मुख्यमंत्री विष्णुदेव साय ह आत्मसमर्पित माओवादी अउ नक्सल हिंसा ले प्रभावित पच्चीस सौ परिवार के बैंकखाता मन म प्रधानमंत्री आवास योजना ग्रामीण के पहला किस्त के रासि अंतरित करीन। मुख्यमंत्री ह आज मंत्रालय म राखेगे वर्चुअली कारीकरम म प्रति परिवार चालीस-चालीस हजार रूपिया के मान ले कुल दस करोड़ रूपिया के हितग्राही मन के खाता म अंतरित करीन।
ए योजना के तहत जउन पच्चीस सौ आत्मसमर्पित माओवादी अउ नक्सल हिंसा ले प्रभावित परिवार के खाता मन म रासि दे गेहे, ओमा ले सबले जादा आठ सौ नौ परिवार सुकमा जिला के हरय। उहें, बीजापुर जिला के पांच सौ चौरानवे, नारायणपुर के तीन सौ सोलह, बस्तर के दू सौ दू, दंतेवाड़ा के एक सौ अस्सी, कोंडागांव के एक सौ छियासठ अउ कांकेर के एक सौ अड़तीस परिवार सामिल हे।
कारीकरम ल संबोधित करत मुख्यमंत्री ह किहीन कि राज्य सरकार ह केंद्र सरकार ले बिसेस आग्रह करके आत्मसमर्पित माओवादी अउ नक्सल हिंसा ले प्रभावित परिवार बर जउन मन प्रधानमंत्री आवास योजना के पात्रता के सर्त म नइ सामिल हो पात रिहीन, ओमन बर पंद्रह हजार आवास स्वीकृत कराय हे। कारीकरम ल उपमुख्यमंत्री अउ गृहमंत्री विजय शर्मा ह घलो संबोधित करीन।
महतारी वंदन योजना-राशि
राज्य सरकार ह महतारी वंदन योजना के तहत पंद्रहवां किस्त जारी कर देहे। महिला अउ बाल विकास विभाग डहार ले प्रदेस के उनहत्तर लाख बत्तीस हजार ले जादा महिला मन ल छै सौ अड़तालीस करोड़ अड़तीस लाख रूपिया के सहायता रासि ओमन के बैंक खाता म अंतरित कर देहे।
इही बीच, महिला अउ बाल विकास विभाग ह हितग्राही महिला मन ले आधार कार्ड अपडेट कराय के अपील करे हे, जेखर ले रासि के भुगतान म कोनो भी दिक्कत झन होवय। बतादन कि आधार कार्ड ल हर दस साल म अपडेट कराना अनिवार्य हे। कई हितग्राही मनके भुगतान आधार इनएक्टिव होय के सेति निरस्त करे गेहे। अइसे हितग्राही मन ल आधार केंद्र म जाके पहिचान अउ निवास प्रमाण पत्र के साथ आधार अपडेट कराना जरूरी हे, ताकि अवइया किस्त के भुगतान सुनिश्चित हो सकय।
वेव्स-शिखर सम्मेलन
वेव्स शिखर सम्मेलन म वैश्विक मीडिया संवाद आज बिहनिया मुंबई के जियो वर्ल्ड कन्वेशन सेंटर म सुरू होइस। ए आयोजन वैश्विक मीडिया अउ मनोंरजन परिदृश्य के संग भारत के जुड़ाव के दिसा म एक महत्वपूर्ण उपलब्धि हरय।
विदेश मंत्री डॉक्टर सुब्रमण्यम जयशंकर ह उद्घाटन सत्र ल संबोधित करत किहीन कि प्रौद्योगिकीय देस के अनमोल विरासत के बारे म जागरूकता ल बढ़ावा दे सकत हे। ओमन किहीन कि नवाचार ऊंचाई तक पहुंच के कुंजी के जउन दू हजार सैंतालीस तक विकसित भारत के निर्माण करही। ए मउका म सूचना अउ प्रसारण मंत्री अश्विनी वैष्णव ह किहीन कि संस्कृति ही रचनात्मकता ल प्रेरित करथे अउ सीमा पार के लोगन मन ल घलो जोड़थे।
नीति आयोग-कार्यशाला
मुख्यमंत्री विष्णुदेव साय ह आज राजधानी रईपुर म कौशल, रोजगार अउ आजीविका उपर नीति आयोग के कार्यसाला के सुभारंभ करीन। ए मउका म राज्य के कौशल विकास, तकनीकी शिक्षा अउ उच्च शिक्षा विभाग डहार ले चार महत्वपूर्ण समझौता ज्ञापन एमओयू म हस्ताक्षर करे गीस। ए समझौता मनके मुख्य उद्देस्य प्रदेस के युवा मन ल रोजगारोन्मुख कौशल देके ओमन ल आत्मनिर्भर बनाना हे।
कार्यसाला ल संबोधित करत मुख्यमंत्री श्री साय ह किहीन कि ए कार्यसाला बदलत समय के जरूरत के अनुरूप बहुत प्रासंगिक हरय। ओमन किहीन कि भारत एक युवा देस हे। यदि युवा मन ल ओखर रूचि अउ क्षमता के अनुसार कौशल प्रसिक्षण मिले त विकसित भारत के लक्ष्य ल तेजी ले पा सकत हे। श्री साय ह किहीन कि राज्य सरकार कौशल विकास ल तेजी ले आगू बढ़ात हे। एखर तहत लाईवलीहुड कॉलेज, आईटीआई अउ महिला स्व-सहायता समूह ल सशक्त बनाय के काम करत हे।
कार्यसाला ल उपमुख्यमंत्री विजय शर्मा अउ नीति आयोग के प्रोग्राम निदेशक डॉक्टर सोनिया पंत ह घलो संबोधित करीन।
जीएसटी-संग्रह
छत्तीसगढ़ ह अप्रैल दू हजार पच्चीस म चार हजार एक सौ पैंतीस करोड़ के वस्तु अउ सेवाकर-जीएसटी संग्रहण करके देस के शीर्ष पंद्रह राज्य मनके सूची म अपन जघा बनाय हे। जीएसटी संग्रहण के मामला म छत्तीसगढ़ ह केरल, पंजाब, बिहार अउ झारखंड जइसे राज्य मन ल घलो पीछू छोड़ दे हे।
मुख्यमंत्री विष्णुदेव साय ह ए उपलब्धि म किहीन कि ए प्रदर्सन छत्तीसगढ़ के अर्थव्यवस्था बर सकारात्मक संकेत हरय। राज्य संसाधन आधारित अर्थव्यवस्था ले आगू बढ़के अब एक सशक्त औद्योगिक केंद्र के रूप म उभरत हे। श्री साय ह किहीन कि छत्तीसगढ़ ल आत्मनिर्भर अउ समृध्द राज्य बनाना हमर लक्ष्य हरय। राज्य के आर्थिक स्थिति म ए बढ़ोत्तरी जनता अउ उद्योग जगत के सहयोग ले संभव होय हे।
केयरएज रैंकिंग
छत्तीसगढ़ ह केयरएज स्टेट रैंकिंग दू हजार पच्चीस म उल्लेखनीय प्रदर्सन करत देस के सत्रह बड़का राज्य मनके सूची म तीन स्थान के सुधार करत चौदहवां ले ग्यारहवां जघा म पहुंच गेहे। बछर दू हजार तेईस के तुलना म राज्य के कुल स्कोर छै दसमलव एक अंक के बढ़ोत्तरी के साथ चौतीस दसमलव आठ ले बाढ़के चालीस दसमलव नौ हो गेहे। ए प्रदर्सन शासन, सामाजिक संकेतक अउ आर्थिक मजबूती म सुधार के प्रमाण हरय।
मुख्यमंत्री विष्णुदेव साय ह किहीन कि केयरएज के ए रिपोर्ट सरकार के कार्य के आंकड़ा के रूप म मान्यता हे। ओमन किहीन कि ए टीम छत्तीसगढ़ के एकजुट मेहनत अउ जनसेवा के भावना के परिणाम हे। शासन म पारदर्सिता, सेवा के गति अउ नागरिक मन के भागीदारी ल प्राथमिकता देहे। सरकार के जोर सामाजिक क्षेत्र म शिक्षा, स्वास्थ्य अउ गरीब कल्याण के रहे हे। ओमन किहीन कि आर्थिक क्षेत्र म निवेश अउ रोजगार ल प्रोत्साहन दे जात हे।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत प्रधानमंत्री मुद्रा योजना के हितग्राही रईपुर के ईशा पटेल ले लेगे भेंटवार्ता प्रसारित करे जाही। एखर प्रसारण काली तीन मई के बिहनिया साढ़े दस बजे ले करे जाही। एला छत्तीसगढ़ स्थित जम्मों आकाशवाणी केंद्र एके संग रिले करही।
मिरानिया-आर्थिक सहायता
मुख्यमंत्री विष्णुदेव साय ह जम्मू कश्मीर के पहलगाम म होय आतंकी हमला म मारे गे रईपुर निवासी दिनेश मिरानिया के परिजन मन ल बीस लाख रूपिया के आर्थिक सहायता देके घोसना करीन हे। श्री साय ह किहीन कि मिरानिया के हत्या दुर्भाग्यपूर्ण अउ पीड़ादायक हे। पूरा छत्तीसगढ़ ए दुख के बेरा म दिनेश मिरानिया के परिवार के साथ हरय। मुख्यमंत्री ह किहीन कि जउन आतंकवादी ए हमला के दोषी हे, ओमन ल कड़ा से कड़ा सजा मिलही। श्री साय ह भरोसा जतइन कि देस के सुरक्षा एजेंसी ए मामला म जल्दी ही न्याय सुनिश्चित करही।
खिलाड़ी-चयन
राज्य सरकार डहार ले संचालित बीजापुर स्पोर्ट्स एकेडमी के एथलेटिक्स खिलाड़ी संतोषी भंडारी के चयन भारतीय खेल प्राधिकरण के नेशनल सेंटर ऑफ एक्सीलेंस भोपाल बर करे गेहे। ए चयन भारतीय खेल प्राधिकरण डहार ले पाछू महिना जारी करे गे, चयन सूची के आधार म होय हे, जेमा देसभर के दस झिन बालिका एथलीट्स ल उत्कृष्ट प्रदर्सन के आधार म चुने गेहे। संतोषी भंडारी सबले कम उमर के खिलाड़ी हरय, जउन बीजापुर स्पोर्ट्स एकेडमी म प्रसिक्षण लेत हे।
मौसम विभाग ह अवइया चौबीस घंटा के दउरान प्रदेस म एक-दू जघा म गरज-चमक के संग अंधड़ चले, गाज अउ करा गिरे के चेतावनी देहे। मौसम विज्ञानी एच.पी. चन्द्रा ह बतइन कि एक ठिन पश्चिमी विक्षोभ दक्षिण पंजाब अउ ओखर ले लगे उत्तर राजस्थान अउ पश्चिम हरियाणा के उपर चक्रीय-चक्रवात के रूप म बने हे। एखर असर ले प्रदेस म बदली-बारिस के स्थिति बनत हे। प्रदेस के अधिकतम तापमान म कोनो बिसेस परिवर्तन होय के संभावना नइ हे।
एआई डाटा सेंटर पार्क
मुख्यमंत्री विष्णुदेव साय काली नवा रईपुर म एआई डाटा सेंटर पार्क के भूमिपूजन करही। ए मउका म उद्योग अउ श्रम मंत्री लखनलाल देवांगन अउ वित्त मंत्री ओ.पी. चौधरी घलो मौजूद रइही।