माओवादी मन ह एक कथित पत्र ले संघर्ष विराम अउ सांतिवार्ता के प्रस्ताव राखे हे। सूत्र के अनुसार सीपीआई केन्द्रीय समिति ह ए पत्र तेलंगाना ले जारी करे हे अउ ए ह तेलुगु म हवय। एमा केन्द्र सरकार ले ऑपरेसन ‘कगार‘ ल रोके के आग्रह करीन हे।
ए पत्र के जवाब म छत्तीसगढ़ के उपमुख्यमंत्री अउ गृहमंत्री विजय शर्मा ह स्पष्ट करे हे कि राज्य सरकार कोनों भी किसम के सार्थक गोठबात खातिर तियार हे, फेर एखर बर कोनों किसम के सरत झन होवय। ओमन आज रईपुर म पत्रकार मन ले गोठबात करत कहिन कि कहूं नक्सली सिरतोन म मुख्यधारा म जुड़ना चाहत हे अउ गोठबात बर तियार हवय, त ओमन ल अपन प्रतिनिधि अउ गोठबात के सरत ल सार्वजनिक रूप ले बताय बर पड़ही। ओमन किहीन कि कहूं नक्सली संविधान ल मना करत हे अउ समान्तर व्यवस्था थोपे के परयास करथे, त गोठबात के कोनों किसम के औचित्य नइ रइही। श्री शर्मा ह किहीन कि सरकार के रूख साफ हवय अउ गोठबात बर दरवाजा खुल्ला हवय। फेर हिंसा अउ खून-खूराबा म कोनों किसम के समझौता नइ होही।
उपमुख्यमंत्री विजय शर्मा-भेंटवार्ता
आत्मसमर्पण करइया नक्सली अउ नक्सल हिंसा ले पीड़ित मनखे मन बर छत्तीसगढ़ सरकार के नवा पुनर्वास नीति के आने-आने पहलु म उपमुख्यमंत्री विजय शर्मा ले विशेष भेंटवार्ता के प्रसारण आकाशवाणी रायपुर कोति ले तीन अप्रैल बिरस्पत के बिहनिया नौ बजे ले करे जाही। राज्य स्तरीय ए प्रसारण ल छत्तीसगढ़ स्थित आकाशवाणी के सबो केन्द्र एके संघरा रिले करही। ए कार्यक्रम मीडियम वेव अउ एफ.एफ. दूनों चैनल म प्रसारित होही।
माओवाद प्रभावित क्षेत्र-निर्माण समिति
राज्य सरकार ह माओवाद प्रभावित सुकमा, बीजापुर अउ नारायणपुर जिला म निर्माण काम के पारदर्शिता अउ जवाबदेही तय करे बर जिला निर्माण समिति बनाय के मंजूरी देहे। ए समिति निर्माण काम ल बने ढंग ले चलाय, निगरानी राखे अउ जांच करही। एखर अध्यक्ष जिला कलेक्टर होही। उहें, जिला के पुलिस अधीक्षक, जिला पंचायत के सीईओ, डीएफओ, लोक निर्माण विभाग के कार्यपालन यंत्री, जिला कोषालय अउ एखर ले जुड़े काम के जिला प्रमुख अधिकारी समिति के सदस्य होही। मुख्यमंत्री विष्णुदेव साय ह कहिन कि भ्रष्टाचार ल कोनों भी स्तर म बर्दाश्त नइ करे जाय। माओवाद प्रभावित क्षेत्र म जनता के पइसा ले चलइया काम म गुणवत्ता अउ साफगोई तय करना सबले पहिली प्राथमिकता होही।
वक्फ-संशोधन विधेयक
संयुक्त संसदीय समिति कोति ले वक्फ संसोधन विधेयक आज लोकसभा म पेस करे गीस। केन्द्रीय अल्पसंख्यक मामला के मंत्री किरेन रिजिजू ह विधेयक पेस करत किहीन कि ए विधेयक सिरिफ वक्फ बोर्ड ले जुड़े संपत्ति ले जुड़े हवय।
ओमन किहीन कि ए कानून मस्जिद के प्रबंधन बर नो हे। ओमन बतईन कि मौजूदा विधेयक के मुताबिक वक्फ बोर्ड म आने-आने मुसलिम संप्रदाय महिला अउ गैर मुसलिम अउ आने लोगन के प्रतिनिधित्व होही।
एखर पहिली, केन्द्रीय गृहमंत्री अमित शाह ह किहीन कि ए विधेयक संयुक्त संसदीय समिति कोति ले विस्तार ले गोठबात करे के बाद लाय गेहे अउ एला मंत्रिमंडल ह मंजूरी दे देहे।
वक्फ संशोधन विधेयक-प्रतिक्रिया
प्रदेस के उपमुख्यमंत्री विजय शर्मा ह वक्फ संसोधन बिल म अपन प्रतिक्रिया देवत किहीन कि ए बिल ले वक्ल संपत्ति ल कानून के दायरा म लाय गेहे, जउन पहिली कोनों भी किसम के न्यायिक समीक्षा ले अलग रिहीस। श्री शर्मा ह किहीन कि एखर ले देस के न्यायिक प्रणाली ल मजबूती मिलही। ओमन किहीन कि वक्फ बोर्ड कोति ले दे गे रिपोर्ट म कतकोन गड़बड़ी के पुष्टि होय हे, जेखर समाधान जरूरी रिहीस। वक्फ संपत्ति म होय अनाधिकृत कब्जा ल हटाय अउ ओ संपत्ति के सही उपयोग तय करे बर सरकार ह कठोर प्रावधान करे हे। उपमुख्यमंत्री ह किहीन कि छत्तीसगढ़ समेत देसभर म वक्फ संपत्ति म होय अनाधिकृत कब्जा के उच्च स्तरीय जांच कराय जाही अउ जरूरी कानूनी कदम उठाय जाही।
टोल शुल्क-दर
देशभर म टोल शुल्क दर चार ले पांच प्रतिशत तक बढ़ गेहे। भारतीय राष्ट्रीय राजमार्ग प्राधिकरण के मुताबिक एखर ले राजमार्ग के रखरखाव अउ ओखर बढ़वार म मदद मिलही। कार बर मासिक पास के दर नौ सौ तीस रूपिया ले बढ़ाके नौ सौ पचास रूपिया कर दे गेहे। संसोधित दर देसभर म एक्सप्रेस-वे अउ राष्ट्रीय राजमार्ग म लागू होही।
एकलव्य मॉडल स्कूल
केन्द्र सरकार ह देसभर म सात सौ अट्ठाईस एकलव्य मॉडल आवासीय विद्यालय खोले के लक्ष्य राखे हे, जेखर ले अनुसूचित जनजाति के करीबन साढ़े तीन लाख विद्यार्थी मन ल फायदा होही। अभी तक देसभर म कुल सात सौ इक्कीस विद्यालय मंजूर करे गेहे। एमा ले चार सौ ससत्तर विद्यालय चलत हे। जनजातीय मामला के राज्यमंत्री दुर्गादास उइके ह राज्यसभा म किहीन कि जनजातीय लइका मन ल ओखर अपन माहौल म पढ़ाय बर बछर दू हजार अट्ठारह-उन्नीस म केन्द्रीय क्षेत्र के योजना के रूप म एकलव्य मॉडल आवासीय विद्यालय सुरू करे गे रिहीस। ओमन किहीन कि ए योजना ले सरकार ह पचास प्रतिशत ले जादा अनुसूचित जनजाति आबादी वाले कम से कम बीस हजार जनजातीय वाले हर ब्लॉक म एक एकलव्य मॉडल आवासीय विद्यालय खोले के फइसला ले गेहे।
जवान-घायल
बीजापुर जिला म आज माओवादी मन डहार ले लगाय गे स्पाइक होल के चपेट म आय ले सुरक्षा बल के दू जवान घायल होगे हे। एमा ले स्पेशल टॉस्क फोर्स के एक आरक्षक संत कुमार कोमरे हवय अउ दूसर जवान बस्तर फाइटर्स के आर. महेश गटपल्ली हवय। घायल जवान मन ल प्राथमिक उपचार के बाद रईपुर भेजे गेहे। घटना के बाद क्षेत्र म सघन तलाशी अभियान चलाय जावत हे।
कवासी लखमा-रिमांड
सराब घोटाला मामला म प्रवर्तन निदेसालय-ईडी के कार्रवाई के दउरान गिरफ्तार पूर्व मंत्री कवासी लखमा ल आज आर्थिक अपराध अन्वेषण ब्यूरो-ईओडब्ल्यू ह घलो गिरफ्तार करीन अउ ओमन ल प्रोडक्शन वारंट म रईपुर के विशेष अदालत में पेस करीन। ईओडब्ल्यू ह उंखर दस दिन के रिमांड मांगे रिहीस। फेर, कोर्ट ह पांच दिन के रिमांड के मंजूरी देहे। अब ईओडब्ल्यू सात अप्रैल तक कवासी लखमा ले पूछताछ करही।
देवेन्द्र यादव-आरोप तय
बलौदाबाजार आगजनी हिंसा मामला म भिलाई विधायक देवेन्द्र यादव समेत छह झिन आने लोगन उपर आरोप तय होगे। प्रथम अपर सत्र न्यायाधीश राकेश कुमार वर्मा के न्यायालय म आज छह झिन आरोपी मन उपर सबो धारा म आरोप तय कर दे गेहे।
खबर के मुताबिक पाछु बछर दस जून के बलौदाबाजार आगजनी हिंसा मामला म पुलिस ह विधायक देवेन्द्र यादव ल गिरफ्तार करके जेल भेज दे गे रिहीस। छह महीना रईपुर जेल म रेहे के बाद विधायक देवेन्द्र यादव सुप्रीम कोर्ट ले जमानत मिले म जेल ले रिहा होय रिहीस।
चिकित्सा महाविद्यालय-राशि
दंतेवाड़ा जिला के गीदम म नवा सासकीय चिकित्सा महाविद्यालय भवन बनाय के काम बर करीबन तीन सौ करोड़ रूपिया के रकम मंजूर करे गेहे। ए फइसला जिला खनिज संस्थान न्यास-डीएमएफ सासी परिषद के बठइका म ले गीस। ए परियोजना ल चलाय बर छत्तीसगढ़ मेडिकल सर्विंस कॉर्पोरेशन-सीजीएमएससी ल कार्य एजेंसी बनाय गेहे। राज्य सासन अउ पीडब्ल्यूडी मेनूअल के प्रावधान म निविदा के काम, कार्यादेस अउ तय समय-सीमा के पालन सीजीएमएससी तय करही।
अउ अब जानन मौसम के हाल..
मौसम विभाग ह अवइया दू दिन म मध्य अउ दक्षिण छत्तीसगढ़ म कुछेक जघा म छिटपुट बरसा होय या फेर गरज-चमक संग छींटा-बौछार होय के संभावना जताय हे। उहें, एक-दू जघा म करा गिरे, गाज गिरे अउ अंधड़ चले के चेतावनी दे गेहे। मौसम विभाग के मुताबिक पांच अप्रैल के बस्तर संभाग अउ ओखर तीर-तखार म बरसा हो सकत हे।