कारीकरम म मुख्यमंत्री विष्णुदेव साय ह देस के पहिली आर्टिफिसियल इंटेलीजेंस आधारित डाटा सेंटर पार्क के सिलान्यास करीन। ए बेरा म मुख्यमंत्री ह किहीन कि एआई-डाटा सेंटर छत्तीसगढ़ बर सूचना अउ प्रौद्योगिकी के क्षेत्र म बड़ क्रांति ले के आय हे। ए प्रधानमंत्री नरेंद्र मोदी के जय विज्ञान-जय अनुसंधान के मंच ल साकार करही अउ विकसित छत्तीसगढ़ के बुनियाद बनही। ओमन किहीन कि देस के ग्रोथ इंजन छत्तीसगढ़ कोयला,स्टील, आयरन अउ ऊर्जा बर पहिचाने जाथे। फेर अब एआई सेमीकंडक्टर अउ सॉफ्टवेयर इंडस्ट्रीज ले विश्व भर म पहिचान मिलत हे। मुख्यमंत्री ह किहीन कि एआई डाटा सेंटर ले प्रदेस म एआई आधारित सेवा मन ल बढ़ावा दे के संग उद्योग अउ व्यापार जगत के अलावा एखर सीधा लाभ लोगन मनके जीवन स्तर ल अच्छा बनाय म मिलही। ओमन ह किहीन कि छत्तीसगढ़ एआई क्रांति देस बर मॉडल बनही।
श्री साय ह किहीन कि एआई डाटा सेंटर के स्थापना ले पांच सौ ले जादा लोगन मन ल प्रत्यक्ष रोजगार मिलही। मेसर्स रैक बैंक डहार ले स्थापित एआई डाटा सेंटर पांच मेगावाट क्षमता हे। एखर पूरा परियोजना म लगभग एक हजार करोड़ रूपिया के निवेस होही। एखर ले एआई म चलने वाला कम्प्यूटर, इंफ्रास्ट्रक्चर अउ सेमीकंडक्टर निर्माण ल घलो बढ़ावा मिलही। मुख्यमंत्री ह किहीन कि राज्य सरकार नवा रईपुर ल आईटी मेडिसिटी अउ फार्मास्युटिकल हब के रूप म विकसित करत हे।
पंजीयन विभाग सेवाएं-शुभारंभ
मुख्यमंत्री विष्णुदेव साय ह आज नवा रायपुर म आयोजित कारीकरम म पंजीयन विभाग के नवाचार आधारित दस नवा सुविधा के सुभारंभ करीन। एमा आधार आधारित प्रमाणीकरण, ऑनलाइन सर्च अउ डाउनलोड, कैशलेस भुगतान, डिजीलॉकर, व्हाट्सप नोटिफिकेसन, घर बइठे रजिस्ट्री, डिजीडाक्यूमेंट, खुद ले नामांतरण जइसे तकनीकी सेवा सामिल हे।
ए मउका म मुख्यमंत्री ह किहीन कि पंजीयन विभाग के ए नवाचार ले रजिस्ट्री अउ नामांतरण जइसे कठिन प्रक्रिया ले आम लोगन मन ल निजात मिलही। ओमन किहीन कि ए सुविधा भ्रष्टाचार म अंकुश लगाय म कारागार साबित होही।
अउ अब खबर वेव्स सम्मेलन ले-
सूचना अउ प्रसारण मंत्री अश्विनी वैष्णव ह किहीन कि भारत मीडिया अउ मनोरंजन क्षेत्र म वैश्विक नेतृत्व कर सकत हे। ओमन ह किहीन कि कतकोन वैश्विक कंपनी मन म ए संबंध म भारत के संग काम करे के इच्छा जताय हे। गूगल, मेटा अउ माइक्रोसॉफ्ट के संग सात वैश्विक फर्म ह आज मुंबई म वेव्स शिखर सम्मेलन के दउरान भारतीय रचनात्मक प्रौद्योगिकी संस्थान-आई.आई.सी.टी. के संग एक समझौता ज्ञापन म हस्ताक्षर करीन। आई.आई.सी.टी. के स्थापना चार सौ करोड़ रूपिया के फंडिंग के संग मुंबई म करे जाही। ए बेरा म श्री वैष्णव ह किहीन कि अवइया दिन म आई.आई.सी.टी., आई.आई.टी. अउ आई.आई.एम. के जइसे मान्यता पाही।
उहें, वेव्स म कम्यूनिटी रेडिया सम्मेलन के उद्घाटन सत्र ल संबोधित करत हुए सूचना अउ प्रसारण राज्य मंत्री डॉक्टर एल. मुरूगन ह देसभर म होवत कम्युनिटी रेडिया के काम के तारीफ करीन। ओमन ह किहीन कि सबो कम्युनिटी रेडियो कोनो न कोनो उद्देस्य बर काम करत हे अउ हमर परंपरा ल बढ़ावा देवत हे।
माओवादी-मुठभेड़
गरियाबंद जिला म पाछु रतिहा पुलिस संग होय मुठभेड़ म एक हार्डकोर माओवादी मारे गेहे। जेखर शव बरामद कर ले गेहे। मारे गे माओवदी के पहिचान डिविजनल कमेटी मेम्बर आयतु उर्फ योगेश कोरसा के रूप म करे गेहे। घटना स्थल ले एक एसएलआर आटोमेटिक हथियार, गोलाबारूद, माओवादी साहित्य अउ आने समान बरामद करे हे।
जिला के पुलिस अधीक्षक निखिल राखेचा ह बतइन कि जुगाड़ थाना क्षेत्र म अवइया जंगल म माओवादी मनके मौजूदगी के सूचना मिले के बाद पुलिस के टीम तलासी अभियान म निकले रिहीस। ए दउरान जंगल म माओवादी मन ह अचानक पुलिस पार्टी उपर फायरिंग सुरू कर दीन। जवान मन डहार ले करे गे जवाबी कार्रवाई म एक माअवोदी मारे गीस।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘बालोद‘‘ जिला के गतिविधि के उपर जानकारी दे जाही।
मौसम
रईपुर,दुर्ग,राजनांदगांव,बिला
सरगुजा जिला के मैनपाट म आकाशीय बिजली के चपेट म आय ले एक शिक्षक के मउत हो गेहे।
मौसम विज्ञानी एच.पी.चंद्रा ह बतइन कि एक पूर्व-पश्चिम द्रोणिका दक्षिण राजस्थान ले उत्तर ओडिसा तक मध्यप्रदेस, छत्तीसगढ़, झारखंड अउ पश्चिम बंगाल होवत डेढ़ किलोमीटर के ऊंचाई म बने हे। एखर असर ले प्रदेस म पानी गिरत हे। अवइया चौबीस घंटा के दउरान प्रदेस के एक-दू जघा म गरज-चमक के संग अंधड़ चले, आकाशीय बिजली गिरे अउ करा गिरे के संभावना हे। पानी गिरे के कारण तापमान म गिरावट दर्ज करे गेहे।
सेल्फ कार ड्राइव
राज्यपाल रमेन डेका ह आज मधुमेह माने टाइप-वन डायबिटीज बर जागरूकता फैलाय बर निकले गुजरात के दू बहिनी – डॉक्टर स्मिता जोशी अउ डॉक्टर शुक्ला बेन रावल के ’’सेल्फ कार ड्राइव’’ जन-जागरूकता यात्रा ले राजभवन परिसर ले हरा झंडी दिखाके रवाना करीन। श्री डेका ह ए समाजिक पहल के सराहना करत दूनों बहिनी मन ल सुभकामना दीन।
डॉ. जोशी अउ डॉ. रावल ह बतइन कि ओमन बछर दू हजार अट्ठारा ल भारत म किशोर मधुमेह ले पीड़ित लइका के हित म काम करत हे। उंखर उद्देस्य हे कि देस के हर जिला के शासकीय अस्पताल म एनसीडी क्लीनीक के तर्ज म टाइप-वन डायबीटीज बर समर्पित क्लीनिक के स्थापना हो।
एनआईटी-एमओयू
राष्ट्रीय प्रौद्योगिकी संस्थान-एनआईटी रईपुर ह काली जन्यु टेक्नोलॉजीज प्राइवेट लिमिटेड के संग रोबोटिक्स अउ ऑटोमेसन बर सेंटर ऑफ एक्सीलेंस स्थापित करे के एक समझौता ज्ञापन म हस्ताक्षर करीन। एनआईटी रइपुर के निदेशक प्रोफेसर एन.वी.रमना राव अउ जन्यु टेक्नोलॉजीज प्राइवेट लिमिटेड के प्रबंध निदेशक अभिमन्यु राजा ह समझौता ज्ञापन म हस्ताक्षर करीन। ए एमओयू रोबोटिक औद्योगिक स्वचालन अउ कृत्रिम बुध्दिमता के क्षेत्र म नवाचार अनुसंधान अउ कौशल विकास ल बढ़ावा देके उद्देस्य ले करे गेहे।
भटगांव लिंक कोर्ट
सारंगढ़- बिलाईगढ़ जिला के भटगांव तहसील कार्यालय म अब हर गुरूवार के एसडीएम लिंक कोर्ट लगही। एखर ले लोगन मन ल राजस्व मामला म जिला मुख्यालय नइ जाना पड़ही। जिला कलेक्टर डॉक्टर कन्नौजे ह बतइन कि ए व्यवस्था अवइया आदेस तक प्रभावी रइही। ए लिंक कोर्ट ले सरसींवा अउ भटगांव तहसील ले संबंधित राजस्व दांडिक अउ सब्बो न्यायालीन प्रकरण के सुनवाई अउ तुरते निपटारा संभव हो सकही। एखर जरिया ले प्रशासनिक प्रक्रिया सरल होही अउ न्याय बर आम लोगन के पहुंच आसान होही।
एशियन पावर लिफ्टिंग-चयन
देहरादून म पांच ले बारह मई तक आयोजित होवइया एशियन पावर लिफि्ंटग चैंपियनशिप म भिलाई के खिलाड़ी प्रेरणा नथवानी के चयन भारतीय महिला टीम म होय हे। उहें, भिलाई के कृष्णा साहू के चयन भारतीय टीम के प्रसिक्षक अउ राष्ट्रीय निर्णायक अउ जूरी सदस्य के रूप म होय हे।
बताय जात हे कि भारतीय टीम म चयनित प्रेरणा नथवानी ह राष्ट्रीय पावर लिफ्टिंग प्रतियोगिता म स्वर्ण पदक पाय रिहीन, जेखर आधार म पहिली बार ओखर चयन अंतर्राष्ट्रीय पावर लिफि्ंटग प्रतियोगिता बर होय हे।
ओति, बिहार के बोधगया काली चार मई ले खेलो इंडिया यूथ गेम्स सुरू होही। पंद्रह मई तक चलइया ए प्रतियोगिता म छत्तीसगढ़ के बारह मल्लखंब खिलाड़ी सामिल होही। एमा नारायणपुर जिला के नौ खिलाड़ी घलो सामिल हे। एमा चार लइका मन ह ए सबो खिलाड़ी अबूझमाड़ मल्लखंब अउ स्पोर्ट्स अकादमी ले जुड़े हे।