ आने हितधारक मन बर एक ठिन नवा डिजीटल इंटरफेस होही, जेखर ले एला बउरे वाला मन ल कतकोन ऐप ल डाउनलोड करे ले राहत मिलही। ए ऐप ह डेस्कटाप या फेर स्मार्ट फोन म चुनई ले संबंधित जरूरी जानकारी ल दिही।
मुख्यमंत्री-पदभार ग्रहण समारोह
मुख्यमंत्री विष्णुदेव साय ह किहीन हे कि बस्तर अउ सरगुजा संभाग म औषधि पादप ल लेके जागरूकता अभियान चलाय जाही। श्री साय ह काली रईपुर म छत्तीसगढ़ आदिवासी स्थानीय स्वास्थ्य परंपरा अउ औषधि पादप बोर्ड के नव नियुक्त अध्यक्ष विकास मरकाम के पदभार ग्रहण समारोह म ए बात ल किहीन हे। श्री साय ह किहीन कि औषधि पउधा म बहुत अकन गुण होथे। एखर संगेसंग अच्छा आमदनी बर औषधि पादप के रोपण ल बढ़ावा देके जरूरत हवय। बैगा-गुनिया अउ वैद्य मन ह वन औषधि के पहिचान करके लोगन मनके इलाज करथे।
उहे, मुख्यमंत्री श्री साय ह रईपुर मेडिकल कालेज के सभागार म छत्तीसगढ़ रजककार विकास बोर्ड के नव नियुक्त अध्यक्ष प्रहलाद रजत के पदभार ग्रहण कारीकरम म सामिल होइन।
कारीकरम ल आदिमजाति विकासमंत्री रामविचार नेताम अउ वनमंत्री केदार कश्यप ह घलो संबोधित करीन।
परिवहन विभाग-एचएसआरपी
परिवहन विभाग ह गाड़ी मालिक मन के सुविधा अउ सुरक्षा ल देखत हुए गाड़ी म हाई सिक्योरिटी रजिस्ट्रेसन प्लेट-एच.एस.आर.पी. लगवाना जरूरी कर देहे। एखर बर विभाग ह कोनो भी प्रकार के बिचौलिया व्यवस्था या फेर धोखाधड़ी ले बांचे बर बिसेस अभियान ल सुरू करे हे। राज्य के अतिरिक्त परिवहन आयुक्त डी. रविशंकर ह बतइन हे कि गाड़ी मालिक मन विभाग के अधिकृत वेबसाइट के माध्यम ले सीधा आवेदन करके गाड़ी म हाई सिक्योरिटी रजिस्ट्रेसन प्लेट लगवा सकहीं।
इही बीच, परिवहन आयुक्त एस. प्रकाश के अध्यक्षता म राज्य के सबो जिला स्तरीय परिवहन अधिकारी समेत हाई सिक्योरिटी नंबर प्लेट बर अनुबंधित कंपनी के संग उच्च स्तरीय बइठका होइस। जेमा हाई सिक्योरिटी नंबर प्लेट ल लेके आम लोगन मन ल होवत परेसानी ल दूर करे बर दिसा निरदेस दे गीस। अनुबंधित कंपनी ल सबो जिला ल गाड़ी के संख्या के अनुसार हाई सिक्योरिटी नंबर प्लेट बनाय वाला मसीन के संख्या ल बढ़ाय बर घलो कहे गेहे।
नीट यूजी-परीक्षा
छत्तीसगढ़ समेत देसभर म आज मेडिकल प्रवेस परीक्षा-नीट यूजी ह आयोजित होइस। ए परीक्षा ह देसभर म पांच हजार ले जादा केंद्र म अउ विदेस म तेरह ठिक सहर म होइस। परीक्षा ह मंझनिया दू बजे ले संझा पांच बजे तक चलिस। राष्ट्रीय परीक्षा एजेंसी एनटीए के अनुसार, परीक्षा बर बाईस लाख ले जादा विद्यार्थी मन ह पंजीकरण कराय रिहीन।
ऐति, छत्तीसगढ़ म ए परीक्षा बर प्रदेस भर ले पैंतालीस हजार ले जादा विद्यार्थी मन ह पंजीयन कराय रिहीन। राजधानी रईपुर म अट्ठाईस ठिन परीक्षा केंद्र बनाय गे रिहीस, जेमा बड़का संख्या म परीक्षार्थी मन सामिल होइन।
माशिमं-हेल्प लाइन सेंटर
बोर्ड परीक्षा परिणाम के तनाव ले लइका मन ल बचाय बर छत्तीसगढ़ माध्यमिक शिक्षा मंडल ह हेल्प लाइन सेंटर ल सुरू करे हे। आकाशवाणी समाचार ले गोठ करत हुए मंडल के सचिव पुष्पा साहू ह बतइन कि लइका मनके परेसानी ल दूर करे बर एक ठिन हेल्प लाइन नंबर-एक आठ सून्य-सून्य दू-तीन-तीन चार तीन छै तीन ल जारी करे गेहे।