मुख्यमंत्री विष्णुदेव साय के अध्यक्षता म आज मंत्रालय म होय राज्य मंत्रिमंडल के बइठका म कतकोन जरूरी निर्णय ले गीस। बइठका म ले गे निर्णय के जानकारी देवत उपमुख्यमंत्री अरूण साव ह बतईन कि छत्तीसगढ़ लोक सेवा आयोग, व्यावसायिक परीक्षा मंडल अउ विशेष कनिष्ठ कर्मचारी चयन बोर्ड डहार ले आयोजित परीक्षा अउ साक्षात्कार म सामिल होवइया छत्तीसगढ़ के स्थानीय अभ्यर्थी मन ल परीक्षा सुल्क वापस करे जाही।
श्री साव ह बतईन कि राज्य के छोटे व्यापारी मनके हित म एक बड़ा फइसला लेवत राज्य मंत्रिमंडल ह दस साल ले जादा पुराना लंबित मामला म पच्चीस हजार रूपिया तक वैट देनदारी मन ल माफ करे के निर्णय लेहे। एला चालीस हजार ले जादा व्यापारी मन ल लाभ पहुंचही।
कैबिनेट बइठका म नवा रायपुर म राष्ट्रीय फैशन प्रौद्योगिकी संस्थान-निफ्ट के कैम्पस ल घलो मंजूरी दे गीस। उपमुख्यमंत्री ह बतईन कि भारत सरकार के कपड़ा मंत्रालय के अनुसार ए परियोजना के कुल संभावित लागत करीब दू सौ इकहत्तर करोड़ रूपिया होही।
एखर अलावा मंत्रिपरिषद ह राज्य के नगरीय निकाय म बायो-सीएनजी संयंत्र बर रियायती दर म सासकीय भूमि आवंटित करे जाय के सहमति देहे। उहें, सार्वजनिक वितरण प्रणाली म अवइया सक्कर वितरण बर ए महीना ले अवइया बछर मार्च तक जरूरी सक्कर क्रय राज्य के सहकारी शक्कर कारखाना ले करे के निर्णय ले गेहे। मंत्रिपरिषद ह भारत अर्थ मूवर्स लिमिटेड ल राज्य म हैवी अर्थ मूविंग इक्विपमेंट मैन्युफैक्चरिंग संयंत्र स्थापित करे के सैद्धांतिक मंजूरी देहे।
सीआरपीएफ-स्थापना दिवस-अमित शाह
केन्द्रीय गृहमंत्री अमित शाह ह कहिन कि मार्च दू हजार छब्बीस तक देस ले नक्सलवाद पूरा खतम हो जही अउ एमा सीआरपीएफ के जवान सबले बड़का भूमिका निभाही। श्री शाह ह आज मध्यप्रदेश के नीमच म सीआरपीएफ के छियासीवां स्थापना दिवस के बेरा म होय समारोह ल संबोधित करत रिहीन। ओमन कहिन कि कोबरा बटालियन के जवान देस ल नक्सल मुक्त बनाय म कतकोन कामकाज करत हे अउ ओखर मन ले साहस के बल म ही नक्सलवाद ले मुक्ति के देस के संकल्प पूरा होही।
अमर सहीद मनके बलिदान ल नमन करत हुए श्री शाह ह कहिन कि देस के इतिहास म सुरक्षा बल मनके अमर सहीद के शौर्यगाथा स्वर्ण अक्षर म लिखे जाही। ओमन ह सीआरपीएफ के सहीद जवान मनके परिजन के सराहना करत हुए कहिन कि देस सशक्त अउ समृद्ध बनत हे, एमा उंखर परिवार के बड़ योगदान हे।
ए मउका श्री शाह ह जवान मन ल वीरता पुरस्कार घलो दीन। ओमन ह सहीद मन ल श्रद्धांजलि दीन अउ परेड के निरीक्षण घलो करीन।
माओवादी गिरफ्तार/आईईडी बरामद
बीजापुर जिला म सुरक्षा बल मन ह आने-आने थाना क्षेत्र मन ले दू इनामी संग बाईस माओवादी मन ल गिरफ्तार करे हे। ए माओवादी मन तीर ले टिफिन बम, विस्फोटक अउ आने माओवादी सामान बरामद करे गेहे।
पुलिस के मुताबिक उसूर थाना क्षेत्र ले कोबरा बटालियन अउ केन्द्रीय रिजर्व पुलिस बल-सीआरपीएफ के संयुक्त टीम एरिया डॉमिनेशन बर टेकमेटला डहार निकले रिहीस। ए दउरान टेकमेटला के जंगल ले विस्फोटक के संग सात माओवादी पकड़े गीस। उहें, डिस्ट्रिक्ट रिजर्व गार्ड-डीआरजी के टीम ह जांगला थाना क्षेत्र के बेलचर, भूरिपानी अउ कोटमेटा डहार सर्चिंग के दउरान बेलचर के जंगल ल छह माओवादी मन ल गिरफ्तार करे हे। एखर अलावा नेलसनार थाना क्षेत्र म अवइया कांदाकरका के जंगल ले सीआरपीएफ के टीम ह नौ माओवादी मन ल गिरफ्तार करीन।
उहें, नारायणपुर जिला के धनोरा थाना क्षेत्र म सुरक्षा बल मन ह पांच-पांच किलो के आईईडी बरामद करे हे। उहें, चार संदिग्ध मनखे मन ल घलो गिरफ्तार करे गेहे। एखर मन तीर ले एक कुकर बम, दो डेटोनेटर संग माओवादी साहित्य घलो बरामद करे गेहे।
इही जिला के कोहकामेटा क्षेत्र म अवइया गट्टाकाल के जंगल ले भारत-तिब्बत सीमा पुलिस बल-आईटीबीपी के टीम ह पांच किलोग्राम वजन के एक कुकर बम बरामद करे हे। बम निरोधक दस्ता मन ह ए बम ल निष्क्रिय कर दीन।
अशोक पटेल-गिरफ्तार
आर्थिक अपराध अन्वेषण ब्यूरो-ईओडब्ल्यू के टीम ह आज तेंदूपत्ता बोनस घोटाला मामला म भारतीय वन सेवा के अधिकारी अशोक पटेल ल गिरफ्तार करे हे। अशोक पटेल सुकमा जिला के पूर्व डीएफओ हे। जानबा के मुताबिक तेंदूपत्ता बोनस घोटाला मामला म राज्य सरकार ह पाछु महीना अशोक पटेल ल निलंबित कर दे रिहीस। इंखर बाद ईओडब्ल्यू ह एखर कतकोन ठिकाना म छापा मारे गे रिहीस। छापा के दउरान तेंदूपत्ता बोनस घोटाला के कतकोन साक्ष्य मिले रिहीस। उहें, तेंंदूपत्ता बोनस घोटाला मामला म पूर्व विधायक अउ सीपीआई नेता मनीष कुंजाम के घर के अलावा जगरगुंडा, पालाचलमा, कर्कोटा अउ एर्राबोर इलाका म तेंदूपत्ता प्रबंधक मनके ठिकाना म घलो छापा के कार्रवाई करे गे रिहीस।
महादेव सट्टा ऐप-कार्रवाई
महादेव सट्टा ऐप मामला म रायपुर पुलिस ह कोलकाता अउ गुवाहाटी ले चौदह सटोरी मन ल गिरफ्तार करे हे। एमा छत्तीसगढ़ के छह सटोरी मनके संग झारखंड के तीन, मध्यप्रदेश के दू, पंजाब, उत्तरप्रदेश अउ बिहार के एक-एक आरोपी सामिल हे। पकड़े गे आरोपी आने-आने पैनल के जरिया ले सट्टा के संचालन करत रिहीस। पुलिस ह इंखर मन तीर ले तीस लाख रूपिया के सड़सठ मोबाइल फोन, आठ लैपटॉप, चार राउटर, चौरानवे एटीएम कार्ड, पन्द्रह सिम कार्ड, बत्तीस बैंक पासबुक, तीन चेक बुक अउ सीसीटीवी कैमरा जब्त करे हे।
मुख्यमंत्री-अग्निशमन वाहन
मुख्यमंत्री विष्णुदेव साय ह आज रायपुर के माना कैम्प स्थित नगर सेना केन्द्रीय प्रशिक्षण संस्थान परिसर म होवइया कार्यक्रम म बीस नवा अग्निशमन वाहन ल हरा झंडी देखाके रवाना करीन। ए बेरा म ओमन ह नवा रायपुर के सेक्टर-तेरह म नवा बने अग्निशमन केन्द्र सह आवासीय परिसर अउ माना म नवीन सेनानी कार्यालय के घलो लोकार्पण करीन। कार्यक्रम ल संबोधित करत हुए श्री साय ह कहिन कि नागरिक सुरक्षा अउ आपदा प्रबंधन ल सशक्त बनाय बर सरकार दृढ़संकल्पित हे।
अस्थायी बिजली कनेक्शन
राज्य सरकार ह व्यवसायी बर अस्थायी बिजली कनेक्शन पाय के प्रक्रिया ल पूरा तरीका ले डिजिटल अउ सरल बनाय देहे। स्टेट सिंगल विंडो पोर्टल के जरिया ले सुरू करे गे ए ऑनलाइन प्रणाली के उद्देश्य नियम म सुधार करना अउ कठिन प्रक्रिया ल सरल बनाना हे। नवा प्रणाली के तहत व्यवसायी अब घर बइठे ही स्टेट सिंगल विंडो पोर्टल म अस्थायी बिजली कनेक्शन बर आवेदन कर सकत हे।
हाईकोर्ट-प्राचार्य पदोन्नति
छत्तीसगढ़ उच्च न्यायालय म आज मुख्य न्यायाधीश रमेश सिन्हा अउ न्यायाधीश अरविंद वर्मा के डिवीजन बेंच ह प्राचार्य पदोन्नति ल लेके दायर याचिका उपर सुनवाई करीन। राज्य सासन डहार ले पैरवी करत हुए अतिरिक्त महाधिवक्ता ह कोर्ट ल जानकारी दीन कि प्राचार्य पदोन्नति ले जुड़े आने याचिका मनके सुनवाई हाईकोर्ट के आने-आने बेंच मन म चलत हे। एमा मुख्य न्यायाधीश ह रजिस्ट्रार जनरल ल सबो याचिका के सुनवाई एके संग करे के निरदेस दीन। अब ए मामला के अवइया सुनवाई एक मई के होही।
समावेशी आजीविका योजना
जशपुर अउ कबीरधाम जिला के पांच विकासखंड मन म आज छत्तीसगढ़ समावेशी आजीविका योजना के सुभारंभ होइस। ए योजना के तहत ए दूनों जिला के पांच हजार अति गरीब परिवार मन ल अवइया तीन बछर म प्रसिक्षण, बिसेस कार्ययोजना, अउ सरकारी योजना मनके माध्यम ले स्थायी आजीविका ले जोड़े जाही। एखर ले उंखर मनके आय बाढ़ही। संगेसंग सामाजिक-आर्थिक विकास ल बढ़ावा मिलही। नवा रायपुर म होवइया कार्यक्रम म छत्तीसगढ़ राज्य ग्रामीण आजीविका मिशन-बिहान अउ बीआरएसी इंटरनेशनल के बीच तीन बछर बर एमओयू म हस्ताक्षर करे गीस।
स्वास्थ्य मंत्री-निर्देश
प्रदेश के स्वास्थ्य मंत्री श्यामबिहारी जायसवाल ह आज रायपुर स्थित डॉक्टर भीमराव अंबेडकर अस्पताल म अधिकारी मनके बइठका लीन। बइठका म ओमन ल ह चिकित्सा सुविधा ल अच्छा बनाय अउ विस्तार के संबंध म अधिकारी मन ल निरदेस दीन। बइठका म अस्पताल के संरचना अउ सेवा ल आधुनिक अउ मनखे मन बर सरल बनाय उपर घलो विचार-विमर्स करीन।