केन्द्रीय गृह मंत्री अमित शाह ह किहीन हे कि माओवाद के खिलाफ सरलग कार्रवाई के सेति देस म वामपंथी उग्रवाद ले सबले जादा प्रभावित जिला मनके संख्या बारह ले घटके छै हो गेहे। एमा छत्तीसगढ़ के चार जिला- बीजापुर, कांकेर, नारायणपुर अउ सुकमा के संग झारखंड अउ महाराष्ट्र के एक-एक जिला सामिल हे। सोसल मीडिया के एक पोस्ट म गृहमंत्री ह किहीन कि सरकार नक्सल मुक्त भारत बनाय के दिसा म एक बड़का कदम उठावत हे। श्री शाह ह किहीन कि माओवाद विरोधी नीति के सेति आंशिक माओवाद प्रभावित जिला मनके संख्या घलो सत्रह ले घटके छै हो गेहे। एमा छत्तीसगढ़ के दंतेवाड़ा, गरियाबंद अउ मोहला-मानपुर-अंबागढ़ चौकी जिला सामिल हे। श्री शाह किहीन कि सरकार इकतीस मार्च दू हजार छब्बीस तक नक्सलवाद ल पूरा तरह ले खतम करे बर प्रतिबध्द हवय।
उपमुख्यमंत्री-नक्सल पुनर्वास नीति
माओवाद प्रभावित क्षेत्र मन म स्थायी सांति स्थापित करे अउ आत्मसमर्पित माओवादी मन ल समाज के मुख्यधारा म वापिस लाने बर राज्य सरकार ह छत्तीसगढ़ नक्सलवाद आत्मसमर्पण-पीड़ित राहत पुनर्वास नीति-दू हजार पच्चीस लागू करे हे। उपमुख्यमंत्री अउ गृह मंत्री विजय शर्मा ह बतइन हे कि सरकार के नवा नक्सल पुनर्वास नीति के तहत आत्मसमर्पण करइया माओवाद मन ल सम्मानजनक अउ सुरक्षित जीवन कोति बढ़ाय के मउका घलो दे जावत हे।
उपमुख्यमंत्री ह किहीन हे कि सरकार के ए नीति के मुख्य उद्देस्य नक्सल प्रभावित क्षेत्र मन म डर अउ असुरक्षा के माहौल ल खतम करके उंहा के नागरिक मन ल विकास के मुख्यधारा ले जोड़ना हे। आत्मसमर्पण करइया नक्सली मन ल सरकार डहार ले आर्थिक मदद, आवास, शिक्षा अउ रोजगार के साधन देवाय जाही। जेखर, ले ओमन एक नवा सुरूआत कर सकय। उंखर पुनर्वास बर राज्य सरकार ह बिसेस प्रसिक्षण केंद्र मनके स्थापना करीन हे, जिहां ओमन ल तकनीकी अउ व्यावसायिक शिक्षा दे जावत हे। उपमुख्यमंत्री ह बतइन कि छत्तीसगढ़ सरकार के ए नीति प्रदेस ल माओवाद मुक्त, सांतिपूर्ण अउ समृध्द बनाय म एक मील के पत्थर साबित होही।
पेट्रोल-कीमत
छत्तीसगढ़ म पेट्रोल आज ले एक रूपिया सस्ता हो गेहे। राज्य सरकार ह नवा वित्तीय बछर के बजट म पेट्रोल प्रति लीटर एक रूपिया सस्ता करे के घोसना करे रिहीस, जउन इकतीस मार्च रतिहा ले लागू हो गेहे। रायपुर म अब पेट्रोल के कीमत घटके सौ रूपिया बयालीस पइसा प्रति लीटर हो गेहे। एखर पहिली राज्य सरकार ह बल्क म डीजल खरीदी म वैट घटाय रिहीस हे।
श्रमिक-वेतन
प्रदेस म न्यूनतम वेतन अधिनियम के तहत श्रमिक मन बर न्यूनतम वेतन अउ परिवर्तनसील महंगाई भत्ता के दर जारी कर द गेहे। श्रमायुक्त छत्तीसगढ़ शासन अलरमेल मंगई डी. डहार ले आने-आने अनुसूचित नियोजन मन म काम करत श्रमिक मन बर आज एक अप्रैल ले परिवर्तनसील महंगाई भत्ता निर्धारित करे गेहे।
कृषि नियोजन म काम करत श्रमिक मन बर पांच रूपिया प्रति बिन्दु के मान ले प्रतिमाह दू सौ पंद्रह रूपिया परिवर्तनसील महंगाई भत्ता म बढ़ोत्तरी करे गेहे। उहें, पैंतालीस अनुसूचित नियोजन मन म काम करत श्रमिक मन के परिवर्तनसील महंगाई भत्ता म प्रतिमाह दू सौ अट्ठाईस रूपिया के बढ़ोत्तरी करे गेहे।
राज्यपाल-बैठक
राज्यपाल ह हरियाली ल बनाय राखे अउ पर्यावरण संरक्षण बर जिला म जादा ले जादा पेड़-पउधा लगाय के जरूरत उपर बल दीन।
मुख्यमंत्री-उत्कल दिवस
उत्कल दिवस के मउका म मुख्यमंत्री विष्णुदेव साय ह आज राजधानी रायपुर के महिला थाना चौक म महान स्वतंत्रता संग्राम सेनानी बैरिस्टर मधुसूदन दास के मूर्ति म फूल माला चढ़ाके ओमन ल नमन करीन।
ए मउका म मुख्यमंत्री श्री साय ह किहीन हे कि उत्कल दिवस सिरिफ ओडिसा के गठन के उत्सव नहीं, भलूक संघर्ष, आत्मगौरव अउ सांस्कृतिक एकता के प्रेरणा हे। मुख्यमंत्री ह किहीन हे कि छत्तीसगढ़ म बड़का संख्या म उत्कल समाज के लोगन निवास करत हे, जउन प्रदेस के सामाजिक समरसता अउ विविधता ल सशक्त बनात हे।
विकसित भारत यूथ पार्लियामेंट
छत्तीसगढ़ विधानसभा म आज राज्य स्तरीय ‘‘विकसित भारत यूथ पार्लियामेंट‘‘ कारीकरम संपन्न होइस। युवा कार्य अउ खेल मंत्रालय, भारत सरकार डहार ले संचालित ए राष्ट्रव्यापी पहल के उद्देस्य युवा मन ल लोकतांत्रिक प्रक्रिया म सहभागिता के मंच उपलब्ध कराय अउ राष्ट्रीय नीति-निर्माण म उंखर सक्रिय भूमिका सुनिश्चित करना हे। नेहरू युवा केंद्र संगठन डहार ले, ए कारीकरम के आयोजन करे गीस। ए कारीकरम के उद्घाटन खेल अउ युवा कल्याण मंत्री टंकराम वर्मा ह करीन। ओमन युवा मन ल संबोधित करत किहीन हे कि ‘‘हमारा प्रदेश युवा ऊर्जा से भरा हुआ है। अइसन मंच मन ले युवा न सिरिफ अपन बिचार ल व्यक्त कर सकत हे, बल्कि राष्ट्र निर्माण म सक्रिय भूमिका निभाय बर प्रेरित घलो होवत हे।‘‘
ए राज्य स्तरीय कारीकरम म छत्तीसगढ़ के एक सौ चालीस प्रतिभागी मन ल भाग लीन, जेन मन ल तीन मिनट के भाषण के माध्यम ले अपन बिचार राखे के मउका मिलिस। निर्णायक मंडल ह सर्वसम्मति ले तीन प्रतिभागी मनके चुनई राष्ट्रीय स्तर बर करीन हे। एमा दुरूग के दीपांशु नेताम अउ अंकुर पांडेय अउ सूरजपुर के आइफा खातून सामिल हे। ए तीन प्रतिभागी मन एक ले तीन अप्रैल तक नई दिल्ली के संसद भवन म होवइया ‘‘राष्ट्रीय यूथ पार्लियामेंट‘‘ म छत्तीसगढ़ के प्रतिनिधित्व करहीं।
मुख्य अतिथि वित्तमंत्री ओ.पी. चौधरी ह ए कारीकरम के समापन करीन।
छात्रावास-महिला होमगार्ड
आदिम जाति अउ अनुसूचित जाति विभाग के आयुक्त पी.एस. एल्मा ह कोंडागांव जिला म संचालित आश्रम-छात्रावास, संस्था अउ एकलव्य आदर्स आवासीय विद्यालय मनके स्थिति के समीक्षा करीन। बइठका म आयुक्त श्री एल्मा ह कन्या छात्रावास म महिला होमगार्ड के तैनाती सुनिश्चित करे अउ पुरूष कर्मचारी मन के नियुक्ति उपर रोक लगाय के निरदेस दीन। जिहां महिला नगर सैनिक उपलब्ध नइ हे, उहां, रतिहा सुरक्षा बर महिला चौकीदार के व्यवस्था करे ल किहीन। ओमन जम्मों संस्थान मन म बरसात ले पहिली जरूरी मरम्मत काम पूरा करे अउ शौचालय के व्यवस्था सुनिश्चित करे के निरदेस दीन।
बस्तर-पण्डुम
बस्तर क्षेत्र के कला, संस्कृति अउ परंपरा मनके उत्सव ‘बस्तर पंडुम‘ के तहत संभाग स्तरीय प्रतियोगिता काली दू ले पांच अप्रैल तक दंतेवाड़ा जिला म आयोजित करे जाही। उहें, बस्तर पंडुम के तहत तीन अप्रैल के कवि डॉक्टर कुमार विश्वास ‘‘बस्तर के राम‘‘ कथा के वाचन करही।
मुख्यमंत्री विष्णुदेव साय ह ‘‘बस्तर पंडुम‘‘ ल बस्तर के आत्मा ले जुड़े एक सांस्कृतिक पुनर्जागरण बतइन। ओमन उम्मीद जतइन हे कि ए उत्सव बस्तर ल वैश्विक सांस्कृतिक मानचित्र उपर एक नवा पहिचान देवाही अउ इंहा के जनजातीय परंपरा प्रेरणा के स्त्रोत बनही।
उहें, उपमुख्यमंत्री विजय शर्मा ह किहीन हे कि ‘‘बस्तर पंडुम‘‘ अउ ‘‘बस्तर के राम‘‘ जइसन आयोजन बस्तर क्षेत्र बर एक सांस्कृतिक सेतु जइसन हे।
आरक्षक-निलंबित
दुरूग पुलिस ह गांजा तस्कर मन ले सांठगांठ करइया जुन्ना भिलाई थाना के दू झिन पुलिसकर्मी अउ दू झन गांजा तस्कर मन ल गिरफ्तार कर लेहे।
आरोपी मन के तीर ले एक लाख रूपिया ले जादा के करीबन उन्नीस किलोग्राम गांजा अउ चार ठिन मोबाइल फोन बरामद करे गेहे। गिरफ्तार करे गे आरोपी मन म आरक्षक विजय धुरंधर अउ डायल एक सौ बारह के चालक अनिल कुमार टंडन, धीरेन्द्र शर्मा अउ युवराज मेहता सामिल हे। आरोपी मन ल न्यायिक रिमांड म भेज दे गेहे।
एखर पहिली, दुरूग पुलिस अधीक्षक जितेन्द्र शुक्ला ह गांजा तस्कार मन ले सांठगांठ के आरोप म आरक्षक विजय धुरंधर ल निलंबित करे रिहीस। एमा एनडीपीएस प्रकरण म आरोपी मन ल मदद पहुंचाय के आरोप हे।