भारतमाला प्रोजेक्ट म होय गड़बड़ी ल लेके एंटी करप्सन ब्यूरो-एसीबी अउ आर्थिक अपराध अन्वेसन ब्यूरो-ईओडब्ल्यू के टीम ह आज राजधानी रईपुर समेत कई ठिन जघा म छापा मारिन। मिले जानकारी के अनुसार एसीबी अउ ईओडब्ल्यू के टीम ह आज बिहनिया ले ही रईपुर समेत दुरूग, भिलाई, कोरबा अउ आरंग म तत्कालीन एसडीएम, तहसीलदार अउ राजस्व निरीक्षक समेत कई ठिन राजस्व अधिकारी मन के इंहा दबिस दीस।
बतादन कि मुख्यमंत्री विष्णुदेव साय के जन दर्शन कारीकरम म भारत माला योजना के पीड़ित किसान मन गड़बड़ी के सिकायत करे रिहीन। पीड़ित किसान मन मुआवजा तक नइ मिले के बात कहे रिहीन। मुख्यमंत्री ह सिकायत ल गंभीरता से लेत जांच के आदेस दे रिहीन।
रजिस्ट्री-नामांतरण
प्रदेस म अब लोगन मन ल जमीन के नामांतरण बर तहसील के चक्कर नइ लगाय बर पड़ही। नामांतरण के अधिकार तहसीलदार ले लेके पंजीयक ल दे दे गेहे। ए संबंध म छत्तीसगढ़ राजपत्र म अधिसूचना के प्रकाशन कर दे गेहे।
बतादन कि जमीन के खरीदी के बाद नामांतरण जरूरी होथे। एखर बर अभी संबंधित तहसील म आवेदन देना होत रिहीस। तहसील कोर्ट ले आगू के प्रक्रिया करे जात रिहीस। एखर अलावा नामांतरण के प्रक्रिया लंबा बेरा ले लंबित रहय के सेति भूमि स्वामी मन ल परेसानी होत रिहीस। राज्य सरकार ह ए समस्या के समाधान बर छत्तीसगढ़ भू-राजस्व संहिता के धारा एक सौ दस के अधीन तहतसीलदार ल मिले नामांतरण के सक्ती, जिला म पदस्थ रजिस्ट्रार अउ सब रजिस्ट्रार ल दे दे गेहे।
उद्योग भूखंड-नियम बदलाव
राज्य सरकार ह छत्तीसगढ़ भूमि विकास नियम म संशोधन करे हे। एखर चलते छत्तीसगढ़ म अब ले उद्योग एके भूखंड म दुगुना निर्माण कर सकही। एखर ले राज्य म उद्योग अउ व्यवसायिक विकास ल बढ़ावा मिलही। नगर अउ ग्राम निवेस विभाग के अधिकारी मन बतइन कि फ्लैटेड इंडस्ट्रीज बर फ्लोर एरिया रेशियों ल बढ़ाव दे गेहे। जेखर ले एके भूखंड म दुगुना निर्माण करे जा सकही। एखर सेति बिसेस रूप ले एमएसएमई अउ स्टार्टअप ल कम लागत म जादा बउरे बर सही जघा उपलब्ध होही। उहें, औद्योगिक प्लांट बर ग्राउंड कवरेज ल साठ प्रतिसत ले बढ़ाके सत्तर प्रतिसत कर दे गेहे। संघरा सेटबेक म कमी करे गेहे, जेखर ले जमीन के अधिकतम उपयोग हो सकही। नगर पालिका अउ विकास प्राधिकरण क्षेत्र म घलो भूमि विकास नियम म संशोधन करे गेहे।
मुख्यमंत्री विष्णुदेव साय ह किहीन कि ए सुधार ले राज्य म आधुनिक औद्योगिक व्यावसायिक विकास ल बढ़ावा मिलही। एखर ले निवेस म वृध्दि, रोजगार सृजन अउ राज्य के आर्थिक प्रगति ल नवा दिसा मिलही।
प्राधिकरण-कर्ज मुक्त
नवा रईपुर अटल नगर विकास प्राधिकरण पूरा तरह करज मुक्त हो गेहे। प्राधिकरण ह केंद्र सरकार अउ राष्ट्रीयकृत बैंक मन ले लेगे एक हजार सात सौ अठासी करोड़ रूपिया के पूरा करज चुका देहे। संघरा सौ करोड़ रूपिया के सरकारी गारंटी घलो राज्य सरकार ल लहुटा देहे। बतादन कि प्राधिकरण ह आधुनिक अउ नियोजित राजधानी के विकास बर बड़का पैमाना म करज ले रिहीस। ए कर्ज भूमि अधिग्रहण, सड़क, शासकीय भवन अउ शैक्षणिक संस्थान के निर्माण बर रिहीस।
अवकाश-समर कैम्प
राज्य सरकार ह स्कूल मन म गर्मी छुट्टी के दउरान समर कैम्प आयोजित करे के निरदेस दीन हे। स्कूल शिक्षा विभाग के सचिव कोमल सिंह परदेशी ह ए संबंध म प्रदेस के जम्मों कलेक्टर अउ जिला शिक्षा अधिकारी मन ल पत्र जारी करीन हे। पत्र म कहे गेहे कि समर कैम्प बिहनिया साढ़े सात बजे ले साढे़ नौ बजे के बीच स्कूल या सामुदायिक केंद्र मन म आयोजित करे जाय समर कैम्प म चित्रकारी, गायन, वादन, निबंध, कहानी लेखन, नृत्य अउ खेल-कूद जइसे गतिविधि राखे जाही। संघरा कला अउ रचनात्मक क्षेत्र के बिसेसज्ञ मन ल आमंत्रित करके ओमन ले छात्र-छात्रा मन ल मार्गदर्सन अउ प्रसिक्षण दिलाय जाही।
सौर ऊर्जा-सिस्टम
राज्य सरकार ह रईपुर स्थित गांधी भवन म सौर ऊर्जा आधारित सिस्टम स्थापित करे के योजना बनाय हे। एखर उद्देस्य भवन के विद्युत आवश्यकता मन ल पर्यावरण के अनुकूल पूरा करना हे।
खादी अउ ग्रामोद्योग बोर्ड के अध्यक्ष राकेश पांडेय अउ अक्षय ऊर्जा विकास अभिकरण-क्रेडा के अध्यक्ष भूपेन्द्र सवन्नी के बीच आज एक बइठका होइस। बइठका म गांधी भवन म सौर ऊर्जा प्रणाली के स्थापना अउ एखर उपयोगिता उपर विस्तार ले चर्चा होइस। दूनों अध्यक्ष मन परियोजना ल तुरते अमल म लाय बर परस्पर समन्वय स्थापित करे उपर सहमति जतइन हे।
माओवादी-आत्समर्पण
नारायणपुर जिला म आज चार झिन ईनामी माओवादी मन पुलिस के आगू आत्मसमर्पण कर देहे। एमा माड़ डिवीजन प्रेस टीम के कमांडर बैसाखू नुरेटी अउ कम्युनिकेशन टीम के कमांडर समीर कश्यप सामिल हे। एमन उपर पांच अउ तीन लाख रूपिया के इनाम घोसित रिहीस। उहें, कमल सिंह अउ महिला माओवादी फूलमति उपर एक-एक लाख रूपिया इनाम घोसित रिहीस।
जिला के पुलिस अधीक्षक प्रभात कुमार ह बतइन कि सरकार के नवा पुनर्वास नीति के तहत घर अउ नौकरी ह एमन ल आकर्षित करे हे। आत्मसमर्पित जम्मों माओवादी मन ल प्रोत्साहन रासि के रूप म पचास-पचास हजार रूपिया के चेक दे गीस।
रोपवे-हादसा
राजनांदगांव जिला के डोंगरगढ़ स्थित मां बम्लेश्वरी मंदिर म रोपवे के ट्राली टुटे ले भाजपा के प्रदेस महामंत्री भरत वर्मा घायल होगे हे। ओखर कंधा अउ पीठ म चोट आय हे। उहें, ट्राली म बइठे पूर्व मंत्री रामसेवक पैकरा, मां बम्लेश्वरी ट्रस्ट के अध्यक्ष मनोज अग्रवाल अउ भाजपा नेता दया सिंह ल मामूली चोट आय हे।
मिले जानकारी के अनुसार आज मंझनिया मां बम्लेश्वरी के दर्सन करके रोपवे ले नीचे उतरे के दउरान स्टेसन म पहुंचत ही ट्राली अचानक रोपवे ले अलग होके नीचे गिर गे। ए घटना के बाद घायल नेता मन ल डोंगरगढ़ एक निजी अस्पताल म भर्ती कराय गेहे। उहें, गंभीर रूप ले घायल भरत वर्मा ल प्राथमिक उपचार के बाद राजनांदगांव रिफर करे गेहे।
मुख्यमंत्री विष्णुदेव साय ह हादसा म घायल जम्मों मनखे मन के जल्दी स्वास्थ्य लाभ के कामना करीन हे।
के. कस्तूरीरंगन-निधन
इसरो के पूर्व अध्यक्ष अउ भारत के राष्ट्रीय शिक्षानीति के प्रमुख निर्माता डॉक्टर के. कस्तूरीरंगन के आज बिहनिया बेंगलुरू स्थित ओखर आवास म निधन होगे। ओमन चौरासी साल के रिहीन।
मुख्यमंत्री विष्णुदेव साय ह डॉक्टर के. कस्तूरीरंगन के निधन म दुख जतइन हे। ओमन किहीन कि डॉक्टर कस्तूरीरंगन ह इसरो म अपन सेवा ले भारत के अंतरिक्ष कारीकरम ल नवा ऊंचाई तक पहुंचाइन। ओमन हमेसा वैज्ञानिक मन बर प्रेरणास्त्रोत बने रिहीन।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत संघ लोकसेवा आयोग-यूपीएससी के परीक्षा म पैंसठवां रैंक पाय पूर्वा अग्रवाल ले लेगे भेंटवार्ता प्रसारित करे जाही। एखर प्रसारण काली छब्बीस अप्रैल के एफएम चैनल म बिहनिया नौ बजे ले करे जाही। उहें, प्रायमरी चैनल म ए कारीकरम के प्रसारण बिहनिया साढ़े दस बजे ले करे जाही। एला छत्तीसगढ़ स्थित जम्मों आकाशवाणी केंद्र एके संग रिले करही।
अउ अब थोरकुन समाचार सार म –
– प्रधानमंत्री नरेंद्र मोदी ईतवार सत्ताईस अप्रैल के मंझनिया ग्यारा बजे आकाशवाणी म ‘‘ मन की बात‘‘ कारीकरम म देस-विदेस के लोगन मन संग बिचार साझा करही। ए कारीकरम आकाशवाणी अउ दूरदर्सन के पूरा नेटवर्क म प्रसारित होही।
– आज विश्व मलेरिया दिवस हरय। मलेरिया के बारे म जागरूकता बढ़ाय अउ ए रोग उपर नियंत्रण, रोकथाम अउ एला पूरा समाप्त करे संबंधी उपाय मन ल बढ़ावा देबर ए दिवस विश्व स्वास्थ्य संगठन डहार ले हर बछर मनाय जात हे।
– मुख्य सचिव अमिताभ जैन ह शासन के जम्मों विभाग अउ कलेक्टर मन ल डिजिटल पत्राचार करे जाय के निरदेस दीन हे। ओमन पत्र जारी करके किहीन हे कि कार्य संपादन म गति लाय, उन्नक कार्यकुशलता अउ पर्यावरण संरक्षण बर डिजिटल पत्राचार के उपयोग करय।
अउ
– कोरबा जिला के ग्राम भैंसमा के पहलीपारा म काली रतिहा राखे गे एक बिहाव समारोह म जहरीला भोजन खाय ले पचास ले जादा लोग बीमार हो गेहे, जेमन ल मेडिकल कॉलेज अस्पताल म भर्ती कराय गेहे। कालेज के डीन डॉक्टर के.के. सहारे ह बतइन कि जम्मों मरीज खतरा ले बाहिर हे।