आईएएस-तबादला
राज्य सरकार ह भारतीय प्रशासनिक सेवा के एकचालीस झिन अधिकारी मनके ट्रांसफर करे हे। एमा ग्यारा ठिन जिला के कलेक्टर घलो सामिल हे। सामान्य प्रशासन विभाग डहार ले निकले आदेस मुताबिक संजय अग्रवाल ल बिलासपुर, दिव्या उमेश मिश्रा ल बालोद, इंद्रजीत चंद्रवाल ल खैरागढ़-छुईखदान-गंडई, कुंदन कुमार ल मुंगेली, नुपूर राशि पन्ना ल कोंडागांव, संजय कन्नौजे ल सारंगढ़-बिलाईगढ़, भगवान उइके ल गरियाबंद, मयंक चतुर्वेदी ल रायगढ़, कुणाल दुदावत ल दंतेवाड़ा, जन्मेजय महोबे ल जांजगीर-चांपा अउ सर्वेश्वर नरेंद्र भूरे ल राजनांदगांव के कलेक्टर नियुक्त करे गेहे।
एखर संगे टोपेश्वर वर्मा ल बिलासपुर राजस्व मंडल के अध्यक्ष, जनक प्रसाद पाठक ल वन विभाग के विसेस सचिव अउ शिखा राजपुत तिवारी ल चिकित्सा शिक्षा के संगे आयुष विभाग के आयुक्त बनाय गेहे। उहें, किरण कौशल ल मार्कफेड के संग नागरिक आपूर्ति निगम के प्रबंध संचालक अउ डॉक्टर प्रियंका शुक्ला ल राष्ट्रीय ग्रामीण स्वास्थ्य मिशन के प्रबंध संचालक के अतिरिक्त जिम्मेदारी सौंपे गेहे। अइसने, अवनीश शरण, सुनील कुमार जैन, के.डी. कुंजाम, कार्तिकेय गोयल, सारांश मित्तर, पदुम सिंह एल्मा, रमेश कुमार शर्मा, धर्मेश साहू समेत आने अधिकारी मनके प्रभार म घलो बदलाव करे गेहे।
आईपीएस-तबादला
राज्य सरकार ह भारतीय पुलिस सेवा के बीस झिन अधिकारी मनके प्रभार म फेरबदल करे हे। छत्तीसगढ़ पुलिस हाउसिंग कार्पोरेसन के प्रबंध संचालक पवन देव ल आगामी आदेस तक ए कार्पोरेसन के अध्यक्ष घलो बनाय गे हे। उहें, सरगुजा रेंज के पुलिस महानिरीक्षक अंकित कुमार गर्ग ल नवा रईपुर स्थित पुलिस मुख्यालय म एस.आई.बी. के पुलिस महानिरीक्षक के जिम्मेदारी दे गेहे।
अइसने, धु्रव गुप्ता ल पुलिस महानिरीक्षक सीआईडी, दीपक कुमार झा ल सरगुजा रेंज के आईजी, अभिषेक सांडिल्य ल राजनांदगांव के पुलिस महानिरीक्षक, बालाजी राव ल पुलिस मुख्यालय म आईजी कानून व्यवस्था अउ बिसेस शाखा, आजातशत्रु बहादुर सिंह ल गुप्तवार्ता अउ बिसेस शाखा के पुलिस उप महानिरीक्षक, विवेक शुक्ला ल अतिरिक्त पुलिस महानिरीक्षक सी.आई.डी., राजेश कुमार अग्रवाल ल सरगुजा के पुलिस अधीक्षक अउ विजय अग्रवाल ल दुरूग के पुलिस अधीक्षक बनाय गेहे।
एखर संगे जितेन्द्र शुक्ला, भावना गुप्ता, सूरज सिंह, त्रिलोक बंसल, लक्ष्य शर्मा, अंजनेय वार्ष्णेय, पुष्कर शर्मा, योगेश कुमार पटेल, एस.आर.भगत अउ विजय पांडेय के प्रभार म घलो बदलाव करे गेहे।
भाजपा-वक्फ अभियान
भारतीय जनता पार्टी ह वक्फ संशोधन अधिनियम के फायदा बारे म लोगन मन ल जागरूक करे बर आज ले राष्ट्रीय स्तर म वक्फ सुधार जनजागरण अभियान के सुरूआत करे हे। ए अभियान ह पांच मई तक चलही। ए अभियान के चलत भाजपा नेता अउ कार्यकर्ता मन मुस्लिम समुदाय बीच जाही अउ ओमन ल संशोधित अधिनियम बारे म जागरूक करही।
एखर पहिली, भाजपा अध्यक्ष जगत प्रकाश नड्डा ह विपक्षी दल मन उपर वोट बैंक के राजनीति करे अउ संशोधित कानून के प्रावधान बारे म मुसलमान मन ल गुमराह करे के आरोप लगाय रिहीन।
विजय शर्मा-अग्निशमन वाहन
उपमुख्यमंत्री विजय शर्मा ह आज अपन कवर्धा दउरा बेरा दू ठिन अग्निशनम गाड़ी ल हरा झंडी दिखाके रवाना करीन। एमा ल एक ठिन गाड़ी फोम वेंडर यूनिट हे, जउन ह जिला ल पहिली घांव दे गेहे। एखर केपेसिटी छै हजार लीटर हे, जेमा पांच सौ लीटर फोम टेंक के संग पचपन सौ लीटर पानी ले जाय जा सकथे। उहें, दूसर गाड़ी के केपेसिटी घलो छै हजार लीटर पानी के हे। ए दूनों गाड़ी नवा तकनीक वाले हे।
कांग्रेस-प्रदर्शन
प्रदेस म बिगड़त कनून व्यवस्था ल लेके कांग्रेस ह काली इक्काईस अप्रैल के मुख्यमंत्री निवास के घेराव करही। प्रदेस कांग्रेस अध्यक्ष दीपक बैज ह बतइन कि ए मुद्दा ल लेके पहिली गांधी मैदान म एक ठिन सभा होही। एखर बाद कांग्रेस कार्यकर्ता मन मुख्यमंत्री निवास के घेराव करही।
माओवादी आत्मसमर्पण/गिरफ्तार
नारायणपुर जिला म पांच झिन माओवादी मन पुलिस के आगू म आत्मसमर्पण करे हे। ए सबो माओवादी कुतुल अउ इंद्रावती एरिया कमेटी म जोनल डॉक्टर डिप्टी कमांडर अउ एलओएस सदस्य रूप म सक्रिय रिहीन। आत्मसमर्पण करइया माओवादी मन ल शासन डहार ले पचास-पचास हजार रूपिया के चेक दे गीस। जिला के पुलिस अधीक्षक प्रभात कुमार ह बतइन कि आत्मसमर्पण करइया माओवादी मन उपर नौ लाख रूपिया के इनाम घोसित रिहीस।
उहें, इही जिला के कोहकामेटा थाना क्षेत्र के मरकुड़-जड्डा के जंगल म सुरक्षाबल मन तीन झिन माओवादी ल गिरफ्तार करे हे। पुलिस अधीक्षक प्रभात कुमार ह बतइन कि ए माओवादी मन उपर आईईडी बिस्फोट के घटना म सामिल रहय के आरोप हे।
ऐति, बीजापुर जिला म सुरक्षाबल मन आने-आने थाना क्षेत्र ले चार झिन माओवादी ल गिरफ्तार करे हे। ए माओवादी मन तीर ले टिफिन बम समेत माओवादी जिनिस घलो बरामद करे गेहे। पुलिस के मुताबिक डिस्ट्रिक्ट रिजर्व गॉर्ड-डीआरजी अउ बस्तर फाइटर्स के संघरा टीम ह जांगला थाना क्षेत्र म सर्चिंग बर निकले रिहीस, तभे माटवाड़ा अउ कुपमेटा के जंगल ले चार झिन माओवादी ल गिरफ्तार करे गीस।
मुंगेली-स्मार्ट क्लास रूम
मुंगेली जिला के लोरमी विकासखंड के अट्ठाईस ठिन सरकारी स्कूल मन म स्मार्ट क्लास रूम सुरू करे गेहे। उपमुख्यमंत्री अरूण साव ह काली बैगाकापा शासकीय उच्चत्तर माध्यमिक विद्यालय म राखे गे कारीकरम म सबो स्मार्ट क्लास रूम के सुभारंभ करीन। ओमन स्मार्ट क्लास रूम म पढ़ना अउ पढ़ाना एखर सहुलियत ल देखिन अउ एखर बर राखे गे तकनीकी उपकरण ल सहराइन। एचडीएफसी बैंक अउ एआरओ फाउंडेसन के सहयोग ले स्कूल मन म ए स्मार्ट क्लास रूम बनाय गेहे। ए मउका म उपमुख्यमंत्री श्री साव ह किहीन कि स्मार्ट क्लास रूम ले लइका मनके पढ़ई म रूचि के संगेसंग सीखे के क्षमता घलो बाढ़ही। एखर जरिया ले ओमन अपन बिसय मन ल अउ सुघ्घर ढंग ले समझ सकही।
मुख्यमंत्री-सम्मेलन
मुख्यमंत्री विष्णुदेव साय अउ गुजरात के राज्यपाल आचार्य देवव्रत आज रईपुर म महर्षि दयानंद सरस्वती के दू सौवां जयंती अउ आर्य समाज के एक सौ पचासवां स्थापना बछर के मउका म राखे गे धर्म रक्षा महायज्ञ अउ वैदिक सनातन संस्कृति सम्मेलन म सामिल होइन। ए मउका म श्री साय अउ आचार्य देवव्रत ह छत्तीसगढ़ प्रांतीय आर्य प्रतिनिधि सभा डहार ले तियार किताब ‘‘चुनौतियों का चिंतन‘‘ एखर विमोचन करीन।
सभा म बोलत मुख्यमंत्री ह किहीन कि आर्य समाज डहार ले सरलग देस सेवा धरम संस्कृति के रक्षा अउ जनजागरण के काम करे जात हे। ओमन यहू किहीन कि आर्य समाज ह महर्षि दयानंद के बिचार ल आगू लेगत संस्कार अउ शिक्षा असन पुण्य वाले काम करत हे। उहें, गुजरात के राज्यपाल ह किहीन कि महर्षि दयानंद सरस्वती के जीवन मूल्य अउ बिचार मन ल अपनाय ले शारीरिक मानसिक अउ सामाजिक उन्नति के संकल्प पूरा होही।
ईस्टर
ईस्टर के परब आज जम्मों दुनिया हांसी-खुसी के संग मनाय जात हे। ए माने जाथे कि गुडफ्राइडे म ईशा मसीह ल सूली म चढ़ाय जाय के बाद आजे के दिन उंखर पुर्नजनम होय रिहीस। ए मउका म छत्तीसगढ़ के सबो गिरिजा घर मन म बिहनियाच ले श्रध्दालु मनके रेम लगे रिहीस। इंहा बिसेस प्रार्थना सभा घलो राखे गे रिहीस। राष्ट्रपति द्रौपदी मुर्मू अउ उपराष्ट्रपति जगदीप धनखड़ ह लोगन मन ल ईस्टर के सुभकामना दीन हे।
चित्रकला कार्यशाला
राजधानी रईपुर के बूढ़ेश्वर मंदिर म आज ले तीन दिन के चित्रकला कार्यसाला राखे जात हे। संस्कार भारती डहार ले राखे गे ए वर्कसॉप के बिसय लोकमाता अहिल्या बाई होल्कर के जीवन ले जुड़े घटना मन रइही। एमा प्रदेसभर के चित्रकार मन अपन कला ल देखाही।