राष्ट्र आज भारतीय संविधान के निर्माता डॉक्टर भीमराव अंबेडकर के एक सौ चौतीसवां जयंती म श्रध्दांजलि देवत हे। ए मउका म छत्तीसगढ़ संघरा देसभर म कतकोन कारीकरम कराय जावत हे।
राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी , लोकसभा अध्यक्ष ओम बिरला, राज्यसभा के उप सभापति हरिवंश, राज्यसभा म सदन के नेता जेपी नड्डा, राज्यसभा म विपक्ष के नेता मल्लिकार्जुन खरगे, लोकसभा म विपक्ष के नेता राहुल गांधी, केंद्रीय मंत्री, संसद सदस्य अउ आम लोगन मन आज संसद भवन परिसर म डॉक्टर भीमराव अंबेडकर के प्रतिमा के आगू अपन श्रध्दांजलि दीन।
डॉक्टर भीमराव अंबेडकर स्वतंत्र भारत के पहिली विधि अउ न्याय मंत्री रिहीन। ओमन ल बछर उन्नीस सौ नब्बे म मरनोपरांत भारत के सर्वोच्च नागरिक सम्मान भारत रत्न ले सम्मानित करे गे रिहीस।
छत्तीसगढ़ म आज अंबेडकर जयंती ल सामाजिक समरसता दिवस के रूप म मनाय जावत हे। ए मउका म राज्य के सबो जिला, जनपद अउ ग्राम पंचायत म आने-आने कारीकरम कराय जावत हे। ए दउरान संविधान के प्रस्तावना के सामूहिक वाचन करे गीस। संगेसंग ग्राम पंचायत मन म विसेस ग्रामसभा के आयोजन करे गीस।
राज्यपाल रमेन डेका ह आज राजभवन म डॉक्टर भीमराव अंबेडकर के चित्र म फूल-माला पहिराके ओमन ल अपन श्रध्दांजलि दीन। उहें, मुख्यमंत्री विष्णुदेव साय ह आज अपन निवास कार्यालय म डॉक्टर भीमराव अंबेडकर ल नमन करीन।
अंबेडकर-जयंती-02
इही बीच, भारतीय जनता पार्टी के प्रदेस इकाई डहार ले आज डॉक्टर भीमराव अंबेडकर के जयंती के मउका म कतकोन कारीकरम कराय जावत हे। रईपुर के पार्टी प्रदेस कार्यालय कुशाभाऊ ठाकरे परिसर म राखे गे कारीकरम म भाजपा प्रदेस संगठन महामंत्री पवन साय अउ स्वास्थ्य मंत्री श्याम बिहारी जायसवाल संघरा पार्टी पदाधिकारी अउ कार्यकर्ता मन मौजूद रिहीन। ए दउरान संविधान के प्रस्तावना के वाचन घलो करे गीस।
उहें, जिला कार्यालय एकात्म परिसर म राखे गे कारीकरम म वक्ता मन ह उंखर जीवनी उपर प्रकाश डारिन। ए मउका म सांसद बृजमोहन अग्रवाल, विधायक राजेश मूणत, सुनील सोनी, पुरंदर मिश्रा, मोतीलाल साहू, रईपुर जिलाध्यक्ष रमेश सिंह ठाकुर मौजूद रिहीन।
केंद्रीय राज्यमंत्री तोखन साहू ह बिलासपुर म डॉक्टर अंबेडकर के जयंती म उंखर प्रतिमा म फूलमाला चढ़ाके ओमन ल नमन करीन। ए मउका म भाजपा जिलाध्यक्ष दीपक सिंह ठाकुर अउ महापौर पूजा विधानी मौजूद रिहीन।
उहें, जगदलपुर के लालबाग मैदान म राखे गे कारीकरम म प्रदेस भाजपा अध्यक्ष किरण सिंह देव, सांसद महेश कश्यप, बस्तर जिलाध्यक्ष वेदप्रकाश पांडेय अउ महापौर संजय पांडेय सामिल होइन। एखर अलावा भाजपा के सबो बूथ म घलो आज अंबेडकर जयंती म कारीकरम कराय गीस।
भाजपा अनुसूचित जाति मोर्चा के प्रदेस अध्यक्ष डॉक्टर नवीन मारकंडे ह बतइन कि डॉक्टर अंबेडकर के जयंती के मउका म प्रदेस म अवइया पच्चीस अप्रैल तक सरलग कारीकरम कराय जाही।
जांजगीर प्लांट-हादसा
जांजगीर-चांपा जिला के एक ठन कारखाना म शनिवार के फर्नेश काम के दउरान विस्फोट होय के मामला म चांपा पुलिस ह आज कारखाना प्रबंधक अउ संचालक के खिलाफ एफआईआर दर्ज करे हे। ए घटना म तेरह झन कर्मचारी मन झूलस गे रिहीन। एमा नियमित कर्मचारी अउ ठेका मजदूर सामिल हे।
खबर के मुताबिक ए घटना के बाद कलेक्टर अउ पुलिस अधीक्षक मउका म पहुंचिन अउ तुरते ए मामला के जांच कराय के आदेस दीन। जांच म कारखाना प्रबंधक के लापरवाही सामने आय हे। एखर बाद चांपा पुलिस ह कारखाना प्रबंधक अउ संचालक के खिलाफ एफआईआर दर्ज करे हे। ए हादसा म गंभीर रूप ले घायल चार झन अधिकारी अउ कर्मचारी मन ल एयर एबुंलेंस ले हैदराबाद भेजे गेहे। उहें, नौ झन के इलाज रईपुर म चलत हे।
आईईडी-बरामद
बीजापुर जिला के गोरना-मनकेली रद्दा म सुरक्षाबल के टीम ह पांच ठन आईईडी बरामद करे हे। मिले जानकारी के अनुसार बीजापुर अउ जैतालूर थाना क्षेत्र ले टीम ह गस्त बर गोरना-मनकेली कोति निकले रिहीस। इही दउरान मनकेली गांव तीर सुरक्षाबल के टीम ह पांच ठन आईईडी बरामद करीस, जेला मउकच म नष्ट कर दे गीस।
दुर्ग-जागरूकता रैली
राष्ट्रीय अग्निशमन दिवस के मउका म दुरूग म अग्निशमन अउ आपात कालीन सेवा डहार ले जागरूकता रैली निकाले गीस। ए रैली सहर के आने-आने रद्दा ले होवत अग्निशमन कार्यालय म खतम होइस। रैली के माध्यम ले लोगन ल जानकारी दे गीस कि, आग लगे म कइसे काबू पाय जा सकत हे, अउ अइसन घटना झन होवय, तेखर बर कोन-कोन से सावधानी बरते जाय।
प्रेस क्लब-लाइब्रेरी शुभारंभ
प्रेस क्लब परिसर म काली वरिष्ठ पत्रकार स्वर्गीय गोविंद लाल वोरा के सुरता म बने लाइब्रेरी के सुभारंभ करे गीस, जेखर आयोजन गोविंद लाल वोरा फाउंडेसन अउ रईपुर प्रेस क्लब डहार ले करे गीस। मउका म मुख्य अतिथि के रूप म छत्तीसगढ़ विधानसभा के अध्यक्ष डॉक्टर रमन सिंह ह लाइब्रेरी के किताब बर स्वनिधि ले एक लाख रूपिया दे जाय के घोसना करीन। कारीकरम के अध्यक्षता पूर्व विधायक अरूण वोरा ह करीन। कारीकरम म ज्ञानपीठ पुरस्कार ले सम्मानित जाने-माने साहित्यकार विनोद कुमार शुक्ल ह पत्रकार मन ल किताब पढ़े अउ लिखे बर प्रेरित करीन।
बालक मौत-मुआवजा
रईपुर के गुढ़ियारी इलाका म निगम डहार ले सिवरेज बर खोदे गे गड्ढा म काली तीन झन लइका मन गिर गीन, जेमा ले एक झन लइका के मउत होगिस। उहें, दू झिन दूसर लइका मन ल सुरक्षित बाहर निकाल ले गीस, जिंखर इलाज अस्पताल म करे जावत हे। घटना के बाद घुस्साय लोगन मन धरना प्रदर्सन करके चक्काजाम करीन। ए मामला म निगम आयुक्त ह जोन कमिश्नर, कार्यपालन अभियंता, प्रभारी सहायक अभियंता, उपअभियंता अउ जल कार्य ठेकेदार ल कारण बताओ नोटिस जारी करे गेहे अउ ओमन ल चौबीस घंटा के अंदर लिखित स्पष्टीकरण दे जाय बर केहे गेहे।
उहें, महापौर मीनल चौबे ह सबो कालोनी अउ निगम परिसर के सैप्टिक टैंक अउ सम्पवेल के मेन होल ल ढांके के निरदेस दीन हे, ताकि भविष्य म अइसन घटना अउ झन होवय।
इही बीच, मुख्यमंत्री विष्णुदेव साय के निरदेस के बाद रईपुर जिला प्रशासन डहार ले मृतक बालक के परिवार ल तुरते चार लाख रूपिया के आर्थिक सहायता दे गीस।
अउ अब मौसम के हाल…
प्रदेस म मौसम के मिजाज एक घांव फेर बदल गे हवय अउ अवइया चौबीस घंटा म कई जघा म हल्का बरसा होय के या गरज-चमक के संग छींटा पड़े के आसार हे। मौसम विभाग के अनुसार एक-दू जघा म अंधड़ चले के अउ आकाशीय बिजली गिरे के घलो संभावना हे। एखर असर ले तापमान म गिरावट आही।
पाछू चौबीस घंटा के दउरान बस्तर संभाग के कुछेक इलाका म बरसा होइस हे। कांडागांव म आंधी बारिस के संग ओला घलो गिरिस। बरसा के सेति रद्दा मन म पानी भर गीस। उहें, रईपुर म आज बिहनियच ले धूप-छांव के स्थिति बने रिहीस।
अउ अब थोरकुन समाचार सार म –
– कोरबा जिला के उरगा थाना क्षेत्र के मड़वारानी जर्वे गांव तीर तेज रफ्तार पिकअप वाहन ह नहर म गिर गीस। ए दउरान नहर के तेज बहाव म दू झन लइका अउ तीन झन माईलोगिन मन बोहागे रिहीन। आज दू झन माईलोगिन अउ एक झन नोनी के शव ल बरामद करे गेहे। अभी घलो दू झन लापता हे, जिंखर तलास करे जावत हे।
– सरगुजा जिला के सीतापुर थाना क्षेत्र म काली रतिहा तेज रफ्तार कार ह एक ठन फटफटी ल टक्कर मार दीस। ए हादसा म मोटर साइकिल म बइठे तीन झन युवक मन के मउकच म मउत होगे।
– जांजगीर-चांपा जिला के बलौदा क्षेत्र के खोहा गांव म एक ठन मोटर साइकिल अंतेतंते होके पलट गे ए हादसा म औराईकला गांव के पूर्व सरपंच के मउत होगे।
– इही जिला, के चांपा म धर्मांतरण कराय के आरोप म पुलिस ह चार झन ल गिरफ्तार करे हे, जउन मन ल अदालत म पेस करे गीस अउ जिहा ले ओमन ल न्यायिक रिमांड म जेल भेज दे गेहे। उंखर मनके तीर ले पुलिस ह धार्मिक पुस्तक, पोस्टर, मोबाइल अउ कम्प्यूटर बरामद करे गेहे।