स्कूल-ग्रीष्मकालीन अवकाश
प्रदेस म जोरदरहा गर्मी ल देखत स्कूल सिक्षा विभाग ह पच्चीस अप्रैल ले पन्द्रह जून तक गर्मी के छुट्टी घोसित कर देहे। जारी आदेश के मुताबिक ए दउरान सरकारी, अनुदान प्राप्त, गैर अनुदान प्राप्त अउ अशासकीय स्कूल मन म पढ़ई-लिखई नइ होवय। ए आदेस सिक्षक मन बर लागू नइ होवय।
एखर पहिली, शिक्षा विभाग ह एक मई ले पन्द्रह जून तक गर्मी के छुट्टी घोसित करे रिहीस।
मुंबई-वस्त्र और इस्पात उद्योग कार्यक्रम
छत्तीसगढ़ के मुख्यमंत्री विष्णुदेव साय ह मुंबई के गोरेगांव स्थित बॉम्बे के एग्जिबिशन सेंटर म काली तेईस अप्रैल ले होवइया वस्त्र अउ इस्पात उद्योग के दू दिन के कार्यक्रम म सामिल होही। पहिली दिन मुख्यमंत्री ह क्लोथिंग मैन्युफैक्चरर्स एसोसिएशन ऑफ इंडिया-सी.एम.ए.आई. डहार ले राखे गे फैब शो म भाग लीहीं। ए दउरान मुख्यमंत्री ह छत्तीसगढ़ के नवा औद्योगिक नीति म वस्त्र उद्योग बर दे गे बिसेस सुविधा, प्रोत्साहन अउ निवेस के बारे म जानबा साझा करही।
त उहें, दूसर दिन चौबीस अप्रैल के इंडिया स्टील के उद्घाटन समारोह म मुख्यमंत्री ह विशिष्ट अतिथि के रूप म सामिल होही। ए समारोह म प्रधानमंत्री ह वीडियो कॉन्फ्रेंसिंग के माध्यम ले जुड़ही। ए मउका म मुख्यमंत्री ह नवा औद्योगिक नीति के तहत इस्पात उद्योग बर विकसित अधोसंरचना, नवाचार अउ लंबा बेरा के योजना मनके जानबा दीहीं।
मुख्यमंत्री/केन्द्रीय गृह मंत्री-समीक्षा
मुख्यमंत्री विष्णुदेव साय ह काली नई दिल्ली म केन्द्रीय गृहमंत्री अमित शाह के अगुवई म होय समीक्षा बइठका म सामिल होइन। ए दउरान प्रदेस म तीन ठिन नवा आपराधिक कानून – भारतीय न्याय संहिता, भारतीय नागरिक सुरक्षा संहिता अउ भारतीय साक्ष्य अधिनियम ल आगू लाय के बारे म समीक्षा करे गीस। संगेसंग पुलिस, जेल, अदालत, अभियोजन अउ फोरेंसिक ले जुड़े आने-आने नवा नियम के क्रियान्वयन अउ अभी के स्थिति के बारे म गोठबात करे गीस। त उहें, माओवादी उन्मूलन, बस्तर के विकास अउ राज्य म सुरक्षा के संगेसंग न्याय तंत्र ल अउ जादा मजबूत बनाय उपर गोठबात होइस।
बइठका म मुख्यमंत्री ह बतईन कि प्रदेस म नवा आपराधिक कानून ल लागू करे बर तियारी पूरा करे जा चुके हे। नवा आपराधिक कानून ल जल्दी लागू करे उपर गृहमंत्री ह प्रदेस सरकार के प्रसंसा करत कहिन कि जल्दीच नवा कानून ल राज्य म लागू कर दे जाय।
बइठका म छत्तीसगढ़ के गृहमंत्री विजय शर्मा के संगेसंग केन्द्रीय गृह मंत्रालय अउ राज्य सरकार के कतकोन बड़का अधिकारी मन सामिल होइन।
यूपीएससी-परिणाम
संघ लोक सेवा आयोग-यूपीएससी ह सिविल सेवा परीक्षा-दू हजार चौबीस के रिजल्ट घोसित कर देहे। आयोग ह नियुक्ति बर एक हजार नौ उम्मीदवार मनके सिफारिश करे हे, जेमा सात सौ पच्चीस पुरूष अउ दू सौ चौरासी महिला सामिल हे। प्रयागराज के शक्ति दुबे ह सिविल सेवा परीक्षा म पहिली स्थान म आय हे।
ए परीक्षा म छत्तीसगढ़ के बिलासपुर के पूर्वा अग्रवाल ह पैंसठवां रैंक पाय हे।
सिविल सेवा परीक्षा म मुंगेली जिला के अर्पण चोपड़ा ल तीन सौ तेरहवां त उहें, जगदलपुर के मानसी जैन ल चार सौ चवालीसवां अउ अंबिकापुर के केशव गर्ग ह चार सौ छियानबेवां रैंक हासिल करे हे।
जानबा के मुताबिक संघ लोक सेवा आयोग डहार ले सिविल सेवा परीक्षा के लिखित परीक्षा पाछु साल सितंबर महीना म होय रिहीस, जेखर बाद इही साल जनवरी ले अप्रैल के बीच इंटरव्यू होइस।
वेव्स समिट
एक ले चार मई तक मुंबई म ‘‘विश्व दृश्य-श्रव्य अउ मनोरंजन शिखर सम्मेलन-वेव्स के आयोजन करे जाही। केन्द्रीय सूचना प्रसारण अउ संसदीय कार्य राज्यमंत्री डॉक्टर एल. मुरूगन ह बतईन कि ए शिखर सम्मेलन म वेव्स बाजार अउ सीईओ राउंट टेबल जइसन कारीकरम होही। ओमन कहिन कि वेव्स प्रिंट मीडिया, सेटेलाइट टीवी चैनल, डिजिटल मीडिया, ओटीटी प्लेटफॉर्म अउ फिलिम बनइया मन बर ए ह एक ठिन बड़का कार्यक्रम हरय। ओमन किहीन कि वेव्स के माध्यम ले भारतीय तकनीक के झलक ल पूरा दुनिया ल देखे बर मिलही।
माओवादी मुठभेड़
बीजापुर जिला म सुरक्षा बल मनके संग होय मुठभेड़ म तीन लाख रूपिया के एक झिन इनामी माओवादी मारे गेहे। ए माओवादी के पहचान मिलिशिया प्लाटून कमांडर वेल्ला वाचम के रूप म होय हे। एखर उपर अम्बेली ब्लास्ट के घटना म सामिल रेहे के आरोप रिहीस। जिला के पुलिस अधीक्षक डॉक्टर जितेन्द्र कुमार यादव ह बतईन कि बेदरे थाना क्षेत्र के केरपे अउ तोड़समपारा के जंगल म माओवादी मनके होय के सूचना मिले के बाद छत्तीसगढ़ सशस्त्र बल के टीम ह पाछु संझा गश्त म निकले रिहीन। इही दउरान पहिली ले घात लगाके बइठे माओवादी मन ह पुलिस पार्टी उपर गोलीबारी सुरू कर दीन। जवान मन डहार ले करे गे जवाबी कार्रवाई म एक झिन माओवादी मारे गीस। घटना वाले जघा ले तीन सौ पन्द्रह बोर के एक ठिन बंदूक के संगेसंग आने जिनीस बरामद करे गेहे।
पोप फ्रांसिस निधन-राजकीय शोक
केन्द्र सरकार ह ईसाई मनके बड़का पादरी पोप फ्रांसिस के सम्मान म तीन दिन के राजकीय सोक के घोसना करे हे। पोप फ्रांसिस के काली निधन होगे। दू दिन के राजकीय सोक आज अउ काली रइही अउ अंतिम संस्कार के दिन घलो राजकीय सोक रइही। देसभर म राजकीय सोक के दउरान जम्मों इमारत के राष्ट्रीय ध्वज आधा झुके रइही अउ कोनों प्रकार के आधिकारिक मनोरंजन कार्यक्रम नइ होवय।
मुख्यमंत्री सुशासन फेलोशिप योजना-आवेदन
मुख्यमंत्री सुशासन फेलोशिप योजना बर काली तेईस अप्रैल ले अरजी मंगाय के काम सुरू हो जही। अरजी करइया युवा मन ग्यारह मई तक युवा कर सकथे। आवेदक के उमर पैंतीस साल होना चाही। प्रवेस बर कैट परीक्षा के माध्यम ले चयन करे जाही। राज्य सरकार ह ए पाठ्यक्रम के पूरा फीस दीही अउ संगेसंग हरेक नामांकित छात्र ल हर महीना पचास हजार रूपिया के छात्रवृत्ति दे जाही।
भाजपा-गोष्ठी
भारतीय जनता पार्टी के प्रदेस इकाई डहार ले काली रायपुर के अटल बिहारी वाजपेयी ऑडिटोरियम म डॉक्टर भीमराव अंबेडकर सम्मान सभा के तहत एक ठिन विचार गोष्ठी राखे जाही। ए कार्यक्रम म पूर्व केन्द्रीय गृह, युवा अउ खेल राज्यमंत्री निशीथ प्रमाणिक ह मुख्य वक्ता के रूप म सामिल होही।
केन्द्र-हीटवेव सलाह
केन्द्र सरकार ह राज्य अउ केन्द्रसासित प्रदेस मन ल जादा गर्मी जइसन स्थिति ले मजूर मनके सुरक्षा बर तुरते कदम उठाय के सलाह देहे। नई दिल्ली म संवाददाता मन ले गोठबात करत केन्द्रीय श्रम अउ रोजगार मंत्री मनसुख मांडविया ह कहिन कि मंत्रालय ह ए बारे म जम्मों राज्य अउ केन्द्रसासित क्षेत्र मनके मुख्य सचिव मन ल चिट्ठी लिख के केहे हे कि ओमन उद्योग अउ निर्माण कंपनी मनके मजूर मन बर गर्मी ले बांचे बर जरूरी उपाय करयं।
और अब मौसम का हाल...
मौसम विभाग ह अवइया चौबीस घंटा के दउरान रायपुर, बिलासपुर अउ रायगढ़ के संगेसंग प्रदेश के ग्यारह ठिन जिला मन म यलो अलर्ट जारी करत लू चले के चेतावनी देहे। त उहें, अड़तालीस घंटा के दउरान बिलासपुर, कोरबा, रायपुर, दुरूग, राजनांदगांव अउ कांकेर के संगेसंग प्रदेस के तेरह ठिन जिला मन म ग्रीष्म लहर चल सकथे।
अउ अब थोरकुन समाचार सार म –
– छत्तीसगढ़ के आदिम जाति विकास मंत्री रामविचार नेताम ह आज नई दिल्ली म केन्द्रीय खेल अउ युवा कल्याण मंत्री डॉक्टर मनसुख मांडविया ले मिलीन।
– आज पृथ्वी दिवस हरय। एसो के पृथ्वी दिवस के बिसय हे – ‘‘हमारी शक्ति, हमारा ग्रह‘‘। मुख्यमंत्री ह पृथ्वी दिवस के मउका म प्रदेस के लोगन मन ल सुभकामना देवत पर्यावरण ल बने ढंग ले बनाय राखे के अपील करे हे।
– रायपुर पहुंचे अखिल भारतीय कांग्रेस कमेटी के सोशल मीडिया विभाग के अध्यक्ष अउ राष्ट्रीय प्रवक्ता सुप्रिया श्रीनेत ह आज पत्रकार मन ले आने-आने बिसय उपर गोठबात करीन।
– उपमुख्यमंत्री अरूण साव ह बिलासपुर म जिला अधिवक्ता संघ डहार ले राखे गे एडवोकेट प्रीमियर लीग के समापन समारोह म सामिल होइन। ए मउका म ओमन प्रतियोगिता के विजेता अउ उपविजेता टीम के संग खिलाड़ी मन ल घलो साम्मानित करीन।