बारिश-01
प्रदेस म पाछु चैबीस घंटा ले होवत सरलग बरसा ले जनजीवन परभावित होय हे। कतकोन नंदियां-नरवा उफान म हवय। उहें, निचला बस्ती मन म बरसा के पानी भर गेहे। एखर संगेसंग जिला मुख्यालय मन ले दूरिहा इलाका के सड़क संपर्क घलो टूट गेहे।
बीजापुर जिला म मिनगाछल नंदियां के जलस्तर बाढ़े ले राष्ट्रीय राजमार्ग क्रमांक-एक सौ तिरसठ म अवई-जवई बाधित होय हे। जिला के मिंगचाल स्थित सीआरपीएफ कैम्प म घलो पानी भरे ले जवान मन ल दूसर जगह भेजे गेहे।
उहें, सुकमा जिला म सरलग होवत बरसा ले नंदिया-नरवा के पानी उपर आ गेहे अउ कतकोन गांव के रद्दा बंद होगे हे।
ऐति, महासमुंद जिला के बसना विकासखंड के दूधीपाली, छुरिया नाला अउ सुरंगी नाला के पानी सड़क के उपर ले बोहावत हे, जेखर ले ए रद्दा म अवई-जवई बंद होगे हे। जिला कलेक्टर ह लोगन मन ले नंदियां-नरवा अउ पुलिया पार करत बेरा सावधानी बरते के अपील करे हे।
दूसर कोति, राजनांदगांव जिला म घलो सरलग बरसा के सेती निचला बस्ती मन म पानी भर गेहे।
प्रदेस म सरलग बरसा के सेती आने-आने सिंचाई जलासय मन म पानी जादा बाढ़ गेहे। इही बीच, कोरबा जिला के बांगो बांध के पांच गेट खोल दे गेहे।
बारिश-02
प्रदेस म अवइया चैबीस घंटा के दउरान कतकोन जघा म हल्का ले मध्यम बरसा होय के संभावना हे। उहें, रईपुर, दुरूग, बिलासपुर अउ बस्तर संभाग के कुछेक जघा मन म झमाझम बरसा होय के चेतावनी दे गेहे।
मौसम विभाग ले मिले खबर के मुताबिक एक निम्न दाब के क्षेत्र झारखंड अउ उंखर तीरतखार म बने हे। एखरे संगेसंग एक उपरी हवा के चक्रीय चक्रवाती घेरा बने हे। अइसने, एक मानसून द्रोणिका छत्तीसगढ़ ले होके जावत हे। एखर असर ले प्रदेसभर म रूक-रूक के पानी गिरत हे।
मुख्यमंत्री-बारिश निर्देश
मुख्यमंत्री भूपेश बघेल ह प्रदेस म सरलग होवत बरसा ल देखत जम्मों जिला कलेक्टर अउ पुलिस अधीक्षक मन ल सर्तक रेहे के निरदेस देहे। संगेसंग ओमन परभावित क्षेत्र म बाढ़ जइसन कोनों भी स्थिति उपर नजर राखत आपदा प्रबंधन संबंधी जम्मों जरूरी उपाय करे बर घलो कहिन हे।
मुख्यमंत्री ह बाढ़ प्रभावित इलाका म कहूं कोनो क्षति होय हे, त ओखर जल्दीच जांच करके परभावित मन ल तुरते जरूरी सहायता देवाय बर केहे हे। मुख्यमंत्री ह किहीन कि बरसा ल देखत जम्मों नियंत्रण कक्ष पूरा अलर्ट राहय अउ नंदियां-नरवा के पानी के स्तर म सरलग नजर राखे जाय। बरसा के दउरान जल जनित बीमारी ल देखत जम्मों जरूरी डाॅक्टरी बेवस्था घलो करे जाय। मुख्यमंत्री ह आपदा प्रबंधन दल ल सतर्क रेहे अउ समय ले पहिली जरूरी बेवस्था करे के निरदेस घलो दीन हे।
कोरोना-मरीज
छत्तीसगढ़ म कोरोना संक्रमित मरीज के संख्या बाढ़के पन्द्रह हजार ले जादा होगे हे। उहें, चार हजार आठ सौ पैंसठ मरीज मनके इलाज आने-आने अस्पताल म चलत हे।
इही बीच, काली रतिहा तक चार सौ छियासी कोरोना पाॅजिटिव मरीज मनके पहिचान करे गीस। उहें, कोरोना संक्रमित चार मरीज के मउत होगे। एला मिलाके प्रदेस म अब तक एक सौ चैंतीस कोरोना पाॅजीटिव मरीज मनके मउत होगे हे।
दुरूग जिला म सोलह नवा कोरोना मरीज के चिन्हारी करे गेहे। एमा कैम्प क्षेत्र भिलाई ले छह मरीज घलो सामिल हे।
ऐति, रायगढ़ जिला म तीस नवा कोरोना संक्रमित मरीज मिले हे। एमा एक तहसीलदार अउ एक नायब तहसीलदार घलो सामिल हे। पूंजीपथरा थाना के एक आरक्षक के रिपोर्ट कोरोना पाॅजिटिव आय के बाद थाना ल सील कर दे गेहे।
बिलासपुर जिला म नगर निगम के सभापति समेत उन्नीस झिन नवा कोरोना संक्रमित मरीज के पुष्टि होय हे।
कोरोना-स्पष्टीकरण
राजनांदगांव जिला के मुख्य चिकित्सा अउ स्वास्थ्य अधिकारी डाॅक्टर मिथिलेश चैधरी ह स्पष्ट करे हे कि कोनों भी मनखे के कोरोना पाॅजिटिव पाय जाए म स्वास्थ्य विभाग ल डेढ़ लाख रूपिया मिले के बात पूरा अफवाह हरय।
डाॅक्टर चैधरी ह बतईन कि कोनों भी मनखे के कोरोना पाॅजिटिव आय म राज्य सासन के प्रावधान अउ कोरोना प्रोटोकाॅल के मुताबिक मरीज मनके इलाज करे जाथे। अइसन कोनो प्रावधान नइ हे कि हरेक मरीज पाछु डेढ़ लाख रूपिया के रासि मिलथे। उहें, सोसल मीडिया अउ आने-आने माध्यम म एला लेके गलत जानकारी आवत हे। ओमन लोगन मन ले अपील करीन कि अइसन अफवाह म ध्यान मत दे अउ कोरोना के लक्षण पाय म सैंपल देके कोरोना संक्रमण ल रोके म मदद करय।
पढ़ई तुंहर दुआर-एंड्राइड ऐप
कोरोना संकट काल म आॅनलाइन सिक्षा ल सरल बनाय बर ‘‘पढ़ई तुंहर दुआर‘‘ कारीकरम के तहत स्कूल सिक्षा विभाग अउ एनआईसी ह मिलके एक ठिन एंड्राइड ऐप तैयार करे हे। ए ऐप के माध्यम ले लइका मन इंटरनेट होय म अपन पाठ्यक्रम ले जुड़े कन्टेंट डाउनलोड कर सकही। डाउनलोड करे गे वीडियो अउ कन्टेंट ल इंटरनेट नइ होय म घलो आॅफलाइन देखे जा सकही। ए ऐप दूरिहा अंचल के लइका मन बर बड़ उपयोगी साबित होही। ए ऐप ल गूगल प्ले स्टोर ले घलो डाउनलोड करे जा सकत हे।
मन की बात
प्रधानमंत्री नरेन्द्र मोदी ह तीस अगस्त के आकाशवाणी के ‘‘मन की बात‘‘ कारीकरम म देस-बिदेस के लोगन मनके संग अपन विचार साझा करही। मासिक रेडियो कारीकरम के ए ह अड़सठवां कड़ी होही। श्री मोदी ह लोगन मन ल अवइया मन की बात कारीकरम म अपन विचार साझा करे बर केहे हे।
मनखे मन एक आठ शून्य – एक एक – सात आठ शून्य शून्य म अपन विचार रिकाॅर्ड करा सकत हे। अउ नमो ऐप ओपन फोरम या माई जीओवी म घलो अपन विचार लिख सकत हे। एखरे संगेसंग लोगन मन एक नौ दू दू म मिस्ड काॅल दे सकत हे अउ एस.एम.एस. ले मिले लिंक के माध्यम ले घलो सोझे अपन सुझाव दे सकत हे।
वाजपेयी-पुण्यतिथि
पूर्व प्रधानमंत्री अटल बिहारी वाजपेयी की आज दूसर पुण्यतिथि आय। राष्ट्रपति रामनाथ कोविंद, उपराष्ट्रपति एम. वेंकैया नायडू, प्रधानमंत्री नरेन्द्र मोदी, लोकसभा अध्यक्ष ओम बिड़ला ह श्री वाजपेयी के समाधि ‘सदैव अटल‘ म फूलमाला चढ़ाईन।
ऐति, छत्तीसगढ़ म घलो स्वर्गीय वाजपेयी के पुण्यतिथि म आने-आने कारीकरम आयोजित करके ओमन ल श्रद्धासुमन अर्पित करे जावत हे। भाजपा के प्रदेस अध्यक्ष विष्णुदेव साय ह अपन रईपुर स्थित निवास म स्वर्गीय वाजपेयी के फोटू के आगू दीया जलाके ओमन श्रद्धांजलि दीन। उहें, रईपुर सांसद सुनील सोनी ह अपन संसदीय कार्यालय म क्षेत्र के लोगन मन संग श्री वाजपेयी के फोटू म फुलमाला चढ़ा के श्रद्धासुमन अर्पित करीन।
अइसने, राजनांदगांव म भाजपा कार्यकर्ता मन ह स्वर्गीय वाजपेयी के पुण्यतिथि मनाईस अउ ओमन ल श्रद्धांजलि अर्पित करीन।
संक्षिप्त समाचार
अउ अब थोरकुन समाचार सार म-
– स्कूल सिक्षा मंत्री डाॅक्टर प्रेमसाय सिंह टेकाम ह अपन बस्तर प्रवास के दउरान बस्तर विधानसभा क्षेत्र के ग्राम पंचायत भाटपाल म ‘‘आमचो बस्तर रेडियो कार्यक्रम‘‘ के अवलोकन करीन।
– सूरजपुर जिला के प्रतापपुर वन परिक्षेत्र म एक अउ हाथी के मउत होगे। एला मिलाके प्रदेस म पाछु तीन महीना म आठ हाथी के मउत होगे हे।
– रायगढ़ जिला के खरसिया थाना म ऐडु गांव म एक झिन मनखे अपन तीन झिन लइका के संग नदी म कूद गीस। गोताखोर मन ह ए मन ल खोजे म लगे हे।
– जांजगीर-चांपा जिला के पीथमपुर गांव म दू गुट के बीच होय लड़ई-झगड़ा के बाद पुलिस ह तैंतीस झिन आरोपी मन ल गिरफ्तार करे हे।
– बिलासपुर जिला के मस्तुरी थाना क्षेत्र के भानेसर गांव ले एक झिन मनखे के अगवा के मामला म पुलिस ह चार झिन आरोपी मन ल गिरफ्तार कर लेहे।
– कोरिया जिला के भरतपुर के रेन्ध गांव म गाज गिरे ले दस जानवर के मउत होगे।
अउ
– कबीरधाम जिला म लोहारा अउ चिल्फी पुलिस ह एक ठिन गाड़ी ले दू सौ चैंतीस लीटर अंग्रेजी सराब जब्त करे हे। ए मामला म पांच झिन आरोपी मन ल गिरफ्तार करे गेहे।