प्रधानमंत्री नरेन्द्र मोदी ह आज मुंबई के जिओ वर्ल्ड कन्वेंशन सेंटर म पहिली वर्ल्ड ऑडियो विजुअल एंटरटेनमेंट सम्मेलन-वेव्स के उद्घाटन करीन। ए मउका म प्रधानमंत्री ह कहिन कि ए ह वैश्विक मंच हे, जिहां कलाकार अउ रचनाकार मनके विचार ल बढ़ावा मिलही। वेव्स बाजार पहल के तारीफ करत प्रधानमंत्री ह किहीन कि ए ह रचनाकार मन ल बढ़ावा दीहीं। ओमन कहिन कि भारत के ऐनिमेशन अउ ग्राफिक डिजाईन उद्योग बर खुद ल वैश्विक मंच म स्थापित करे के ए ह बड़े मउका हे।
प्रधानमंत्री ह कहिन कि भारत दुनिया के तीसरा सबले बड़े अर्थव्यवस्था बने के प्रयास करत हे अउ उंखर तीर विश्व के तीसर सबले बड़े स्टार्टअप सिस्टम हे। श्री मोदी ह किहीन कि भारतीय फिल्म अब विश्व के कोना-कोना तक पहुंचत हे अउ आज भारतीय फिल्म सौ ले जादा देस मन म प्रदर्सित होवत हे।
वेव्स सम्मेलन के उद्घाटन सत्र म सूचना अउ प्रसारण मंत्री अश्विनी वैष्णव ह कहिन कि ए सम्मेलन नवा आर्थिक अवसर दीहीं अउ रचनाकार मन ल नवा प्रौद्योगिकी के बारे म जाने के मउका दीही। श्री वैष्णव ह कहिन कि ए ह रचनाकार मन ल विश्वभर के क्रेता अउ निवेसक मन ले जोड़ही।
केन्द्रीय मंत्री-पत्रकारवार्ता
भारतीय जनता पार्टी डहार ले प्रदेस म वक्फ सुधार जनजागरण अभियान चलाय जावत हे। ए संदर्भ म आज केन्द्रीय मंत्री डॉक्टर जितेन्द्र सिंह रायपुर पहुंचीन। प्रदेस भाजपा कार्यालय म पत्रकार मन ले चर्चा करत केन्द्रीय मंत्री ह कहिन कि वक्फ संशोधन अधिनियम वंचित मुस्लिम समुदाय के हित म हवय। ओमन किहीन कि पहिली के वक्फ कानून के सेती कतकोन घोटाला होय हे अउ वक्फ के करीब अस्सी प्रतिशत संपत्ति म भ्रष्टाचार या अवैध कब्जा के आरोप हे। केन्द्रीय मंत्री ह किहीन कि कानून म संशोधन होय ले अब ए स्थिति म सुधार आही।
अपन रायपुर म दौरा म केन्द्रीय मंत्री डॉक्टर जितेन्द्र सिंह मेडिकल कॉलेज सभागृह म वक्फ संशोधित अधिनियम के संबंध म मुस्लिम समाज अउ दूसर समाज के बुद्धिजीवी वर्ग ल जागरूक करे बर आयोजित व्याख्यान माला म घलो मुख्य वक्ता के रूप म सामिल होइन। ए मउका म मुख्यमंत्री विष्णुदेव साय घलो मौजूद रिहीन।
वक्फ-कार्यशाला
एखर पहिली, भारतीय जनता पार्टी के प्रदेस इकाई डहार ले आज रापपुर के कुशाभाऊ ठाकरे परिसर म वक्ल बिल उपर कार्यशाला करे गीस, जेमा भाजपा के राष्ट्रीय महामंत्री डॉक्टर राधामोहन दास ह किहीन कि केन्द्र सरकार ह वक्फ बिल म संशोधन करे हे। एखर मतलब ए नइ हे कि भाजपा एखर विरोधी हे, बल्कि भाजपा ह वक्फ के समर्थक हवय।
उहें, मुख्यमंत्री विष्णुदेव साय ह किहीन कि वक्फ बोर्ड के संपत्ति के फायदा आम मुस्लिम मन ल नइ मिल सकत रिहीस। अब एखर फायदा गरीब मुसलमान मन ल घलो मिलही।
राज्यपाल/मुख्यमंत्री-नक्सल पीड़ित मुलाकात
बस्तर संभाग के कांकेर, नारायणपुर, सुकमा अउ बीजापुर जिला ले आय नक्सल हिंसा ले पीड़ित ग्रामीण मनके प्रतिनिधिमंडल ह आज रायपुर म राज्यपाल रमेन डेका अउ मुख्यमंत्री विष्णुदेव साय ले भेंट करीन। ए दउरान पीड़ित ग्रामीण मन ह राज्यपाल अउ मुख्यमंत्री ल अपन समस्या बतईन अउ ज्ञापन सौंपीन। राज्यपाल ह सबो पीड़ित मन ले गोठबात करीन अउ सासन डहार ले नक्सल हिंसा ले प्रभावित लोगन ल जउन सहायता रासि उपलब्ध कराय गेहे, ओ रासि के सद्पयोग करे बर किहीन।
उहें, मुख्यमंत्री ले भेंट के दउरान प्रतिनिधिमंडल ह कर्रेगुट्टा के पहाड़ी म चलत नक्सल विरोधी अभियान ल निर्णायक मोड़ तक पहुंचाय के अपील करीन। ओमन किहीन कि बस्तर के हजारों परिवार चार दशक ले माओवादी आतंक के सामना करत हे, जेखर ले क्षेत्र के सामाजिक, शैक्षणिक अउ आर्थिक नींव ल गहरा नुकसान पहुंचे हे। ए बखत सुरक्षा के कार्रवाई अउ सरकार के नीति ले बस्तर म सांति अउ विकास के आसा जगे हे। मुख्यमंत्री ह उंखर मनके बात ल गंभीरता ले सुनीन अउ ओमन ल भरोसा देवईन कि राज्य सरकार ह नक्सलवाद ल पूरा तरीका ले खतम करे बर प्रतिबद्ध हे।
मुख्यमंत्री-बस सेवा शुभारंभ
मुख्यमंत्री-जनगणना
केन्द्रीय मंत्रिपरिषद डहार ले जातीय जनगणना कराय जाय के फइसला के मुख्यमंत्री विष्णुदेव साय ह स्वागत करीन हे। ओमन किहीन कि ए फइसला सामाजिक सद्भाव अउ देस के विकास बर जरूरी हे। श्री साय ह किहीन कि आजादी के बादेच कांग्रेस हमेशा जातिगत जनगणना के विरोध करत आय हे। बछर दू हजार दस म तत्कालीन कांग्रेस के अगुवई वाले यूपीए सरकार ह जातिगत जनगणना बर सहमति जताय रिहीस। फेर कांग्रेस ह जनगणन नइ होन दीस।
अंतर्राष्ट्रीय श्रमिक दिवस
आज अंतर्राष्ट्रीय श्रमिक दिवस हे। श्रमिक आंदोलन अउ आने-आने देस के अर्थव्यवस्था म कामगार मनके योगदान ल देखाय बर हर बछर एक मई के श्रमिक दिवस मनाय जाथे।
श्रमिक दिवस म आज राजधानी रायपुर संघरा प्रदेस म घलो कतकोन कार्यक्रम करके श्रमिक मनके सम्मान करे जावत हे।
माओवादी-हत्या
छत्तीसगढ़ अउ झारखंड के सीमा म ग्राम पंचायत ओरसापाठ म पाछु रतिहा माओवादी मन ह सड़क बनाय के काम म लगे मुंशी के गोली मारके हत्या कर दीन। एखर अलावा दू ठन गाड़ी ल आगी लगा दीन। घटना के सूचना मिलते साथ दूनों राज्य के पुलिस मउका म पहुंचीस अउ जांच सुरू करीन।
नमाज-गिरफ्तारी
बिलासपुर के गुरू घासीदास केन्द्रीय विश्वविद्यालय म एन.एस.एस. कैम्प के दौरान जबरन नमाज पढ़ाय के मामला म पुलिस ह तत्कालीन एनएसएस प्रभारी प्रोफेसर दिलीप झा ल गिरफ्तार करे हे। उहें, आठ झन दूसर कार्यक्रम अधिकारी मनके खिलाफ घलो एफ.आई.आर. दर्ज करे गेहे। कोटा पुलिस ह दिलीप झा ल हिरासत म लेके पूछताछ सुरू कर देहे।
खबर के मुताबिक कोटा क्षेत्र के ग्राम शिवतराई म एक महीना पहिली सात दिवसीय एन.एस.एस. सिविर के आयोजन करे गे रिहीस।
प्राचार्य पदोन्नति रोक
छत्तीसगढ़ उच्च न्यायालय ह स्कूल शिक्षा विभाग डहार ले व्याख्याता ले प्राचार्य के पद म करे गे पदोन्नति उपर रोक लगा देहे। न्यायालय ह स्कूल सिक्षा विभाग के फैसला म नाराजगी जतावत अवमानना के नोटिस घलो जारी कर देहे। अब ए मामला म अगला सुनवाई सात मई के होही।
खबर के मुताबिक प्राचार्य के पद म होवइया पदोन्नति के बारे म उच्च न्यायालय म कतकोन याचिका लगे हे। एक ठिन अइसने मामला के सुनवाई के दउरान राज्य सरकार डहार ले न्यायालय ल भरोसा देवाय गे रिहीस कि अवइया सुनवाई तक प्राचार्य के पद म पदोन्नति के आदेस जारी नइ करे जाही।
अब अब मौसम के हाल…
प्रदेस म आज मंझनिया बाद अचानके मौसम बदलीस अउ राजधानी रायपुर संघरा कतकोन जघा म अंधड़ चले के संग तेज बरसा होइस। रायपुर म लगभग नब्बे किलोमीटर प्रतिघंटा के रफ्तार ले अंधड़ चलीस, जेखर ले कतकोन जघा म पेड़ अउ होर्डिंग्स मन गिर गीन। संगेसंग बैनर-पोस्टर फट के उड़ गीन। अंधड़ के सेती राजधानी के कतकोन इलाका म बिजली आपूर्ति प्रभावित रिहीस।
भिलाई म घलो तेज हवा के संग बरसा होइस। हवा अतका तेज रिहीस कि पार्किंग म खड़े दुपहिया वाहन मनके गिरे के समाचार घलो मिले हे।
मौसम विभाग ले मिले जानकारी के अनुसार एक ठिन द्रोणिका दक्षिण-पश्चिम राजस्थान के ऊपर बने हे, जेखर कारण मौसम म बदलाव देखे जावत हे। अवइया चौबीस घंटा के दउरान रायपुर, दुरूग अउ बिलासपुर संभाग के एक-दू जघा म गरज-चमक के संग अंधड़ चले के, आकाशीय बिजली गिरे के अउ ओलावृष्टि होय के संभावना हे।