नीट/जेईई-परीक्षा
उच्चतम न्यायालय ह कोरोना संक्रमण ल देखत राष्ट्रीय पात्रता प्रवेश परीक्षा-नीट अउ संयुक्त प्रवेश परीक्षा-जेईई ल स्थगित करे के संबंध म याचिका ल खारिज कर देहे।
न्यायालय ह कहिन कि छात्र मनके भविष्य ल बहुत बेरा तक अधर म लटकाय नइ राखे जा सकय। इंजीनियरिंग प्रवेश परीक्षा निर्धारित कारीकरम के अनुसार एक ले छह सितंबर के बीच अउ मेडिकल प्रवेश परीक्षा तेरह सितंबर के आयोजित कराय जाही।
न्यायमूर्ति अरूण मिश्रा, न्यायमूर्ति बी.आर. गवई अउ न्यायमूर्ति कृष्ण मुरारी के पीठ ह ए प्रवेस परीक्षा मन ल स्थगित करे के संबंध म आने-आने राज्य मनके ग्यारह उम्मीदवार मनके याचिका के सुनवाई करत कहिन कि सबो सावधानी के पालन करत जीवन ल आगू बढ़ाना चाही।
रक्षा उद्योग-एमओयू
छत्तीसगढ़ म रक्षा श्रेणी के उद्योग के पहिली उत्पादन इकाई के स्थापना बर आज एमओयू म हस्ताक्षर करे गीस। ए औद्योगिक इकाई सशस्त्र सेना अउ राज्य सरकार के सुरक्षा बल मन बर बुलेटपुफ्र जैकेट अउ हेलमेट के उत्पादन करही। ए इकाई दुरूग जिला के बिरेभांठ गांव म स्थापित करे जाही।
मुख्यमंत्री भूपेश बघेल के उपस्थिति म आज रईपुर म आयोजित एक ठिन संक्षिप्त समारोह म एमओयू म उद्योग विभाग के प्रमुख सचिव मनोज कुमार पिंगुआ अउ रक्षा उत्पाद के औद्योगिक इकाई स्थापित करइया कंपनी एटमास्टको लिमिटेड के एमडी एस. स्वामीनाथन ह हस्ताक्षर करीन। मुख्यमंत्री ह ए इकाई के स्थापना बर एटमास्टको लिमिटेड अउ उद्योग विभाग के अधिकारी मन ल बधाई अउ सुभकामना दीन।
खबर के मुताबिक ए इकाई म कंपनी डहार ले सत्यायासी करोड़ रूपिया ले जादा के पूंजी निवेस करे जाही। ए उद्योग के माध्यम ले लगभग डेढ़ सौ लोगन ल रोजगार मिलही। पहिली चरण म रक्षा उत्पाद के ए औद्योगिक इकाई एक-एक लाख बुलेटपुफ्र जैकेट अउ हेलमेट के उत्पादन करही। ए इकाई म नवंबर तक उत्पादन सुरू हो जही।
बारिश
प्रदेस म पाछु दू दिन ले होवत सरलग बरसा ले जनजीवन म असर पड़े हे। बस्तर अउ सरगुजा संभाग म कतकोन नदी-नाला उफान म हे। कतकोन गांव के जिला मुख्यालय ले सड़क संपर्क टूट गेहे।
हमर संवाददाता मन ले मिले जानकारी के मुताबिक बीजापुर अउ सुकमा जिमा म बरसा के सेती आज घलो आवागमन बाधित हे। बीजापुर जिला के मिनगाछल नदी के जलस्तर खतरा के निसान ले उपर हे। उहें, सुकमा जिला के सबरी नदी के जलस्तर घलो लगातार बाढ़त हे। जिला के कतकोन गांव के संपर्क ह टूट गेहे।
ओति, राजनांदगांव जिला म आज घलो बरसा होवत हे। नदी-नाला म पानी के बहाव तेज होय के सेती जिला प्रसासन ह तीर-तखार के गांव म अलर्ट जारी कर देहे।
ओति, जांजगीर-चांपा जिला के ग्राम खम्हरिया म बरसा के सेती दीवार गिरे ले एक झिन नोनी के दबके मउत होगे। उहें, इही जिला के ग्राम सेमरा म खेत म काम करत एक झिन माईलोगिन के गाज गिरे ले मउत होगे अउ ओखर बेटा गंभीर रूप झुलस गेहे।
कोरोना-मरीज
छत्तीसगढ़ म कोरोना संक्रमण के मामला लगातार बढ़ते जात हे। आज घलो आने-आने जिला ले कोरोना संक्रमित नवा मरीज मिले के पुष्टि होय हे।
दुरूग जिला म अब तक सैंतीस नवा कोरोना संक्रमित मरीज मिले हे।
ओति, जशपुर जिला म आज अट्ठारह नवा कोरोना पॉजिटिव मरीज मनके पहिचान करे गेहे। एमा ले पन्द्रह मरीज जशपुर सहर ले मिले हे। उहें, तीन मरीज दुलदुला विकासखंड ले हे। इही बीच, कलेक्टर महादेव कावरे ह कोरोना संक्रमण के बाढ़त मामला देखत जशपुर शहर ल सात दिन बर लॉकडाउन कर देहे।
उहें, रायगढ़ जिला म प्रसासन ह आज ले अवइया तेईस अगस्त तक ट्रक मरम्मत, स्पेयर पार्टस अउ टायर-टयूब के संचालन बर दिसा-निरदेस जारी करे हे। सहर के बाहिर अउ राजमार्ग म स्थित दुकान मन ह बिहिनिया सात बजे ले ग्यारह बजे तक खुलही। इही दउरान दुकानदार अउ ग्राहक मन ल कोरोना संक्रमण ले संबंधित आने-आने सर्त के पालन घलो करना होही।
ऐति, राजधानी रईपुर म भाजपा के प्रदेस प्रवक्ता संजय श्रीवास्तव के कोरोना जांच रिपोर्ट पॉजिटिव आई हे। ओमन ह ट्वीट करके लोगन ले आग्रह करीन हे कि जउन लोगन हाल ही म उंखर संपर्क म आय हे, ओमन अपन कोरोना जांच करवा ले।
इही बीच, एम्स अस्पताल प्रबंधन ह नेता प्रतिपक्ष धरमलाल कौशिक के कोरोना जांच रिपोर्ट निगेटिव आय के बाद ओमन ल स्वस्थ बताय हे। श्री कौशिह ह स्वस्थ होय के बाद एम्स प्रबंधन अउ प्रदेसवासी मनके आभार जताईन।
राज्य म काली रतिहा तक कोरोना संक्रमण के पांच सौ छिहत्तर नवा मामला सामने आय रिहीस। एमा ले दू सौ छियालीस रईपुर जिला ले मिले रिहीस। उहें, दुरूग ले अंठानवे, राजनादंगांव ले इंक्यावन अउ बालोद जिला के तैंतीस मरीज के पहिचान करे गे रिहीस। अब तक प्रदेस म कोरोना संक्रमण ले एक सौ बयालीस लोगन के मउत हो चुके हे।
सिंहदेव-पेसा जानकारी
पंचायत अउ ग्रामीण विकास मंत्री टी.एस. सिंहदेव ह काली संझा आकाशवाणी रायपुर ले प्रसारित बिसेस कारीकरम ‘‘हमर ग्राम सभा‘‘ पेसा कानून के बारे म विस्तार ले जानकारी दीन। ओमन बतईन कि पेसा कानून के लागू होय ले अनुसूचित क्षेत्र मन म पंचायत के अधिकार मन ल कारगर ढंग ले स्थापित करे म मदद मिलही। ए क्षेत्र म रहइया लोगन अपन विकास के प्राथमिकता ल खुदे तय कर सकही।
पंचायत मंत्री ह बतईन कि प्रदेस म पेसा कानून ल प्रवाभी ढंग ले लागू करे अउ नियम बनाय बर पंचायत अउ ग्रामीण विकास विभाग डहार ले एखर सबो भागीदार मन ले चरचा करे जात हे। श्री सिंहदेव ह बतईन कि राज्य के पच्यासी अनुसूचित विकासखंड के निर्वाचित जनप्रतिनिधि, आदिवासी समाज के संगठन, पेसा अउ वन अधिकार कानून म अमल करे बर काम करत गैर सरकारी संगठन मन ले ए बारे म गोठबात करे जात हे।
खेलो इंडिया स्कीम
केन्द्रीय खेल मंत्रालय ह जूनियर टॉप्स खेलो इंडिया स्कीम के सुरूवात करे हे। एमा छत्तीसगढ़ के बैडमिंटन खिलाड़ी आकर्षि कश्यप अउ ईशान भटनागर ल चुने गेहे। ए स्कीम बछर दू हजार चौबीस अउ अट्ठाईस म होवइया ओलम्पिक ल देखत सुरू करे गेहे, जेमा देसभर के बारह खेल के दू सौ अंठावन जूनियर प्रतिभासाली खिलाड़ी मन ल चुने गेहे। जूनियर टॉप्स खेलो इंडिया स्कीम बर चयनित छत्तीसगढ़ के दू सीर्ष जूनियर खिलाड़ी मन म सामिल भिलाई के आकर्षि कश्यप वर्तमान म देस के नंबर वन बैडमिंटन खिलाड़ी हरय। उहें, रईपुर के ईशान भटनागर सातवां नंबर के मिश्रित युगल खिलाड़ी हरय।
युवक-एयरलिफ्ट
बिलासपुर के खूंटाघाट बांध म रतिहा फंसे एक झिन युवक ल वायुसेना के हेलीकॉप्टर ले एयरलिफ्ट करके सुरक्षित निकाल ले गेहे। बांध ले बाहिर निकाले के बाद युवक ल राजधानी रईपुर के अस्पताल म भर्ती कराय गेहे।
खबर के मुताबिक बिलासपुर जिला के रतनपुर के तीर स्थित ग्राम गिधौरी निवासी एक झिन युवक काली संझा नहाय बर बांध म गे रिहीस अउ ओ ह पानी के तेज बहाव म फंस गे। युवक रातभर पेड़ के सहारा ले लटके रिहीस। एखर जानकारी ग्रामीण मन ह पुलिस ल दीन, जेखर बाद राहत आपदा प्रबंधन के टीम मउका म पहुंचीस अउ युवक ल बांध ले बाहिर निकाले के परयास करीन, फेर असफल होगीन। बाद म वायुसेना के टीम ह पुलिस प्रसासन के आग्रह म युवक ल आज मुंधरहा बांध ले एयरलिफ्ट करके बाहिर निकालीन।
विजय प्रताप सिंह-निधन
सूरजपुर जिला के भाजपा उपाध्यक्ष अउ सरगुजा जिला के पूर्व जिला पंचायत अध्यक्ष विजय प्रताप सिंह के आज निधन होगे। ओमन पूर्व मंत्री अउ राज्यसभा सांसद शिवप्रताप सिंह के बेटा रिहीन। स्वर्गीय विजय प्रताप सिंह ह विधायक बर चुनाव घलो लड़े रिहीन।
छत्तीसगढ़-पर्यटन
केन्द्र सरकार के स्वदेश दर्शन योजना ट्राईबल टूरिज्म सर्किट के तहत राज्य सरकार डहार ले कुरदर, सरोधा दादर अउ धनकुल म रिसॉर्ट बनाय गेहे। करीबन उनतीस करोड़ रूपिया के लागत ले बने ए तीनों रिसॉर्ट के लोकार्पण अभी हाल ही म मुख्यमंत्री ह वीडियो कान्फ्रेंसिंग के माध्यम ले करीन। इहां पर्यटक मन ल जनजातीय संस्कृति ले परिचित होय के मउका मिलही। इहां जनजातीय परंपरागत शैली म संग्रहालय के निर्माण करे गेहे। कुरदर हिल बिलासपुर, सरोध दादर रिसॉर्ट कबीरधाम अउ धनकुल रिसॉर्ट कोंडगांव जिला म हवय।