मुख्यमंत्री विष्णुदेव साय ह किहीन हें कि रइपुर स्थित स्वामी विवेकानंद हवईअड्डा म झटकुन अंतर्राष्ट्रीय कार्गो सुविधा सुरू होही। ए सुविधा के सुरू होय ले प्रदेस के किसान मन के उपज ल अंतर्राष्ट्रीय बजार मिलही। मुख्यमंत्री ह काली छत्तीसगढ़ राज्य बीज विकास निगम के नवा अध्यक्ष चन्द्रहास चंद्राकर अउ छत्तीसगढ़ राज्य कृषक कल्याण परिषद के नवा अध्यक्ष सुरेश कुमार चंद्रवंशी के पदभार ग्रहण समारोह म ए गोठ ल किहीन। ए मउका म मुख्यमंत्री ह प्रदेस के किसान मन ले कोदो-कुटकी अउ मक्का जइसन फसल उपजाय के घलो आग्रह करीन हें। ओमन किहीन कि हमन ल जैविक खेती डहार आगू बाढ़े के जरूरत हे। मुख्यमंत्री ह यहू गोठ किहीन कि प्रदेस म सौर सुजला योजना फेर सुरू होही। एखर तहत किसान मन ल अनुदान म सोलर सिंचाई पंप दे जाही।
अंबेडकर जयंती-जय भीम पदयात्रा
संविधान निर्माता बाबा साहेब अंबेडकर के जयंती के मउका म आज रइपुर म ‘जय भीम पदयात्रा‘ के आयोजन करे गीस। ए पदयात्रा तेलीबांधा तरिया ले सुरू होके अंबेडकर चौक म सिराइस। पदयात्रा म मुख्यमंत्री विष्णुदेव साय समेत अब्बड़ संख्या म युवा मन सामिल होइन। ए बेरा मुख्यमंत्री ह बाबा साहेब के मूर्ति उपर फूलमाला चढ़ाके नमन करिन। मुख्यमंत्री ह युवा मनके संग संविधान के प्रस्तावना के पाठ करके संविधान के मूल भावना के प्रति निष्ठा अउ प्रतिबध्द होके प्रिएम्बल वॉल उपर दस्तखत करिन।
खेल-युवा कल्याण विभाग अउ नेहरू युवा केंद्र संगठन के डहार ले आयोजित कारीकरम ल संबोधित करत मुख्यमंत्री ह किहीन हे कि भारत के संविधान हर नागरिक बर पवित्र ग्रंथ आय, जउन हमन ल गरब ले जिनगी जिये के अधिकार देथे। ओमन किहीन कि प्रधानमंत्री नरेंद्र मोदी ह बाबा साहेब के जिनगी ले जुड़े पांच ठन परमुख जघा मन ल ‘पंचतीर्थ‘ के रूप म विकसित करे के निर्णय ले हे, जेखर ले नवा पीढ़ी उंखर बिचार ले सीख ले सकंय। मुख्यमंत्री ह युवा मन ले भारत के लोकतांत्रिक मूल्य के रक्षा अउ ओला मजबूत बनाय बर अपन भूमिका निभाय के आह्वान करिन हें। ए मउका म मुख्यमंत्री ह समाज म बिसेस योगदान देवइया युवा मन ल सम्मानित करिन।
ऐति, राज्य सरकार ह अंबेडकर जयंती के मउका म काली चौदह अप्रैल के सबो सरकारी कार्यालय अउ संस्थान म सार्वजनिक छुट्टी घोसित करे हे।
मुख्यमंत्री-पदभार ग्रहण समारोह
मुख्यमंत्री विष्णुदेव साय काली छत्त्तीसगढ़ गृह निर्माण मंडल के अध्यक्ष अनुराग सिंहदेव के पदभार ग्रहण अउ अभिनंदन समारोह म सामिल होइन। ए मउका म मुख्यमंत्री ह गृह निर्माण मंडल के करीबन छै सौ अस्सी करोड़ रूपिया के कतकोन परियोजना के लोकार्पण अउ सिलान्यास करीन। संगेसंग आठ लोगन ल अनुकंपा नियुक्ति प्रमाण पत्र घलो बांटिन। कारीकरम ल संबोधित करत मुख्यमंत्री ह किहीन कि गृह निर्माण मंडल के डहार ले जरूरतमंद लोगन बर घर बनाय जावत हें।
ए मउका म उपमुख्यमंत्री अरूण साव, कैबिनेट मंत्री रामविचार नेताम अउ मंत्री ओपी चौधरी घलो मौजूद रिहीन।
उहें, मुख्यमंत्री के मौजूदगी म छत्तीसगढ़ राज्य वन विकास निगम के नवा अध्यक्ष रामसेवक पैकरा ह घलो पदभार ग्रहण करीन। ए मउका म विधानसभा अध्यक्ष डॉक्टर रमन सिंह घलो मौजूद रिहीन।
एक भारत श्रेष्ठ भारत
‘‘एक भारत श्रेष्ठ भारत‘‘ कारीकरम के तहत रइपुर के राजभवन म काली अरूणाचल प्रदेस, राजस्थान अउ ओडिसा राज्य के स्थापना दिवस मनाय गीस। कारीकरम म छत्तीसगढ़ म रहइया ए राज्य के लोगन मन सामिल होइन। ए तीनों राज्य के लइका अउ युवा मन अपन संस्कृति अउ लोक परंपरा उपर प्रस्तुति दीन।
ए मउका म राज्यपाल रमेन डेका ह किहीन कि जब हमन एक-दूसर के संस्कृति ल समझबो, अपनाबो अउ ओखर सम्मान करबो, तभे सशक्त भारत के निर्माण होही। राज्यपाल ह यहु किहीन कि ‘एक भारत श्रेष्ठ भारत‘ कारीकरम हमन ल सांस्कृति आदान-प्रदान, आर्थिक मदद अउ राष्ट्रीय एकता ल बढ़ाय के संदेस देथे।
सोनमणि बोरा-समीक्षा
आदिम जाति विकास विभाग के परमुख सचिव सोनमणि बोरा ह प्रदेस म जनजातीय कल्याण योजना मन के तहत काम-बूता ल झटकुन पूरा करे के निरदेस दीन हें। श्री बोरा ह काली नवा रइपुर म वीडियो कॉन्फ्रेंसिंग ले आयोजित समीक्षा बइठका म अधिकारी मन ले किहीन कि बरसा ले पहिली सबो निर्माण कारज ल पूरा कर ले जाय। ओमन बतइन कि अवइया मानसून म प्रदेस के सबो आश्रम, छात्रावास, प्रयास अउ एकलव्य विद्यालय मन म दस लाख पउधा लगाय जाही। एखर बर कार्ययोजना तियार करे बर किहीन हें। ए दउरान श्री बोरा ह जनजातीय मनके रहन-सहन उपर आधारित निर्माणाधीन संग्रहालय के घलो निरीक्षण करिन।
कोरबा-दुर्घटना
कोरबा जिला म आज एक ठन चारपहिया वाहन ह अंते-तंते होके नहर म गिर गे। जेखर ले गाड़ी म सवार पांच लोगन पानी म बूड़गे, जेखर तलास करे जावत हे। एमा दू झन लइका अउ तीन झन माईलोगन सामिल हें। गाड़ी म चौबीस झन सवार रिहीन, जेमा ले उन्नीस लोगन बाहिर निकल गे। उहें, पांच लोगन के तलास करे जावत हे। ए सबो झन गाड़ी म सवार होके खरहरी गांव जावत रिहीन।
माओवादी-शिनाख्त/माओवादी आत्मसमर्पण
बीजापुर जिला म काली होय मुठभेड़ म मारे गे तीन माओवादी मनके चिन्हारी हो गेहे। ए मुठभेड़ इंद्रावती थाना क्षेत्र के जंगल म काली सुरक्षाबल के संग होय रिहीस। मुठभेड़ म मारे गे माओवादी अनिल पूनेम माटवाड़ा एलओएस कमांडर उपर पांच लाख रूपिया के इनाम रिहीस, उहें, दू आने माओवादी पालो पोड़ियाम अउ दीवान मड़कम उपर एक-एक लाख रूपिया के इनाम रिहीस हे। ए दूनों झन माटवाड़ा एलओएस सदस्य के रूप म सक्रिय रिहीन।
ऐति, कोंडागांव जिला म आज एक लाख रूपिया के इनामी महिला माओवादी ह पुलिस के आगू आत्मसमर्पण कर दीस। एहा जनमिलिसिया सदस्य अउ बारसूर एलओएस सदस्य के रूप म सक्रिय रिहीस। आत्मसमर्पण करइया महिला माओवादी ल राज्य सरकार डहार ले ‘‘छत्तीसगढ़ नक्सलवाद उन्मूलन नीति‘‘ के तहत पचास हजार रूपिया दे गीस।
सुशासन तिहार-कार्रवाई
सुशासन तिहार के बेरा मुख्यालय ले अनुपस्थित रहइया मन उपर गरियाबंद कलेक्टर ह कारवाही करे हे। कलेक्टर ह फिंगेश्वर नगर पंचायत के सीएमओ ल निलंबित करे के निरदेस दीन हें। उहें, तीन झन एसडीएम, दू जनपद सीईओ अउ पांच झन सीएमओ मन ल कारण बताओ नोटिस घलो जारी करे हे।
जांजगीर-हादसा
जांजगीर-चांपा जिला के कोटाडबरी म प्रकाश इंडस्ट्रीज म काली संझा हादसा होगे। प्लांट के भट्ठी के आगी ले महाप्रबंधक समेत तेरह झन करमचारी झुलसगें। घायल करमचारी मनके इलाज रइपुर के निजी अस्पताल म चलत हे। एमा ले महाप्रबंधक समेत तीन झन के हालत गंभीर बताय जावत हे।
घटना के सूचना मिलतेच कलेक्टर आकाश छिकारा, पुलिस अधीक्षक विवेक शुक्ला अउ औद्योगिक सुरक्षा के सहायक संचालक राहुल पटेल मउका म पहंचिन। ए बेरा कलेक्टर ह औद्योगिक सुरक्षा अधिकारी मन ल घटना के जांच करे के निरदेस दीन हें।
भिलाई-अतिक्रमण कार्रवाई
भिलाई नगर निगम प्रशासन ह आज कब्जा हटाय के कारवाही करिस। गौतम नगर म नाला अउ सीवरेज लाइन म बने घर उपर कारवाही होइस। ए बेरा पचास ले जादा कब्जा मन ल हटाय गीस। नगर निगम के अधिकारी मन बतइन कि कारवाही ले पहिली कब्जा करे लोगन मन ल नोटिस दे गे रिहीस हे। जेखर ले प्रभावित लोगन मन कारवाही के विरोध करिन। ए बेरा भारी संख्या म पुलिसबल घलो तैनात रिहीस। बताय गीस कि नाला उपर कब्जा होय के सेति बरसात के बेरा पानी निकासी के समस्या होथे, एखर सेति अवैध कब्जा ल हटाय गीस।
फुटबॉल प्रतियोगिता
नारायणपुर के रामकृष्ण मिशन के आश्रम मैदान म ए दारी स्वामी विवेकानंद अंडर-ट्वेंटी पुरूष राष्ट्रीय फुटबॉल चैंपियनशिप के आयोजन करे जावत हे। आज खेले गेय मुकाबला म आंध्रप्रदेस के टीम ह दादरा-नगर हवेली अउ दमन-दीव के टीम ल एक के मुकाबला चार गोल ले हराइस। उहें, काली चौदह अप्रैल के तेलंगाना अउ चंडीगढ़, पांडिचेरी अउ उत्तराखंड के बीच मुकाबला होही।
अउ अब थोरकुन समाचार सार म –
– मुख्यमंत्री ह बैसाखी परब के मउका म प्रदेसवासी मन ल सुभकामना देइन हें। ओमन किहीन कि बैसाखी परब ह हमन ल, मेहनत अउ समर्पण के कीमत सुरता देवाथे।
अउ
– सक्ती जिला के मालखरौदा पुलिस ह बड़ेरबेली गांव म एक झन युवक ले मारपीट करइया छै लोगन ल गिरफ्तार कर ले हे। उहें, एक झन आने मनखे फरार हे।