राष्ट्रपति द्रौपदी मुर्मू ह वक्फ संशोधन विधेयक ल मंजूरी दे दीन हें। एखरे संग ए विधेयक अब कानून बनगे। संसद ह ए विधेयक ल इही हफ्ता पारित करे रिहीस। राष्ट्रपति ह मुसलमान वक्फ निरसन विधेयक-दू हजार पच्चीस ल घलो स्वीकृति दे दीन हें।
ए नवा कानून के माध्यम ले केंद्र सरकार के उद्देस्य, देस म वक्फ संपत्ति प्रबंधन के शासन, पारदर्सिता अउ दक्षता ल बढ़ाय म सुधार लाना हे। मुकदमा अउ न्यायिक निगरानी के कमी जइसन लंबा बेरा ले अवइया मुद्दा मन ल संसोधित करके नवा कानून एक ठन जवाबदेह ढांचा बनाय के उदिम करथे। परमुख बदलाव मन म वक्फ के गठन ल फेर परिभाषित करना, सर्वेक्षण अउ पंजीकरण प्रक्रिया म सुधार करना, सरकारी निगरानी ल सशक्त बनाना, वक्फ ले जुरे निकाय मन म गैर मुस्लिम सदस्य अउ माईलोगिन मन ल सामिल करके समावेस सुनिश्चित करना हे। ए नवा कानून देस म वक्फ संपत्ति प्रबंधन ल आधुनिक बनाय बर जरूरी कदम हे।
केंद्रीय गृहमंत्री-वामपंथी उग्रवाद-बैठक
केंद्रीय गृहमंत्री अमित शाह ह किहीन कि अवइया बछर इकतीस मार्च ले पहिली छत्तीसगढ़ समेत जम्मों देसभर ले नक्सलवाद खतम हो जही। केंद्रीय गृहमंत्री ह रइपुर म काली वामपंथी उग्रवाद के स्थिति उपर बइठका करत ए गोठ ल किहीन। ओमन यहू किहीन कि प्रधानमंत्री नरेंद्र मोदी के अगुवई म डबल इंजन के सरकार, नक्सलवाद के नास करे बर सरलग उदिम करत हे।
श्री शाह ह किहीन कि नक्सल विरोधी अभियान के गति धीमा नइ पड़ना चाही। एक राज्य ले आने राज्य भगइया नक्सली मन ल पकड़े बर राज्य पुलिस अउ केंद्रीय सुरक्षा एजेंसी मन म बेहतर समन्वय होना चाही।
केंद्रीय गृहमंत्री ह राज्य सरकार डहार ले नक्सल प्रभावित इलाका म सरकारी योजना मन ल जन-जन तक पहुंचाय बर बनाय गे नियद नेल्लानार ल सुरक्षा बल के सिविर ले पांच किलोमीटर के दायरा ल बढ़ा के दस किलोमीटर करे बर किहीन हें।
बइठका म छत्तीसगढ़ के मुख्यमंत्री विष्णुदेव साय अउ उपमुख्यमंत्री विजय शर्मा के संगे गृह मंत्रालय, केंद्रीय सशस्त्र पुलिस बल अउ छत्तीसगढ़ सरकार के बड़का अधिकारी घलो मौजूद रिहीन।
केंद्रीय गृहमंत्री- जवान संवाद
एखर ले पहिली, काली छत्तीसगढ़ के दंतेवाड़ा म एंटी-नक्सल अभियान म सामिल कमांडर मन के संग गोठबात करत गृहमंत्री ह किहिन कि सुरक्षाबल मन नक्सली मन ल कमजोर बना दिन हें। चाहे जंगला होय या फेर उफनावत नदिया-नरवा, चाहे ठुठरत जाड़ या फेर भारी घाम-पियास, हमर वीर जवान मन अपन साहस ले करोड़ों जीवन ल नक्सल प्रभाव ले मुक्त करिन हें।
भाजपा स्थापना दिवस
ए मउका म छत्तीसगढ़ के मुख्यमंत्री विष्णुदेव साय ह कार्यकर्ता मन ल बधई देवत किहीन हे कि प्रधानमंत्री नरेंद्र मोदी के अगुवई म आज बिकास के सुरूज ले जम्मों देस ह उजियार होवत हे।
ऐति, मुख्यमंत्री विष्णुदेव साय ह रइपुर के भाजपा प्रदेस कार्यालय कुशाभाऊ ठाकरे परिसर म स्थापना दिवस के मउका म पार्टी के झंडा फहराइन। संगेसंग मुख्यमंत्री ह प्रसिक्षण केंद्र के भूमिपूजन घलो करिन। ए दउरान क्षेत्रीय संगठन महामंत्री अजय जामवाल, प्रदेस संगठन महामंत्री पवन साय अउ उपमुख्यमंत्री विजय शर्मा समेत भाजपा के आने-आने बड़का नेता मौजूद रिहीन। उहें, भाजपा के प्रदेस अध्यक्ष किरण सिंह देव ह जगदलपुर म पार्टी के झंडा फहराइन।
इही बीच, भारतीय जनता पार्टी के प्रदेस इकाई भाजपा के स्थापना दिवस अउ बाबा साहेब अंबेडकर के जयंती के मउका म आज ले चौदह अप्रैल तक आने-आने कारीकरम के आयोजन करत हे। भाजपा के प्रदेस उपाध्यक्ष लक्ष्मी वर्मा ह बतइन कि पार्टी पदाधिकारी अउ कार्यकर्ता मन आज स्थापना दिवस म बूथ, कार्यालय अउ घर म पार्टी के झंडा फहराइन। ऐति, आठ अउ नौ अप्रैल के सबो मंडल अउ विधानसभा स्तर म सक्रिय सदस्य मनके सम्मेलन राखे जाही। उहें, दस अउ ग्यारा अप्रैल के गांव, बस्ती अउ बूथ मन म घर-घर संपर्क अभियान चलाय जाही। कारीकरम के दउरान भाजपा के विकास यात्रा के संगे केंद्र अउ प्रदेस सरकार के उपलब्धि उपर प्रदर्सनी लगाय जाही।
मुख्यमंत्री-अध्यक्ष-मुलाकात
मुख्यमंत्री विष्णुदेव साय ह आज राजधानी रइपुर निवास कार्यालय म नवा निगम-मंडल अध्यक्ष मन ले भेंट करिन। मुख्यमंत्री ह सबो अध्यक्ष मन ल नवा जिम्मेदारी के सेती बधई अउ सुभकामना देवत उंखर सुफल कार्यकाल के कामना करिन। ये मउका म राज्य केश शिल्पी कल्यान बोर्ड के अध्यक्ष मोना सेन, राज्य समाज कल्यान बोर्ड के अध्यक्ष शालिनी राजपूत, उपाध्यक्ष चंद्रकांति वर्मा अउ छत्तीसगढ़ राज्य तेलघानी विकास बोर्ड के अध्यक्ष जितेन्द्र कुमार साहू मौजूद रिहीन।
उहें, मुख्यमंत्री विष्णुदेव साय छत्तीसगढ़ राज्य अक्षय ऊर्जा विकास अभिकरण-क्रेडा के नवा अध्यक्ष भूपेन्द्र सवन्नी के पदभार ग्रहण अउ अभिनंदन समारोह म सामिल होइन। ए मउका म मुख्यमंत्री ह किहींन हे कि अक्षय ऊर्जा के क्षेत्र म छत्तीसगढ़ के समग्र विकास म क्रेडा के भूमिका महत्वपूर्ण हे। ओमन विस्वास जतइन हे कि श्री सवन्नी के अगुवई म राज्य म स्वच्छ अउ नवीकरणीय ऊर्जा ल बढ़ावा मिलहीं अउ ए क्षेत्र नवा ऊंचई तक पहुंचही।
मेडिकल कॉलेज-जुर्माना
प्रवेस अउ फीस विनियामक छत्तीसगढ़ डहार ले प्रदेस के तीन ठन निजी मेडिकल कालेज म छात्र मनले ट्रांसपोर्ट, हॉस्टल अउ मेस के नाव म जादा पइसा ले जाय के सिकायत सही पाय गीस। एखर बाद ए मेडिकल कालेज मन उपर दस-दस लाख रूपिया के जुर्माना लगाय गेहे। छात्र मनले ले गे जादा पइसा ल एक महिना के भीतर सात प्रतिसत सलाना ब्याज समेत लहुटाय के निरदेस दे गेहे।
रामनवमी
रामनवमी के परब आज छत्तीसगढ़ के संग जम्मों देसभर म बड़ उछाह के संग मनाय जावत हे। ए परब भगवान विष्णु के अवतार श्रीराम के जनम होय के मउका म मनाय जाथे। हिंदू पंचांग ले रामनवमी चइत महिना के नौवां तिथि के मनाय जाथे। ऐति, राष्ट्रपति, उपराष्ट्रपति, प्रधानमंत्री अउ छत्तीसगढ़ के राज्यपाल के संग मुख्यमंत्री विष्णुदेव साय ह देसवासी मन ल रामनवमी के बधई अउ सुभकामना देइन हें।
रामनवमी के मउका म आज प्रदेसभर के आने-आने जघा म राम मंदिर मन म पूजा-पाठ करे जावत हें। कतकोन जघा म आज सोभायात्रा घलो निकाले जावत हे। ऐति, राजधानी रइपुर के दूधाधारी मठ म भगवान श्रीराम के दर्सन बर बिहनिया ले ही श्रध्दालु मनके भीड़ उमड़े रिहीस।
मुख्यमंत्री विष्णुदेव साय ह रामनवमी के मउका म राजधानी रइपुर के वीआईपी रोड जघा श्रीराम मंदिर पहुंच के विधि-विधान ले पूजा-पाठ करिन। ए मउका म मुख्यमंत्री ह किहीन हे कि रामनवमी परब ले हम सब झन ल भगवान श्रीराम के मर्यादा ल अपन जिनगी म उतारे के सीख मिलथे।
इही बीच, नवरात्र के आखिरी दिन आज आने-आने देवी मंदिर अउ शक्ति पीठ म पूजा-पाठ करे गीस। कतकोन जघा हवन-पूजन, कन्या भोज अउ भंडारा बांटे गीस। संगेसंग बाजा-गाजा अउ जसगीत गावत जोत अउ जंवारा विर्सजन करे जावत हें।
जशपुर-जल जागृति
केंद्रीय जल शक्ति मंत्रालय के कैच द रेन अभियान के अंतर्गत जल जागृति कारीकरम के तहत जशपुर जिला के घोलेंग गा्रम पंचायत म काली जल संरक्षण जागरूकता सिविर के आयोजन करे गीस, जेमा ग्रामीण मन ल जल अउ भूमि संरक्षण के महत्ता बतावत पारंपरिक अउ आधुनिक उपाय के जानकारी दे गीस।
अउ अब मौसम के हाल…
मौसम विभाग के जानकारी ले आठ अप्रैल ले प्रदेस के अधिकतम तापमान म गिरावट के दउर सुरू होय के संभावना हे। मौसम विज्ञानी एच.पी.चंद्रा ह बतइन हे कि एक ठिन द्रोणिका पूर्वी बिहार ले छत्तीसगढ़ होवत पूर्वी विदर्भ तक बिस्तारित हे। उहें, चक्रवाती घेरा दक्षिण पूर्व बंगाल के खाड़ी के उपर तक बिस्तारित हे। एखरे प्रभाव ले तापमान म गिरावट हो सकथे।