केंद्रीय गृह मंत्री अमित शाह काली पांच अप्रैल के दंतेवाड़ा जिला म आयोजित बस्तर पंडुम महोत्सव के समापन समारोह म सामिल होही। केंद्रीय गृहमंत्री आज देर संझा रईपुर पहुंचही। श्री शाह काली बिहनिया दंतेवाड़ा जाही, जिहां मां दंतेश्वरी के दर्सन करे बाद बस्तर पंडुम के समापन समारोह म सामिल होही।
अपन दंतेवाड़ा प्रवास के दौरान केंद्रीय गृहमंत्री बस्तर के स्थानीय जन-प्रतिनिधि, सुरक्षा बल के कमांडर अउ अधिकारी मन संग बइठका करही। एखर बाद केंंद्रीय गृहमंत्री रईपुर लहुट के विभागीय समीक्षा बइठका लेके वामपंथी उग्रवाद के खिलाफ चलाय जात अभियान के समीक्षा करही अउ भावी रणनीति बर मार्गदर्सन दीही।
वक्फ संशोधन विधेयक-पारित-01
वक्फ संशोधन विधेयक-दू हजार पच्चीस संसद ले पारित होगे। राज्यसभा ह बारह घंटा के चर्चा के बाद एला मंजूरी दीस। एक सौ अट्ठाईस सदस्य मन संशोसन विधेयक के पक्ष म अउ पंचानवे झन विपक्ष म मतदान करीन। लोकसभा ले ए विधेयक पहिली ही पारित हो चुके हे।
विधेयक उपर चर्चा के जवाब देवत अल्पसंख्यक कार्यमंत्री किरेन रिजिजू ह किहीन कि ए अधिनियम ले मुस्लिम समुदाय के करोड़ो गरीब लोग मन ल फायदा होही। ओमन किहीन कि नरेंद्र मोदी सरकार सबका साथ-सबका विकास के लक्ष्य ल लेके आगू बाढ़त हे।
वक्फ संशोधन विधेयक-पारित-02
संसद के दूनों सदन ले वक्फ संशोधन विधेयक अउ मुसलमान वक्फ निरसन विधेयक पारित होय म प्रधानमंत्री नरेंद्र मोदी ह किहीन कि, ए सामाजिक आर्थिक न्याय, पारदर्सिता अउ समावेसी विकास के दिसा म एक ऐतिहासिक अवसर हे। श्री मोदी ह एक ठिन सोसल मीडिया पोस्ट म संसदीय समिति के विचार विमर्स म हिस्सा लेवइया जम्मों सांसद मनके आभार व्यक्त करीन।
छत्तीसगढ़ के मुख्यमंत्री विष्णुदेव साय ह लोकसभा अउ राज्यसभा म वक्फ संशोधन विधेयक के पारित होय म खुसी जतइन हे।
ऐति, छत्तीसगढ़ के उपमुख्यमंत्री अरूण साव ह वक्फ संशोधन विधेयक पारित होय म किहीन कि प्रधानमंत्री नरेंद्र मोदी सुधार अउ परिवर्तन के नीति म चलत हे। ए वक्फ संशोधन विधेयक घलो उही दिसा म एक महत्वपूर्ण अउ बहुत बड़का कदम हरय। ए संशोधन विधेयक के जरिया वक्फ के संपत्ति पारदर्सी होही अउ कई ठिन खामी दूर होही।
भारतीय जनता पार्टी के प्रदेस प्रवक्ता तौकीर रजा ह वक्फ संशोधन बिल के सुवागत करत किहीन कि ए संसोधन विधेयक अल्पसंख्यक मनके हित म एक बड़का कदम हरय। ओमन किहीन कि पूरा देस अउ अल्पसंख्यक समुदाय ए संशोधन विधेयके समर्थन म खड़े हे।
केंद्रीय मंत्रिमंडल-निर्णय
केंद्रीय मंत्रिमंडल ह रेल मंत्रालय के छत्तीसगढ़ के संगेसंग महाराष्ट्र अउ ओड़िसा के चार ठिन परियोजना ल मंजूरी दे देहे, जेखर कुल लागत अट्ठारा हजार छै सौ अंठावन करोड़ रूपिया हरय। आज नई दिल्ली म संवाददाता मन ल जानकारी देत सूचना अउ प्रसारण मंत्री अश्विनी वैष्णव ह बतइन कि ए परियोजना ले तीन राज्य मन के पंद्रह जिला म भारतीय रेलवे के मौजूदा नेटवर्क लगभग एक हजार दू सौ सैंतालिस किलोमीटर तक बाढ़ जाही। ओमन किहीन कि ए परियोजना म छत्तीसगढ़ के खरसिया-नया रईपुर-परमलकासा, पांचवां अउ छठा लाइन, संबलपुर-जरपाड़ा तीसरा अउ चौथा लाइन, झारसुगुड़ा-सासन तीसरा अउ चौथा लाइन अउ गोंदिया-बल्हारशाह के दोहरीकरण सामिल हे। श्री श्री वैष्णव ह किहीन कि एखर ले लगभग तीन करोड़ उनयासी लाख मानव दिवस बर प्रत्यक्ष रोजगार पैदा होही।
राज्यपाल-सुकमा
राज्यपाल रमेन डेका ह आज सुकमा जिला के प्रवास के दउरान प्रधानमंत्री आवास योजना ग्रामीण के लाभान्वित परिवार के घर पहुंच के ओखर मनले भेंट करीन। राज्यपाल ह प्रधानमंत्री आवास योजना के हितग्राही समीर विश्वास के घर पहुंच के शासन ले मिलइया योजना के जानकारी लीन।
अपन प्रवास के दउरान राज्यपाल ह सुकमा जिला के कलेक्टेरेट परिसर म एक पेड़ मां के नाम अभियान के तहत रूद्राक्ष के पउधा लगइन। ए दउरान ओमन पर्यावरण संरक्षण अउ धरती ल हराभरा बनाय बर जम्मों झन ल अपन तीर-तखार म पउधा लगाय बर प्रेरित करीन।
मुख्यमंत्री कुदरगढ़
मुख्यमंत्री विष्णुदेव साय आज सूरजपुर जिला म चलत तीन दिन के कुदरगढ़ महोत्सव के समापन समारोह म सामिल होइन। समारोह ल संबोधित करत मुख्यमंत्री ह कुदरगढ़ मंदिर ट्रस्ट के कार्यालय अउ धर्मशाला निर्माण बर पचास-पचास लाख रूपिया के संघरा गढ़वतिया माता मंदिर म सीढ़ी निर्माण बर पचास लाख रूपिया देके घलो घोसना करीन।
ओपन-परीक्षा रद्द
गरियाबंद जिला के लोहरसी परीक्षा केंद्र म राज्य ओपन स्कूल परीक्षा के दउरान बारहवीं के जघा दसवीं कक्षा के पेपर बांट दे गीस। परीक्षा के एक दिन पहिली दसवीं कक्षा के गृह विज्ञान बिसय के पेपर लीक होय के बाद राज्य ओपन स्कूल के सचिव ह आदेस जारी करके परीक्षा ल निरस्त कर देहे। एखरे संग परीक्षा के नया तारीख के भी ऐलान कर दे गेहे। दसवीं कक्षा के गृह विज्ञान बिसय के परीक्षा अब बाईस अप्रैल के राखे जाही।
इही बीच, जिला शिक्षा अधिकारी ह बतइन कि लापरवाही के सेति ड्यूटी म तैनात केंद्राध्यक्ष नारायण सिंह, सहायक केंद्राध्यक्ष तुलसी राम यादव अउ ऑब्जर्वर नितू साहू ल हटा दे गेहे।
विजय शर्मा-जवान प्रतिमा
उपमुख्यमंत्री विजय शर्मा ह दंतेवाड़ा जिला के तुमनार म बस्तर फाइटर्स के आरक्षक अमर शहीद स्वर्गीय सुबरनाथ यादव के सुरता म बने शहीद स्मारक के तहत ओखर प्रतिमा के अनावरण करीन। ए मउका म उपमुख्यमंत्री ह किहीन कि शहीद सुबरनाथ यादव के बलिदान हमन ल नक्सलवाद के खिलाफ लड़ई म अउ दृढ़ता ले आगू बाढ़े के प्रेरणा देथे। ओखर वीरता अउ समर्पण हम जम्मों झन बर प्रेरणा स्त्रोत हे। ए मउका म परिवार के सदस्य, स्थानीय नागरिक, स्कूली लइका अउ बस्तर फाइटर्स के जवान मौजूद रिहीन।
माओवादी-आत्मसमर्पण
सुकमा जिला म आज नक्सली कमांडर बारसे देवा के भाई बारसे सन्ना समेत चार माओवादी मन आत्मसमर्पण करीन हे। ए माओवादी मन पुलिस अधीक्षक किरण चौहान अउ केंद्रीय रिजर्व पुलिस बल-सीआरपीएफ के अधिकारी मनके आगू आत्मसमर्पण करीन। आत्मसमर्पण करइया चार म ले दू माओवादी मन उपर आठ-आठ लाख रूपिया के इनाम घोसित रिहीस।
दक्षिण पूर्व मध्य रेलवे
दक्षिण पूर्व मध्य रेलवे बिलासपुर मंडल म उनहत्तरवां रेल सेवा पुरस्कार समारोह के आयोजन करे गीस। समारोह म मंडल रेल प्रबंधक राजमल खोईवाल मुख्य अतिथि अउ मंडल सेक्रो अध्यक्ष भगवती खोईवाल विशिष्ट अतिथि के रूप म सामिल होइन। ए मउका म मंडल के छप्पन रेलकर्मी अउ आने-आने विभाग ल ग्यारा रनिंग शील्ड पाछू बछर म ओमन कोति ले करे गे बढ़िया काम बर पुरस्कृत करे गीस।
अउ अब थोरकुन समाचार सार म –
– दुरूग पुलिस ह एक महिला अधिवक्ता ल डिजिटल अरेस्ट करके इकतालीस लाख रूपिया के ठगी करे के मामला म दू झिन आरोपी ल गुजरात ले गिरफ्तार करे हे। आरोपी मन करा ले नोट गिने के मसीन अउ एक ठिन गाड़ी जब्ती करे गे हे।
अउ
– एंटी करप्सन ब्यूरो एसीबी ह बलरामपुर जिला के बरतीकला म पदस्थ एक पटवारी ल दस हजार रूपिया के रिस्वत लेवत रंगेहाथ गिरफ्तार करे हे। ए पटवारी ह एक मनखे ले सीमांकन बर रिस्वत के मांग करे रिहीस।