मंत्रिमंडल ह चीनी मौसम दू हजार पच्चीस-छब्बीस बर तीन सौ पचपन रूपिया प्रति कुंटल के हिसाब ले गन्ना के उचित अउ लाभकारी मूल्य ल तय करे के स्वीकृति देहे। श्री वैष्णव ह कहिन कि ए फइसला ले पांच करोड़ गन्ना किसान मनके संगेसंग चीनी मिल अउ संबंधित सहायक गतिविधि म काम करत पांच लाख श्रमिक मन ल घलो फायदा मिलही।
मंत्रिपरिषद-बैठक
मुख्यमंत्री विष्णुदेव साय के अध्यक्षता म आज मंत्रालय म राज्य मंत्रिमंडल के बइठका होइस। मंत्रिपरिषद ह एक ठिन बड़का फइसला लेवत हुए प्रदेस के दू हजार छह सौ इक्कीस बीएड अर्हताधारी सहायक सिक्षक मन ल अंतरविभागीय समिति के अनुंससा के अनुसार सहायक सिक्षक विज्ञान प्रयोगसाला के रिक्त चार हजार चार सौ बाईस पद बर समायोजन करे के निर्णय ले गेहे। एखर बर स्कूल सिक्षा विभाग ल अधिकृत करे गेहे। उपमुख्यमंत्री अरूण साव ह पत्रकार मन ले गोठ करत हुए बतईन कि ए सिक्षक मनके बछर दू हजार तेईस म सीधा भर्ती म नियुक्त करे के बाद सेवा ल समाप्त कर दे गे रिहीस। मंत्रिमंडल के फइलसा ले अब सहायक सिक्षक मन ल राहत मिलही।
मंत्रिपरिषद ह राज्य के सुदूर अनुसूचित अउ ग्रामीण क्षेत्र म ‘‘मुख्यमंत्री ग्रामीण बस सुविधा योजना‘‘ सुरू करे फइसला लेहे। उपमुख्यमंत्री ह बतईन कि ए योजना ले जुड़े गाड़ी मालिक मन ल गांव वाले रद्दा म गाड़ी चलाय बर प्रथम परमिट निर्गमन के तारीख ले तीन बछर अधिकतम अवधि बर मासिक कर म पूरा छूट दे जाही।
उहें, मंत्रिपरिषद ह तकनीकी शिक्षा ल बढ़ावा दे बर नवा रायपुर म स्टेट ऑफ आर्ट राष्ट्रीय इलेक्ट्रॉनिकी अउ सूचना प्रौद्योगिकी संस्थान-एन.आई.ई.एल.आई.टी. के स्थापना पर दस एकड़ ले जादा के भूईंया ल निःशुल्क आवंटित करे के प्रस्ताव के अनुमोदन करीन। एखर अलावा मंत्रिपरिषद ह रेगहा, बटाई, लीज अउ डुबान वाले जघा म खेती करइया किसान मन ल घलो कृषक उन्नति योजना ले जोड़े के फइसला लेहे।
वेव्स शिखर सम्मेलन
पहिली विश्व ऑडियो विजुअल एंटरटेनमेंट शिखर सम्मेलन-वेव्स काली एक मई ले मुंबई के जियो वर्ल्ड कन्वेंशन सेंटर म सुरू होही। प्रधानमंत्री नरेन्द्र मोदी ह एखर उद्घाटन करही। चार दिन तक चलइया ए कार्यक्रम ह श्रव्य, दृश्य अउ मनोरंजन के भविष्य बर गोठ करे खातिर वैश्विक मंच प्रदान करही। कार्यक्रम म वैश्विक मीडिया संवाद, क्रेता-विक्रेता चर्चा, आगू आत सृजनकर्ता मन बर अपन सामग्री ल प्रस्तुत करय अउ बढ़ावा देके सत्र अउ कहानी सुनाय के नवा जमाना के प्रारूप के बारे म घलो जानकारी दे जाही।
ए शिखर सम्मेलन मनोरंजन, प्रतिभा अउ रचनात्मकता के क्षेत्र म भारत के आपार संभावना ल दुनिया के आगू लाय के एक अवसर दीहीं। चार मई तक चले वाले ए सम्मेलन म दुनियाभर के सीर्ष मीडिया सीईओ अउ मनोरंजन जगत के बड़े लोगन मन एक संघरा आही। ए कार्यक्रम म सौ ठिन देस के लगभग पांच हजार प्रतिनिधि मनके भाग लेके उम्मीद हे। एखर अलावा कतकोन दिग्गज कलाकार – अमिताभ बच्चन, रजनीकांत, चिरंजीवी, मोहन लाल, नागार्जुन, शाहरूख खान, अनिल कपूर, अक्षय कुमार, आलिया भट्ट अउ आमिर खान शिखर सम्मेलन म भाग लीहीं। ए सम्मेलन म लोगन मन ल भारत के संगेसंग दुनियाभर के कतकोन जघा के कला, संस्कृति अउ सिनेमा के झलक देखे बर मिलही।
सीआईएससीई-परीक्षा परिणाम
काउंसिल फॉर द इंडियन स्कूल सर्टिफिकेट एग्जामिनेशन ह आई.एस.सी.ई. के दसवीं अउ आई.एस.सी. के बारहवीं कक्षा के परिणाम ल घोसित कर देहे। दसवीं के परीक्षा म निन्यानवे दशमलव तीन सात प्रतिशत के संग छात्रा मन ह छात्र ले जादा अच्छा प्रदर्शन करे हे। बारहवीं के कक्षा म घलो निन्यानवे दशमलव चार-पांच प्रतिशत छात्रा मन ही पास होय हे। उहें, छात्र मनके पास होय के प्रतिशत ह अंठानवे दशमलव छह-चार प्रतिशत रहिस।
अंतर्राष्ट्रीय-श्रमिक दिवस
काली अंतर्राष्ट्रीय श्रमिक दिवस हरय। ए मउका म श्रम मंत्री लखनलाल देवांगन ह श्रमवीर मन ल बधाई अउ सुभकामना देहे। ओमन ह कहिन हे कि राज्य सरकार ह श्रमिक मन समेत सबो जरूरतमंद लोगन मनके विकास बर हरसंभव कोसिस करत हे। संगेसंग श्रम विभाग के तीनों मंडल छत्तीसगढ़ भवन अउ आने सन्निर्माण कर्मकार मंडल, संगठित कर्मकार, राज्य सामाजिक सुरक्षा अउ श्रम कल्याण मंडल के माध्यम ले योजना के सफल क्रियान्वयन होवत हे।
अक्षय तृतीया
प्रदेस म अक्षय तृतीया के परब ल आज उत्साह के संग मनाय जात हे। छोटे लइका मन ह एक कोति गुड्डा-गुड़िया के बिहाव करीन। त उहें, दूसर कोति लोगन मन ल मंदिर देवाला म दान-दक्षिणा करके बिसेस पूजापाठ करीन। ए मउका म राजधानी रायपुर समेत प्रदेस के कतकोन जघा म भंडारा घलो कराय गीस। उहें, सराफा बाजार म घलो बड़ रौनक देखे बर मिलीस।
चारधाम यात्रा
अक्षय तृतीया के पावन परब म आज उत्तराखंड के उत्तरकाशी जिला म गंगोत्री अउ यमुनोत्री धाम के कपाट ल परंपरा के अनुसार वैदिक मंत्रोच्चार के संग श्रद्धालु मन बर खोल दे गीस। एखर संगेसंग चारधाम यात्रा के सुभारंभ होगे हे। उत्तराखंड के मुख्यमंत्री पुष्कर सिंह धामी ह कहिन हे कि चारधाम यात्रा म अवइया श्रद्धालु मनके यात्रा ल सुगम बनाय बर बिसेस इंतजाम करे गेहे।
कोरिया गुणवत्ता-आश्वासन
राष्ट्रीय क्षय उन्मूलन कार्यक्रम अउ राष्ट्रीय गुणवत्ता आश्वासन मानक म उत्कृष्ट प्रदर्शन करे बर कोरिया जिला ल चार ठिन आने-आने श्रेणी म राज्य स्तरीय सम्मान मिले हे। रायपुर म होय ए कार्यक्रम म स्वास्थ्य मंत्री श्यामबिहारी जायसवाल ह ए सम्मान ल प्रदान करीन। ए बेरा म श्री जायसवाल ह कहिन कि प्रदेस म अच्छा अधोसंरचना अउ स्वास्थ्य सुविधा के विस्तार बर राज्य सरकार ह प्रतिबद्ध हे। ओमन डॉक्टर अउ स्टाफ ले किहीन हे कि ओमन ह मरीज मनके अच्छा इलाज अउ जांच बर संकल्पबद्ध रहय।
दुर्घटना
कोंडागांव जिला के फरसगांव थाना क्षेत्र म होय सड़क हादसा म पिता अउ बेटी के मउत होगे। उहें, परिवार के दू झिन आने लोगन ह गंभीर रूप ले घायल होगे हे। जानबा के अनुसार एक परिवार ह अपन मोटर साइकिल ले बिहाव मजाय बर फरसगांव ले केशकाल कोति जात रिहीन। फेर इही बेरा म माझीआठ गांव के तीर म उंखर मोटर साइकिल ह अनियंत्रित होके दूसर डहार ले आत कार ले टकरा गीस। ए हादसा म दू झिन लोगन मनके मउका म ही मउत होगे हे। उहें, दू झिन आने घायल मन ल कोंडागांव जिला अस्पताल म भर्ती कराय गेहे।
ऐति, नारायणपुर जिला के कुतुल अउ बेड़माकोटी के बीच होय रद्दा हादसा म एक झिन माईलोगिन के मउत होगे। जबकि दू झिन ट्रक चालक समेत पांच झिन लोगन ल सामान्य चोट आय हे।
गांजा-तस्करी सजा
कबीरधाम जिला के अतिरिक्त सत्र न्यायालय ह गांजा तस्करी म सामिल छह झिन आरोपी मन ल दोसी बतावत हुए पन्द्रह बछर के कारावास अउ एक-एक लाख रूपिया के जुर्माना के सजा सुनाय हे। आरोपी मन ल इंदौर के नार्कोटिक्स कंट्रोल ब्यूरो-एनसीबी ह बीस मई दू हजार बाईस के गांजा रखे के आरोप म गिरफ्तार करे रिहीन। गिरफ्तारी के बाद एनसीबी ह उही बछर म ग्यारह नवंबर के ए मामला के सिकायत दरज करीन अउ चौदह नवंबर ले ए मुकदमा ल सुरू करे गे रिहीस।
अउ अब मौसम के हाल…
मौसम विभाग ले मिले जानबा के अनुसार काली प्रदेस के एक-दू ठिन जघा म हल्का बरसा होय अउ गरज-चमक के संग हवा-गरेर चले के संभावना हे। उहें, कुछेक जघा म गाज अउ करा गिरे के चेतावनी दे गेहे। ए बेरा म प्रदेस के अधिकतम तापमान म विशेष परिवर्तन होय के संभावना नो हरय।