रेल तथा सूचना प्रसारण मंत्री अश्विनी वैष्णव ह किहीन कि खरसिया-नया रईपुर-परमालकसा रेल परियोजना छत्तीसगढ़ के रेल कनेक्टिविटी बर वरदान साबित होही। आज नई दिल्ली के रेल भवन ले वीडियो कॉन्फ्रेंसिंग के माध्यम ले होय प्रेस कांफ्रेंस म रेल मंत्री ह किहीन कि आठ हजार सात सौ करोड़ रूपिया ले जादा के लागत वाले ए परियोजना ले पूरा छत्तीसगढ़ ल एक छोर ले दूसर छोर तक कवरेज मिलही। ए परियोजना ह ओडिसा के सीमा ले महाराष्ट्र के सीमा तक रेल नेटवर्क के सुविधा दीही। ओमन किहीन कि खरसिया -परमालकसा पांचवां-छटवां रेल लाइन ह नवा धमनी जइसन हे।
रेल मंत्री ह किहीन कि ए ह भारत के सबले बड़े रेल परियोजना मन म एक हे। एखर ले छत्तीसगढ़ के रायगढ़, जांजगीर-चांपा, बिलासपुर, बलौदाबाजार, दुर्ग अउ राजनांदगांव जइसन जिला जुड़ही। ए प्रोजेक्ट म छै सौ पंद्रह किलोमीटर लंबा पटरी बिछही अउ इक्कीस ठन रेलवे स्टेसन बनाय जाही।
रेल मंत्री ह बतइन कि दू सौ अठहत्तर किलोमीटर लंबा ए रूठ बने के बाद आठ ले जादा मेल अउ एक्सप्रेस गाड़ी के संचालन इंहा करे जाही। ए रेल नेटवर्क के बने ले रेलवे ल करीबन ढाई हजार करोड़ रूपिया के डीजल के बचत होही।
रेलमंत्री-प्रेसवार्ता-02
ए रेल लाइन म आगे रावघाट ले जगदलपुर के बीच रेल लाइन बिछाय बर डीपीआर बनाय के काम करीबन पूरा हो गेहे।
ए मउका म छत्तीसगढ़ के मुख्यमंत्री विष्णुदेव साय ह किहीन कि प्रधानमंत्री नरेंद्र मोदी के अगुवई म केंद्र सरकार डहार ले छत्तीसगढ़ म रेलवे ले जुड़े हजारों करोड़ों रूपिया के काम कराय जावत हे।
माओवादी-आत्मसमर्पण
दंतेवाड़ा जिला म आज छब्बीस झन माओवादी मन ह आत्मसमर्पण करीन हे। ए माओवादी मन ह पुलिस अधीक्षक गौरव राय के आगू आत्मसमर्पण करीन हे। एखर अलावा नारायणपुर जिला म घलो पांच झन महिला माओवादी मन ह आत्मसमर्पण करीन हे। ए सबो झन उपर एक-एक लाख रूपिया के इनाम रिहीस। एमन ह परलकोट इलाका म सक्रिय रिहीन। आत्मसमर्पण करइया माओवादी मन ल प्रोत्साहन रासि के रूप म पच्चीस-पच्चीस हजार रूपिया के चेक दे गीस। एखर अलावा एमन ल नक्सल पुनर्वास नीति म मिलइया सबो सुविधा दे जाही।
इही बीच, नारायणपुर जिला म आईईडी विस्फोट म एक झन ग्रामीण के घायल होय के खबर हे।
विश्व स्वास्थ्य दिवस
स्वास्थ्य अउ बहेतर स्वास्थ्य के बारे म जागरूकता बढ़ाय खातिर आज छत्तीसगढ़ संघरा देसभर म विश्व स्वास्थ्य दिवस मनाय जावत हे। ए बछर विश्व स्वास्थ्य दिवस के विषय हे ‘‘स्वस्थ सुरूआत, आशापूर्ण भविष्य‘‘ ए विषय के उद्देस्य माता अउ नवजात शिशु के मौत ल रोकना अउ माईलोगिन मनके सेहत अउ कल्याण ल बढ़ावा देना हे। ए मउका म प्रधानमंत्री नरेंद्र मोदी ह स्वस्थ विश्व के निर्माण बर अपन प्रतिबध्दता जतइन। अपन संदेस म ओमन किहीन कि सरकार स्वास्थ्य सेवा बर अपन धियान सरलग राखही अउ लोगन के कल्याण बर आने-आने दिसा म निवेस करही। श्री मोदी ह ए बात उपर जोर दीन कि अच्छा स्वास्थ्य हर समाज के नींव होथे।
मुख्यमंत्री विष्णुदेव साय ह विश्व स्वास्थ्य दिवस के मउका म प्रदेसवासी मन ल स्वस्थ जीवन सैली अपनाय के अपील करीन हे। ओमन किहीन कि स्वस्थ जीवन जिये बर संतुलित आहार, नियमित आयाम अउ मानसिक स्वास्थ्य उपर धियान देना जरूरी हे।
विश्व स्वास्थ्य दिवस के मउका म राजधानी रईपुर के राजेन्द्र नगर म निसुल्क आयुर्वेद चिकित्सा सिविर के आयोजन करे गीस। ए दउरान आने-आने विसेसज्ञ आयुर्वेदिक डॉक्टर मन डहार ले रोग के निदान अउ समाधान के बारे म जानकारी दे गीस।
पोषण पखवाड़ा
केन्द्रीय महिला अउ बाल विकास मंत्रालय कुपोषण ल दूर करे बर काली ले पोषण पखवाड़ा के सातवां संस्करण मनाही। एसो के पोषण पखवाड़ा म बिसेस रूप ले चार बिसय उपर जोर दे जाही। ए बिसय हे-जीवन के पहिली एक हजार दिन उपर धियान केंद्रित करना, पोषण ट्रेकर के लाभार्थी मॉड्यूल ल लोकप्रिय बनाना, कुपोषण के प्रबंधन अउ लइका मन म मोटापा ल दूर करे बर स्वस्थ जीवन सैली ल अपनाना।
सुशासन तिहार
प्रदेस म काली आठ अप्रैल ले सुशासन तिहार के आयोजन करे जाही। तीन चरण म होवइया सुशासन तिहार के तहत पहिली चरण म आठ ले ग्यारा अप्रैल तक लोगन ले आवेदन ले जाही। उहें, दूसर चरण म एक महिना के भीतर मिले आवेदन के निपटारा करे जाही। तीसर अउ अंतिम चरण म पांच मई ले इकतीस मई के बीच समाधान सिविर के आयोजन करे जाही।
काली ले ग्यारा अप्रैल तक ग्राम पंचायत मुख्यालय अउ नगरीय निकाय कार्यालय म बिहनिया दस बजे ले संझा पांच बजे तक आवेदन ले जाही। ए स्थल म समाधान पेटी रखे जाही, जेखर ले लोगन अपन समस्या अउ सिकायत लिखके ओमा डार सकय। समाधान पेटी के व्यवस्था जिला अउ विकासखंड मुख्यालय स्तर म करे जाही। ऑनलाइन आवदेन प्राप्त करे के व्यवस्था पोर्टल म घलो रइही। हरेक आवेदन ल पोर्टल म पंजीकृत करके ऑनलाइन अपलोड करे जाही। संगेसंग आवेदनकर्ता ल घलो पावती दे जाही।
समाधान सिविर म मुख्यमंत्री संघरा मंत्री, सांसद, विधायक अउ राज्य सरकार के अधिकारी मन घलो सामिल होही। ए दउरान आने-आने विकास काम के योजना के प्रगति के निरीक्षण के संगेच योजना ले लोगन ल मिलत फायदा के बारे म फीडबैक ले जाही। जिला मुख्यालय म अधिकारी मन संग समीक्षा बइठका होही।
जल-संरक्षण
छत्तीसगढ़ म भू-जल संवर्धन बर जरूरी संरचना के निर्माण मनरेगा, जिला खनिज न्यास मद अउ आपदा प्रबंधन कोस ले कराय जाही। ए संबंध म जल संसाधन विभाग ह राज्य के सबो कलेक्टर मन ल पत्र जारी करे हे। पत्र म भू-जल के दोहन म सरलग निगरानी राखे बर केहे गे हवय।
भारत सरकार के जल शक्ति मंत्रालय डहार ले तियार भू-जल सर्वेक्षण रिपोर्ट के अनुसार छत्तीसगढ़ के एक सौ छियालिस विकासखंड मन ले पांच ठन विकासखंड भू-जल दोहन के अनुसार संकट के स्थिति म हवय। ए विकासखंड हे- बालोद जिला के गुरूर, बेमेतरा जिला के नवागढ़, बेमेतरा अउ बेरला अउ रईपुर जिला के धरसींवा विकासखंड। एखर अलावा इक्कीस ठन विकासखंड ल सेमी क्रिटिकल स्थिति म पाय गे हवय।
प्रवेश परीक्षा-आवेदन
छत्तीसगढ़ व्यावसायिक परीक्षा मंडल डहार ले वर्तमान शैक्षणिक सत्र म प्री बीएड अउ प्री डीएलएड प्रवेस परीक्षा बर पच्चीस अप्रैल तक आवेदन मंगाय गे हवय। प्री बीएड अउ प्री डीएलएड प्रवेस परीक्षा बर ऑनलाइन आवेदन के प्रारंभिक तिथि अट्ठाईस मार्च ले सुरू हो गेहे। आवेदन म त्रुटि सुधार के तिथि छब्बीस ले अट्ठाईस अप्रैल संझा पांच बजे तक तय करे गेहे।
उहें, शिक्षा के अधिकार अधिनियम-आरटीई म प्रदेस के निजी स्कूल मन म प्रवेस के प्रक्रिया जारी हे। एमा प्रथम चरण के ऑनलाइन आवेदन के तिथि ल इकतीस मार्च ले बढ़ाके आठ अप्रैल कर दे गेहे।
अउ अब मौसम के हाल…
एक ठन पश्चिमी विक्षोभ के सेति प्रदेस के कुछेक जघा म काली ले मौसम म बदलाव हो सकत हे। मौसम विभाग के अनुसार काली आठ अप्रैल के रईपुर, बस्तर, दुरूग अउ बिलासपुर संभाग के कुछेक जिला म हल्का बरसा होय के या गरज-चमक के संग छींटा पड़े के संभावना हे। एखर अलावा प्रदेस के कुछेक जघा म वज्रपात होय के या अंधड चले के संभावना जताय गे हवय।
अउ अब थोरकुन समाचार सार म –
– मुख्यमंत्री विष्णुदेव साय ह आज जशपुर जिला के बगिया के सीएम कैम्प कार्यालय ले मोबाइल कैंसर डिडक्सन वैन ल हरा झंडा दिखाके रवाना करीन।
– पूर्व आबकारी मंत्री कवासी लखमा के रिमांड अवधि ईओडब्ल्यू के बिसेस कोर्ट डहार ले पांच दिन बर बढ़ा दे गेहे। अब ओमन ह ग्यारा अप्रैल तक पुलिस रिमांड म रइही।
– जशपुर जिला प्रशासन अउ बालको मेडिकल सेंटर डहार ले सामुदायिक स्वास्थ्य केंद्र कुनकुरी म सात अउ आठ अप्रैल के निसुल्क रक्त अउ कैंसर रोग परामर्स सिविर के आयोजन करे जावत हे।
अउ
– कोंडागांव जिला के बड़े राजपुर ब्लाक के तितरखंड गांव म वार्षिक देवमेला सुरू हो गेहे। एमा चौबीस परगना ले देवी-देवता मन ल लाय गे हवय अउ उंखर विधि-विधान ले पूजा-पाठ करे जावत हे।