प्रधानमंत्री नरेंद्र मोदी ह किहीन हे कि पहलगाम आतंकी हमला के दोषी अउ षडयंत्र रचइया मन ल कठोर रूप ल जवाब दे जाही। आकाशवाणी ले मन की बात कारीकरम म श्री मोदी ह किहीन कि ए हमला ह आतंकवाद के आका मनके हतासा अउ कायरता ल बताथे।
प्रधानमंत्री ह किहीन कि आतंकवाद के खिलाफ ए लड़ई म देस के एकता ह सबले बड़का ताकत हे अउ आतंकी हमला के बाद जम्मों दुनिया ले संवेदना आवत हे।
प्रधानमंत्री ह छत्तीसगढ़ म दंतेवाड़ा के साईंस सेंटर के चर्चा करत किहीन कि ए केंद्र ह लइका मनके जीवन म नवा बदलाव लाय हे। कुछ समय पहिली तक दंतेवाड़ा के नाव खाली मारकाट अउ असांति बर जाने जात रिहीस। फेर अब उंहा साईंस सेंटर ह लइका अउ उंखर महतारी-बाप बर उम्मीद के नवा किरण बन गेहे। ए साईंस सेंटर म जवई लइका मन ल भारी पसंद आवत हे। ओमन अब नवा-नवा मसीन बनाय ले लेके टेक्नालॉजी ल बउर के नवा प्रोडक्ट बनाना सिखत हे। संगे ओमन ल थ्री-डी प्रिंटर्स अउ रोबोटिक कार के संगेसंग दूसर इनोवेटिव जिनिस बारे म जाने के मउका मिले हे।
मन की बात-02
प्रधानमंत्री ह किहीन कि कोनो भी प्राकृतिक आपदा ले निपटे म जागरूकता मुख्य होथे। ओमन यहू किहीन कि अब प्राकृतिक आपदा याने अलहन के स्थिती म लोगन अपन मोबाइल म सचेत ऐप के मदद ले सहायता ले सकत हे।
श्री मोदी ह किहीन कि अवइया पांच जून के विश्व पर्यावरण दिवस म ‘एक पेड़ मां के नांव‘ ए अभियान के एक बछर पूरा हो जही।
प्रधानमंत्री ह उन्नीस सौ सत्रह म महात्मा गांधी के अगुवई म होय चंपारण सत्याग्रह के चर्चा करीन। ओमन किहीन कि एक सौ आठ बछर आगू अप्रैल अउ मई के महिना म देस के आजादी खातिर एक ठिन अनोखा लड़ाई लड़े गे रिहीस।
उहें, प्रधानमंत्री ह किहीन कि अवइया दस मई के प्रथम स्वतंत्रता संग्राम के वर्षगांठ मनाय जाही अउ अट्ठारा सौ संतावन क्रांति के महान नायक बाबू वीरसिंह कुंवर के पुण्यतिथि छब्बीस अप्रैल के मनाय गीस। श्री मोदी ह किहीन कि देस ल अपन ए स्वतंत्रता संग्राम सेनानी फ्रीडम फाइटर मनके अमर प्रेरणा ल सबर दिन सुरता राखना हे।
मन की बात-छत्तीसगढ़
मुख्यमंत्री विष्णुदेव साय ह आज अपन निवास कार्यालय म जनप्रतिनिधि, अधिकारी अउ करमचारी मन संग प्रधानमंत्री के मासिक रेडियो कारीकरम ‘मन की बात‘ ल सुनिन। ए मउका म मुख्यमंत्री ह किहीन कि प्रधानमंत्री ह ए बखत ‘मन की बात‘ कारीकरम म छत्तीसगढ़ के दंतेवाड़ा जिला म स्थापित विज्ञान केंद्र के बिसेस रूप ले बड़ई मारिन। ओमन एला प्रदेस बर गर्व के बिसय बतावत प्रधानमंत्री के प्रति हार्दिक आभार व्यक्त करीन।
उपमुख्यमंत्री अरूण साव ह किहीन कि मन की बात कारीकरम म प्रधानमंत्री ह दंतेवाड़ा के विज्ञान केंद्र के तारीफ करीन हे। एखर ले ए साबित होथे कि बस्तर म सांति स्थापित होवत हे।
उहें, दंतेवाड़ा जिला पंचायत के सीईओ जयंत नाहटा ह आकाशवाणी समाचार ले गोठबात करत बतइन कि दूरिहा इलाका म ए साईंस सेंटर ए पाय के बनाय गे हे कि इंहा पढ़इया लइका मन ल विज्ञान के जानकारी मिल सकय।
ऐति, ए मन की बात कारीकरम ल भाजपा प्रदेस अध्यक्ष किरण सिंह देव ह रईपुर ग्रामीण विधानसभा म क्षेत्रीय संगठन महामंत्री अजय जामवाल ह फाफाडीह मंडल म अउ प्रदेस संगठन महामंत्री पवन कुमार साय ह गुढ़ियारी मंडल म सुनीन।
सीजीएमएससी आरोपी-चालान
छत्तीसगढ़ मेडिकल सर्विसेस कारर्पोरेसन लिमिटेड-सीजीएमएससी घोटाला मामला म सामिल छै झिन आरोपी मनके खिलाफ एंटी करप्शन ब्यूरो एसीबी ह रईपुर के स्पेसल कोर्ट म चलान पेस करे हे। ए चालान म एसीबी ह ए आरोपी मन उपर रीएजेंट समेत मेडिकल उपकरण के बिसई म भारी पैमाना म भ्रष्टाचार करे अउ सरकारी खजाना ल नुकसान पहुंचाय के आरोप लगाय हे।
मुख्यमंत्री-शिक्षा विभाग समीक्षा
मुख्यमंत्री विष्णुदेव साय ह किहीन हे कि छत्तीसगढ़ के यूनिवर्सिटी अउ कॉलेज मनके क्वालिटी के आधार म देस के पहलइया सौ ठिन सुघ्घर शैक्षणिक संस्थान मनके रैंकिंग म लाय बर बिसेस परयास करे जाय। ओमन यहू किहीन कि अइसन कहू होही त आने राज्य के पढ़इया लइका मन घलो पढ़ई बर छत्तीसगढ़ ल प्राथमिकता देही। मुख्यमंत्री ह अपन निवास कार्यालय म उच्च शिक्षा विभाग के कामकाज के समीक्षा बेरा ए बात किहीन।
बइठका म मुख्यमंत्री ह निरदेस दे हे कि कोरबा, दंतेवाड़ा अउ रायगढ़ असन जिला मन म जिंहा भरपूर जिला खनिज निधि-डीएमएफ के रासि हवय उंहा कोनो-कोनो कालेज मन ल चिन्हारी करके बिसय-बिसेस के नेशनल लेवल वाले मॉडल कालेज के रूप म विकसित करे जाय। ओमन किहीन कि अइसन कालेज म न केवल प्रदेस के भलूक देस-विदेस के पढ़इया लइका मन बर घलो पढ़ई-लिखई के केंद्र बन सकत हे।
श्री साय ह नवीन शिक्षा नीति के मुताबिक प्रोफेसर ऑफ प्रैक्टिस के नीति ल अपनाय उपर जोर दीन। ओमन किहीन कि कई ठिन क्षेत्र के नामी बिसय-बिसेसज्ञ मन ल पढ़ाय ले जोड़े से पढ़इया लइका मन ल व्यवहारिक ज्ञान अउ सम-सामयिक जानकारी के सोज्झे फायदा मिलही। ओमन इंदिरा कला संगीत विश्व विद्यालय खैरागढ़ ल अउ जादा सुघ्घर बनाय बर बिसेस रणनीति अउ परयास करे खातिर निरदेस घलो दीन।
ए मउका म उच्च शिक्षा विभाग के सचिव डॉक्टर भारतीदासन ह विभागीय गतिविधि मनके विस्तार ले जानकारी दीन।
गरियाबंद जिला के फिंगेश्वर विकासखंड म छत्तीसगढ़ राज्य ओपन स्कूल परीक्षा म दसवीं कक्षा के पेपर लीक होय मामला के जांच रिपोर्ट आय बाद लोक शिक्षण संचालनालय डीपीआई ह केंद्राध्यक्ष नारायण सिंह चंद्राकर, सहायक केंद्राध्यक्ष तुलसी राम यादव अउ ऑब्जर्वर नीतु शाह ल सस्पेंड कर देहे।
इंहा ए बतादन कि बीते चार अप्रैल के लोहरसी परीक्षा केंद्र म बारहवीं कक्षा के होम साईंस बिसय के परीक्षा म दसवीं कक्षा के प्रश्नपत्र बांट दे गे रिहीस। जेखर बाद ए पेपर ल केंसिल कर दे गे रिहीस।
पुलिस-ऑपरेशन
जम्मू-कश्मीर के पहलगाम आतंकी हमला के बाद गृह मंत्रालय अउ पुलिस मुख्यालय ले मिले निरदेस बाद दुरूग जिला म आज बिहनियच ले तीन एडिसनल एसपी के टीम डहार ले तीन ठिन आने-आने जघा मन म पाकिस्तानी अउ बंग्लादेसी मन के खोज म ऑपरेसन चलाय गीस। करीबन तिरालीस झिन संदिग्ध मनके चिन्हारी करे गीस। एखर मनके फिंगर प्रिंट लेके आधार कार्ड जांचे गीस। ए दउरान तीन ठिन इलाका मन म दुरूग पुलिस के तीन एडिसनल एसपी म सुखनंदन राठौर, अभिषेक झा अउ पद्मश्री तंवर के संग टीम मन करीबन चार सौ मकान म रहवइया एक हजार मनखे मन के जांच करीन।
गांजा तस्कर-गिरफ्तार
जशपुर पुलिस ह ऑपरेशन ‘‘अघात‘‘ के तहत एक झिन अंतर्राज्यीय गांजा तस्कर ले करीबन अस्सी लाख रूपिया कीमत वाले एक कुंटल तिरासी किलोग्राम अवैध गांजा बरामद करे हे।