जम्मू कश्मीर के पहलगाम म काली होय आतंकी हमला के राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेंद्र मोदी के संगेसंग कतकोन राजनीतिक दल के परमुख नेता मन ह निंदा करे हे।
केंद्रीय गृहमंत्री अमित शाह ह कश्मीर के पहलगाम म काली होय आतंकवादी हमला म मारे गे परिवार अउ पूरा देस ल आस्वासन देहे कि निरदोष लोगन मनके हत्या करइया आतंकवादी मन ल छोड़े नइ जाय। गृहमंत्री ह श्रीनगर म पुलिस नियंत्रण कक्ष म मृतक मनके पार्थिव सरीर म फूल चढ़ाइन अउ किहीन कि देस ह आतंक के आगू नइ झुकय अउ डरपोकना आतंकी मन ल छोड़े नइ जाय। गृहमंत्री ह पलहगाम के बैसरन वन क्षेत्र म घटना वाले जघा म गीन अउ घायल मनले मिलिन।
ऐति, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह ए घटना के निंदा करे हे। राज्याल ह किहीन कि पूरा देस मृतक मनके परिवार के संग खड़े हे। ए हमला म मारे गे रईपुर के व्यापारी दिनेश मिरानिया के निधन उपर दुख जतइन हे। ओमन राज्य सरकार ल मृतक के परिवार वाले मन ल पूरा मदद करे के निरदेस दे हे।
उहें, मुख्यमंत्री ह घलो अपन संवेदना म किहीन कि ए हमला के जवाब दे जाही। राज्य सरकार ह हमला म मारे गे रईपुर रहइया दिनेश मिरानिया के परिवार के संग खड़े हे।
जानबा के मुताबिक पहलगाम म काली होय आतंकी हमला म छब्बीस झिन पर्यटक मारे गेहे अउ कतकोन मनखे घायल होय हे।
पहलगाम हमला-भाजपा कार्यक्रम स्थगित
इही बीच, भारतीय जनता पार्टी के प्रदेस इकाई ह पहलगाम म होय आतंकी हमला ल देखत अपन जम्मों संगठनात्मक कार्यक्रम ल स्थगित कर देहे। पार्टी के प्रदेस महामंत्री संजय श्रीवास्तव ह बतइन कि आज होवइया डॉक्टर भीमराव अंबेडकर सम्मान सभा अउ बिचार गोष्ठी के संगेसंग पच्चीस अप्रैल के वक्फ बोर्ड सुधार कानून जन-जागरण अभियान उपर होवइया कार्यसाला ल घलो स्थगित कर देहे। प्रदेस महामंत्री ह बतइन कि प्रदेस अध्यक्ष अउ भाजपा पदाधिकारी मन काली रईपुर के समता कालोनी निवासी कारोबारी दिनेश मिरानिया के अंतिम संस्कार कार्यक्रम सामिल होके ओमन ल श्रध्दांजलि दीन।
मुख्यमंत्री-मुंबई सीएमएआई फैब शो
मुख्यमंत्री विष्णुदेव साय ह आज मुंबई म चलत क्लोदिंग मैन्युफैक्चरर एसोसिएशन ऑफ इंडिया-सीएमएआई फैब शो म सामिल होइन। ए दउरान ओमन प्रदेस म कपड़ा अउ परिधान क्षेत्र म निवेस के संभावना उपर जोर दीन। ए मउका म मुख्यमंत्री ह निवेसक अउ टेक्सटाइल क्षेत्र ले जुड़े उद्योगपति मन ले गोठबात करके ओमन ल छत्तीसगढ़ म निवेस बर बुलइन। कारीकरम म वस्त्र गारमेंट अउ हैंडलूम सेक्टर ल बढ़ावा देबर छत्तीसगढ़ सरकार ह सीएमएआई के संग समझौता पत्र उपर दस्तखत करीन। उद्योगपति मन ल संबोधित करत मुख्यमंत्री ह किहीन कि हालेच म राज्यमंत्रि मंडल ह नवा रईपुर म नेशनल इंस्टीट्यूट ऑफ फैशन डिजाइन-निफ्ट ल मंजूरी देहे। ए संस्थान के बने ले प्रदेस म कपड़ा उद्योग ल बढ़ावा मिलही।
प्रधानमंत्री-ई-बस योजना
रईपुर-बिलासपुर-कोरबा अउ दुरूग-भिलाई म दु सौ चालीस ई-बस सुरू करे के तियारी जोर पकड़ ले हे। ए बस मन ल प्रधानमंत्री ई-बस योजना के तहत चलाय जाही। ए बारे म केंद्रीय आवासन अउ सहरी कार्य मंत्रालय के बिसेसज्ञ अउ अधिकारी मन डहार ले नगरी प्रशासन विभाग अउ राज्य शहरी विकास प्राधिकरण-सूडा के अधिकारी मनके क्षमता विकास बर काली नवा रईपुर म प्रसिक्षण कारीकरम राखे गीस। ए दउरान अधिकारी मन ल ई-बस सेवा ल बने ढंग ले चलाय के बारे म जानबा दे गीस। राज्य सहरी विकास अभिकरण के मुख्य कार्यपालन अधिकारी शशांक पांडेय ह बतइन कि प्रधानमंत्री ई-बस सेवा योजना के तहत प्रदेस म दू सौ चालीस ई-बस दे जाही। एमा रईपुर बर सौ दुरूग-भिलाई अउ बिलासपुर बर पचास-पचास के संग कोरबा बर चालीस ठिन ई-बस सामिल हे।
जेईई मेन्स परीक्षा-प्रयास विद्यालय
प्रदेस के प्रयास आवासीय विद्यालय के तीन सौ इकहत्तर म एक सौ बाईस छात्र मन ह जेईई मेन्स के परीक्षा पास कर लेहे। ए बछर ए परीक्षा के घोसित परिणाम मन म रईपुर के प्रयास बालक आवासीय विद्यालय परीक्षा परिणाम सबले बढ़िया रिहीस। ए स्कूल ले करीबन पैंतालीस प्रतिसत लइका मन पास होय हे। त उहें अंबिकापुर के प्रयास आवासीय विद्यालय के सोलह, दुरूग के बारह, कांकेर के आठ, जशपुर के नौ, जगदलपुर के सात अउ कोरबा प्रयास आवासीय विद्यालय के एक झिन लइका ह जेईई मेन्स के परीक्षा पास करे हे।
अटल पंचायत डिजिटल सुविधा केंद्र
पंचायत दिवस के मउका म काली चौबीस अप्रैल ले प्रदेस के एक हजार चार सौ साठ ग्राम पंचायत मन म ‘‘अटल पंचायत डिजिटल सुविधा केंद्र‘‘ सुरू करे जाही। ए केंद्र मन म गांव के लोगन मन ल जम्मों सुविधा एके जघा मिल सकही। जेमा बैंक खाता ले सोज्झे पइसा निकालना, पइसा के ट्रांसफर अउ बिजली पानी के बिल के भुगतान करे के संगेसं पेंसन बीमा रासि मिले के सुविधा सामिल हे। ग्राम पंचायत मन म सुरू होवइया ए सुविधा केंद्र ले किसान मन धान के पइसा, महतारी वंदन योजना के पइसा, पेंशन अउ आने योजना मनके पइसा ल सोज्झे निकाल सकही। संगेसंग जन्म मृत्यु प्रमाण पत्र के संगेसंग आने सुविधा ह घलो ए केंद्र मन ले मिलही।
मुख्यमंत्री-यूपीएससी परीक्षा बधाई
मुख्यमंत्री विष्णुदेव साय ह संघ लोक सेवा आयोग यूपीएससी डहार ले होय सिविल सेवा परीक्षा दू हजार चौबीस म सफलता पवइया छत्तीसगढ़ के जम्मों अभ्यर्थी मन ल बधई अउ सुभकामना दे हवय। ओमन किहीन कि ए सफलता आपमन के मेहनत, धैर्य अउ आत्मविश्वास के प्रतीय हरय।
मुख्यमंत्री ह ए परीक्षा म पैंसठवां रैंक हासिल करइया बिलासपुर जिला के पूर्वा अग्रवाल ले फोन म गोठबात करत ओमन ल बधई दीन। ए मउका म मुख्यमंत्री ह मेहनत करइया परीक्षार्थी मन ल किहीन कि ए सफल प्रतिभा मन ले प्रेरणा लेके अपन लक्ष्य ल पावय।
राज्यपाल-विद्यार्थी मुलाकात
राजभवन म आज अटल बिहारी वाजपेयी विश्वविद्यालय बिलासपुर के छात्र मन ह राज्यपाल रमेन डेका ले मिलिन। ए दउरान छात्र मन ह राज्यपाल ल काजेल म पढ़ई अउ शिक्षक मनके समस्या के बात किहीन। जेखर बाद राज्यपाल ह समस्या के समाधान करे के बात किहीन। ए मउका म राज्यपाल ह किहीन कि राष्ट्रीय शिक्षा नीति के मुताबिक कक्षा चलाय अउ छात्र मन ल गर्मी के छुट्टी देबर विश्वविद्यालय ल निरदेस दे जाही।
व्यापमं-नगर सैनिक भर्ती परीक्षा
छत्तीसगढ़ व्यावसायिक परीक्षा मंडल ह महिला अउ पुरूष नगर सैनिक के लिखित भर्ती परीक्षा बर ऑनलाइन अर्जी मंगवाय हे। अर्जी भरइया मन व्यावासायिक परीक्षा मंडल के वेबसाइट म तीस मई तक अर्जी कर सकथे। परीक्षा बाईस जून के हो सकथे। ए परीक्षा बर रईपुर-बिलासपुर-जगदलपुर अउ अंबिकापुर म केंद्र बनाय गेहे।
राष्ट्रीय संगोष्ठी-समापन
पृथ्वी दिवस के मउका म वन विभाग डहार ले नवा रईपुर के अरण्य भवन स्थित दंडकारण्य सभागार म होय दू दिन के सागरिया मेमोरियल राष्ट्रीय सिल्वीकल्चर संगोष्ठी आज सिरागे। आकाशवाणी समाचार ले गोठबात करत राज्य के प्रधान मुख्य वन संरक्षक विकास अउ योजना अरूण कुमार पाण्डेय ह बतइन कि ए संगोष्ठी आठ तकनीकी क्षेत्र म होइस। छत्तीसगढ़ के संगेसंग आठ राज्य मनके वन अधिकारी मन ए संगोष्ठी म भाग लीन।
दुर्घटना
सूरजपुर जिला के बिसाबी पोड़ी गांव म पाछू रतिहा एक ठिन गाड़ी के अंतेतंते होके पलटे ले दू झिन लइका के मउत होगे अउ बीस झिन लोगन मन घायल हो गेहे, जेमा ले नौ झिन के हालत गंभीर बताय जात हे। घायल मनखे मन ल अंबिकापुर मेडिकल कालेज भेज दे गेहे। ए गाड़ी म पच्चीस झिन लोगन मन बइठ के बिहाव के कारीकरम म बिलासपुर गे रिहीन। लहुटत खानी ए गाड़ी ह बिसाबी पोड़ी गांव के तीर पलट गे। सूचना मिलतेच चेंद्रा पुलिस ह मउका म पहुंचिन अउ घायल मन ल भटगांव के स्वास्थ्य केंद्र म भर्ती करवाइन।
ओति, गौरेला-पेण्ड्रा-मरवाही जिला के पीपरडोल गांव म पाछू रतिहा होय सड़क दुर्घटना म एक झिन मनखे के मउत होगे अउ एक झिन आने मनखे ह घायल हो गेहे।