प्रधानमंत्री नरेंद्र मोदी काली एक दिवसीय दउरा म छत्तीसगढ़ आहीं। ए बेरा ओमन बिलासपुर जिला के मोहभट्टा म तैंतीस हजार सात सौ करोड़ रूपिया ले जादा लागत के बिजली, तेल, गैस, रेल, सड़क, शिक्षा अउ आवास क्षेत्र ले जुड़े कतकोन विकास परियोजना मनके नींव राखहीं अउ उद्घाटन घलो करही। एखर संगेसंग प्रधानमंत्री पश्चिमी क्षेत्र बिस्तार योजना के तहत पांच सौ साठ करोड़ रूपिया ले जादा लागत के पावरग्रिड के तीन ठन बिजली परियोजना ल घलो राष्ट्र ल सौंपहीं। ए मउका म प्रधानमंत्री ह जनसभा ल घलो ल संबोधित करही।
अधिकारिक जानकारी ले प्रधानमंत्री नरेंद्र मोदी बिलासपुर जिला म स्थित एनटीपीसी के सीपत सुपर थर्मल पावर परियोजना के तीसरइया चरण के आधारसिला राखहीं। एखरे संग ओमन राज्य बिजली उत्पादन कंपनी के पहिली सुपर क्रिटिकल थर्मल पावर परियोजना कारज ल घलो सुरू करहीं।
अपन दउरा के बेरा प्रधानमंत्री ह कोरिया, सूरजपुर, बलरामपुर अउ सरगुजा जिला म भारत पेट्रोलियम कॉर्पोरेशन लिमिटेड के सिटी गैस वितरण परियोजना के आधासिला राखहीं। ए बेरा प्रधानमंत्री ल पांच सौ चालिस किलोमीटर लंबा विशाखापट्टनम-रईपुर पाइपलाइन परियोजना के घलो आधारसिला राखहीं
प्रधानमंत्री-छत्तीसगढ़-02
छत्तीसगढ़ म बढ़िया संपर्क बनाय के उद्देस्य ले प्रधानमंत्री ह एक सौ आठ किलोमीटर लंबा वाले सात ठन रेल परियोजना के आधारसिला राखहीं अउ एक सौ ग्यारा किलोमीटर लंबा वाले तीन ठन रेल परियोजना के लोकार्पण करहीं। श्री मोदी ह अभनपुर-रईपुर खंड म मेमू रेल सेवा ल हरा झंडा दिखाके रवाना करही। एखर अलावा राष्ट्रीय राजमार्ग- नौ सौ तीस के झलमला ले शेरपार खंड अउ राष्ट्रीय राजमार्ग-तिरालिस के अंबिकापुर-पत्थगांव खंड ल टू-लेन म अपग्रेड करके राष्ट्र ल सौंपहीं। संगेसंग प्रधानमंत्री ह राष्ट्रीय राजमार्ग एक सौ तीस-डी के कोंडागांव-नारायणपुर खंड ल टू लेन म अपग्रेड बर आधारसिला राखहीं।
छत्तीसगढ़ म शिक्षा के बुनियादी ढांचा ल बढ़ाय बर श्री मोदी ह उनतीस जिला म एक सौ तीस पीएमश्री स्कूल अउ रईपुर म विद्या समीक्षा केंद्र के सुरूआत करहीं। ऐति, प्रधानमंत्री आवास योजना ग्रामीण के तहत तीन लाख हितग्राही मनके गृह प्रवेस होही अउ इही बेरा प्रधानमंत्री ह कुछेक हितगा्र्रही मन ल उंखर नवा घर के चाबी घलो सौंपहीं।
उहें, प्रधानमंत्री ह मोहभट्टा के कारीकरम ले ही वीडियो कॉन्फ्रेंसिंग के जरिया ले अभनपुर-रईपुर मेमू स्पेसल रेल सेवा के सुभारंभ करहीं। ए रेलगाड़ी ह अभनपुर अउ रईपुर के बीच बिहनिया अउ संझाकुन चलही अउ ए रेलगाड़ी ह केंद्री, सीबीडी अउ मंदिर हसौद म रूकही।
माओवादी-मुठभेड़
सुकमा जिला म आज सुरक्षाबल के संग होय मुठभेड़ म सत्रह माओवादी मारे गीन। एमा ग्यारा झन माईलोगन सामिल हें। मारे गेय सबो नक्सली के शव बरामद कर ले गेहे। एमा पच्चीस लाख रूपिया के एक झन ईनामी माओवादी कुहड़ामी जगदीश उर्फ बुधरा घलो मारे गेहे, जेखर चिन्हारी माओवादी संगठन के दरभा डिवीजन के सचिव के रूप म होइस हे। ए मुठभेड़ म डीआरजी के दू झन जवान घलो घायल होगिन, जिंखर हालत खतरा ले बाहिर बताय जावत हे। जिला के पुलिस अधीक्षक किरण चौहान ह बतइन कि केरलापाल थाना इलाका गोगुंडा, नेन्डुम अउ उमापल्ली के तिर-तखार के जंगल म माओवादी रेहे के सूचना मिलतेच डीआरजी अउ सीआरपीएफ के टीम ह सर्चिंग म निकले रिहीस। इही बेरा पहिली ले ताकत बइठे माओवादी मन सुरक्षाबल उपर गोलीबारी कर दीन। ऐति, जवान मन घलो जवाबी कार्रवाही करीन, जेमा सत्रह माओवादी ढेर होगिन। मुठभेड़ के बाद घटनास्थल ले भारी मात्रा म बिस्फोटक जिनिस घलो बरामद करे गीस।
ऐति, केंद्रीय गृहमंत्री अमित शाह ह सत्रह माओवादी मारे जाय म सुरक्षाकर्मी मन ल बधई दीन हे। ओमन एक्स पोस्ट म लिखिन कि केंद्र सरकार, इकतीस मार्च बछर दू हजार छब्बीस ले पहिली नक्सलवाद के खातमा बर संकल्पित हे।
उहें, मुख्यमंत्री विष्णुदेव साय ह किहीन कि सुरक्षाबल के जवान मन ल मिले सुफलता संहराउक हे। राज्य ह नक्सलवाद ले मुक्ति पाय के दिसा म सरलग आगू बाढ़त हे। झटकुन देस-प्रदेस ल वामपंथी उग्रवादी मन ले मुक्ति मिलहीं।
ऐति, गृहमंत्री विजय शर्मा ह घलो जवान मन ल ए सुफलता बर बधई दीन हें।
माओवादी आत्मसमर्पण/आईईडी विस्फोट
ओति, बीजापुर जिला म घलो आज मुठभेड़ होइस, जेमा एक झन माओवादी मारे गीस। पुलिस अधीक्षक जितेन्द्र यादव ह बतइन कि बासागुड़ा थाना इलाका के टेकमेटा-नरसापुर जंगल म मुठभेड़ होइस। मउका ले हथियार अउ बिस्फोटक जिनिस बरामद करे गीस।
उहें, भैरमगढ़ थाना इलाका के उसपरी गांव के तिर बम के चपेट आय ले एक झन माईलोगिन घायल होगे, जेला भैरमगढ़ अस्पताल म भर्ती कराय गेहे।
इही जिला, म सुरक्षाबल के टीम ह आने-आने थाना इलाका ले छै झन माओवादी मन ल गिरफ्तार करे हें। एमा भैरमगढ़ अउ बेदरे थाना इलाका ले तीन-तीन झन माओवादी पकड़े गीन हें।
ओति, दंतेवाड़ा जिला म आज पंद्रह झन माओवादी मन पुलिस के आगू आत्मसमर्पण कर दीन। इंखर उपर अपन-अपन इलाका म बैनर-पोस्टर लगा के रद्दा ल बाधित करे के आरोप हे। आत्मसमर्पित सबो माओवादी मन ल सरकार के पुनर्वास नीति के तहत पच्चीस-पच्चीस हजार रूपिया दे गीस।
उहें, दंतेवाड़ा जिला ले घलो पांच झन माओवादी गिरफ्तार करे गीन। एमा दू झन माईलोगन सामिल हें। एमन ल बिस्फोटक जिनिस लगावत बेरा गिफ्तार करे गीस।
मुख्यमंत्री कार्यशाला
मुख्यमंत्री विष्णुदेव साय आज राजधानी रईपुर म आयोजित राष्ट्रीय कार्यसाला ‘‘नेशनल कॉन्फ्रेंस ऑन बैंक ऑडिट एंड एआई‘‘ म सामिल होइन। ए मकउा म श्री साय ह किहीन कि भारत आज दुनिया के पांचवां सबले बड़का अर्थव्यवस्था बन गेहे। जीएसटी अउ कर सुधार मन बेवस्था ल सरल बनइन अउ राजस्व संग्रहण ल मजबूत करीन हे। ओमन किहीन कि चार्टर्ड एकाउंटेंट भारत के बिकास यात्रा म परमुख भूमिका निभावत हे अउ बिकसित भारत दू हजार सैंतालीस के लक्ष्य ल पाय बर उंखर भागीदारी अहम होही। मुख्यमंत्री ह एआई ले जुड़े संभावना अउ चुनौती उपर घलो गोठ करीन। ए मउका म मुख्यमंत्री ह सीए छत्तीसगढ़ के बिसेस ‘‘चिन्हा‘‘ के बिमोचन करीन।
सौगात ए मोदी
प्रधानमंत्री नरेंद्र मोदी के डहार ले एक ठन सुघ्घर उदिम करे जावत हे। ‘‘सौगात ए मोदी‘‘ के तहत काली मुख्यमंत्री विष्णुदेव साय ह मुस्लिम समाज के पांच सौ जरूरतमंद माईलोगन मन ल गिफ्ट पाकिट बांटिन। ए मउका म मुख्यमंत्री ह सबो लोगन ल ईद के बधाई देवत किहीन कि ए परब ह परेम अउ एकता के प्रतीक आय।
पीएम-मन की बात
प्रधानमंत्री नरेंद्र मोदी ह काली बिहनिया ग्यारा बजे आकाशवाणी म अपन ‘‘मन की बात‘‘ करहीं। ए कारीकरम म देस-बिदेस के लोगन के संग अपन बिचार साझा करहीं। एहा मासिक रेडियो कारीकरम के एक सौ बीसवीं कड़ी होहीं। ए कारीकरम आकाशवाणी अउ दूरदर्सन के सबो नेटवर्क, आकाशवाणी समाचार वेबसाइट अउ न्यूज ऑन एआईआर मोबाइल ऐप म प्रसारित होही।
चैत्र नवरात्र
काली ले चइत नवरात्रि के परब सुरू होवत हे। ए बेरा नौ दिन तक दुर्गा दाई के नौ रूप के पूजा-पाठ करे जाहीं। देवी मंदिर मन म ज्योत जलाय जाही। रईपुर अउ रतनपुर के महामाया मंदिर, चन्द्रपुर के चन्द्रहासिनी अउ महासमुंद के खल्लारी अउ चंडी दाई, दंतेवाड़ा के दंतेश्वरी मंदिर समेत प्रदेसभर के मंदिर मन म सबो तियारी पूरा कर ले गेहे।
नवरात्रि के सेति डोंगरगढ़ के मां बम्लेश्वरी के दरबार घलो सज-धज के तियार हो गेहे। रेल प्रशासन ह एसो घलो कतकोन रेलगाड़ी के ठहराव डोंगरगढ़ म देहे।
ऐति, राज्यपाल अउ मुख्यमंत्री ह घलो प्रदेसवासी मन ल चइत नवरात्रि, हिन्दू नवा बछर अउ गुड़ी पड़वा के बधई देइन हें।
जिले की चिट्ठी
प्रादेशिक समाचार एकांश, आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले, छै बजके दस मिनट तक करे जाही। ए कारीकरम ल छत्तीसगढ़ के जम्मो आकाशवाणी केंद्र एके संघरा रिले करहीं। ए दारी के अंक म ‘‘महासमुंद‘‘ जिला के गतिविधि के जानकारी दे जाही।