प्रधानमंत्री नरेन्द्र मोदी ह कहिन हे कि सरकार ह अइसन व्यवस्था बनाय उपर ध्यान देना जारी राखही, जिहां हरेक आकांक्षी उद्यमी ल आसानी ले ऋण के सुविधा मिल सकय। प्रधानमंत्री मुद्रा योजना के दसवां वर्षगांठ के मउका म आज सोशल मीडिया पोस्ट म श्री मोदी ह कहिन कि ए योजना ह अनेक आने-आने मनखे के सपना ल पूरा करे हे। प्रधानमंत्री ह ए योजना ल उद्यमी मन ल ससक्त बनाय बर एला मौन क्रांति बताय हे।
एखर पहिली, प्रधानमंत्री ह ए योजना के लाभार्थी मनके संग अपन निवास म गोठबात करीन। ओमन कहिन कि मुद्रा योजना ह लोगन मन ल अपन उद्यमिता कौशल देखाय के मउका देवाय हे। प्रधानमंत्री ह कहिन कि ए योजना के सत्तर प्रतिशत लाभार्थी माईलोगिन हे। प्रधानमंत्री ह कहिन कि ए योजना के उद्देश्य युवा मन ल सशक्त बनाना हे। बातचीत के दउरान लाभार्थी मन ह प्रधानमंत्री ह अपन अनुभव साझा करीन।
प्रधानमंत्री ह छत्तीसगढ़ के राजधानी रायपुर के एक झिन महिला उद्यमी अउ ‘‘हाउस ऑफ पुचका‘‘ के संस्थापक ईशा पटेल ले घलो गोठबात करीन। महिला उद्यमी ह प्रधानमंत्री ले घर म खाना बनाय ल लेके सफल कैफे व्यवसाय स्थापित करे तक के अपन यात्रा साझा करीन। महिला उद्यमी ह बतईन कि तेईस साल के उम्र म ओमन अपन व्यवसाय ल आगू बढ़ाय बर जोखिम लेके अपन क्षमता अउ अपन समय के प्रभावी ढंग ले उपयोग करीन।
प्रधानमंत्री मुद्रा योजना के तहत सूक्ष्म अउ छोटे उद्यमी मन ल बीस लाख रूपिया तक के ऋण बिना गारंटी के दे जाथे।
सुशासन तिहार
प्रदेस म आज ले ‘सुशासन तिहार‘ के सुरूआत होगे हे। तीन चरण म होवइया ए सुशासन तिहार इक्कीस मई तक चलही। पहिली चरण म आठ ले ग्यारह अप्रैल तक आम लोगन मन ले ग्राम पंचायत अउ नगरीय निकाय म आवेदन ले जावत हे। सुशासन तिहार ल लेके लोगन मन म अब्बड़ उत्साह देखे जावत हे। अउ ओमन अपन समस्या ले जुड़े आवेदन समाधान पेटी म जमा करत हे। लोगन मन ल अपन समस्या ले जुड़े आवेदन देय म कोनों भी किसम के परेसानी झन होवय, एला देखत ग्राम पंचायत अउ नगरीय निकाय के कार्यालय म अधिकारी-कर्मचारी मनके ड्यूटी घलो लगाय गेहे। उहें, ऑनलाइन आवेदन पोर्टल अउ कॉमन सर्विस सेंटर के माध्यम ले घलो आवेदन करे के सुविधा दे गेहे। विकासखंड अउ जिला मुख्यालय मन म घलो आवेदन प्राप्त करे बर समाधान पेटी राखे गेहे, जिहां लोगन मन अपन समस्या के बारे म आवेदन डार सकत हे।
उहें, रायपुर म कलेक्टर डॉक्टर गौरव सिंह ह आज आने-आने वार्ड म पहुंच के लोगन मन ले अपन समस्या के निराकरण बर आवेदन देके के अपील करीन। ओमन नगर निगम जोन क्रमांक-चार के कार्यालय अउ आने-आने वार्ड म आवेदन ले जाय के प्रक्रिया के अवलोकन घलो करीन।
सुशासन तिहार के तहत दूसरइया चरण म एक महीना के भीतर मिले आवेदन के निराकरण करे जाही। उहें, तीसर अउ आखिरी चरण म पांच मई ले इकतीस मई के बीच समाधान शिविर के आयोजन करे जाही। तीसर चरण म हरेक जिला के आठ ले पन्द्रह ग्राम पंचायत के बीच समाधान सिविर आयोजित होही। नगरीय निकाय म जरूरत के मुताबिक सिविर के आयोजन करे जाही। समाधान सिविर म जनकल्याणकारी योजना मनके जानकारी दे जाही।
मुख्यमंत्री-मरका पंडुम
मुख्यमंत्री विष्णुदेव साय ह कांकेर जिला के भिरावाही गांव म गोंडवाना समाज डहार ले राखे गे मरका पंडुम के समापन समारोह म सामिल होइन। ए परब म नवा फल अउ फसल मन ल आराध्य देवी-देवता मन ल चढ़ाय के परंपरा हवय। समारोह ल संबोधित करत मुख्यमंत्री ह कहिन कि गोंडवाना समाज के अपन इतिहास रेहे हे। ओमन कहिन कि ह मन ल अपन संस्कृति अउ परंपरा ल आगू बढ़ाय के जरूरत हे। समारोह म मुख्यमंत्री ह गोंडवाना समाज के प्रतिनिधि मनके मांग म अस्सी लाख रूपिया के आने-आने विकास अउ निर्माण काम के घोसना करीन।
पोल्ट्री कॉन्क्लेव
रायपुर म आज ले देस के सबले बड़े पोल्ट्री कॉन्क्लेव के सुरूआत होगे हे। दू दिवसीय ए कॉन्क्लेव म देसभर ले पोल्ट्री व्यवसाय ले जुड़े ट्रेडर्स अउ किसान सामिल होवत हे। मीडिया ले चर्चा के दउरान आईबी ग्रुप के महाप्रबंधक बहादुर अली ह बतईन कि कॉन्क्लेव म सरपंच मन ह गांव म पोल्ट्री फार्म लगय के प्रस्ताव राखीन।
पोषण-पखवाड़ा
केन्द्रीय महिला अउ बाल विकास मंत्रालय डहार ले आज ले पोषण पखवाड़ा मनाय जावत हे। ए बछर के पोषण पखवाड़ा मुख्य रूप ले चार ठिन बिसय म केन्द्रित हवय। एमा जीवन के पहिली एक हजार दिन के दउरान देखभाल, पोषण ट्रैकर के लाभार्थी मॉडयूल के प्रचार-प्रसार, कुपोषण के प्रभावी प्रबंधन अउ लइका मन म मोटापा ल दूरिहा करे बर स्वस्थ जीवनशैली ल बढ़ावा देना हे।
पोषण अभियान, प्रधानमंत्री नरेन्द्र मोदी डहार ले सुरू करे गे प्रमुख पहल हवय, जेखर उद्देश्य गर्भवती माईलोगिन, स्तनपान करइया माईलोगिन, किशोरी नोनी अउ छह बछर के कमती आयु के लइका मन बर पोषण संबंधी परिणाम ल सुधारना हे। अब तक पोषण पखवाड़ा के छह सफल संस्करण आयोजित करे गेहे। ए बखत पोषण पखवाड़ा के सातवां संस्करण मनाय जावत हे।
छत्तीसगढ़ म घलो आज ले पोषण पखवाड़ा के सुरूवात होगे हे। मोहला-मानपुर-अंबागढ़ चौकी जिला के कलेक्टर तुलिका प्रजापति ह आने-आने आंगनबाड़ी केन्द्र म पोषण पखवाड़ा के सुभारंभ करीन अउ हितग्राही मन ले गोठबात करीन।
माओवादी-आत्मसमर्पण
बीजापुर जिला म आज चार इनामी समेत बाईस माओवादी मन ह पुलिस के आगू आत्मसमर्पण करे हे। एमा ले दू झिन माओवादी उपर आठ-आठ लाख रूपिया अउ दू झिन आने माओवादी मन उपर पांच-पांच लाख रूपिया के इनाम घोसित रिहीस।
भाजपा-बैठक
भारतीय जनता पार्टी के राष्ट्रीय सह संगठन मंत्री शिवप्रकाश अउ प्रदेस प्रभारी नितिन नबीन काली नौ अप्रैल के रायपुर स्थित प्रदेस भाजपा कार्यालय म निगम-मंडल अउ आयोग के पदाधिकारी के बइठका लीहीं। एखर संगेसंग ओमन नगरीय निकाय के महापौर, सभापति, अध्यक्ष अउ उपाध्यक्ष मनके घलो बइठका लीहीं। ए जानकारी भाजपा के प्रदेस महामंत्री जगदीश रोहरा ह दीन हे।
रेलवे-आवेदन
दक्षिण पूर्व मध्य रेलवे ह अपरेंटिस पद म भर्ती बर आवेदन मंगाय हे। इच्छुक अउ योग उम्मीदवार रेलवे के आधिकारिक वेबसाइट म जाके चार मई तक ऑनलाइन आवेदन कर सकत हे। रेलवे डहार ले नागरपुर मंडल म नौ सौ उन्नीस अउ वर्कशॉप मोतीबाग म अठासी पद म भर्ती करे जाही। आवेदन मन ल कोनों मान्यता प्राप्त बोर्ड ले दसवीं या समकक्ष परीक्षा कम से कम पचास प्रतिशत अंक के संग पास होना जरूरी हवय। संगेसंग ओमन ल संबंधित ट्रेड म आईटीआई पास होना जरूरी हे।
ट्रेन परिचालन
पश्चिम रेलवे मुंबई मंडल के सूरत स्टेशन म चलत विकास काम के सेती कुछेक ट्रेन मनके ठहराव अउ अवई-जवई म अस्थायी बदलाव करे गेहे। एखर अंतर्गत दक्षिण पूर्व मध्य रेलवे ले जवइया ट्रेन मनके ठहराव अब सूरत स्टेशन के जघा म उधना स्टेसन म होही। तीन अप्रैल ले अवइया आदेस तक अहमदाबाद-हावड़ा एक्सप्रेस अउ पोरबंदर-शालीमार एक्सप्रेस सूरत के जघा म उधना स्टेसन म रूकही। उहें, छह अप्रैल ले ओखा-शालीमार एक्सप्रेस अउ सांतरागाछी-पोरबंदर एक्सप्रेस अउ चार अप्रैल ले पोरबंदर-सतरागाछी अउ शालीमार-पोरबंदर एक्सप्रेस के ठहराव सूरत के जघा म उधना स्टेसन म दे जाही। एखर संगेसंग आठ अप्रैल ले शालीमार-ओखा एक्सप्रेस सूरत के स्थान म उधना स्टेसन म रूकही।
अपोलो अस्पताल प्रबंधन-नोटिस
बिलासपुर के मुख्य चिकित्सा अउ स्वास्थ्य अधिकारी ह अपोलो अस्पताल प्रबंधन ल नोटिस जारी करके डॉक्टर नरेन्द्र विक्रमादित्य के डिग्री समेत आने दस्तावेज पेस करे बर केहे हे। डॉक्टर विक्रमादित्य ल अपोलो अस्पताल प्रबंधन ह विशेषज्ञ डॉक्टर के नौकरी म राखे रिहीन। ओमन कार्डियोलॉजिस्ट के रूप म ऑपरेसन करीन, जेखर बाद छह ले जादा लोगन मनके मउत होगे रिहीस। ओमन छत्तीसगढ़ विधानसभा के पूर्व अध्यक्ष राजेन्द्र प्रसाद शुक्ला के घलो ऑपरेशन करीन, जेखर बाद उंखर तबीयत बिगड़ गीस अउ थोरकिन देर बाद उंखर मउत होगे रिहीस।