मुख्यमंत्री विष्णुदेव साय ह जगदलपुर म आज जल संसाधन विभाग के मुख्य अभियंता कार्यालय के सुभारंभ करीन। ए मउका म श्री साय ह किहीन कि कार्यालय के सुरू होय ले बस्तर संभाग के जम्मों सातों ठन जिला मनके विभागीय कामकाज म सुविधा मिलही। ओमन यहू किहीन कि जल संसाधन ले जुड़े निर्माण काम मनके सर्वेक्षण, डीपीआर निर्माण अउ तकनीकी मंजूरी म तेजी आही। ओमन किहीन कि पहिली ए काम के मंजूरी ले बर रईपुर जाय बर पड़त रिहीस हे। अब कार्यालय बने ले रईपुर जाय के जरूरत नइ पड़य।
ए मउका म उपमुख्यमंत्री विजय शर्मा, जल संसाधन मंत्री केदार कश्यप, सांसद महेश कश्यप अउ विधायक किरण िंसंह देव के संगेसंग जनप्रतिनिधि अउ अधिकारी-करमचारी मन ह मौजूद रिहीन।
उहें, मुख्यमंत्री श्री साय ह काली जगदलपुर म संभाग स्तरीय विभागीय समीक्षा के बइठका लिही। ए बइठका म जम्मों कलेक्टर, पुलिस अधीक्षक, जिला पंचायत के मुख्य कार्यपालन अधिकारी अउ दीगर अधिकारी मन ह सामिल होही।
संपत्तिकर-जमा छूट
राज्य सरकार ह नगरीय निकाय मन म वित्तीय बछर दू हजार चौबीस-पच्चीस के संपत्तिकर अउ विवरण जमा करे खातिर तीस दिन के बिसेस छूट दे हे। अब तीस अप्रैल दू हजार पच्चीस तक संपत्तिकर जमा करे जा सकत हे। ए संबंध म जम्मों जिला कलेक्टर, नगर निगम के आयुक्त के संगेसंग नगर पालिका अउ नगर पंचायत के मुख्य नगर पालिका अधिकारी ल परिपत्र जारी कर दे गेहे।
खबर के मुताबिक नगरीय निकाय मन म संपत्तिकर अउ विवरण जमा करे के आखिरी तारीख ल पहिली इकतीस मार्च दू हजार पच्चीस राखे गे रिहीस।
नक्सली-आत्मसमर्पण
मोहला-मानपुर जिला म आज पांच लाख रूपिया के एक झन इनामी माओवादी ह पुलिस के आगू म आत्मसमर्पण कर दीन। जिला के पुलिस अधीक्षक वाय.पी.सिंह ह एक ठन पत्रकारवार्ता म बतइन कि आत्मसमर्पण करइया माओवादी रूपेश मंडावी ह राजनांदगांव-कांकेर एरिया म डिवीजन कमेटी के कोतरी एरिया कमेटी के सदस्य अउ एलओएस डिप्टी कमांडर के पद म पदस्थ रिहीन हे। ओमन बतइन कि रूपेश मंडावी ह माओवादी संगठन के विचार ले मोहभंग अउ अांतरिक मतभेद होय के सेति आत्मसमर्पण करीन। ओमन बतइन कि ए माओवादी ह जिला के मदनवाड़ा, सीतागांव, औंधी अउ मानपुर के संगेसंग कांकेर, नारायणपुर जिला म सक्रिय रिहीन।
आईआईएम-दीक्षांत समारोह
रईपुर के भारतीय प्रबंध संस्थान आईआईएम के चौदहवां दीक्षांत समारोह के कारीकरम ल आज करे गीस। ए कारीकरम म कोलगेट पामोलिव इंडिया लिमिटेड के एमडी अउ सीईओ प्रभा नरसिम्हन ल माई पहुना बनाय गीस। ए दउरान ओमन एमबीए, ई-एमबीए, एफपीएम अउ ई-एफपीएम ले स्नातक करइया पांच सौ पंचानवे झन विद्यार्थी मन ल डिग्री भेंट करीन। एखर अलावा नौ झन शोध करइया मन ल डॉक्टरेट के उपाधि दे गीस। उहें, सात झिन विद्यार्थी मन ल स्वर्ण पदक प्रदान करे गीस।
ए कारीकरम म बोलत आईआईएम के निदेसक रामकुमार कांकाणी ह किहीन कि आज के दिन ह छात्र अउ छात्रा मनके जिनगी के एक ठन जरूरी समय हरय।
प्रशासनिक फेरबदल
राज्य सरकार ह भारतीय प्रशासनिक सेवा के दू झन अधिकारी मनके प्रभार म फेरबदल करे हे। सामान्य प्रशासन विभाग डहार ले जारी करे गे आदेस के मुताबिक आईएएस अधिकारी मुकेश कुमार बंसल ल सामान्य प्रशासन विभाग म सचिव के प्रभार ले मुक्त कर दे गेहे। ओखर जघा आईएएस अधिकारी रजत कुमार ल सामान्य प्रशासन विभाग के सचिव के उपराहा प्रभार सौंपे गेहे।
उहें, राज्य सरकार ह राज्य प्रशासनिक सेवा के छै झन अधिकारी मनके तबादला कर देहे। सामान्य प्रशासन विभाग डहार ले जारी करे गे आदेस के मुताबिक विनायक शर्मा ल मनेन्द्रगढ़-चिरमिरी-भरतपुर जिला के अपर कलेक्टर ममता यादव ल संयुक्त कलेक्टर बिलासपुर, माधुरी सोन ठाकुर ल संयुक्त कलेक्टर कोरबा, स्निग्धा तिवारी ल संयुक्त कलेक्टर जांजगीर-चांपा, अशोक कुमार मार्बल ल डिप्टी कलेक्टर सारंगढ़-बिलाईगढ़ अउ गीता रायस्त ल संभागीय कार्यालय जगदलपुर म उपायुक्त के पद म पदस्थ करे गेहे।
रिश्वत-गिरफ्तार
एंटी करप्सन ब्यूरो-एसीबी के टीम ह आज गौरेला-पेण्ड्रा-मरवाही जिला के गौरेला म पदस्थ राजस्व निरीक्षक आरआई संतोष कुमार चंद्रसेन ल पचास हजार रूपिया के रिश्वत लेवत रंगेहाथ गिरफ्तार करे गीस। उहें, एक झन अउ करमचारी ह मउका ले भाग गे, जेखर तलास करे जात हे। राजस्व निरीक्षक ह एक झन किसान तीर ले जमीन संबंधी काम करे के बदला म रिश्वत के मांग करे रिहीन।
दुरूग जिला के जेवरा-सिरसा चौकी के अंतर्गत बेलौदी गांव म पाछू रतिहा एक ठन ट्रैक्टर ह अंतेतंते होके घर के बाहिर बइठे छै झिन लोगन मन ल अपन चपेट म ले लीन। ए हादसा म एक झन लइका समेत दू झिन लोगन मनके मउकाच म परान छूटगे। उहें, चार झिन मनखे मन घायल होगे, घायल होय मनखे मनके इलाज कराय खातिर अस्पताल म भर्ती कराय गेहे। घटना के बाद गांव वाले मन ह चक्काजाम करके विरोध प्रदर्सन करीन।
उहें, जिला के सेलूद गांव के तांदुला नहर म डूबे ले दू झिन मनखे के लास ल एसडीआरएफ के टीम ह खोजबीन करके नहर ले बाहिर निकालीन हे। एक झिन जवान लइका के लास ल खोपली गांव के तीर अउ दूसर युवक के लास ल डोमाडीह गांव के तीर बरामद करे गीस।
सट्टा गिरफ्तार
रईपुर के क्राइमब्रांच पुलिस के टीम डहार ले आईपीएल क्रिकेट मैच के दउरान महादेव ऑनलाइन सट्टा खेलाय के मामला म कलकत्ता ले दस झन लोगन मन ल गिरफ्तार करे गेहे। ए जम्मों आरोपी मन ल रईपुर लाके पूछताछ करे जात हे। काली आरोपी मन ल कोर्ट म पेस करे जाही। क्राइमब्रांच के एक झन अधिकारी ह बतइन कि अभी जांच सुरू करे गेहे अउ कई झन मनखे के जुड़े होय के संभावना हे।
टुटेजा-जमानत
सुप्रीम कोर्ट ह शराब घोटाला मामला म गिरफ्तार करे गे, पूर्व आईएएस अधिकारी अनिल टुटेजा ल जमानत दे देहे। उहें, जमानत मिले के बावजूद ओमन रिहा नइ हो पाय, ओखर खिलाफ इही मामला म ईओडब्ल्यू एसीबी ह प्रकरण दर्ज करे हवय।
खरसिया-नया रायपुर-रेल लाइन
दुरूग कलेक्टर अभिजीत सिंह ह खरसिया-नवा रईपुर-परमलकसा परियोजना नवा रेल लाइन म प्रभावित पाटन अउ दुरूग अनुभाग म सामिल तेईस ठन गांव के निजी भूमि के खाता विभाजन, अंतरण, व्यपवर्जन अउ खरीदी-बिक्री ल तुरते प्रभाव ले अवइया आदेस तक रोक लगा देहे।
विशेष कार्यक्रम
आकाशवाणी रईपुर के प्रादेशिक समाचार एकांश डहार ले प्रधानमंत्री मुद्रा योजना उपर केंद्रित विसेस कारीकरम के प्रसारण ल काली सोलह अप्रैल के बिहनिया नौ बजे ले करे जाही। कारीकरम म प्रधानमंत्री मुद्रा योजना के हितग्राही रईपुर के ईशा पटेल ले लेगे भेंटवार्ता के प्रसारण करे जाही। ए कारीकरम ल छत्तीसगढ़ के जम्मों आकाशवाणी केंद्र ले प्रसारण करे जाही।
अउ अब मौसम के हाल…
राज्य म आज राजधानी रईपुर के संगेसंग कई ठन जघा मन म हवा गरेर अउ गरज-चमक के संग बूंदा-बांदी पानी गिरे के समाचार मिले हे। उहें, मौसम विभाग डहार ले काली कुछेक जघा मन म करा गिरे के संगेसंग थोर बहुत बरसा अउ बिजली गिरे के चेतावनी दे गेहे। मौसम विभाग ले मिले खबर के मुताबिक एक ठन द्रोणिका ह मध्यप्रदेस के दक्षिण भाग ले दक्षिण गंगेटिक पश्चिम बंगाल तक छत्तीसगढ़ होवत उपरी हवा म अपन प्रभाव बनातव हे, जेखर असर ले प्रदेस के मौसम म बदलाव देखे जात हे।