केन्द्रीय अन्वेषण ब्यूरो-सीबीआई ह नागरिक आपूर्ति निगम-नान घोटाला के जांच ल प्रभावित करे के मामला म पूर्व आईएएस अधिकारी अनिल टूटेजा अउ आलोक शुक्ला के संग पूर्व महाधिवक्ता सतीश चंद्र वर्मा के खिलाफ एफआईआर दर्ज करे हे। सीबीआई ह दूनों पूर्व आईएएस अधिकारी अनिल टूटेजा अउ आलोक शुक्ला के घर म छापा के कार्रवाही करीन, जेमा कुछ आपत्तिजनक दस्तावेज बरामद होय के दावा करे हे।
दूनों पूर्व आईएएस अधिकारी उपर आरोप हे कि ओमन ह अपन पद के दूरूपयोग करके आर्थिक अपराध शाखा म दर्ज एफआईआर अउ नान मामला म ईडी डहार ले चलत कार्रवाई ल प्रभावित करे हे। सीबीआई ह किहीन कि एखर अलावा दूनों पूर्व आईएएस अधिकारी मन ह कथित तौर म तत्कालीन महाधिवक्ता सतीश चंद्र वर्मा ल ईडी अउ एसीबी डहार ले जांच के तहत अग्रिम जमानत हासिल करे बर अनुचित लाभ दीन।
जेईई मेन्स-नतीजे
राष्ट्रीय परीक्षा एजेंसी-एनटीए ह संयुक्त प्रवेश परीक्षा जेईई मेन दू हजार पच्चीस के दूसर सत्र के परिणाम जारी कर देहे। ए बार कुल चौबीस विद्यार्थी मन ह सत-प्रतिसत नंबर पाय हे। जादा अंक पाने वाला म राजस्थान के मोहम्मद अनस अउ आयुष सिंघल, दिल्ली के दक्ष अउ हर्ष झा, पश्चिम बंगाल के देवदत्त माझी अउ महाराष्ट्र के आयुष रवि चौधरी सामिल हे। कटऑफ के संग परिणाम जेईई मेन के अधिकारी के वेब साइट म उपलब्ध हे। एनटीए ह दू ले नौ अप्रैल के बीच ए परीक्षा आयोजित करे रिहीस। ए बछर जेईई मेन दू हजार पच्चीस, दू सत्र म जनवरी अउ अप्रैल म आयोजित करे गे रिहीस।
पंचायत सचिव-हड़ताल समाप्त
पंचायत सचिव ह शासकीय करण अउ वेतन बढ़ाय के मांग ल लेके पाछू एक महिना ले चलत अपन हड़ताल खतम कर देहे। छत्तीसगढ़ पंचायत सचिव संघ के कार्यकारी अध्यक्ष कोमल निषाद ह बतइन कि उपमुख्यमंत्री अउ पंचायत अउ ग्रामीण विकास मंत्री विजय शर्मा ले होय गोठबात के बाद ए निर्णय ले गेहे। ओमन ह बतइन कि सरकार ह आश्वासन दे हे कि वर्तमान म पंद्रह बछर के सेवा पूरा करइया सचिव मनके वेतन सत्यापन ले जुड़े विसंगती ल दूर करे जाही अउ आंदोलन के समय म रूके होय वेतन घलो जल्दी स्वीकृत करे जाही।
ट्रैफिक आदेश
प्रदेस म भीषण गर्मी के दौर सुरू हो गेहे। एला देखत बिलासपुर पुलिस ह आम लोगन मन ल धूप अउ लू ले बचाव बर मंझनिया बारह बजे ले संझा पांच बजे तक ट्रैफिक सिग्नल ल बंद राखे के आदेस दे हे। अतिरिक्त पुलिस अधीक्षक ट्रैफिक प्रभारी रामगोपाल करियारे ह बतइन कि सिग्नल बंद रहय के दउरान घलो पुलिस के जवान यातायात व्यवस्था के अच्छा संचालन बर चौक-चौराहा म तैनात रइही। जवान मन ल छायानुमा छतरी दे जाही। जेखर ले ओमन अपन कर्तव्य के निर्वहन अच्छा तरीका ले कर सकही।
वक्फ-कार्यशाला
भाजपा के प्रदेस इकाई डहार ले अवइया पच्चीस अप्रैल के कुशाभाऊ ठाकरे परिसर स्थित प्रदेस कार्यालय म वक्फ बिल सुधार जनजागरण अभियान कार्यसाला के आयोजन करे जाही। ए कार्यसाला म मुख्यमंत्री विष्णुदेव साय, भाजपा के राष्ट्रीय महामंत्री दुष्यंत गौतम, प्रदेस भाजपा अध्यक्ष किरण सिंह देव अउ प्रदेस संगठन महामंत्री पवन साय सामिल होही। भाजपा के प्रदेस महामंत्री भरतलाल वर्मा ह बतइन कि वक्फ बोर्ड सुधार कानून ल लेके विपक्ष डहार ले फैलाय जात भ्रम ल दूर करे बर पार्टी ह जन-जागरण अभियान चलाय के निर्णय लेहे। इही कड़ी म ए कार्यसाला के आयोजन करे जाही।
अग्निवीर-भर्ती आवेदन
भारतीय थल सेना डहार ले अग्निवीर भर्ती बर अब ऑनलाइन आवेदन के प्रक्रिया पच्चीस अप्रैल तक बढ़ा दे गेहे। अग्निवीर के भर्ती जनरल, तकनीकी, कर्लक, ट्रेडमेन, महिला सैन्य पुलिस अउ रेगुलर कैडर भर्ती धर्म गुरू, नर्सिंग सहयोगी अउ सिपाही फार्मा के पद मन बर करे जाही।
भारतीय सेना डहार ले ए घलो बताय जात हे कि सेना म चयन निष्पक्ष, पारदर्सी अउ केवल योग्यता के आधार म ही करे जात हे। एखर बर आवेदक भर्ती बर कोनो अनाधिकृत मनखे मनके झांसा म नइ आय।
नगर निगम-निर्माण कार्य
प्रदेस के सबो नगरीय निकाय के अधिकारी प्रतिनिधि वार्ड मन म घूमके निर्माण कामकाज अउ योजना ल सरलग देखत हे। एखर ले साफ-सफाई के अलावा प्रधानमंत्री आवास योजना के निर्माण काम, सड़क के निर्माण, जल प्रबंधन अउ अमृत मिशन के तहत पाईप लाइन बिछाय अउ जल प्रदाय योजना के काम म तेजी आय हे। वार्ड मन म साफ-सफाई, कचरा प्रबंधन अउ निर्माण काम के गुणवत्ता म सुधार दिखाई देवत हे।
जानबा के मुताबिक उप मुख्यमंत्री अरूण साव ह विभागीय समीक्षा बइठका म आयुक्त अउ मुख्य नगर पालिका अधिकारी मन ल रोज वार्ड मन म घूम के कामकाज के निरीक्षण करे के निरदेस दे रिहीन।
किसान-धरना प्रदर्शन
जांजगीर-चांपा जिला म नवागढ़ क्षेत्र के किसान मन ह नहर ले पानी दे जाय के मांग ल लेके अवइया बाईस अप्रैल के जिला मुख्यालय जांजगीर म धरना प्रदर्सन करे के निर्णय लेहे। क्षेत्र के गांव हरदी हरी म कृषक चेतना मंच के बैनर तले तीस गांव के किसान मनके बइठका होइस। बइठका म किसान मन ह पानी के कमी ले फसल के होवत नुकसान के जानकारी दीन। कृषक चेतना मंच के जिला संयोजक राजशेखर सिंह ह बतइन कि नहर ले टेल एरिया म पानी नइ पहुंचत हे। यदि सरकार सही समय म पानी नइ दीही, त किसान मन के फसल ल भारी नुकसान होही।
सड़क दुर्घटना
दुरूग जिला के पावर हाउस म पाछू रतिहा होय एक सड़क दुर्घटना म दू झन मनखे मन के मउत होगिस। उहें, एक आने मनखे घायल हो गेहे। जेला अस्पताल म भर्ती कराय गेहे। पुलिस ले मिले जानबा के अनुसार तीन नबालिग दोस्त एक मोटर साइकिल म रील बनाय बर भिलाई ले खुर्सीपार डहार जावत रिहीन। ए दउरान बाईक अनियंत्रित होके सड़क किनारे खड़े एक गाड़ी ले टकरा गीस।
ओति, सक्ती जिला के गांव कनेटी म मोटर साइकिल सवार एक मनखे हाइवा ले जाके टकरा गीस। ए हादसा म मनखे के मउका म ही मउत होगिस। ए घटना ले घुस्साय गांव के लोगन मन ह चक्काजाम करके विरोध प्रदर्सन करीन।
उहें, कोंडागांव जिला म कार के टक्कर ले कांग्रेसी नेता के मउत हो गेहे। बताय जात हे कि कांग्रेस के नेता खरीददारी बर सहर डहार जात रिहीस, तभे ए हादसा होइस।
माओवादी-डंप
बीजापुर जिला म सुरक्षाबल मन ह माओवादी डहार ले छुपा के राखेगे एक बड़े डंप ल बरामद करे हे। ए डंप म भारी मात्रा म विस्फोटक अउ नक्सल समान मिले हे। जिला के पुलिस अधीक्षक जितेन्द्र यादव ह बतइन कि कोबरा बटालियन के टीम तलासी अभियान बर निकले रिहीस। ए दउरान सुरक्षाबल मनके टीम ह मुर्कराजगुटटा के पहाड़ी मन म माओवादी मन डहार ले छुपा के राखे गे डंप के पता लगाइस। डंप ले छै नग सोलर प्लेट, छै जरकिन, दू माओवादी वर्दी, दू पंखा अउ आने संदिग्ध समान बरामद करे गेहे।
अदाणी फाउंडेशन-सामूहिक खेती
रायगढ़ जिला के पुसौर विकासखंड के गांव के माईलोगन मन अब सामूहिक खेती के जरिया ले आत्मनिर्भरता डहार मजबूत कदम बढ़ावत हे। अदाणी फाउंडेशन डहार ले संचालित आजीविका संवर्धन के पहल म ए माईलोगिन मन ल आधुनिक कृषि तकनीक ले सशक्त बनाय हे। माईलोगिन मन ह पाछू बछर अक्टूबर ले साहो कीस्म के टमाटर के खेती सुरू करीन। अदाणी फाउंडेशन डहार ले माईलोगिन मन ल मल्चिंग, खाद, उर्वरक, कीटनाशक अउ उन्नत बीज जइसे जरूरी समान दे गेहे। जेखर बाद पाछू बछर दिसंबर ले ए बछर मार्च तक चौहत्तर हजार किलोग्राम ले जादा टमाटर के उत्पादन होइस, जेखर ले करीब साढ़े तीन लाख रूपिया के आय अर्जित करे गीस।
उहें, गांव सुपा म पहिली फसल चक्र म ढाई हजार किलोग्राम करेला के घलो उत्पादन करे गीस। जेखर ले पचपन हजार रूपिया से जादा के आय होइस। एखर अलावा गांव बरपाली, जेवरीडीह, कपरदा, ठेंगागुढ़ी के तेईस स्वयं सहायता समूह के उनसठ माईलोगिन सदस्य ह ड्रीप सिंचाई पध्दति ले टमाटर, खीरा अउ करेला के खेती सुरू करे हे।