प्रधानमंत्री नरेन्द्र मोदी ह कहिन हे कि भारत ह हर आतंकवादी अउ ओला सहायता दे वाले मनके पहिचान करके उंखर मनके पता लगाही अउ पहलगाम हमला के दोसी मन ल सजा दीहीं। ओमन ह कहिन हे कि आतंकवाद ल छोड़े नइ जाही अउ भारत दुनिया के कोनों भी कोना ले अपराधी मन ल खोज के बाहर निकालही।
श्री मोदी ह राष्ट्रीय पंचायतीराज दिवस के मउका म आज बिहार म एक ठिन जनसभा ल संबोधित करत हुए कहिन कि आतंकवाद ले देस के आत्मा कभू नइ टुटही। प्रधानमंत्री ह कहिन कि न्याय ल सुनिश्चित करे बर हरसंभव कोसिस करे जाही अउ पूरा देस ह ए संकल्प बर अडिग हे। ओमन ह जोर देवत कहिन कि मानवता म विश्वास राखे वाला हरेक मनखे ह भारत के संग खड़े हे।
श्री मोदी ह भारत के प्रति एकुजटता देखाय बर विश्व अउ वैश्विक नेता मन ल धन्यवाद दीन।
दिनेश मिरानिया-श्रद्धांजलि
जम्मू कश्मीर के पहलगाम म दू दिन पहिली होय आतंकी हमला म अपन जान ल गंवाय वाले छत्तीसगढ़ के दिवंगत कारोबारी दिनेश मिरानिया के आज रायपुर म अंतिम संस्कार होइस।
एखर ले पहिली राज्यपाल रमन डेका ह आज बिहनिया श्री मिरानिया के घर म पहुंच के उंखर पार्थिव सरीर म फूल चढ़ा के श्रद्धांजलि अर्पित करीन।
उहें, मुख्यमंत्री विष्णुदेव साय ह श्री मिरानिया के अंतिम संस्कार म सामिल होके पार्थिव सरीर ल कांधा दीन। ओमन दिवंगत दिनेश मिरानिया ल श्रद्धांजलि अर्पित करीन। ए बेरा म श्री साय ह कहिन कि राज्य सरकार ह ए दुख के घड़ी म परिवार के संग खड़े हे अउ ओमन ल हरसंभव सहयोग दे जाही। मुख्यमंत्री ह कहिन कि आतंकवादी मनके एक कायराना हरकत ह देश के आत्मा म चोट करे हे। आतंकवादी मन ह पर्यटक मनके माध्यम ले कश्मीर अउ देश ल अस्थिर करे के कोसिस करे हे। ओमन कहिन हे कि देस के एक संघरा होके ए अमानवीय कृत्य के बदला लीहीं।
इही बीच, भाजपा के प्रदेस इकाई ह घलो ए आतंकी हमला दिवंगत दिनेश मिरानिया ल श्रद्धांजलि दीन। ए बेरा म भाजपा के प्रदेस अध्यक्ष किरण सिंह देव ह कहिन कि मानवता ल शर्मशार करइया आतंकी मन कोति ले पर्यटक मन उपर करे गे हमला निंदनीय हे। जम्मों देस पीड़ित परिवार के संग हवय। एको भी दोसी ल छोड़े नइ जाही।
अटल डिजिटल सुविधा केन्द्र-शुभारंभ
मुख्यमंत्री विष्णुदेव साय ह पंचायतीराज दिवस के मउका म आज रायपुर ले ‘‘अटल डिजिटल सुविधा केन्द्र‘‘ के वर्चुअल सुभारंभ करीन। ए मउका म जल संरक्षण के उद्देश्य ले प्रदेस के ग्यारह हजार छह सौ तिरानवे ग्राम पंचायत म ‘‘मोर गांव-मोर पानी‘‘ महाभियान के घलो सुरूआत करीन। उहें, पंचायत प्रतिनिधि अउ लोगन मन ले जल संरक्षण के आह्वान करत हुए ओमन ल सपथ दिलईन।
ए बेरा म पंचायत प्रतिनिधि अउ ग्रामीण मन ल संबोधित करत हुए मुख्यमंत्री ह कहिन कि आज ले प्रदेस के एक हजार चार सौ साठ ग्राम पंचायत म अटल डिजिटल सुविधा केन्द्र के सुरूवात होय हे अउ अवइया बेरा म एखर विस्तार होही। ओमन ह कहिन हे कि ए केन्द्र के सुरू होय ले ग्रामीण इलाका म डिजिटल क्रांति आही अउ प्रदेस के सरकारी सेवा अउ योजना ह आम लोगन तक आसानी ले पहुंच सकही। श्री साय ह कहिन कि प्रधानमंत्री श्री मोदी ह छत्तीसगढ़ के जनता ले वादा करे रिहीन ग्राम पंचायत म नगद भुगतान के सुविधा उपलब्ध कराय जाही, ताकि ग्रामीण मन ल बैंक साखा तक झन जाय बर पड़े। आज मोदी के ए गारंटी ल पूरा करत हुए प्रदेस म ‘‘अटल डिजिटल सुविधा‘‘ केन्द्र ल सुरू करे गेहे।
ए कार्यक्रम के बेरा म मुख्यमंत्री ह ‘‘अटल डिजिटल सुविधा‘‘ केन्द्र के हितग्राही अउ जनप्रतिनिधि मन ले गोठबात घलो करीन।
उद्योग मंत्री-मुंबई सम्मेलन
वाणिज्य अउ उद्योग मंत्री लखनलाल देवांगन ह आज मुंबई म आयोजित ‘‘इंडिया स्टील सम्मेलन‘‘ म सामिल होइन। ए बेरा म ओमन ह छत्तीसगढ़ ल इस्पात उत्पादन अउ औद्योगिक निवेस बर तेजी ले आगू बाढ़त राज्य बतईन। श्री देवांगन ह इस्पात क्षेत्र म राज्य सरकार के नीति, पारदर्शिता अउ प्रोत्साहन योजना के जानकारी दीन अउ देस-विदेस के निवेसक मन ले राज्य के औद्योगिक विकास म साझेदार बने के आह्वान करीन।
माओवादी-मुठभेड़
छत्तीसगढ़ अउ तेलंगाना के तीर-तखार के जगह म सुरक्षा बल अउ माओवादी मनके बीच होय मुठभेड़ में पांच झिन माओवादी मनके मारे जाय के खबर हे। एमा ले तीन झिन माओवादी मनके सव ल बरामद कर ले गेहे।
पुलिस ले मिले जानबा के अनुसार बीजापुर जिला के उसूर थाना क्षेत्र के अंतर्गत कर्रेगट्टा के पहाड़ी के जंगल म पाछु दू दिन ले नक्सल विरोधी ऑपरेशन चलत हे। छत्तीसगढ़, तेलंगाना अउ महाराष्ट्र के कतकोन सुरक्षा बल मन ह पहाड़ी म माओवादी मनके संगठन के शीर्ष नेता मनके उपस्थिति के बारे म खुफिया सूचना मिले के बाद ए ऑपरेशन ल सुरू करीन। सुरक्षा बल मन ह पहाड़ी ल घेर लेहे। महाराष्ट्र, तेलंगाना अउ छत्तीसगढ़ समेत तीन राज्य के पुलिस के आला अधिकारी मन ह ए जम्मांं स्थिति नजर राखे हे। उहें, राज्य पुलिस अउ सीआरपीएफ के शीर्ष अधिकारी मन ह घलो ऑपरेशन के निगरानी करत हे। एखर अलावा ड्रोन ले घलो नजर रखे जात हे। बताय गेहे कि ए माओवादी मनके खिलाफ सबले बड़े संयुक्त ऑपरेशन मे ले एक हे।
नेलांगूर-कैम्प
भारत तिब्बत सीमा पुलिस बल-आईटीबीपी ह माओवाद विरोधी माड़ बचाओ अभियान के चलत नारायणपुर जिला के सीमावर्ती गांव नेलांगुर म नवा कैम्प बनाय हे। आईटीबीपी के अधिकारी मन ह बतईन कि अभू तक आईटीबीपी ह अबूझमाड़ क्षेत्र म पांच ठिन नवा कैम्प स्थापित करे हे। एमा महाराष्ट्र सीमा ले लगे नेलांगूर घलो सामिल हे। ए कैम्प के स्थापित होय ले दुर्गम अउ घना जंगल म सुरक्षा बल मन ल माओवादी मनके खिलाफ अभियान चलाय म मदद मिलही।
राज्यपाल-बलरामपुर/जशपुर
राज्यपाल रमेन डेका ह आज बलरामपुर-रामानुजगंज जिला म कतकोन सासकीय योजना के चलत हितग्राही मन ल सामग्री के वितरण करीन। ए मउका म ओमन ह जिला म स्वच्छता ही सेवा अभियान के चलत अच्छा काम करइया स्वच्छग्राही दीदी मन ल सम्मानित घलो करीन। अइसने, राष्ट्रीय ग्रामीण आजीविका मिशन के चलत कतकोन महिला स्व-सहायता समूह मन ल चक्रीय निधि अउ बैंक लिंकेज ले लगभग उनहत्तर लाख रूपिया के चेक बांटे गीस। उहें, प्रधानमंत्री जनमन आवास योजना के चलत एक झिन हितग्राही ल आवास के चाबी घलो दे गीस।
एखर अलावा राज्यपाल ह जशपुर प्रवास के दउरान जिला पंचायत म आयोजित कारीकरम म करीबन पैंतीस हितग्राही मन ल समाग्री के वितरण करीन। ए दउरान ओमन हितग्राही मन ले गोठबात करीन अउ टी.बी. मरीज मन के सेवा के क्षेत्र म उत्कृट काम करइया मन ल सम्मानित करीन।
स्वास्थ्य मंत्री-सरगुजा
स्वास्थ्य मंत्री श्यामबिहारी जायसवाल ह काली सरगुजा प्रवास के बेरा म जिला म स्वास्थ्य सुविधा के जायजा लीन अउ कतकोन स्वास्थ्य केन्द्र के निरीक्षण करीन। ए बेरा ओमन ह नवापारा के सहरी सामुदायिक स्वास्थ्य केन्द्र म मरीज मन ले बात करके ओमन ल मिले वाले चिकित्सा सुविधा के जानकारी लीन। स्वास्थ्य मंत्री ह परसा के आयुष्मान आरोग्य मंदिर म घलो चिकित्सा सुविधा ल देखत हुए कतकोन वार्ड के जायजा लीन। भफौली के हेल्थ एंड वेलनेस सेंटर अउ दरिमा के सामुदायिक अउ प्राथमिक स्वास्थ्य केन्द्र के निरीक्षण के बेरा ओमन ह अधिकारी मन ल मरीज बर पर्याप्त मात्रा म दवई के उपलब्धता ल सुनिश्चित करे समेत आने जरूरी दिसा-निरदेस दीन।
अउ अब मौसम के हाल…
प्रदेस के बिलासपुर, दुरूग अउ रायपुर संभाग म अवइया अड़तालीस घंटा म ग्रीष्मलहर जइसे स्थिति बने रेहे के संभावना हे। उहें, काली बस्तर संभाग के जिला म एक-दू ठिन जघा म गरज-चमक के संग हल्का पानी गिर सकत हे। मौसम विभाग के अनुसार बंगाल के खाड़ी ले आवत नमी के सेती छब्बीस अप्रैल से बस्तर संभाग म हल्का ले मध्यम बरसा होय के आसार हे। एखर ले लोगन मन ल गर्मी ले कुछु राहत मिल सकत हे।
इही बीच, मौसम विभाग बस्तर, नारायणपुर, कोंडागांव, कांकेर, धमतरी, गरियाबंद अउ महासमुंद जिला म गरज-चमक के संग आकाशीय बिजली गिरे अउ तेज हवा चले के चेतावनी दीन हे।