राज्यसभा म आज वक्फ संशोधन विधेयक ल बिचार अउ पारित करे बर पेस करे गीस। ए विधेयक ल पेस करत हुए अल्पसंख्यक कार्य मंत्री किरेन रिजिजू ह किहीन हे कि ए कानून के उद्देस्य संपत्ति प्रबंधन म पारदर्सिता ल बढ़ाके, वक्फ बोर्ड अउ स्थानीय अधिकारी मनके बीच समन्वय ल सुव्यवस्थित करना अउ हितधारक मनके अधिकार के रक्षा करके शासन म सुधार करना हे।
एखर ले पहिली काली रतिहा लोकसभा ह वक्फ संशोधन विधेयक ल पारित कर देहे। ए विधेयक के पक्ष म दू सौ अट्ठासी अउ विपक्ष म दू सौ बत्तीस झिन सदस्य मन ह मतदान करीन। लोकसभा म बारह घंटा ले जादा बेरा तक विधेयक ल लेके गोठ होइस। ए विधेयक के उद्देस्य विरासत वाले जघा के सुरक्षा अउ सामाजिक कल्याण ल बढ़ावा देके संगेसंग वक्फ संपत्ति के प्रबंधन ल सुव्यवस्थित करना हे। विधेयक म मुस्लिम माईलोगिन बिसेस रूप ले विधवा अउ तलाक होय माईलोगिन मनके आर्थिक अउ सामाजिक स्थिति म सुधार के प्रावधान हे।
ए विधेयक म चर्चा के जवाब देत हुए अल्पसंख्यक कार्यमंत्री किरेण रिजिजू ह ए धारना ल गलत बतइन अउ किहीन कि गैर मुस्लिम वक्फ बोर्ड के कामकाज म हस्तक्षेप करही। श्री रिजिजू ह किहीन कि विधेयक के उद्देस्य कोनो के संपत्ति ल जब्त करना नो हरय।
ऐति, छत्तीसगढ़ के मुख्यमंत्री विष्णुदेव साय ह लोकसभा म वक्फ संशोधन विधेयक के पारित होय म खुसी जतइन हे। ओमन ह किहीन हे कि ए विधेयक ह मुस्लिम समाज के जरूरतमंद गरीब मन बर फायदेमंद होही।
इही बीच, भाजपा अनुसूचित जनजाति मोर्चा के प्रदेस अध्यक्ष विकास मरकाम ह लोकसभा म पारित वक्फ संशोधन विधेयक के तारीफ करत हुए किहीन कि ए विधेयक ह आदिवासी मनके संवैधानिक अधिकार अउ संस्कृति ल सुदृढ़ करे बर बहुत महत्वपूर्ण निर्णय हवय। ओमन ह किहीन हे कि ए विधेयक पांचवा अउ छटवां अनुसूचित क्षेत्र म आदिवासी समुदाय के भूमि अधिकार के रक्षा ल सुनिश्चित करथे। ए आदिवासी मनके परंपरा म वक्फ बोर्ड के अतिक्रमण ले सुरक्षा देके संस्कृति ल अक्षुण्ण बनाय राखही।
निगम मंडल-नियुक्ति
राज्य सरकार ह छत्तीस निगम मंडल म अध्यक्ष अउ उपाध्यक्ष के नियुक्ति कर देहे। काली देर रतिहा जारी करे गे सूची के अनुसार भूपेन्द्र सवन्नी ल छत्तीसगढ़ राज्य अक्षय ऊर्जा विकास निगम अउ लोकेश कावड़िया ल छत्तीसगढ़ निशक्तजन, वित्त अउ विकास निगम के अध्यक्ष बनाय गेहे। उहें मोना सेन ल छत्तीसगढ़ राज्य केश सिल्पी कल्याण बोर्ड के अध्यक्ष अउ गौरीशंकर श्रीवास ल उपाध्यक्ष के जिम्मेदारी दे गेहे। अइसने शालिनी राजपूत ल समाज कल्याण बोर्ड के अध्यक्ष अउ चंद्रकांति वर्मा ल उपाध्यक्ष बनाय गेहे। एखर अलावा अनुराग सिंहदेव ल छत्तीसगढ़ गृह निर्माण मंडल, नंदकुमार साहू ल रईपुर विकास प्राधिकरण, केदारनाथ गुप्ता ल राज्य सहकारी दुग्ध महासंघ, संजय श्रीवास्तव ल नागरिक आपूर्ति निगम अउ रामप्रताप सिंह ल छत्तीसगढ़ भवन के संगेसंग आने सन्निर्माण कर्मकार कल्याण मंडल के अध्यक्ष के जिम्मेदारी दे गेहे।
उहे, श्री निवास राव मद्दी ल राज्य वित्त आयोग, रामसेवक पैकरा ल छत्तीसगढ़ राज्य विकास निगम, संदीप शर्मा छत्तीसगढ़ राज्य खाद्य आयोग अउ चंदूलाल साहू ल छत्तीसगढ़ राज्य भंडार गृह निगम के अध्यक्ष नियुक्त करे गेहे। संगेसंग शशांक शर्मा ल छत्तीसगढ़ संस्कृति परिषद, प्रफुल्ल विश्वकर्मा ल छत्तीसगढ़ लौह सिल्पकार विकास बोर्ड, जितेन्द्र साहू ल राज्य तेलघानी विकास बोर्ड, अमरजीत सिंह छाबड़ा ल राज्य अल्पसंख्यक आयोग, सौरभ सिंह ल खनिज विकास निगम अउ डॉक्टर वर्णिका शर्मा ल राज्य बाल संरक्षण आयोग के अध्यक्ष बनाय गेहे।
व्यापमं-परीक्षा
छत्तीसगढ़ व्यवसायिक परीक्षा मंडल व्यापमं ह शैक्षणिक सत्र दू हजार पच्चीस बर पीईटी अउ पीपीएचटी के प्रवेस परीक्षा बर ऑनलाइन आवेदन के प्रक्रिया सुरू कर देहे। आवेदन करे के आखिरी तिथि सत्रह अप्रैल हवय। परीक्षा के संभावित तिथि आठ मई बताय गेहे।
अइसने, पीएटी अउ पीवीपीटी के प्रवेस परीक्षा बर घलो ऑनलाइन आवेदन के प्रक्रिया सुरू हो गेहे। आवेदन के अंतिम तिथि इक्कीस अप्रैल अउ परीक्षा के संभावित तिथि पंद्रह मई तय करे गेहे।
बस्तर पंडुम
दंतेवाड़ा के हाई स्कूल मैदान म आज ले संभाग स्तरीय बस्तर पंडुम सुरू हो गेहे। उपमुख्यमंत्री अउ गृहमंत्री विजय शर्मा ह एखर सुभारंभ करीन।ए मउका म गृहमंत्री ह किहीन कि बस्तर के गौरवसाली संस्कृति ल सहेजे अउ संवारे समेत दुनिया भर म पहुंचाय खातिर सरकार ह बस्तर पंडुम कारीकरम के आयोजन करत हे, जेखर ले बस्तर के संस्कृति अउ परंपरा ल दुनियाभर के लोगन मन ल जाने अउ समझे के मउका मिलही।
उहें, वनमंत्री केदार कश्यप ह किहीन कि बस्तर क्षेत्र के स्थानीय व्यंजन, वेसभूषा, आभूषण जउन गायब होवत जात हे, अइसे समृध्द संस्कृति ल बचाय के पहल बस्तर पंडुम के माध्यम ले करे जात हे।
ए कारीकरम ल विधायक अउ प्रदेस भाजपा अध्यक्ष किरण सिंह देव ह संबोधित करत हुए किहीन कि ए आयोजन बस्तर के धरोहर ल संजोय अउ ओला दुनिया भर के लोगन मन तक पहुंचाय के एक अच्छा माध्यम हरय।
ए बस्तर पंडुम समारोह म बस्तर संभाग के सबो जिला के सांस्कृतिक प्रदर्सनी अउ कतकोन प्रतियोगिता के आयोजन करे जाही। उहें, अब ले कुछेक देर बाद मशहूर हिन्दी कवि कुमार विश्वास ह अपन प्रस्तुति दीहीं।
बस्तर पंडुम के समापन समारोह म पांच अप्रैल के केंद्रीय गृहमंत्री अमित शाह सामिल होही।
जीएसटी संग्रह
मुख्यमंत्री विष्णुदेव साय ह ए उपलब्धि उपर खुसी जतात हुए किहीन हे कि ए ह केवल आंकड़ा के उपलब्धि नो हरय, बल्कि इमानदारी पारदर्सिता अउ जनभागीदारी उपर आधारित सुशासन के पहिचान हे। ओमन ह किहीन कि राज्य सरकार ह टैक्स प्रशासन ल जन केंद्रित अउ टेक्नालॉजी संचालित बनाके ए सिध्द करे हे कि अगर ईच्छा सक्ति होही, त राजस्व घलो बाढ़थे।
रेरा-बैंक सूचीबध्द
छत्तीसगढ़ रियल एस्टेट विनियामक प्राधिकरण-सी.जी. रेरा, देस के पहिली राज्य बन गेहे, जउन ह आवंटि मन कोति ले जमा करे गे धनरासि के सुरक्षा अउ उचित उपयोग ल सुनिश्चित करे बर सत्रह ठिन बैंक ल सूचीबध्द करे हे।
रेरा के अध्यक्ष संजय शुक्ला ह आज रईपुर म होय ‘‘बैंकिंग ऑन ट्रस्ट एनश्योरिंग प्रॉपर यूटिलाइजेशन ऑफ रेरा आरडीए फंड्स‘‘ कारीकरम म बैंक के बीच सुचीबध्द दस्तावेज बांटे गीस। ओमन ह किहीन कि एखर उद्देस्य आवंटि मनके पइसा के सुरक्षा अउ ओखर सही उपयोग ल सुरक्षित बनाना हे।
प्रदेस म काली एक-दू ठिन जघा म गरज-चमक के संग हवा गरेर करे अउ गाज गिरे के संभावना हे। मौसम विभाग ले मिले जानकारी के अनुसार प्रदेस म क्षोभमंडल के निम्न स्तर म बंगाल के खाड़ी ले सरलग नमी आवत हे, जेखर सेति प्रदेस के दक्षिणी भाग म हल्का बादर करे अउ पानी गिरे के संभावना हे। मुख्य रूप ले बस्तर संभाग म एखर जादा असर देखे बर मिल सकत हे।
अउ अब थोरकुन समाचार सार म –
– मुख्यमंत्री विष्णुदेव साय ह आज रईपुर म आयोजित योग आयोग के नवनिर्वाचित अध्यक्ष रूपनारायण सिन्हा के सपथ ग्रहण समारोह म सामिल होइन।
अउ
– कबीरधाम जिला पुलिस ह एक ठिन कार ले तीन करोड़ रूपिया के सोन के गहना अउ करीब साढ़े आठ लाख रूपिया नगदी जब्त करे हे। ए मामला म दू झिन लोगन मन ल गिरफ्तार करे गेहे।