प्रधानमंत्री बिलासपुर जिला म स्थित एनटीपीसी के सीपत सुपर थर्मल पावर परियोजना के तीसरा चरण के आधार सिला रखही। जेखर लागत नौ हजार सात सौ नब्बे करोड़ रूपिया ले जादा हरय। एखर अलावा ओमन राज्य विद्युत उत्पादन कंपनी लिमिटेड के पंद्रह हजार आठ सौ करोड़ रूपिया ले जादा के लागत वाला पहिली सुपर क्रिटिकल थर्मल पावर परियोजना के काम के सुरूआत करही।
अपन छत्तीसगढ़ दउरा म प्रधानमंत्री कोरिया, सूरजपुर, बलरामपुर अउ सरगुजा जिला मन म भारत पेट्रोलियम कार्पोरेसन लिमिटेड के सिटी गैस वितरण परियोजना के आधारसिला रखही। एमा दू सौ किलोमीटर ले जादा हाई प्रेसर पाइप लाइन अउ आठ सौ किलो मीटर ले जादा मीडियम डेंसिटी पॉलीइथिलीन पाइपलाइन अउ एक हजार दू सौ पचासी करोड़ रूपिया ले जादा लागत वाला कई ठन सीएनजी डिस्पेंसिंग आउटलेट सामिल हे। प्रधानमंत्री पांच सौ चालीस किलोमीटर लंबा विशाखापट्टनम-रईपुर पाइपलाइन परियोजना के घलो आधारसिला रखही, जेखर लागत दू हजार दू सौ दस करोड़ रूपिया ले जादा हे।
प्रधानमंत्री-छत्तीसगढ़-02
छत्तीसगढ़ म कनेक्टिविटी ल बेहतर बनाय के उद्देस्य ले प्रधानमंत्री एक सौ आठ किलोमीटर के लंबाई वाला सात ठिन रेलवे परियोजना मनके आधारसिला रखही अउ एक सौ ग्यारा किलोमीटर लंबा तीन ठन रेल परियोजना मनके लोकार्पण करही। श्री मोदी अभनपुर-रईपुर खंड म मेमू ट्रेन सेवा ल हरा झंडा देखाही। एखर अलावा राष्ट्रीय राजमार्ग-नौ सौ तीस के झलमला ले शेरपार खंड अउ राष्ट्रीय राजमार्ग-तिरालीस के अंबिकापुर-पत्थलगांव खंड ल टू-लेन म अपग्रेड करके राष्ट्र ल समर्पित करही। एखरे संघरा ओमन राष्ट्रीय राजमार्ग-एक सौ तीस डी, के कोंडागांव-नारायणपुर खंड ल टू लेन म अपग्रेड करे के आधारसिला घलो रखही।
छत्तीसगढ़ म शिक्षा के बुनियादी ढांचा ल बढ़ावा देबर प्रधानमंत्री श्री मोदी उनतीस ठन जिला म एक सौ तीस पीएमश्री स्कूल अउ रईपुर म विद्या समीक्षा केंद्र के सुरूआत करही। पीएम स्कूल फॉर राइजिंग इंडिया योजना के तहत एक सौ तीस स्कूल मन ल अपग्रेड करे जाही। ए स्कूल स्मार्ट बोर्ड, आधुनिक प्रयोगसाला अउ पुस्कालय के माध्यम ले उच्च गुणवत्ता वाला शिक्षा दे म मदद करही। उहें, रईपुर म विद्या समीक्षा केंद्र आने-आने शिक्षा संबंधी सरकारी योजना मन के ऑनलाइन निगरानी अउ डेटा विस्लेषण ल सक्षम करही।
प्रधानमंत्री आवास योजना ग्रामीण के तहत तीन लाख लाभार्थियों मनके गृह प्रवेस होही अउ ए दउरान प्रधानमंत्री कुछेक लाभार्थी मन ल ओखर आवास के चाबी सौंपही।
केंद्र सरकार ह केंद्रीय कर्मी मन बर दू प्रतिसत महंगाई भत्ता अउ पेंसन भोगी मनके महंगाई राहत ल मंजूरी देहे। नई दिल्ली म संवाददाता मन ल मंत्रिमंडल के निर्णय के जानकारी देवत सूचना अउ प्रसारण मंत्री अश्विनी वैष्णव ह बतइन कि ए, ह ए साल के पहला जनवरी ले लागू होही। एखर ले केंद्र सरकार के अड़तालिस लाख छैंसठ हजार कर्मचारी अउ छैंसठ लाख पचपन हजार पेंसन भोगी मन ल फायदा होही।
श्री वैष्णव ह किहीन कि सरकार ह ए साल के खरीफ सीजन म किसान मन ल किफायती दर उपर फास्फेट अउ पोटास उर्वरक उपलब्ध कराय के घलो मंजूरी देहे। ओमन किहीन कि किसान मनके हित के रक्षा बर डीएपी के अधिकतम खुदरा कीमत एक हजार तीन सौ पचास रूपिया प्रति पचास किलो ग्राम बैग उपर रखे गेहे।
भाजपा अल्पसंख्यक-‘‘सौगात-ए-मोदी‘‘
भारतीय जनता पार्टी अल्पसंख्यक मोर्चा के तत्वाधान म आज रईपुर म एकात्म परिसर स्थित प्रदेस भाजपा कार्यालय म ‘‘सौगात-ए-मोदी‘‘ कारीकरम के आयोजन करे गीस। कारीकरम के मुख्य अतिथि भाजपा अल्पसंख्यक मोर्चा के राष्ट्रीय अध्यक्ष जमाल सिद्दीकी रिहीन। उहें, विशिष्ट अतिथि के रूप म वक्फ बोर्ड के अध्यक्ष डॉक्टर सलीम राज अउ विधायक पुरंदर मिश्रा के संगेसंग भाजपा जिला अध्यक्ष रमेश िंसंह ठाकुर समेत मोर्चा के अनेक पदाधिकारी सामिल होइन।
वक्फ बोर्ड के अध्यक्ष डॉक्टर सलीम राज ह बतइन कि रमजान के मद्देनजर ‘‘सौगात-ए-मोदी‘‘ कारीकरम म मुस्लिम समाज के गरीब परिवार मनके लोगन मन ल सामग्री कीट के वितरण करे गीस।
माओवादी-आत्मसमर्पण
नारायणपुर जिला म आज छै झिन महिला माओवादी मन पुलिस के आगू आत्मसमर्पण कर दीन हे। ए माओवादी मन उपर कुल छै लाख रूपिया के इनाम घोसित रिहीस हे। ए माओवादी मन पुलिस अधीक्षक प्रभात कुमार के आगू आत्मसमर्पण करीन। ए जम्मों माओवादी कुतुल अउ नेलनार एरिया कमेटी के सक्रिय सदस्य रिहीन अउ एमन उपर आने-आने वारदात म सामिल रहे के आरोप हे। आत्मसमर्पण करइया जम्मों माओवादी मन ल राज्य सरकार के पुनर्वास नीति के तहत पच्चीस-पच्चीस हजार रूपिया के प्रोत्साहन रासि दे गीस।
जवान घायल-आईईडी बरामद
नारायणपुर जिला म माओवादी मन डहार ले लगाय गे आईईडी के चपेट म आय ले एक झिन जवान घायल होगे हे। मिले जानकारी के अनुसार जिला के कोहकामेटा थाना अंतर्गत कुतुल कैम्प ले आईटीबीपी, डीआरजी अउ बस्तर फाइटर्स के संयुक्त टीम एरिया डोमिनेसन बर बेड़माकोटी कोति निकले रिहीस। इही दउरान माओवादी मन कोति ले लगाय गे आईईडी म ब्लास्ट होगे, जेखर चपेट म आय ले बस्तर फाइटर्स के एक झिन जवान घायल होगे, जेला उपचार बर जिला अस्पताल म भर्ती कराय गेहे।
ओति, बीजापुर जिला म केंद्रीय रिजर्व पुलिस बल-सीआरपीएफ के टीम ह सर्चिंग के दउरान चेरपाल-पालनार रद्दा म पैंतालीस किलो ग्राम के आईईडी बरामद करे हे, जेला बम निरोधक दस्ता के टीम ह मउकच म नष्ट कर दीस।
मुख्यमंत्री-कार्यशाला
नवा रईपुर म आज ‘‘आदिवासी समुदायों के लिए वन आधारित जीविकोपार्जन के अवसर‘‘ बिसय उपर नीति आयोग अउ वन अउ जलवायु परिवर्तन विभाग के संयुक्त तत्वाधान म कार्यसाला के आयोजन करे गीस। ए मउका म मुख्यमंत्री ह किहीन कि जनजातीय समाज अउ जंगल के बीच गहरा संबंध हे अउ दूनों एक-दूसर के पूरक के रूप म संरक्षित-संवर्धित होत हे। ओमन किहीन कि ए कार्यसाला आदिवासी अउ वन के सह अस्तित्व ल केंद्र म रखके ओमन के उन्नति के रद्दा प्रशस्त करही अउ जनजातीय समाज ल तकनीक अउ नवाचार ले जोड़े के संघरा आर्थिक स्थिति ल मजबूत करे म मदद करही।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ के तहत ए बखत प्रतिष्ठित साहित्यिक सम्मान ज्ञानपीठ पुरस्कार बर चुने गे साहित्यकार विनोद कुमार शुक्ल ले लेगे बिसेस भेंटवार्ता प्रसारित करे जाही। ए कारीकरम काली उनतीस मार्च के बिहनिया साढ़े दस बजे आकाशवाणी केंद्र रईपुर ले प्रसारित होही। एला छत्तीसगढ़ स्थित आकाशवाणी के जम्मों केंद्र रिले करही।
सहकारी टैक्सी सेवा
केंद्रीय गृह अउ सहकारिता मंत्री अमित शाह ह घोसना करीन हे कि सरकार सहकारी टैक्सी सेवा सुरू करही। सहकारिता के माध्यम ले संचालित ए सेवा उबर अउ ओला के मॉडल उपर काम करही। लोकसभा म श्री शाह ह किहीन कि ए कदम सहकार ले समृध्दि के अनुरूप उठाय गेहे।
आंगनबाड़ी-समय
प्रदेस म बाढ़त गर्मी ल धियान म राखत राज्य शासन ह आंगनबाड़ी केंद्र मनके संचालन समय म अस्थाई बदलाव करे हे। महिला अउ बालविकास विभाग डहार ले जारी निरदेस के अनुसार एक अप्रैल ले तीस जून तक आंगनबाड़ी केंद्र मनके संचालन बिहनिया सात बजे ले ग्यारा बजे तक करे जाही। ए बेरा म केंद्र मनके संचालन छै घंटा के बजाय चार घंटा ही होही।