पुलिस अधिकारी मन बतइन कि ए माओवादी मन ह सुकमा पुलिस कोति ले चलाय जावत नियद नेल्लानार योजना ले परभावित होके, ए क्षेत्र म सुरक्षाबल के सरलग कैंप सुरू होय ले अउ माओवादी मन कोति ले होवत शोषण ले तंगा के आत्मसमर्पण करीन हे। ए सबो झन ल राज्य सरकार के नवा पुनर्वास नीति के तहत पचास-पचास हजार रूपिया के प्रोत्साहन रासि दे गीस।
मुख्यमंत्री विष्णुदेव साय ह ए बात उपर संतोष जतइन हे कि माओवादी मन अब समाज के मुख्यधारा ले जुड़ना चाहत हे। ओमन किहीन कि आत्मसमर्पण करइया माओवादी मनके पुनर्वास बर हर संभव काम करे जाही। श्री साय ह किहीन कि केंद्रीय गृहमंत्री अमित शाह के संकल्प अनुसार मार्च दू हजार छब्बीस तक छत्तीसगढ़ समेत पूरा देस ले नक्सलवाद के समूलनास निश्चित हे।
इही बीच, नारायणपुर पुलिस कोति ले चलाय जावत माड़ बचाओ अभियान के तहत सुरक्षाबल ल माओवादी मनके खिलाफ बड़का जीत मिले हे। जिला के कसोड़-कुमुरादी के जंगल म होय मुठभेड़ म हथियार बंद सीनियर कैडर माओवादी बड़ मात्रा म विस्फोटक समेत आने-आने समान छोड़के भीग गीन। घटनास्थल के सर्चिंग म डीआरजी अउ आईटीबीपी के टीम ह छै लाख रूपिया नगद, ग्यारा लैपटॉप, विस्फोटक पदार्थ समेत आने-आने समान बरामद करीन हे। पुलिस ह दावा करीस हे, कि ए मुठभेड़ म बड़ संख्या म माओवादी मारे गेहे अउ घायल घलो होय हे। पुलिस महानिरीक्षक सुंदरराज पी. अउ जिला पुलिस अधीक्षक प्रभात कुमार ह माओवादी मन ले हथियार छोड़े के अपील करीन हे।
नक्सल मुक्त-गांव
सुकमा जिला के बड़ेसट्टी गांव अब नक्सल मुक्त हो गेहे। ए गांव म सक्रिय रहय आखिरी ग्यारा झन माओवादी मन ह आज हथियार डाल दीन हे। अब राज्य सरकार के नवा आत्मसमर्पण, पुनर्वास नीति अउ इलवद पंचायत योजना के तहत ए गांव के विकास बर एक करोड़ रूपिया दे जाही। ए पइसा ल शिक्षा, स्वास्थ्य, सड़क, पानी अउ सामूदायिक भवन जइसन जरूरी काम म खर्चा करे जाही।
उप मुख्यमंत्री विजय शर्मा ह सुकमा जिला म सक्रिय ए ग्यारा माओवादी मनके एके संग होय आत्मसमर्पण ल ऐतिहासिक बतइन हे। ओमन किहीन कि मुख्यमंत्री विष्णुदेव साय के अगुवई म छत्तीसगढ़ सरकार ह नक्सलवाद के समाधान बर, जेन संवेदनसील अउ दूरदर्सी नीति ल अपनाय हे, ओखरे परिणाम अब दिखे लगे हे। आज के आत्मसमर्पण ए बात के प्रमाण हे कि विस्वास, पुनर्वास अउ विकास के त्रि-स्तरीय रणनीति ले माओवादी मन ल मुख्यधारा ले जोड़े म सफलता मिलत हे।
जांजगीर-प्लांट हादसा-मौत
जांजगीर के चांपा के प्रकाश इंडस्ट्रीज म पाछू दिन होय एक हादसा म घायल जीएम अनूप चतुर्वेदी के इलाज के बीच हैदराबाद म मउत होगे हे। इही हादसा म तीन झन घायल अधिकारी-करमचारी मनके इलाज हैदराबाद म ही चलत हे। उहें, आने नौ झन के इलाज रईपुर अउ भिलई के अस्पताल म होवत हे।
घटना के बाद औद्योगिक सुरक्षा विभाग ह प्लांट प्रबंधन ल नोटिस जारी करके जवाब मांगे हे। संगेसंग विभाग के फोरेंसिक टीम के जांच म प्लांट प्रबंधन के लापरवाही पता चले के बाद घटनास्थल ल बंद घलो कर देहे। ए मामला म चांपा पुलिस ह पहिली ही प्लांट के दू अधिकारी अउ अन्य के खिलाफ रिपोर्ट दरज कर चुके हे।
बीएड बर्खास्त शिक्षक-आंदोलन समाप्त
प्रदेस म बीएड प्रसिक्षित बर्खास्त सहायक शिक्षक मन ह अपन आंदोलन समाप्त कर दीन हे। उंखर एक प्रतिनिधिमंडल ह आज मुख्यमंत्री विष्णुदेव साय ले निवास कार्यालय म भेंट करे के बाद आंदोलन ल खतम करे के घोसना करीन। सुनइया मन ल बतादन कि बीएड प्रशिक्षित बर्खास्त सहायक शिक्षक मन अपन आने-आने मांग ल लेके पाछू एक सौ छब्बीस दिन ले आंदोलन करत रिहीन।
मुख्यमंत्री ह ए प्रतिनिधिमंडल ले किहीन हे कि उंखर समस्या ल समझ के सरकार ह सहानुभूति ले ए बिसय उपर गंभीरता ले सोचत हे। ओमन आस्वस्त करीन कि ए मामला ल सुलझाय बर शासन स्तर म सबो सकारात्मक परयास करे जावत हे।
हाई सिक्यूरिटी रजिस्ट्रेशन प्लेट
प्रदेस म गाड़ी मन म हाई सिक्यूरिटी रिजस्ट्रेसन प्लेट लगाय के काम म तेजी लाय बर अनुबंधित कंपनी मन कोति ले सिविर लगाय जाही। कंपनी मन म करमचारी बढ़ाय जाही। संगेसंग हाई सिक्यूरिटी रजिस्ट्रेसन प्लेट लगाय के सुविधा जिला परिवहन कार्यालय म घलो उपलब्ध होही। परिवहन सचिव अउ आयुक्त एस. प्रकाश ह अनुबंधित कंपनी मनके प्रतिनिधि मन संग होय बइठका म ए निरदेस दीन हे।
सुनइया मन ल बतादन कि सर्वोच्च न्यायालय के निरदेस अनुसार राज्य म गाड़ी मन म हाई सिक्यूरिटी रजिस्ट्रेसन प्लेट लगाय के काम तेजी ले करे जावत हे।
बातों-बातों में
सुनइया मन ल बतादन कि प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ के ए दारी के अंक ह पोषण पखवाड़ा म केंद्रित रइही। ए कारीकरम म आहार विसेसज्ञ लक्ष्मी पांडेय ले लेगे भेंटवार्ता ल काली उन्नीस अप्रैल के बिहनिया साढ़े दस बजे आकाशवाणी केंद्र रईपुर ले परसारित करे जाही। एला छत्तीसगढ़ के सबो आकाशवाणी केंद्र एके संग रिले करही।
दीपक म्हस्के-पदभार
मुख्यमंत्री विष्णुदेव साय ह आज राजधानी रईपुर म छत्तीसगढ़ मेडिकल सर्विस कॉर्पोरेसन लिमिटेड के नवा नियुक्त अध्यक्ष दीपक म्हस्के के पदभार ग्रहण कारीकरम म सामिल होइन। एमा विधानसभा अध्यक्ष डॉक्टर रमन सिंह घलो सामिल रिहीन। ए मउका म मुख्यमंत्री ह किहीन कि छत्तीसगढ़ मेडिकल सर्विस कॉर्पोरेसन लिमिटेड के राज्य के स्वास्थ्य सेवा म गुणवत्ता, पारदर्सिता अउ जरूरी दवा अउ सामान के समय म उपलब्धता पक्का करे म बड़का भूमिका रहय हे।
गुड फ्राइडे
आज गुड फ्राइडे हे। प्रभु ईसा मसीह ल सलीब म चढ़ाय के सुरता म ए दिन मनाय जाथे। इही दिन प्रभु यीशु ह मनखे मन ल पाप ले मुक्ति देवाय बर अपन जिनगी ल त्यागे रिहीन। प्रधानमंत्री नरेंद्र मोदी ह गुड फ्राइडे म प्रभु यीशु मसीह के बलिदान ल सुरता करीन हे। सोसल मीडिया म पोस्ट म श्री मोदी ह किहीन हे कि ए दिन हमन ल परेम, सहानुभूति, दया अउ उदारता के प्रेरणा देथे।
प्रभु ईसा मसीह के त्याग दिवस म आज राजधानी रईपुर समेत राज्यभर के गिरिजाघर मन म बिसेस प्रार्थना सभा राखे गीस।
अउ अब मौसम के हाल…
प्रदेस म आज ले तापमान म बढ़ोत्तरी फेर सुरू होय हे, जबकि मौसम विभाग ह अवइया चौबीस घंटा म प्रदेस म एक-दू जघा म थोरकुन पानी गिरे या गरजे लउके के संग छींटा पडे़ के संभावना बताय हे। ए दउरान एक-दू जघा म अंधड़ चले अउ गाज गिर के घलो आसार हे।
अउ अब थोरकुन समाचार सार म –
– महिला अउ बाल विकास विभाग ह बालोद के जिला कारीकरम अधिकारी ल कर्तव्य म लापरवाही अउ अनियमितता के आरोप म तुरते प्रभाव ले निलंबित कर दे गेहे।
– जांजगीर के चांपा पुलिस ह करीब एक करोड़ चौबीस लाख रूपिया के धोखाधड़ी के मामला म एक मनखे ल गिरफ्तार करे हे। एहा जमीन खरीदी-बिक्री अउ सेयर बाजार म मुनाफा देवाय के झासा देके ठगी करे हे।
– कांडागांव जिला के केशकाल वनमंडल म आज ले वन सीमा सुरक्षा सप्ताह सुरू होय हे, जउन ह चौबीस अप्रैल तक चलही।
अउ
– जांजगीर-चांपा जिला के पामगढ़ म कार के टक्कर ले मोटर साइकिल सवार एक झन युवक मउत होगे। पुलिस ह आरोपी कार चालक के खिलाफ मामला दरज करे हे।