छत्तीसगढ़ राज्य वक्फ बोर्ड कोति ले वक्फ संपत्ति के किराया ऑनलाइन लेके फइसला ले गेहे। एमा प्रदेस के हरेक जिला के मस्जिद के अकाउंट ऑनलाइन खोलवाय गेहे। वक्फ बोर्ड के नवा निरदेस के पालन मस्जिद अउ मदरसा के अधिकारी मन ह सुरू कर देहे। राज्य वक्फ बोर्ड ह एला लेके निरदेस जारी करे हे। आकाशवाणी समाचार ले गोठबात करत राज्य वक्फ बोर्ड के अध्यक्ष डॉक्टर सलीम राज ह बतईन कि छत्तीसगढ़ ह देस के पहिली अइसन राज्य होही, जिहां वक्फ संपत्ति के किराया ऑनलाइन ले जाही।
मुख्यमंत्री-नगरीय निकाय समीक्षा
मुख्यमंत्री विष्णुदेव साय ह काली मंत्रालय म नगरीय प्रसासन अउ विकास विभाग के कामकाज के समीक्षा करीन। ओमन अधिकारी मन ल सहर म अवइया दस बछर के जरूरत के हिसाब ले पानी के बेवस्था सुनिश्चित करे अउ सहर के बाहिरी हिस्सा म बनत नवा रिहायशी क्षेत्र म प्राथमिकता ले उद्यान बनाय के निरदेस दीन। मुख्यमंत्री ह सबो नगरीय निकाय म अटल विश्वास पत्र म मुख्य रूप ले अमल करे बर किहीन हे। ओमन निर्माण अउ विकास काम के बढ़वार के मॉनिटरिंग बर ऐप या ऑनलाइन सिस्टम तियार करे बर किहीन। श्री साय ह रईपुर नगर निगम असन आने नगरीय निकाय म घलो संपत्ति कर के वसूली खातिर ऑनलाइन सिस्टम तियार करे म जोर दीन। बइठका म मुख्यमंत्री ह ‘‘मोर संगवारी योजना‘‘ म घर पहुंच दस्तावेज बनाय के व्यवस्था ल केन्द्र सरकार के डिजी लॉकर ले लिंक करे बर किहीन हे।
यूपीएससी परीक्षा-प्रोत्साहन राशि
राज्य सरकार ह संघ लोक सेवा आयोग-यूपीएससी मेन्स के परीक्षा पास करइया उम्मीदवार मन ल एक लाख रूपिया प्रोत्साहन रकम देके घोसना करे हे। ए संबंध म नगरीय प्रसासन विभाग ह सबो नगर पालिक निगम ल आदेस जारी कर देहे। ए रकम चुने गे प्रतिभागी ल महापौर सम्मान निधि ले दे जाही।
पंजीयन विभाग-समीक्षा
वाणिज्य मंत्री ओ.पी. चौधरी ह काली नवा रायपुर म पंजीयन विभाग के अधिकारी मन संग बइठका करके विभागीय कामकाज के समीक्षा करीन। बइठका म श्री चौधरी ह पाछु बछरभर म होय सुधार पंजीयन दस्तावेज के स्थिति, राजस्व प्राप्ति, सतर्कता प्रकोष्ठ के गतिविधि, न्यायालयीन प्रकरण के स्थिति, मुद्रांक अउ आरआरसी प्रकरण, ऑडिट रिपोर्ट अउ डाटा डिजीटाईजेशन के जिलावार बढ़वार के जानकारी लीन। संगेसंग अधिकारी मन ल निर्देश दीन कि आम लोगन बर सासन कोति दे जात आने-आने सुभीता के प्रचार-प्रसार करयं अउ पंजीयन कार्यालय म फ्लैक्स अउ बैनर लगाय जाय। श्री चौधरी ह रईपुर, दुरूग अउ बिलासपुर जिला ल राजस्व मिले म अव्वल रेहे खातिर प्रसंसा करीन।
राज्यपाल-जीपीएम
राज्यपाल रमेन डेका गौरेला-पेण्ड्रा-मरवाही जिला के दउरा के दूसर दिन आज अमरकंटक पहुंचीन। ओमन नर्मदा मईया के पूजापाठ करके प्रदेस के खुसहाली बर मानता मानीन। दउरा के बेरा राज्यपाल ह धरमपानी के इको हिल रिसॉर्ट म चलाय जात एकलव्य आदर्श आवासीय विद्यालय, पीएमश्री स्कूल, पेण्ड्रारोड गुरूकुल अउ लालपुर के छात्रावास के लइका मन ले भेंट करीन। ए बेरा म राज्यपाल ह लइका मन ले पढ़ई-लिखई, उंखर सउक अउ खेलकूद के संबंध म बात करीन।
ए दउरान राज्यपाल ह पकरिया आंगनबाड़ी केन्द्र ल देखीन अउ आंगनबाड़ी म मिलइया सुभीता, भोजन के गुणवत्ता अउ पोषण के जानकारी लीन। ए मउका म श्री डेका ह एक पेड़ मां के नाम अभियान म आम के पौधा रोपीन। राज्यपाल ह पकरिया गांव म प्रधानमंत्री आवास योजना-ग्रामीण के लाभान्वित परिवार ले भेंट करीन।
केन्द्रीय कृषि मंत्री-विज्ञान केन्द्र
केन्द्रीय कृषि मंत्री शिवराज सिंह चौहान ह काली नई दिल्ली म वर्चुअल माध्यम ले देसभर के सबो सात सौ इकतीस कृषि विज्ञान केन्द्र के संग गोठबात करीन। श्री चौहान ह ए बात म जोर दीन कि कृषि क्षेत्र के बढ़वार बर अभियान के रूप म काम करे के जरूरत हवय। ओमन किहीन कि किसानी व्यापक क्षेत्र हे अउ प्रत्यक्ष रूप ले करीबन पैंतालीस प्रतिशत जनसंख्या किसानी ले जुड़े हे। श्री चौहान ह बतईन कि देस के सकल घरेलू उत्पाद-जीडीपी के करीबन अट्ठारह प्रतिशत हिस्सा किसानी क्षेत्र ले ही आथे। एखरे सेती एला अउ बने ढंग ले करे बर हमन ल सरलग परयास करे पर पड़ही।
चारधाम यात्रा-प्रसारण
आकाशवाणी ले चारधाम यात्रा के उद्घाटन के सोझे प्रसारण करे जाही। गंगोत्री धाम के खुले के सोझे प्रसारण काली बिहनिया दस ले ग्यारह बजे तक होही। उहें, यमुनोत्री धाम के प्रसारण साढ़े ग्यारह ले साढ़े बारह बजे तक होही। केदारनाथ धाम के कपाट खुले के सोझे प्रसारण दू मई के बिहनिया छह बजे होही। बद्रीनाथ धाम के खुले के सोझे प्रसारण चार मई के बिहनिया साढ़े छह बजे साढ़े सात बजे तक होही। सोझे प्रसारण आकाशवाणी के इंद्रप्रस्थ, एफ.एम. गोल्ड अउ आराधना चैनल के संगेसंग न्यूज ऑन एआईआर म घलो मौजूद रइही। यात्रा ले जुड़े रिपोर्ट घलो काली ले चार मई तक हरेक दिन संझा साढ़े सात ले सात बजके पैंतालीस मिनट तक प्रसारित करे जाही।
मुख्यमंत्री-नगरीय निकाय समीक्षा
मुख्यमंत्री विष्णुदेव साय ह काली मंत्रालय म नगरीय प्रसासन अउ विकास विभाग के कामकाज के समीक्षा करीन। ओमन अधिकारी मन ल सहर म अवइया दस बछर के जरूरत के हिसाब ले पानी के बेवस्था सुनिश्चित करे अउ सहर के बाहिरी हिस्सा म बनत नवा रिहायशी क्षेत्र म प्राथमिकता ले उद्यान बनाय के निरदेस दीन। मुख्यमंत्री ह सबो नगरीय निकाय म अटल विश्वास पत्र म मुख्य रूप ले अमल करे बर किहीन हे। ओमन निर्माण अउ विकास काम के बढ़वार के मॉनिटरिंग बर ऐप या ऑनलाइन सिस्टम तियार करे बर किहीन। श्री साय ह रईपुर नगर निगम असन आने नगरीय निकाय म घलो संपत्ति कर के वसूली खातिर ऑनलाइन सिस्टम तियार करे म जोर दीन। बइठका म मुख्यमंत्री ह ‘‘मोर संगवारी योजना‘‘ म घर पहुंच दस्तावेज बनाय के व्यवस्था ल केन्द्र सरकार के डिजी लॉकर ले लिंक करे बर किहीन हे।
दुर्घटना
बलरामपुर जिला के वाड्रफनगर पुलिस चौकी क्षेत्र म पाछु रतिहा होय रद्दा दुर्घटना म तीन झिन युवक के मउत होगे। खबर के मुताबिक तीनों एके फटफटी म बइठ के एक ठिन कार्यक्रम म संघरे बर गे रिहीन। लहुटत बेरा पेंडारी गांव तीर उंखर फटफटी अनते-तनते होके रद्दा तीर के पेड़ ले टकरा गे। ए हादसा म तीनों युवक के मउकाच म मउत होगे। सूचना मिलतेच पुलिस मउका म पहुंच के सव ल पोस्टमार्टम बर भेजे हे।
अक्षय तृतीया
प्रदेस म अक्षय तृतीया यानि अक्ती के परब काली उछाह के संग मनाय जाही। नान्हें लइका मन पुतरा-पुतरी के बिहाव करही। एखर बर आजे ले बाजार-हाट म सुघ्घर-सुघ्घर सजे पुतरा-पुतरी अउ कलसा मिलत हे। संगेसंग अक्ती के दिन मंदिर देवाला मन म बिसेस पूजापाठ अउ दान-धरम करे जाथे।
अक्षय तृतीया के मउका म बाल विवाह ल रोके बर राज्य सासन ह आने-आने जिला के प्रसासन ल बिसेस सतर्कता बरते के निरदेस देहे। महिला अउ बाल विकास विभाग के सचिव शम्मी आबिदी ह बाल विवाह ल रोके बर कलेक्टर, पुलिस अधीक्षक अउ जिला जनपद पंचायत के सीईओ मन ल दिसा-निरदेस जारी करे हे। ए निरदेस म केहे गेहे कि कानून के उल्लंघन करे म वर-वधु के अभिभावक, सगे रिश्तेदार अउ बाराती अउ विवाह संपन्न करइया पंडित मन उपर घलो कानूनी कार्रवाई करे जाय। सासन ह सबो लोगन मन ले ए दिसा म सहयोग करे के अपील करे हे। कहूं कोनों ल बाल विवाह के सूचना मिलही त, तीर-तखार थाना के प्रभारी या चाईल्ड हेल्पलाइन नंबर – एक शून्य नौ आठ या महिला हेल्पलाइन नंबर – एक आठ एक या आपातकालीन सेवा एक सौ बारह म जानकारी दे सकथे।
अउ अब मौसम के हाल…
मौसम विभाग ले मिले जानकारी के मुताबिक प्रदेस म काली कुछेक जघा म छिटपुट बरसा के संग छींटा बौछार होय के संभावना हवय। उहें, अवइया चौबीस घंटा म प्रदेस के एक-दू जघा म हवा गरेर संग गाज गिरे अउ करा गिरे के आसार हवय।
इही बीच, आज सरगुजा संभाग के जशपुर अउ अंबिकापुर समेत तीर-तखार के क्षेत्र म गरज-चमक संग बरसा होय के समाचार मिले हे।
थोरकुन समाचार सार म –
– मुख्यमंत्री विष्णुदेव साय के अगुवई म काली तीस अप्रैल के बिहनिया साढ़़े ग्यारह बजे राज्य मंत्रिपरिषद के बइठका होही।
– राज्य सरकार ह भारतीय वन सेवा के पैंतीस झिन अधिकारी मनके प्रभार म फेरबदल करे हे।
– स्वास्थ्य विभाग ह सात झिन चिकित्सा अधिकारी मनके तबादला के आदेस जारी कर देहे।
अउ
– भोपाल म चौबीस ले अट्ठाईस अप्रैल तक राखे गे पैंतीसवां राष्ट्रीय सब जूनियर अउ जूनियर कयाकिंग अउ केनोईंग प्रतियोगिता म छत्तीसगढ़ के खिलाफ सौरभ साहू, शिव कुमार अउ निकोलस ह दू सौ मीटर इवेंट म कांस्य पदक जीते हे।