नवा रईपुर म प्रदेस के पहिली सेमीकंडक्टर यूनिट खुलही। मुख्यमंत्री विष्णुदेव साय ह आज सेमीकंडक्टर निर्माता कंपनी पोलीमैटेक इेलक्ट्रानिक्स प्राइवेट लिमिटेड के प्लांट के आधारसिला रखिन। ए प्लांट के स्थापना ले स्थानीय लोगन मन ल रोजगार मिलही। ए कंपनी सेमीकंडक्टर चिप बनाय वाला अग्रणी कंपनी म ले एक हे, जउन ह राज्य म एक हजार एक सौ तैंतालिस करोड़ रूपिया के लागत ले एक बड़का कारखाना स्थापित करही। डेढ़ लाख वर्ग फीट म बनइया ए प्लांट बछर दू हजार तीस तक दस अरब चिप्स तियार करही, जेखर उपयोग टेलीकाम, सिक्सजी-सेवनजीर, लैपटॉप अउ पॉवर इलेक्ट्रानिक्स म करे जाही।
ए मउका म अपन संबोधन म मुख्यमंत्री ह किहीन कि छत्तीसगढ़ के नवा औद्योगिक नीति म सेमीकंडक्टर उद्योग ल बिसेस प्रोत्साहन दे गेहे। मुख्यमंत्री ह किहीन कि, ए पहल विकसित भारत के सपना ल साकार करे म काम के साबित होही। ओमन उम्मीद जतइन कि नवा रईपुर निश्चित तौर म छत्तीसगढ़ के सिलिकॉन वेली के रूप म पहिचान बनाही। समारोह म मुख्यमंत्री ह ए संयंत्र म काम करइया युवा मन ल नियुक्ति पत्र घलो दीन।
ए मउका म उद्योग मंत्री लखनलाल देवांगन अउ आवास अउ पर्यावरण मंत्री ओपी चौधरी घलो मौजूद रिहीन।
मुख्यमंत्री-ई-ऑटो सेवा
मुख्यमंत्री विष्णुदेव साय ह आज नवा रईपुर म एक ठन नवा पर्यावरण अनुकूल सार्वजनिक परिवहन सेवा ई-ऑटो ल हरा झंडा दिखाके सुभारंभ करीन। ए सेवा नवा रईपुर अटल नगर विकास प्राधिकरण अउ छत्तीसगढ़ राज्य ग्रामीण आजीविका मिसन ‘‘बिहान‘‘ के सहयोग ले सुरू करे गेहे। ए मउका म मुख्यमंत्री ह किहीन कि ए केवल एक परिवहन सेवा के सुभारंभ नइ हे, बल्कि महिला मनके स्वावलंबन अउ उद्यमिता ल बढ़ावा देके दिसा म राज्य सरकार के एक सशक्त प्रयास हरय।
ई-ऑटो सेवा के संचालन महिला स्व-सहायता समूह डहार ले करे जाही, जेमा तीन कलस्टर के पंद्रह ग्राम संगठन के कुल चालीस महिला सदस्य सामिल हे। ई-ऑटो सेवा एक सौ तीस किलोमीटर के दायरा म अवासीय क्षेत्र, कार्यालय, रेलवे स्टेसन, एयरपोर्ट अउ जंगल सफारी जइसे परमुख जघा मन ल जोड़ही। ‘‘लखपति दीदी योजना‘‘ के तहत ए पहल चालीस महिला मन बर आत्मनिर्भरता के दिसा म एक बड़का कदम साबित होही। एखर ले महिला मनके मासिक आय म वृध्दि होही अउ ओमन आर्थिक रूप ले सशक्त बनही।
मुख्यमंत्री-कोयला मंत्री खनिज समीक्षा
मुख्यमंत्री विष्णुदेव साय अउ केंद्रीय कोयला अउ खान मंत्री जी. किशन रेड्डी ह आज रईपुर म खनिज विभाग के कामकाज के समीक्षा करीन। ए मउका म मुख्यमंत्री ह किहीन कि केंद्र सरकार के संग समन्वय ले खनन क्षेत्र म छत्तीसगढ़ के भागीदारी ल अउ जादा बढ़ाय जाही। ओमन किहीन कि खनिज विभाग डहार ले अन्वेषण योजना म व्यापक बदलाव करत क्रिटिकल खनिज क ेअन्वेषण ल प्राथमिकता दे जात हे।
ए मउका म केंद्रीय खान मंत्री श्री रेड्डी ह किहीन कि विकसित भारत के निर्माण म क्रिटिकल मिनरल्स अउ खनन क्षेत्र के भूमिका अत्यंत महत्वपूर्ण हरय। छत्तीसगढ़ ह ए दिसा म जउन अग्रणी कदम उठाय हे, ओ ह भारत ल आत्मनिर्भर बनाय के दिसा म मील के पत्थर हे।
ए मउका म केंद्रीय मंत्री ह खनन क्षेत्र म बाढ़त यातायात के दबाव अउ नागरिक सुरक्षा ले देखत कोयला परिवहन बर बनाय जात डैडीकेटेड कोल कॉरिडोर के प्रगति के घलो जानकारी लीन।
ए मउका म मुख्यमंत्री अउ केंद्रीय मंत्री ह कटघोरा, लिथियम ब्लॉक के कम्पोजिट लाइसेंस अनुबंध दस्तावेज अउ चार लौह अयस्क ब्लॉक के प्रीफर्ड बिडर आदेस सफल बोलीदाता मन ल प्रदान करीन।
राज्यपाल-दीक्षांत समारोह
राज्यपाल रमेन डेका आज दुरूग स्थित के.के. मोदी विश्वविद्यालय के पहिली दीक्षांत समारोह म सामिल होइन। ए मउका म ओमन सड़सठ विद्यार्थी मन ल बीटेक, बीबीए अउ बीसीए के डिग्री प्रदान करीन। समारोह ल संबोधित करत राज्यपाल ह किहीन कि शिक्षा समाज ल बदले, मनखे मन ल सशक्त बनाय अउ एक मजबूत राष्ट्र के निर्माण बर सबले सक्तिशाली माध्यम हरय। ओमन डिग्री लेवइया युवा मनले आग्रह करीन कि ओमन केवल नौकरी के तलास झन करय, बल्कि नौकरी के सृजन करइया बनय। साहसी बनय, जोखिम उठावय अउ वास्तविक दुनिया के समस्या बर अभिनव समाधान लावय।
एल्कलाइन वॉटर बॉटिंलंग प्लांट-शुभारंभ
मुख्यमंत्री विष्णुदेव साय ह आज नवा रईपुर अटल नगर के पचेड़ा म ‘‘झरिया‘‘ एल्कलाइन वॉटर बॉटिंलंग प्लांट के सुभारंभ करीन। ए प्लांट के संचालन पचेड़ा अभनपुर के शारदा स्व-सहायता समूह डहार ले करे जाही। ए मउका म मुख्यमंत्री ह किहींन कि एल्कलाइन जल शरीर बर बहुत लाभकारी होथे। ए मउका म मुख्यमंत्री ह झरिया मोबाइल ऐप अउ वेब पोर्टल ल घलो लॉन्च करीन।
ए प्लांट के स्थापना नवा रईपुर अटल नगर विकास प्राधिकरण अउ राष्ट्रीय ग्रामीण आजीविका मिसन बिहान के संयुक्त सहयोग ले करे गेहे। ए प्लांट के संचालन समूह के दस महिला करत हे।
मुख्यमंत्री सम्मान समारोह
मुख्यमंत्री विष्णुदेव साय काली धमतरी जिला के रांकाडीह म राखे गे कंवर पैकरा समाज के नव निर्वाचित आदिवासी पंचायत जन-प्रतिनिधि मनके सम्मान समारोह अउ धमतरी राज कंवर पैकरा समाज के वार्षिक महासभा म सामिल होइन। ए मउका म ओमन नगरीय निकाय अउ त्रिस्तरीय पंचायत चुनाव म विजयी जनप्रतिनिधि मन ल बधई दीन। कारीकरम म मुख्यमंत्री ह धमतरी म कंवर समाज भवन बर पचास लाख अउ केकराखोली मार्ग म पुलिया बनाय बर तीस लाख रूपिया देय के घोसना करीन। ए मउका म ओमन दस हितग्राही मन ल पीएम आवास के चाबी घलो सौंपिन। संघर पच्चीस हितग्राही मन ल अधिकार अभिलेख प्रदान करीन।
मुख्यमंत्री महासमुंद जिला के खल्लारी म राखे गे आदिवासी कंवर-पैकरा समाज महासभा अउ वार्षिक अधिवेसन म घलो सामिल होइन। ए मउका म श्री साय ह पचपन लाख रूपिया के विकास कार्य के घोसना करीन।
वेव्स
केंद्रीय सूचना अउ प्रसारण मंत्री अश्विनी वैष्णव ह किहीन कि रचनात्मक क्षेत्र ले उभरत अर्थव्यवस्था म महाराष्ट्र अउ मुंबई के बिसेस महत्व हरय। तेजी ले बदलत टेक्नोलाजी के दउर म एला बनाय राखे बर मुंबई म विश्व ऑडियो विजुअल अउ मनोरंजन शिखर सम्मेलन-वेव्स आयोजित करे जात हे। श्री वैष्णव महाराष्ट्र के मुख्यमंत्री देवेन्द्र फडणवीस के संग मुंबई म वेव्स के आयोजन के तियारी मनके समीक्षा के बाद पत्रकार मनले गोठबात करत रिहीन। श्री फडणवीस ह बतइन कि वेव्स ए क्षेत्र म विश्व के सबले बड़का सम्मेलन हरय।
दुर्घटना
दुरूग जिला के महाराजा चौक करा तेज रफ्तार कार ह ऑटो ल टक्कर मार दीस। ए घटना म आठ महिला सफाई कर्मी अउ ऑटो चालक घायल होगिन। एमा ले चार के हालत गंभीर बताय गेहे। जम्मों घायल मनके इलाज दुरूग जिला अस्पताल म चलत हे। घटना के जानकारी मिलतेच महापौर अल्का बाघमार घायल मन ले मिले बर जिला अस्पताल पहुंचिन।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ के तहत ए बखत नये वक्फ अधिनियम म छत्तीसगढ़ राज्य वक्फ बोर्ड के अध्यक्ष डॉक्टर सलीम राज ले लेगे बिसेस भेंटवार्ता प्रसारित करे जाही। ए कारीकरम काली बारह अप्रैल के बिहनिया साढ़े दस बजे आकाशवाणी केंद्र रईपुर ले प्रसारित होही। एला छत्तीसगढ़ स्थित आकाशवाणी के जम्मों केंद्र रिले करही।
अउ अब मौसम के हाल…
प्रदेस म काली एक-दू जघा म हल्का बरसा होय या गरज-चमक के संग छींटा पड़े के संभावना हे। एखर अलावा मौसम विभाग ह राज्य के कुछेक जघा म अंधड़ चले अउ गाज गिरे के संभावना घलो जताय हे। मौसम विभाग के अनुसार अवइया दू दिन के बाद गर्मी ले थोरकुन राहत मिले के संभावना हे।