मुख्यमंत्री-शिविल सेवा
मुख्यमंत्री विष्णुदेव साय ह राष्ट्रीय सिविल सेवा दिवस के मउका म देस सेवा म लगे सबो सिविल सेवक अउ उंखर परिवार वाले मन ल सुभकामना दीन हे। मुख्यमंत्री ह किहीन कि ए दिन सिरिफ सिविल सेवक मनके योगदान ल सुरता करे के मउका हे, भलूक भविष्य के चुनौती म आत्ममंथन अउ चिंतन के दिवस हे। मुख्यमंत्री ह किहीन कि सिविल सेवक ओ कड़ी हे, जउन सरकार के योजना अउ जनता के अपेक्षा के बीच सेतु के काम करथे। ओमन किहीन कि सिविल सेवक मनके मेहनत ले ही देस अउ प्रदेस सुशासन के रद्दा म आगू बढ़थे।
मुख्यमंत्री-राष्ट्रीय जनसंपर्क दिवस
मुख्यमंत्री विष्णुदेव साय ह राष्ट्रीय जनसंपर्क दिवस के मउका म प्रदेस के जम्मों जनसंपर्क अधिकारी, करमचारी अउ जनसंचार क्षेत्र ले जुड़े सबो प्रतिनिधि मन ल सुभकामना दीन हे। मुख्यमंत्री ह किहीन कि जनसंपर्क सरकार अउ जनता के बीच विस्वास अउ गोठबात खातिर मजबूत कड़ी हवय। शासन के योजना नीति अउ जनहितकारी कारीकरम ल लोगन तक अमराय म जनसंपर्क के महत्ता के भूमिका होथे।
मुख्यमंत्री-की नोट कार्यक्रम
मुख्यमंत्री विष्णुदेव साय काली रईपुर म राखे गे ‘‘की-नोट‘‘ एड्रेस कारीकरम म सामिल होइन। ए मउका म ओमन नवा दौर के भाग दौड़ म पाछू छूटत ‘‘भारतीयता के संस्कार‘‘ बिसय म अपन बिचार राखिन। मुख्यमंत्री ह किहीन कि छत्तीसगढ़ ह नवा शिक्षा नीति ल अपनाय हे। ए नीति म शिक्षा के संग रोजगार अउ संस्कार दूनों ल प्राथमिकता दे गेहे।
जवान शहीद/माओवादी गिरफ्तार
बीजापुर जिला म आज माओवादी मन कोति लगाय गे आईईडी के चपेट म आय ले सीएएफ के एक झिन जवान शहीद होगे। खबर के मुताबिक ए घटना तोयनार ले चार किलोमीटर दूरिहा फरसेगढ़ के हवय। रोड बनाय के काम म सीएएफ के जवान मनोज पुजारी के ड्यूटी लगे रिहीस, इही बेरा प्रेसर आईईडी के चपेट म आय ले उंखर मउत होगे। क्षेत्र म सुरक्षाबल के जवान मन के सर्च अभियान चलत हे।
उहें, नारायणपुर जिला के ओरछा थाना क्षेत्र म सुरक्षाबल ह दू झिन माओवादी ल गिरफ्तार करे हे। गिरफ्तार माओवादी तीर ले एक कुकर बम बरामद करे गेहे। ए दूनों माओवादी चौबीस फरवरी के गांव एडजूम के जंगल म होय माओवादी मुठभेड़ के घटना म सामिल रिहीन। गिरफ्तार माओवादी के पहिचान इंद्रावती एलओएस के सक्रिय सदस्य के रूप म होय हे।
ओति, झारखंड के बोकारो जिला म आज सुरक्षाबल अउ माओवादी मनके बीच होय मुठभेड़ म आठ झिन माओवादी के मारे जाय के खबर हे। ए मुठभेड़ म एक करोड़ के ईनामी माओवादी घलो मारे गेहे। सबो के शव बरामद कर ले गेहे।
कांग्रेस प्रदर्शन
प्रदेस म बिगड़त कानून व्यवस्था ल लेके आज कांग्रेस ह राजधानी रईपुर म प्रदर्सन करीन। ए दउरान कांग्रेस कार्यकर्ता मन ह रईपुर म मुख्यमंत्री निवास म घेराव करे के परयास करीन। घेराव के पहिली रईपुर नगर-निगम के आगू कांग्रेस ह एक सभा राखही। ए सभा म प्रदेसभर ले कांग्रेस के बड़का नेता, पदाधिकारी अउ कार्यकर्ता संघरीन। सभा म बोलत कांग्रेस के बड़का नेता मन ह पाछू डेढ़ बछर म प्रदेस म बाढ़त अपराध महिला मनके खिलाफ होवत अत्याचार, लूट अउ हत्या समेत कई ठिन मुद्दा म राज्य सरकार के खिलाफ हमला बोलिन। सभा ल प्रदेस कांग्रेस अध्यक्ष दीपक बैज अउ विधानसभा म नेता प्रतिपक्ष चरणदास महंत समेत कतकोन नेता मन ह संबोधित करीन।
पद्म पुरस्कार-आवेदन
केंद्रीय गृह मंत्रालय कोति ले बछर दू हजार पच्चीस के पद्म विभूषण, पद्म भूषण अउ पद्मश्री पुरस्कार खातिर अर्जी मंगाय गे हे। ए पुरस्कार साहित्य संस्कृति कला समेत आने क्षेत्र म योगदान बर दे जात हे। पात्र मनखे मन के नामांतरण ऑनलाइन पोर्टल ले इकतीस जुलाई तक प्रस्तुत करे जा सकथे। एखर संगेसंग तय प्रारूप म भरे गे प्रस्ताव चौदह जुलाई तक संचालक संचालनालय संस्कृति अउ राजभाषा नवा रईपुर ल भेजे जा सकत हे।
उपमुख्यमंत्री-सिलाई केंद्र शुभारंभ
उपमुख्यमंत्री अरूण साव ह आज रईपुर के चंगोराभाठा म महतारी सिलई केंद्र के सुभारंभ करीन। रईपुर नगर-निगम कोति चलाय जात ए सिलई केंद्र म प्रसिक्षण दे जाही। प्रसिक्षण के बाद महिला अपन स्व-रोजगार सुरू कर सकही। ए बेरा म उपमुख्यमंत्री ह किहीन कि माईलोगन मन ल आत्मनिर्भर बनाय खातिर बने पहल हवय। ओमन किहीन कि ए कीसम के सिलई केंद्र पूरा प्रदेसभर म खुलय एखर परयास करे जाही। कारीकरम म रईपुर के महापौर मीनल चौबे घलो मौजूद रिहीन।
मुख्यमंत्री केंद्रीय मंत्री-मुलाकात
मुख्यमंत्री विष्णुदेव साय ए बखत दिल्ली दउरा म हवय। दउरा के दूसर दिन आज मुख्यमंत्री श्री साय ह अभी ले थोरिक देर पहिली केंद्रीय गृहमंत्री अमित शाह ले भेंट करीन। ए मउका म एक अहम बइठका म तीन नवा आपराधिक कानून लागू करे बर गोठबात होइस। ए बइठका म छत्तीसगढ़ के गृह मंत्री विजय शर्मा अउ पुलिस विभाग के कतकोन बड़का अधिकारी भाग लीन।
खिलाड़ी-चयन
रईपुर अउ बिलासपुर म चलत खेल विभाग के आवासीय खेल अकादमी बर नवा खिलाड़ी मन के चयन होवइया हे। एखर बर खेल विभाग कोति ले चयन ट्रायल के आयोजन होवत हे। ट्रायल के पहिली दिन रईपुर के कोटा स्टेडियम म खिलाड़ी मनके पंजीयन दस्तावेज जांच अउ डॉक्टरी जांच करे गीस। काली शारीरिक दक्षता के परीक्षण होही अउ तीसर दिन खेल कौशल के जांच करे जाही। तीरांदाजी के परीक्षण बालिका खेल छात्रावास के आगू मैदान म अउ हॉकी के सरदार वल्लभ भाई पटेल अंतर्राष्ट्रीय स्टेडियम रईपुर म होही। उहें, बिलासपुर अकादमी बर चयन ट्रायल के आयोजन उनतीस अउ तीस अप्रैल के करे जाही।
स्कूल समय-बदलाव
बाढ़त गर्मी म घलो अशासकीय स्कूल मन डहार ले निर्धारित ले जादा बेरा तक स्कूल के संचालन के सिकइत के बाद जिला शिक्षा अधिकारी ह एक आदेस पारित करत किहीन कि पूर्व के आदेस के पालन नइ करे के स्थिति म अशासकीय स्कूल मन उपर कार्रवाई करे जाही।
वेव्स-पंजीकरण
विश्व श्रव्य दृश्य अउ मनोरंजन सिखर सम्मेलन-वेव्स बर मीडिया के प्रतिनिधि मन बर पंजीकरण तीसर आखिरी दिन-इक्कीस, बाईस, तेईस अप्रैल ले फिर से सुरू करे जाही। ए मीडिया पेसेवर, फोटोग्राफर अउ डिजीटल कंटेंट क्रिएटर्स बर आवेदन करे अउ एक ले चार मई के मुंबई म होवइया मीडिया अउ मनोरंजन कारीकरम के हिस्सा बने के आखिरी मउका हे। वेव्स म हिस्सा लेवइया आकांक्षी पीआईबी वेब्स मीडिया एट द रेट जीमेल डॉट कॉम के अवलोकन कर सकत हे।
अउ अब मौसम के हाल…
मौसम विभाग के मुताबिक एक पूर्व पश्चिम द्रोणिका उत्तर पश्चिम राजस्थान ले पूर्वी बांग्ला देस तक बने हे। उहें, एक उत्तर दक्षिण द्रोणिका उत्तर छत्तीसगढ़ ले मन्नार के खाड़ी तक तेलांगाना रायल सीमा अउ तमिलनाडु होत बढ़वार म हवय। द्रोणिका के सेती हवा के दिसा उत्तर-पश्चिम हो जही, जेखर परभाव ले प्रदेस के तापमान म सरलग बढ़वार होही। मौसम विभाग कोति ले उत्तर अउ मध्य छत्तीसगढ़ अउ ओखर ले लगे जिला म झांझ चले के चेतावनी दे गेहे। उहें, मौसम सुख्खा बने रइही।