प्रधानमंत्री नरेंद्र मोदी ह किहीन हे कि जब युवा मन देस निर्माण म भाग लेथे त, देस ह तेजी ले विकास करथे अउ दुनिया म अपन पहिचान घलो बनाथे। ओमन किहीन कि हमर देस के युवा मन अपन महिनत अउ नवा-नवा काम ले दुनिया ल देखावत हे कि देस म कतना संभावना हे। प्रधानमंत्री ह आज अब्बड़ अकन सरकारी विभाग अउ संगठन म नवा भर्ती होय इंक्यावन हजार ले जादा युवा मन ल रोजगार मेला म वीडियो कॉन्फ्रेंसिंग ले नियुक्ति पत्र बांटिन। रोजगार ल पहिली प्राथमिकता देके प्रधानमंत्री के संकल्प के क्रम म रोजगार मेला के पंद्रहवां कड़ी रिहीस, जेखर आयोजन रईपुर समेत देसभर म सैंतालीस जघा म करे गीस।
इही दउरान प्रधानमंत्री ह मुंबई म होवइया विश्व ऑडियो विजुअल और मनोरंजन शिखर सम्मेलन यानी वेव्स के बारे म किहीन कि ए आयोजन के केंद्र म घलो देस के युवा हे।
श्री मोदी ह किहीन कि देस के माईलोगिन मन नौकरी, अंतरिक्ष अउ विज्ञान के क्षेत्र म नवा ऊंचाई छूवत हे।
रोजगार मेला-केंद्रीय राज्यमंत्री
रईपुर म आयोजित करे गे रोजगार मेला म केंद्रीय आवास और शहरी कार्य राज्यमंत्री तोखन साहू ह सामिल होइन। जेमा ओमन केंद्र सरकार के आने विभाग म नवा भर्ती होय तिरसठ युवा मन ल नियुक्ति पत्र सौंपिन।
कारीकरम म गोठियात हुए श्री साहू ह किहीन कि ए रोजगार मेला प्रधानमंत्री नरेंद्र मोदी के आत्मनिर्भर भारत अउ विकसित भारत के संकल्प ल पूरा करे के दिसा म एक अउ बड़का कदम हे। ओमन बतइन कि पाछू दारी होय रोजगार मेला म लगभग इकहत्तर हजार नियुक्ति पत्र बांटे गे रिहीस अउ ए दारी इंक्यावन हजार ले जादा युवा मन ल नियुक्ति पत्र दे गेहे। केंद्रीय राज्यमंत्री ह किहीन हे कि बछर दू हजार सत्ताईस के आखिरी तक भारत ल पांच ट्रिलियन के अर्थव्यवस्था बनाना हे।
ए रोजगार मेला के आयोजन आयकर विभाग कोति ले करे गे रिहीस। कारीकरम म छत्तीसगढ़ के मुख्य आयकर आयुक्त अपर्णा करण ह किहीन कि आज तक के रोजगार मेला ले दस लाख ले जादा युवा मन ल रोजगार दे जा चुके हे।
मुख्यमंत्री-राजस्व समीक्षा
मुख्यमंत्री विष्णुदेव साय ह राजस्व अधिकारी मन ल फौती-नामांतरण के प्रक्रिया म कोनो भी प्रकार के लापरवाही नइ करे अउ सही बेरा म काम पूरा के निरदेस देहे। आज रईपुर म राजस्व काम के समीक्षा करत हुए ओमन कलेक्टर मन ल निरदेस दीन कि निश्चित बेरा म नामांतरण नइ होय म संबंधित पटवारी के जवाबदेही तय करके उंखर खिलाफ कड़ा कार्रवाई करे जाय। मुख्यमंत्री ह स्पष्ट करीन कि राजस्व विभाग के सीधा संबंध आम लोगन ले हे। राजस्व न्यायालय के संचालन हफ्ता म दू दिन खच्चित करे जाय। मुख्यमंत्री ह गांव-गवई म डिजिटल तकनीक के जादा ले जादा उपयोग करे अउ डायवर्सन प्रक्रिया ल सरल बनाय उपर जोर दीन। ओमन अविवादित नामांतरण अउ बंटवारा के मामला म जादा देरी करइया अधिकारी-करमचारी के खिलाफ कार्रवाई करे बर किहीन।
अरूण साव-प्रेसवार्ता
इही बीच, रईपुर म पत्रकार मन संग गोठबात करत उपमुख्यमंत्री अरूण साव ह किहीन कि केंद्र सरकार के तत्परता ले जम्मूकश्मीर अउ पहलगाम के वातावरण अब सामान्य होय हे। उहें, अमरनाथ यात्रा बर लोगन मन म बड़ उछाह हे अउ सरलग पंजीयन होवत हे, जेन ह बताथे कि मनखे मन भारत सरकार के व्यवस्था ले संतुष्ट हे।
छत्तीसगढ़ म माओवादी मुद्दा म श्री साव ह किहीन कि फोर्स मन ह पाछू पंद्रह महिना म माओवादी मनके खिलाफ सरलग कार्रवाही करे हे, जेखर ले ओमन डराय हे। उपमुख्यमंत्री ह माओवादी मन ले अपील करीन कि ओमन आत्मसमर्पण करके राज्य सरकार के आत्मसमर्पण अउ पुर्नवास नीति के फायदा उठाय।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘मन की बात‘ कारीकरम म अपन बिचार साझा करही। ए मासिक रेडियो कारीकरम के एक सौ इक्कीसवां कड़ी होही। आकाशवाणी अउ दूरदर्शन के जम्मों नेटवर्क, आकाशवाणी समाचार के वेबसाइट अउ न्यूज ऑन एआईआर मोबाइल ऐप म कारीकरम सीधा प्रसारित होही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना प्रसारण मंत्रालय के यूट्यूब चैनल मन म घलो एखर सीधा प्रसारण करे जाही। आकाशवाणी ले हिंदी प्रसारण के तुरते बाद मन की बात कारीकरम के क्षेत्रीय भाखा मन म प्रसारण होही।
सूचना प्रसारण-मीडिया परामर्श
केंद्र सरकार के सूचना और प्रसारण मंत्रालय ह सबो मीडिया चैनल बर परामर्श जारी करे हे। एमा ओमन ल राष्ट्रीय सुरक्षा ल देखत हुए आतंकवाद रोधी अभियान अउ सुरक्षा फोर्स मनके काम के सीधा प्रसारण ले बचे के सलाह दे गेहे। मंत्रालय ह मीडिया ले रक्षा अभियान अउ काम ले जुड़े स्त्रोत आधारित सूचना उपर रिपोर्टिंग करे ले दूर रहय के सलाह घलो देहे। मंत्रालय ह किहीन हे कि बेरा ले पहिली संवेदनसील सूचना के खुलासा ह देस विरोधी लोगन बर सहायक सिध्द हो सकत हे अउ अभियान उपर प्रभाव के संगेसंग फोर्स मन के सुरक्षा ल खतरा म डाल सकत हे।
मंत्रालय ह किहीन हे कि पाछू होय घटना ह जिम्मेदार रिपोर्टिंग के महत्व ल उजागर करे हे। कारगिल युध्द, मुंबई आतंकी हमला अउ कंधार अपहरण जइसन घटना के दउरान अंतेतंते कवरेज ह देस हित ल प्रतिकूल रूप ले प्रभावित करे रिहीस।
माओवादी ऑपरेशन-जवान घायल
बीजापुर जिला के कार्रेगुटा के जंगल म माओवादी मनके खिलाफ सुरक्षाबल के ऑपरेसन सरलग पांचवां दिन घलो जारी हे। सर्चिंग ऑपरेसन म जब सुरक्षाबल के जवान गलगम ले कार्रेगुटा पहाड़ी कोति जावत रिहीन, तभे आईईडी बम फुट गे, जेखर चपेट म आय ले डिस्ट्रिक्टर रिजर्व गार्ड-याने डीआरजी के एक जवान ह घायल होगिस, जेला सुघ्घर इलाज बर हेलीकॉप्टर ले रईपुर लाय गेहे। ए ऑपरेसन म महिला पुलिस घलो सामिल रिहीन। सुरक्षा बल ह अभी तक तीन महिला माओवादी ल मार गिराय हे।
भारतमाला परियोजना-कार्रवाई
भारतमाला परियोजना म गड़बड़ी के आरोप म आर्थिक अपराध अन्वेषण ब्यूरो यानी ईओडब्ल्यू ह कार्रवाई करत हुए चार अधिकारी मन ल गिरफ्तार करके ओमन ले पूछताछ करत हे। ए मामला म ईओडब्ल्यू ह काली सोलह जघा म दबिस देके अब्बड़ अकन कागज अउ इलेक्ट्रानिक समान जब्त करे रिहीस। जेन अधिकारी मन के इंहा छापा मारे गेहे ओमा एसडीएम, तहसीलदार, राजस्व निरीक्षक अउ पटवारी स्तर के लोगन सामिल हे। ए कार्रवाई नवा रईपुर, अभनपुर, दुरूग, भिलाई, आरंग, बिलासपुर समेत राज्य के आने जिला मन म घलो करे गे रिहीस।
अउ अब मौसम के हाल…
प्रदेस म अभी अब्बड़ गर्मी पड़त हे। फेर, काली ले कुछेक जघा म मौसम बदले के आसार हे। मौसम विभाग के अनुसार काली एक-दू जघा म हल्का बरसा होय अउ गरज-चमक के संग छींटा पड़े के संभावना हे। उहें, कुछेक जघा म हवा गर्रा चले अउ गाज गिरे के चेतावनी दे गेहे। जेखर ले प्रदेस के तापमान म थोरकुन गिरावट हो सकत हे।