केन्द्रीय मंत्रिमंडल के बइठका म आज कतकोन जरूरी फइसला ले गीस। मंत्रिमंडल ह किसान मन ले जुड़े प्रधानमंत्री कृषि सिंचाई योजना के उप योजना के रूप म कमांड एरिया डेव्लपमेंट अउ जल प्रबंधन के आधुनिकीकरण ल मंजूरी दे देहे। सूचना अउ प्रसारण मंत्री अश्विनी वैष्णव ह बतईन कि ए योजना के सुरूवाती परिव्यय एक हजार छह सौ करोड़ रूपिया हवय। श्री वैष्णव ह किहीन कि एखर ले किसान मन ल जादा फसल ले म मदद मिलही अउ अटहत्तर परियोजना म अस्सी हजार किसान मन ल सामिल करे जाही। ए योजना के उद्देश्य मौजूदा नगर या दिगर स्त्रोत ले तय कलस्टर म सिंचाई के पानी के आपूर्ति बर सिंचाई जल आपूर्ति नेटवर्क ल आधुनिक बनाना हे।
पीएम-वेव्स शिखर सम्मेलन
प्रधानमंत्री नरेन्द्र मोदी ह कहिन कि मनोरंजन, दुनिया के सबले बड़े उद्योग म एक हवय अउ अवइया बेरा म एखर अउ बढ़वार होही। निजी समाचार कोति ले राखे गे एक कार्यक्रम म बोलत श्री मोदी ह किहीन कि कला अउ संस्कृति ल आगू बढ़ाय बर केन्द्र सरकार अवइया महीना मुंबई म विश्व ऑडियो विजुअल अउ मनोरंजन शिखर सम्मेलन वेव्स के आयोजन करत हे। ओमन किहीन कि वेव्स भारतीय कलाकार मन ल अपन सामग्री बनाय अउ ओला वैश्विक मंच ले जाय बर मजबूत बनाही।
प्रधानमंत्री ह भारत के जीवंत अउ रचनात्मक उद्योग के संबंध म बात करीन, जेमा फिल्म, पॉडकॉस्ट, गेमिंग, संगीत-ए.आर अउ वी.आर सामिल हे। ओमन ए उद्योग ल आगू स्तर म ले जाय के उद्देश्य ले भारत म निर्माण के पहल म बात करीन। प्रधानमंत्री ह मीडिया घराना ले वेव्स प्लेटफॉर्म ल लोकप्रिय बनाय के आग्रह करीन अउ रचनात्मक क्षेत्र के युवा मन ल ए आंदोलन म सामिल होय बर प्रोत्साहित करीन। ओमन ए बात म जोर दीन कि वेव्स ल हर घर तक पहुंचना चाही अउ हर दिल ल छूना चाही।
मुख्यमंत्री-गृह विभाग समीक्षा
मुख्यमंत्री विष्णुदेव साय ह आज मंत्रालय म गृह विभाग के कामकाज के समीक्षा करीन। बइठका म मुख्यमंत्री ह नवा आपराधिक कानून – भारतीय न्याय संहिता ल सबले पहिली प्राथमिकता देके निरदेस दीन। ओमन किहीन कि सबो जिला म चरणबद्ध तरीका ले कार्यशाला अउ सेमिनार राखे जाय, जेमा केस स्टडी अउ मॉकट्रायल ले प्रसिक्षण दे जाय। बइठका म मुख्यमंत्री ह अपराध अनुसंधान प्रणाली ल अउ जादा प्रभावी अउ प्रमाणिक बनाय म जोर दीन। ओमन किहीन कि आपराधिक प्रकरण म सिरिफ गिरफ्तार ही नहीं, भलूक सही जानकारी अउ पुख्ता साक्ष्य के आधार म जांच करे जाय। जेखर ले अभियुक्त ल सजा हो सकय। ओमन किहीन कि पीड़ित ल बेरा म न्याय देवाना राज्य सरकार के प्राथमिकता हरय।
मुख्यमंत्री ह साइबर अपराध के बाढ़त चुनौती ल देखत साइबर सेल ल तकनीकी रूप ले मजबूत बनाय अउ जनता ल साइबर जागरूकता ले जोड़े बर अभियान चलाय के निरदेस दीन।
केन्द्रीय मंत्री-छत्तीसगढ़
केन्द्रीय कोयला मंत्री जी. किशन रेड्डी काली दस अप्रैल ले छत्तीसगढ़ के दू दिन के दउरा म रइही। अपन दउरा के बेरा श्री रेड्डी काली कोरबा जिला के गेवरा के एसईसीएल कोयला खदान के समीक्षा करही। ए दउरान केन्द्रीय एक बिलियन टन कोयला उत्पादन के उपलब्धि पवइया खनन परिस्थिकीय तंत्र के हितधारक अउ श्रमिक मन संग गोठबात करही। श्री रेड्डी खनन क्षेत्र के रोडमैप म गोठबात करे बर मुख्यमंत्री विष्णुदेव साय ले घलो भेंट करही।
हाईकोर्ट-निर्देश
छत्तीसगढ़ उच्च न्यायलय म आज बिजली कंपनी के खिलाफ दायर याचिका म सुनवाई होइस। कोर्ट ह छत्तीसगढ़ स्टेट पावर होल्डिंग कंपनी ल याचिकाकर्ता मन ल बांड नंबर दे अउ तीन महीना के भीतरी जूनियर इंजीनियर के पद म पदोन्नति आदेस जारी करे के निरदेस दीन।
खबर के मुताबिक छत्तीसगढ़ स्टेट पावर होल्डिंग कंपनी कोति ले कनिष्ठ अभियंता पद बर बछर दू हजार बाईस म विभागीय परीक्षा राखे गे रिहीस। ए परीक्षा म सामिल होय कोरबा संभाग के लाइन परिचारक दिनेश कुमार चन्द्रा ह याचिका दायर करे रिहीन।
एमिटी विश्वविद्यालय-दीक्षांत समारोह
राज्यपाल रमेन डेका आज रईपुर के पंडित दीनदयाल उपाध्याय ऑडिटोरियम म राखे गे एमिटी विश्वविद्यालय के तीसर दीक्षांत समारोह म संघरीन। ए मउका म राज्यपाल ह अट्ठारह झिन मेधावी विद्यार्थी मन ल स्वर्ण, पन्द्रह झन ल रजक अउ छै झन कांस्य पदक दीन। समारोह म बछर दू हजार चौबीस बैच के छह सौ साठ विद्यार्थी मन ल स्नातक अउ स्नातकोत्तर के उपाधि दीन। समारोह म रक्षा अनुसंधान अउ विकास संगठन के वैज्ञानिक डॉक्टर वी.के. दास अउ उद्योगपति एस.एन. स्वामी ल डॉक्टरेट के मानक उपाधि समेत सोलह झिन विद्यार्थी मन ल आने-आने विषय म पीएचडी के उपाधि दे गीस।
ृ समारोह म बोलत राज्यपाल ह विद्यार्थी मन ले आह्वान करीन कि ओमन नवाचार के संबंध म सोचे अउ ओला अपनावय। ओमन किहीन कि सिक्षा ल व्यवसाय नइ बनाना चाही, भलूक ए जिनगी के बढ़वार के रद्दा हरय। ए मउका म श्री डेका ह ‘‘एक पेड़ मां के नाम‘‘ अभियान म पौधारोपण करीन।
हाईकोर्ट-सीजीपीएससी
छत्तीसगढ़ लोक सेवा आयोग-सीजीपीएससी घोटाला मामला म शशांक गोयल के जमानत याचिका छत्तीसगढ़ उच्च न्यायालय ह खारिज कर देहे। आज ए मामला के सुनवाई न्यायाधीश बी.डी. गुरू ह करीन। एखर पहिली, शशांक गोयल ह सीबीआई के स्पेशल कोर्ट म घलो जमानत बर अरजी दे रिहीन, जेला कोर्ट ह खारिज कर दे रिहीस।
खबर के मुताबिक सीजीपीएससी कोति ले बछर दू हजार बीस ले बाईस के बीच राखे गे परीक्षा अउ इंटरव्यू म वीआईपी अउ उंखर रिश्तेदार मनके चयन म गंभीर सवाल उठे रिहीस। ए मामला म सीजीपीएससी के पूर्व अध्यक्ष टामन सिंह सोनवानी, बजरंग पावर के निदेशक श्रवण कुमार गोयल अउ डिप्टी कंट्रोलर इग्जाम ललित गणवीर ल पुलिस पहिलीच गिरफ्तार कर लेहे।
हाईकोर्ट-सड़क सुरक्षा
रद्दा म अतिक्रमण अउ मवेसी मनके सेती होवत दुर्घटना ल लेके छत्तीसगढ़ उच्च न्यायालय ह नाराजगी जताय हे। मुख्य न्यायाधीश रमेश कुमार सिन्हा अउ न्यायाधीश अरविंद वर्मा के डिवीजन बेंच म आज ए मामला के सुनवाई होइस। कोर्ट ह राज्य सासन ले केहे हे कि सड़क सुरक्षा के मानक संग कोनों किसम के समझौता नइ करे जा सकय। राज्य सासन ल ठोस कार्ययोजना के संग जुवाब दे बर पड़ही। राज्य सासन कोति ले पैरवी करत अतिरिक्त महाधिवक्ता वाय.एस. ठाकुर ह कोर्ट ल बतईन कि रद्दा म मवेशी मन ल रोके अउ सड़क सुरक्षा ल लेके बनाय जात एसओपी के ड्राफ्ट आखिरी चरण म हवय।
भाजपा-बैठक
रईपुर स्थित प्रदेस भाजपा कार्यालय कुशाभाऊ ठाकरे परिसर म आज निगम-मंडल अउ आयोग के अध्यक्ष अउ उपाध्यक्ष के बइठका होइस। बइठका म राष्ट्रीय सह-संगठन महामंत्री शिवप्रकाश, भाजपा प्रदेश प्रभारी नितिन नबीन, प्रदेस अध्यक्ष किरण सिंह देव, मुख्यमंत्री विष्णुदेव साय, क्षेत्रीय संगठन महामंत्री अजय जामवाल, संगठन महामंत्री पवन साय समेत बड़का नेता अउ पार्टी के पदाधिकरी मौजूद रिहीन।
आईईडी विस्फोट-जवान घायल
बीजापुर जिला के कोड़ेपाल नाला के तीर आज आईईडी विस्फोट के चपेट म आय ले केन्द्रीय रिजर्व पुलिस बल-सीआरपीएफ के एक जवान घायल होगे हे। घायल जवान ल इलाज बर बीजापुर के जिला अस्पताल म भर्ती कराय गेहे।
कांदुलनार-कैम्प
नारायणपुर जिला के माओवादी प्रभावित गांव कांदुलनार म नवा सुरक्षा अउ जनसुभीता कैम्प बनाय गेहे। पाछु बछर भर म नारायणपुर जिला म अभी तक बारह कैम्प बन गेहे। कांदुलनार म कैम्प के खुले ले रद्दा, पानी, पुल-पुलिया, सिक्षा, चिकित्सा, मोबाइल नेटवर्क कनेक्टिविटी अउ आने जरूरी सुभीता के बढ़वार होही। ए मउका नारायणपुर पुलिस अउ बीएसएफ कोति ले गांव कांदुलनार म कम्युनिटी पुलिसिंग के आयोजन करे गीस। ए बेरा म गांव के लोगन मन ल कल्याणकारी योजना के संबंध म जानकारी दे गीस। संगेसंग रोजमर्रा के उपयोग म अवइया जिनीस बांटे गीस।
तीरंदाजी अकादमी
नवा रायपुर म राष्ट्रीय स्तर के आधुनिक तीरंदाजी अकादमी के स्थापना करे जाही। एखर बर अटल नगर विकास प्राधिकरण ह करीबन दस एकड़ भूईंया के चिन्हारी कर लेहे। खेल अउ युवा कल्याण विभाग ल ए भूईंया नब्बे बछर के लीज म दे जाही। ए अकादमी म आउटडोर अउ इंडोर तीरंदाजी रेंज, हाई परफारर्मेशन ट्रेंनिग सेंटर अउ छात्रावास जइसन निर्माण काम प्रस्तावित हवय। ए अकादमी देस के युवा तीरंदाज मन बर सबले बने प्रसिक्षण केन्द्र के रूप म आगू आही।