आज दिनभर के खबर ल अपन गुरतुर छत्तीसगढ़ी भाखा म पढ़व

केंद्रीय गृहमंत्री अमित शाह ह माओवादी मन ले अपील करे हे कि ओमन  हथियार छोड़के मुख्यधारा म सामिल होवय। आज दंतेवाड़ा म बस्तर पंडुम के समापन समारोह ल संबोधित करत हुए श्री शाह ह, ए संकल्प ल दोहराइन के अवइया चैत्र नवरात्र तक छत्तीसगढ़ ले लाल आतंक खतम हो जही। ओमन किहीन कि बस्तर म विकास तभे हो सकत हे, जब इंहा सांति होही। श्री शाह  ह किहीन कि विकास बर हाथ म बंदूक नइ भलूक कलम अउ कम्प्यूटर के जरूरत हे।
छत्तीसगढ़ के जनजाति कला अउ सिल्प ल संरक्षित अउ संवर्धित करे बर आयोजित करे गे बस्तर पंडुम के सराहना करत हुए केंद्रीय गृहमंत्री ह घोसना करीन कि अवइया बछर बस्तर पंडुम म देस के हर आदिवासी जिला के कलाकार मन सामिल होही। एखर अलावा एसो जउन बस्तर पंडुम सात जनजातीय विधा मन म आयोजित करे गेहे, ओला अवइया बछर बारह श्रेणी म आयोजित करे जाही। एखरे संगेच बस्तर के जनजातीय संस्कृति ल अंतर्राष्ट्रीय स्तर म प्रसिध्दि दिलाय बर आने-आने देस मनके राजदूत मन ल बस्तर के जिला मनके दउरा कराय जाही, ताकि ओमन इंहा के समृध्द कला अउ संस्कृति ले परिचित हो सकय।
बस्तर पंडुम यानि बस्तर उत्सव के आयोजन बस्तर के समृध्द जनजातीय कला अउ संस्कृति ल एक घांव फेर जीवित करे बर अउ एला देस-विदेस के आगू लाय बर करे गेहे। बारह मार्च ले आज पांच अप्रैल तक चलइया, ए आयोजन के बेरा ब्लॉक, जिला अउ फेर संभाग स्तर म जनजातीय नृत्य, गीत, नाट्य, वाद्ययंत्र, वेशभूषा, सिल्प, चित्रकला, पेय पदार्थ अउ व्यंजन के श्रेणी म प्रतिस्पर्धा आयोजित करे गीस। ए बस्तर पंडुम म अट्ठारा सौ ले जादा ग्राम पंचायत के लगभग सैंतालिस हजार कलाकार मन ह भाग लीन हे।
समापन समारोह ल संबोधित करत हुए मुख्यमंत्री विष्णुदेव साय ह किहीन कि बस्तर अब बदलत हे अउ अब ए बदलाव स्थायी होही। ओमन विस्वास जतइन कि बस्तर के लोगन अब नक्सलवाद ले मुक्ति चाहत हे अउ विकास के मुख्यधारा ले जुड़ के आगू बाढ़ना चाहत हे। बस्तर पंडुम अउ बस्तर ओलंपिक जइसन आयोजन ए जनभावना के प्रतीक हे। श्री साय ह किहीन कि प्रधानमंत्री अउ केंद्रीय गृहमंत्री ह मार्च दू हजार छब्बीस तक पूरा देस ले नक्सलवाद ल खतम करे के संकल्प लेहे। छत्तीसगढ़ म सुरक्षा बल के जवान मनके कार्रवाई ले सफलता मिलत हे। मुख्यमंत्री ह किहीन कि नियद नेल्लानार योजना के जरिया बस्तर अंचल म सबो मुलभूत सुविधा पहुंचाय जात हे।
समारोह ल उपमुख्यमंत्री विजय शर्मा ह घलो संबोधित करीन। ए बेरा केंद्रीय गृहमंत्री अमित शाह ह बस्तर पंडुम के तहत आयोजित आने-आने प्रतिस्पर्धा के विजेता मन ल पुरस्कार बांटिन। ओमन बस्तर पंडुम के मउका म आयोजित जनजातीय कला अउ संस्कृति ल देखात प्रदर्सनी के अवलोकन घलो करीन।
अपन दंतेवाड़ा प्रवास के दउरान केंद्रीय गृहमंत्री ह आने-आने सुरक्षाबल के जवान मनके संग गोठबात करीन अउ उंखर संग भोजन घलो करीन।
एखर पहिली, केंद्रीय गृह मंत्री ह मुख्यमंत्री विष्णुदेव साय के संग दंतेवाड़ा के मां दंतेश्वरी मंदिर म पूजा-पाठ करके देस अउ प्रदेसवासी मन के सुख-समृध्दि अउ सुरक्षा के कामना करीन।

आईईडी विस्फोट-ग्रामीण मौत

नारायणपुर जिला म आईईडी के चपेट म आय ले एक ग्रामीण के मउत हो गेहे। उहें, एक आने मनखे घायल हो गेहे। मिले जानकारी के मुताबिक कानागांव निवासी ए दूनों ग्रामीण फूलझाडू बनाय बर झाड़ी लेबर जंगल म गे रिहीस। इही दउरान जड्डा अउ मरकुड गांव के बीच आईईडी विस्फोट होगे अउ दूनों ग्रामीण एखर चपेट म आगे। ए घटना म घायल दूनों ग्रामीण मनके इलाज नारायणपुर के अस्पताल म चलत हे।

दुर्घटना

दंतेवाड़ा जिला के पालनार गांव के तीर आज एक चारपहिया गाड़ी के अंते-तंते होके पलटे ले, ओमा सवार दस ले जादा ग्रामीण मन घायल होगिन। ए सबो ग्रामीण मन बस्तर पंडुम कारीकरम म सामिल होय बर दंतेवाड़ा जात रिहीन। घायल ग्रामीण मन ल इलाज बर दंतेवाड़ा के अस्पताल म भर्ती कराय गेहे।

सुशासन तिहार

प्रदेस म आठ अप्रैल ले सुशासन तिहार के आयोजन तीन चरण म करे जाही। ए बेरा पहिली चरण म आठ ले ग्यारा अप्रैल तक लोगन मन ले आवेदन ले जाही। उहें, दूसर चरण म एक महिना के भीतर मिले आवेदन मनके निराकरण करे जाही। तीसर अउ आखिरी चरण म पांच मई ले इकतीस मई के बीच समाधान सिविर के आयोजन करे जाही।
मुख्यमंत्री विष्णुदेव साय ह सबो जिला कलेक्टर मन ल ए आयोजन के   संबंध म निरदेस दे हे। मुख्यमंत्री ह कलेक्टर मन ले किहीन ह,े कि आम जनता ले ओखर मनके समस्या के संबंध म आठ ले ग्यारा अप्रैल तक ग्राम पंचायत मुख्यालय अउ नगरीय निकाय कार्यालय मन म बिहनिया दस बजे ले संझा पांच बजे तक आवेदन ले जा सकही। ए जघा म समाधान पेटी राखे जाही, ताकि लोगन मन अपन समस्या अउ सिकायत ल लिखके ओमा डाल सकय। समाधान पेटी के व्यवस्था जिला अउ विकासखंड मुख्यालय स्तर म करे जाही। ऑनलाइन आवेदन मंगाय के व्यवस्था पोर्टल म घलो होही। हरेक आवेदन ल पोर्टल म पंजीकृत करके ऑनलाइन अपलोड करे जाही। संगेसंग आवेदनकर्ता ल पावती दे जाही।
समाधान सिविर मन म मुख्यमंत्री समेत मंत्री, सांसद, विधायक अउ राज्य शासन के अधिकारी मन सामिल होही। ए बेरा आने-आने विकास कार्य अउ योजना मन ल लागू करे के निरीक्षण के संगेसंग योजना ले लोगन मन ल मिलइया फायदा के जानकारी ले जाही। जिला मुख्यालय म अधिकारी मनके संग समीक्षा बइठका घलो होही।

खनिज राजस्व

छत्तीसगढ़ ह एसो खनिज राजस्व प्राप्ति म नवा कीर्तिमान बनाय हे। प्रदेस म संचालित खनन गतिविधि ले चौदह हजार एक सौ पंचानवे करोड़ रूपिया के खनिज राजस्व प्राप्त होय हे, जउन पाछू बछर के तुलना म ग्यारा प्रतिसत जादा हे। दंतेवाड़ा जिला म सबले जादा छै हजार पांच सौ अस्सी करोड़ रूपिया के खनिज राजस्व संग्रहण करे गेहे।
खनिज विभाग के अधिकारी मन ह बतइन कि प्रदेस म साल दू हजार पंद्रह ले खनिज विभाग डहार ले खनिज मनके आबंटन ई-नीलामी के माध्यम ले करे जात हे। एखर ले रायल्टी के अलावा प्रीमियम रासि के रूप म अतिरिक्त राजस्व मिलत हे। राज्य शासन डहार ले खनिज राजस्व के कुल प्राप्ति के पांच प्रतिसत रासि खनिज विकास मद म जमा करे जात हे, जेखर ले प्रदेस के दूरिहा म स्थित अंचल मन म खनिज संसाधन के विकास अउ अधोसंरचना निर्माण के कारज करे जात हे।

अष्टमी/रामनवमीं

आज चैत्र नवरात्र के महाअष्टमी हरय। आज के दिन आदिशक्ति मां दुर्गा के आठवां स्वरूप महागौरी के पूजा-पाठ करे जात हे। राजधानी रईपुर समेत राज्य के सबो शक्तिपीठ अउ देवी मंदिर मन म नवरात्रि के मउका म पूजा अउ अनुष्ठान के कारीकरम करे जात हे। आज बिहनिया ले ही शक्तिपीठ अउ देवी मंदिर मन म श्रध्दालु मनके भीड़ देखे गीस। जघा-जघा हवन, पूजन अउ धार्मिक आयोजन करे जात हे। कुछेक जघा मन म भंडारा के आयोजन घलो करे जात हे।
उहें, काली रामनवमीं हरय। ए मउका म ज्योति कलश अउ जंवारा के विसर्जन करे जाही। राज्यपाल रमेन डेका अउ मुख्यमंत्री विष्णुदेव साय ह दुर्गाष्टमी अउ महानवमी के प्रदेसवासी मन ल बधई अउ सुभकामना दीन हें।

अउ अब मौसम के हाल…

अवइया दू दिन के दउरान प्रदेस के तापमान म करीबन दू डिग्री सेल्सियस के बढ़ोत्तरी होय के संभावना हे। उहें, एखर बाद आठ अप्रैल ले दक्षिणी छत्तीसगढ़ के कुछेक भाग म हल्का बरसा हो सकत हे। मौसम विभाग ले मिले जानकारी के अनुसार नौ ले ग्यारा अप्रैल तक छत्तीसगढ़ के मध्य भाग म घलो बरसा होय के संभावना हे।

अउ अब थोरकुन समाचार सार म –

– राज्य शासन ह छत्तीसगढ़ संस्कृति परिषद के अंतर्गत गठित साहित्य अकादमी के अध्यक्ष के रूप म शशांक शर्मा के नियुक्ति करे हे।

– कोंडागांव जिला म गुमास्ता लाइसेंस पंजीयन के नाव म पांच हजार रूपिया के रिस्वत मांगे के मामला म जिला प्रशासन ह दू संविदा कर्मचारी मन ल बर्खास्त करे के संगेसंग श्रम उपनिरीक्षक ल निलंबित कर देहे।

अउ

– छत्तीसगढ़ राज्य लघु वनोपज संघ के प्रबंधक नियमितीकरण के मांग ल लेके आज ले अनिश्चितकालीन हड़ताल सुरू कर दीन हे।