प्रधानमंत्री-छत्तीसगढ़-01
प्रधानमंत्री नरेन्द्र मोदी आज छत्तीसगढ़ के बिलासपुर जिला के मोहभट्टा म बिजली, सड़क, रेल, तेल, गैस, सिक्षा अउ आवास ले जुड़े 33 हजार 700 करोड़ रूपिया ले ज्यादा के विकास परियोजना के उद्घाटन, सिलान्यास अउ लोकार्पण करीन।
ए मउका म जनसभा ल संबोधित करत हुए प्रधानमंत्री ह कहिन कि छत्तीसगढ़ के नक्सल प्रभावित इलाका म स्थाई शांति के नवा दउर दिखत हे। राज्य के दूरिहा-दूरिहा आदिवासी इलाका म पक्का सड़क, बिजली अउ मोबाइल नेटवर्क के संगेसंग स्वास्थ्य अउ आने-आने सुविधा पहुंचाय जावत हे। एसो नक्सल प्रभावित इलाका म कतकोन स्कूल फेर सुरू करे गेहे। श्री मोदी ह किहीन कि छत्तीसगढ़ के तस्वीर अउ तकदीर बदलत हे। आदिवासी इलाका के विकास बर ‘‘धरती आबा‘‘ जनजातीय उत्कर्ष अभियान सुरू करे गेहे। एखर अलावा बहुतेच पिछड़ा आदिवासी जनजातीय मन बर प्रधानमंत्री जन-मन योजना चलाय जावत हे। एखर तहत करोड़ों रूपिया खरचा करके आदिवासी इलाका के बिकास करे जावत हे। प्रधानमंत्री ह कहिन कि बिकास के लाभ छत्तीसगढ़ के हरेक परिवार तक पहुंचाय म केन्द्र अउ राज्य सरकार कोनों कोर-कसर नइ छोड़ही।
कार्यक्रम के बेरा प्रधानमंत्री आवास योजना-ग्रामीण के तहत तीन लाख हितग्राही मन ल गृह प्रवेस कराय गीस। प्रधानमंत्री ह योजना के तीन लाख हितग्राही मन ल उंखर नवा घर के चाबी सौंपीन। श्री मोदी ह कहिन कि उंखर सरकार सिरिफ चार दीवारी नइ बनाय, भलुक ए घर म रहवइया लोगन के जिनगी घलो बनाथे।
प्रधानमंत्री-छत्तीसगढ़-02
प्रधानमंत्री ह कहिन कि अतेक बड़े संख्या म आवास निर्माण होय ले न सिरिफ झोपड़ी म रहवइया लोगन के पक्का घर म रेहे के सपना पुरथे भलुक स्थानीय कारीगर, बेपारी, ट्रांसपोर्टर अउ युवा मन ल घलो रोजगार मिलथे।
कार्यक्रम ले ही प्रधानमंत्री ह अभनपुर-रायपुर रेलखंड म मेमू रेलगाड़ी ल हरा झंडा दिखाके रवाना करीन।
कार्यक्रम ल केन्द्रीय आवास अउ शहरी विकास मंत्री मनोहरलाल खट्टर अउ छत्तीसगढ़ के मुख्यमंत्री विष्णुदेव साय घलो संबोधित करीन।
ए मउका म छत्तीसगढ़ के राज्यपाल रमेन डेका, विधानसभा अध्यक्ष डॉक्टर रमन सिंह, केन्द्रीय राज्यमंत्री तोखन साहू, उपमुख्यमंत्री अरूण साव अउ विजय शर्मा संगे राज्य मंत्रिमंडल के आने-आने सदस्य, सांसद अउ विधायक मौजूद रिहीन।
मन की बात
प्रधानमंत्री नरेंद्र मोदी ह आज आकाशवाणी ले ‘‘मन की बात‘‘ कार्यक्रम म किहीन कि खराब कपड़ा के चुनौती दुनियाभर बर चिंता के नवा कारण बन गेहे। ओमन कहिन कि एक प्रतिशत ले घलो कमती खराब कपड़ा ल नवा कपड़ा म सिरजाय जाही।
प्रधानमंत्री ह कहिन कि गर्मी आतेच सहर-सहर अउ गांव-गांव म पानी बचाय के उदिम सुरू हो जथे। एखर सेती कतकोन आने-आने राज्य म पानी बचाय के कारज जोरसोर ले चलत हे। जलशक्ति मंत्रालय अउ आने-आने स्वयंसेवी संस्था मन ए दिसा म सुघ्घर कारज करत हे अउ देस म हजारों तरिया, चेकडेम, बोरवेल रीचार्ज अउ सामुदायिक सोकपिट के निर्माण होवत हे।
प्रधानमंत्री ह पढ़ईया लइका मन ल गर्मी छुट्टी के बेरा बने-बने कारज करे के सलाह दीन हे। ओमन युवा मन बर ‘‘माई भारत‘‘ नाव के एक ठन कैलेंडर के घलो गोठ करीन, जेला एसो के गर्मी छुट्टी बर बनाय गेहे। ओमन किहीन कि ए कैलेंडर ले कुछु नवा उदीम करे गेहे। ए कैलेंडर म युवा छात्र मन जन औषधिक के बारे म जानकारी ले सकत हे।
प्रधानमंत्री ह हालेच म होय खेलो इंडिया पैरागेम्स म खिलाड़ी मनके बढ़िया प्रदर्शन ल संहराइन हें। ओमन किहीन कि अंतर्राष्ट्रीय योग दिवस के उल्टा गिनती सुरू हो चुके हे। योग दिवस बर अब सौ दिन ले घलो कमती बेरा बांचे हे। प्रधानमंत्री ह योग ल अपन जिनगी म सामिल करे के अपील करीन। एसो अंतर्राष्ट्रीय योग दिवस के बिसय – ‘‘एक पृथ्वी-एक स्वास्थ्य के लिए योग‘‘ हे।
ऐति, प्रधानमंत्री के मन की बात कार्यक्रम ल छत्तीसगढ़ म घलो सुने गीस। मुख्यमंत्री विष्णुदेव साय ह रायपुर स्थित अपन निवास कार्यालय म नवगुरूकुल अउ नेतृत्व साधना केन्द्र के नोनी मन संग कार्यक्रम ल सुनीन। ए बेरा केन्द्रीय मंत्री मनोहर लाल खट्टर, विधानसभा अध्यक्ष डॉक्टर रमन सिंह, मंत्री केदार कश्यप, प्रदेस अध्यक्ष किरण सिंह देव अउ विधायक पुरंदर मिश्रा मौजूद रिहीन।
कार्यक्रम सुने के बाद मुख्यमंत्री ह कहिन कि मन की बात कार्यक्रम ह देस के जनता ल जागरूक करे के बढ़िया मंच बन चुके हे। मुख्यमंत्री ह नोनी मन संग गोठबात घलो करीन अउ ओमन ल भविष्य बर सुभकामना दीन।
माओवादी आत्मसमर्पण
बीजापुर जिला म आज 50 झन माओवादी मन आत्मसमर्पण कर दीन। एमा ले 13 झन उपर 68 लाख रूपिया के इनाम घोषित रिहीस। राज्य म ए पहली दरी आय जउन अतेक बड़े संख्या म माओवादी मन एके संघरा आत्मसमर्पण करीन हे। जिला के पुलिस अधीक्षक जितेन्द्र कुमार यादव ह कहिन कि आत्मसमर्पण करइया मन म कतकोन बड़का माओवादी सामिल हें। आत्मसमर्पण करइया मन ल सरकार के पुनर्वास नीति के तहत पच्चीस-पच्चीस हजार रूपिया के चेक दे गीस।
मुख्यमंत्री विष्णुदेव साय ह कहिन कि बस्तर संभाग के दूरिहा इलाका म सरकार डहार ले सरलग नवा सुरक्षा कैम्प लगाय ले अउ सड़क निर्माण के संगे सिक्षा अउ स्वास्थ्य बेवस्था के बिस्तार ले सरकार उपर लोगन के विश्वास बाढ़े हे। ओमन किहीन कि लाल आंतक के दामन छोड़के सांति के रद्दा म लहुटइया ये लोगन के विकास बर राज्य सरकार तत्पर हे।
माओवादी मुठभेड़-पहचान
बीजापुर जिला म काली सुरक्षा बल के संग होय मुठभेड़ म मारे गे माओवादी के चिन्हारी कर ले गेहे। ए माओवादी के चिन्हारी जगरगुंडा एरिया कमेटी के नरसापुर आरपीसी अध्यक्ष कन्ना झाड़ी के रूप म होय हे। एखर उपर एक लाख रूपिया के इनाम रिहीस हे। सुरक्षा बल ह घटनास्थल ले बंदूक अउ विस्फोटक जिनीस बरामद करीस हे।
फास्ट ट्रैक कोर्ट-सुभारंभ
छत्तीसगढ़ उच्च न्यायायल के मुख्य न्यायाधीश रमेश सिन्हा ह काली मोहला-मानपुर-अंबागढ़ चौकी जिला म फास्ट ट्रैक कोर्ट के वर्चुअल सुभारंभ करीन। ए बेरा ओमन नवा न्यायालय परिसर के घलो वर्चुअल निरीक्षण करीन। उहें, अपन संबोधन म न्यायाधीश रमेश सिन्हा ह कहिन कि व्यवहार न्यायालय के स्थापना होय ले अब पक्षकार अउ अधिवक्ता मन ल आने-आने मामला के सुनवाई बर राजनांदगांव नइ आय बर पड़ही।
दुर्घटना
गौरेला-पेंड्रा-मरवाही जिला के कोटमी थाना इलाका म होय सड़क हादसा म दू लोगन के मउत होगे। मिली जानकारी ले मनेंद्रगढ़ ले बिलासपुर जवइया चापहिया गाड़ी ह मंदिर दर्सन बर जावत माईलोगिन ल टक्कर मार दीस, जेखर ले माईलोगिन पुलिया खाल्हे गिर गीस अउ ओखर मउकाच म मउत होगे। घटना के बाद चारपहिया गाड़ी घलो सोननदी म गिर गे, जेमा एक मनखे के मउत होगे अउ सात झन आने लोगन घायल होगीन। जम्मों घायल मन ल सिम्स म भर्ती कराय गेहे।
दूसर डहार, जांजगीर-चांपा जिला के लोहर्सी गांव म कार के टक्कर ले फटफटी सवार एक झन युवक के मउत हो गीस।
चैत्र नवरात्र/विक्रम संवत
आज ले चइत नवरात्र के परब सुरू होगे हे। बिहनियाच ले जम्मों देवी मंदिर अउ सक्तिपीठ म दर्सन बर श्रद्धालु मनके भीड़ उमड़त हे। मंदिर मन म मनोकामना जोत घलो जलाय जावत हे। संगे मंदिर मन ल सुघ्घर ढंग ले सजाय गेहे। ए मउका म डोंगरगढ़ के मां बम्लेश्वरी मंदिर, रतनपुर के मां महामाया, चन्द्रपुर के चन्द्रहासिनी अउ दंतेवाड़ा के माई दंतेश्वरी मंदिर म जवइया श्रद्धालु अउ रेंगत जवइया मन बर बिसेस व्यवस्था करे गेहे।
इही बीच, आज ले भारतीय नववर्ष घलो सुरू होगे हे। एला विक्रम संवत या नव संवत्सर कहिथे। देसभर के आने-आने इलाका म भारतीय नववर्ष ल आने-आने नांव ले जाने जाथे।