आज दिनभर के खबर ल अपन गुरतुर छत्तीसगढ़ी भाखा म पढ़व

दंतेवाड़ा जिला म सुरक्षाबल मन संग होय मुठभेड़ म आज पैंतालिस लाख रूपिया के एक झिन इनामी माईलोगिन माओवादी मारे गीस हे। एखर उपर छत्तीसगढ़ शासन डहार ले पच्चीस लाख अउ तेलांगाना सरकार डहार ले बीस लाख रूपिया के इनाम घोसित रिहीस। डीआरजी अउ बस्तर फाइटर्स के टीम ह घटना जघा ले इंसास रायफल, गोलाबारूद अउ आने हथियार बरामद करे हे।

बस्तर रेंज के पुलिस महानिरीक्षक सुंदरराज पी. ह बतइन कि मारे गे माईलोगिन माओवादी के चिन्हारी रेणुका उर्फ बानू के रूप म होय हे, जउन ह दण्डकारण्य स्पेसल जोनल कमेटी के मेंबर रिहीस। दंतेवाड़ा रेंज के उप पुलिस महानिरीक्षक कमलोचन कश्यप ह बतइन कि गीदम अउ बीजापुर थाना क्षेत्र के सीमा ले लगे गांव नेलगोड़ा, इकेली अउ बेलनार क्षेत्र म ए मुठभेड़ होय हे। फेर सुरक्षाबल मन डहार ले जवाबी कार्रवाई बाद माओवादी मन उंहा ले भाग गीन।

रईपुर ले नवा रईपुर राजधानी क्षेत्र ह रेल नेटवर्क ले जुड़े गे हवय। अब इंहा आय-जाय बर मेमू ट्रेन रोजिना चलही। ए ट्रेन ह रईपुर रेलवे टेसन ले मंदिर हसौद, नवा रईपुर सीबीडी अउ केन्द्री होवत अभनपुर पहुंचही। यात्री मन रईपुर ले नवा रईपुर अउ अभनपुर के यात्रा कर सकहीं, उहू घलो मात्र दस रूपिया म। ए ट्रेन के चालू होय ले मंदिर हसौद, मंत्रालय, सचिवालय, नवा रईपुर अउ अभनपुर अवई-जवई सस्ता अउ आसान हो जही।

प्रधानमंत्री नरेंद्र मोदी ह काली बिलासपुर म राखेगे कारीकरम बेरा वीडियो कॉन्फ्रेंसिंग के माध्यम ले अभनपुर-रईपुर मेमू ट्रेन सेवा के सुभारंभ करीन। ए मउका म प्रधानमंत्री श्री मोदी ह छत्तीसगढ़ म दू हजार छै सौ पंचानवे करोड़ रूपिया के लागत ले पूरा होय चार ठिन रेल परियोजना ल राष्ट्र ल समर्पित करे के संगे ओमन सात ठिन रेल परियोजना के आधारसिला घलो रखिन।

छत्तीसगढ़ म पड़त जोरदरहा गर्मी ल देखत राज्य सरकार ह दू अप्रैल ले तीस अप्रैल तक सबो सरकारी, निजी स्कूल अउ शैक्षणिक संस्थान मनके बेरा म बदली करे हे। लोक शिक्षण संचालनालय डीपीआई डहार ले जारी आदेस मुताबिक एक पाली म चलइया सबो स्कूल बिहनिया सात बजे ले ग्यारा बजे तक लगही। उहें, अइसन स्कूल जिहां दू पाली म पढ़ई होथे, उहां प्रायमरी अउ मीडिल स्कूल बिहनिया सात बजे ले ग्यारा बजे तक लगही। उहें, हाई स्कूल अउ हायर सेकेंडरी स्कूल मन म पढ़ई बिहनिया ग्यारा बजे ले मंझनिया तीन बजे तक होही। उहें, स्कूल म ऑफिस के बेरा ह जस के तस रइही।

जशपुर म प्रकृति पूजा के महापरब सरहुल धूमधाम ले मनाय गीस। ए मउका म सहर के डिपू बगीचा म सकलाय श्रध्दालू मन भगवान महादेव अउ माता पार्वती के पूजा-पाठ करीन। ए मउका म एक ठिन सोभा यात्रा निकाले गीस, जेमा अब्बड झिन गंवई के मनखे मन पारंपरिक पोषाक म सामिल होइन। ए दउरान एक ठिन धार्मिक सभा घलो होइस, जेमा केंद्रीय जनजाति कार्यमंत्री जुएल उरांव, पूर्व राज्यसभा सांसद रणविजय सिंह जूदेव अउ जशपुर विधायक रायमुनि भगत ह घलो संबोधित करीन।

ईद-उल-फितर आज छत्तीसगढ़ समेत देसभर म आस्था अउ उछाह के संग मनाय जात हे। आज लोगन मन ईदगाह अउ मस्जिद मन म नमाज अदा करे बाद एक-दूसर ल ईद के मुबारकबाद दीन। एखर संगे घर म घलो नमाज अदा करके मुस्लिम समुदाय के लोगन मन ह सेवइयां अउ शीर-खुरमा खाके ईद के खुसियारी बांटिन।

ए मउका म जगदलपुर म ईदगाह जमात खाना म मुस्लिम समुदाय के लोगन मन बिसेस नमाज अदा करीन अउ एक-दूसर ल ईद के बधई दीन। ए दउरान बस्तर संभाग ल नक्सल मुक्त करे समेत छत्तीसगढ़ अउ देस म अमन चैन अउ उन्नति के दुआ मांगे गीस।

राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी, छत्तीसगढ़ के राज्यपाल रमेन डेका, मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह ह ईद-उल-फितर के मउका म लोगन मन ल बधाई अउ सुभकामना दीन हे।

भगवान झूलेलाल के जयंती अउ चेट्रीचण्ड्र के मउका म रईपुर म काली एक ठिन भव्य सोभा यात्रा निकाले गीस। ए सोभा यात्रा नगर म घूमे के बाद जयस्तंभ चौक पहुंचिस। जिहां मुख्यमंत्री विष्णुदेव साय ह सोभा यात्रा के सुवागत करीन अउ जम्मों सिंधी समुदाय ल ए परब के सुभकामना दीन। ए मउका म ओमन किहीन कि भगवान झूलेलाल ह न सिरिफ सिंधी समाज के आराध्य हरय, भलूक सामाजिक एकता साहस अउ सेवा भाव के चिन्हारी हे।

ए मउका म मुंगेली म घलो सिंधी समाज डहार ले एक ठिन सोभा यात्रा निकाले गीस।

बिलासपुर जिला के मल्हार गांव म शोभायात्रा बेरा कथित रूप ले डीजे के तेज आवाज ले एक ठिन मकान के छज्जा ह गिर गीस। ए हादसा म दस झिन मनखे घायल होगे, जेमन ल मस्तुरी अस्पताल ले जाय गीस। घायम मन म दू झिन नान्हे लइका के हालत गंभीर होय के सेति लइका मन ल प्राइवेट अस्पताल म भर्ती कराय गे रिहीस, जिहां इलाज बेरा एक झिन लइका के मउत होगे।

एडीसनल एसपी उदयन बेहार ह बतइन कि डीजे बाक्स के टकराय ले मकान के छज्जा ह गिरे हवय। ए मामला म डीजे संचालक, ड्राइवर अउ आयोजनकर्ता के खिलाफ गैर इरादतन हत्या के मामला दरज करे गेहे। आरोपी मन ल गिरफ्तार करे बाद न्यायिक रिमांड म भेज दे गेहे।

लोकसंस्कृति के जीवंत झलक प्रस्तुत करइया पैंतीसवां बिलासा महोत्सव काली बिलासपुर म संपन्न होइस। बिलासा कला मंच डहार ले राखे गे ए दू दिन वाले महोत्सव म कई ठिन लोक कला मंडली डहार ले नाच-गान अउ संगीत प्रस्तुत करे गीस। कारीकरम म बिलासा साहित्य सम्मान ले रईपुर के गुलाल वर्मा ल, बिलासा कला सम्मान ले तखतपुर के भोजराज पटेल अउ रईपुर के प्रभा कटारे ल अउ बिलासा सेवा सम्मान ले शांता फाउंडेसन के नीरज गेमनानी ल सम्मानित करे गीस।

केंद्र सरकार के एकीकृत पेंसन योजना यूपीएस काली ले लागू हो जही। केंद्र सरकार ह यूपीएस ल राष्ट्रीय पेंशन प्रणाली के विकल्प के रूप म प्रस्तुत करे हे। पेंसन फंड नियामक अउ विकास प्राधिकरण हाले म यूपीएस के संचालन बर नियम अधिसूचित करे गीस। ए नियम ह केंद्र सरकार के कर्मचारी मनके तीन ठिन समूह ले संबंधित हे। पहलइया समूह म एक अप्रैल दू हजार पच्चीस तक सेवा म एनपीएस के अंतर्गत काम करइया केंद्र सरकार के कर्मचारी सामिल हे। दूसरइया श्रेणी म एक अप्रैल दू हजार पच्चीस या ओखर बाद केंद्र सरकार म नवा भर्ती होय लोगन सामिल हे। तीसरइया श्रेणी म एनपीएस के हिस्सा रेहे केंद्र सरकार के कर्मचारी इकतीस मार्च या ओखर ले पहिली रिटायर होय हे।

प्रदेस म अवइया अड़तालीस घंटा के बाद मौसम बदलही तइसे लागत हे। मौसम वैज्ञानिक मनके मुताबिक दू अप्रैल के बाद प्रदेस म कोनो-कोनो जघा बरसा अउ तेज हवा चल सकत हे।

– राज्यपाल रमेन डेका ह डॉक्टर संजय तिवारी ल दुरूग स्थित हेमचंद यादव विश्व विद्यालय के कुलपति नियुक्त करे हे। वर्तमान म डॉक्टर तिवारी ह भोज ओपन विश्वविद्यालय के कुलपति हे।

– राज्यपाल रमेन डेका दू अप्रैल के मोहला-मानपुर जिला के दउरा म रइही। ए दउरान राज्यपाल ह प्रशासनिक अधिकारी मनके बइठका लिही अउ जिला म चलत सरकारी योजना मनके प्रगति बारे म समीक्षा करही।

– कोरबा जिला के कटघोरा, अंबिकापुर, बिलासपुर, नेशनल हाईवे म कार के टक्कर ले फटफटी सवार एक झिन मनखे के मउत होगे।