प्रदेस म मुख्यमंत्री तीर्थयात्रा योजना फेर ले सुरू होगे हे। मुख्यमंत्री विष्णुदेव साय ह आज रायपुर रेलवे स्टेसन ले भारत गौरव ट्रेन ल हरा झंडा दिखाके रवाना करीन। ए ट्रेन ले प्रदेस के आठ सौ यात्री तीरथ यात्रा बर रवाना होइन। योजना के तहत दर्शनार्थी मन ल मदुरई, तिरूपति अउ रामेश्वर के दर्सन कराय जाही। ट्रेन म यात्री मन बर खाय-पीये के संग चिकित्सा सुविधा घलो रइही।
ए मउका म मुख्यमंत्री ह कहिन कि भाजपा सरकार म ए योजना के सुरूवात पूर्व मुख्यमंत्री डॉक्टर रमन सिंह ह करे रहिन। ए योजना ल छह साल पहिली बंद कर दे गे रिहीस, जेखर सुरूआत आज ले फेर होइस। श्री साय ह कहिन कि राज्य के भाजपा सरकार ह जउन वादा करे रहिस, ओला पूरा करे के काम करत हे।
प्रधानमंत्री-बिलासपुर
प्रधानमंत्री नरेन्द्र मोदी अवइया तीस मार्च के बिलासपुर जिला के मोहभट्टा आही। प्रधानमंत्री के प्रवास के तैयारी ल लेके काली मुख्य सचिव अमिताभ जैन ह वीडियो कॉन्फ्रेसिंग के माध्यम ले अधिकारी मनके बइठका लीन। बइठका म ओमन ह बइठक व्यवस्था, चिकित्सा, विद्युत, हेलीपेड, सुरक्षा, संचार, प्रेस मीडिया के संग आने-आने व्यवस्था के संबंध म अधिकारी मन ले जानकारी लीन अउ ओमन ल जरूरी दिसा-निरदेस दीन।
श्रमिक राशि
श्रम मंत्री लखनलाल देवांगन ह आज नवा रायपुर म करीबन एक लाख पन्द्रह हजार श्रमिक मनके खाता म तिरपन करोड़ तिरालीस लाख रूपिया ले जादा के रासि ऑनलाइन अंतरित करीन। श्रम विभाग कोति ले पाछु सवा साल म श्रमिक मन ल आने-आने योजना के तहत लगभग पांच सौ करोड़ रूपिया अंतरित करे जा चुके हे। ए मउका म श्री देवांगन ह मुख्यमंत्री निर्माण श्रमिक मृत्यु अउ दिव्यांग सहायता योजना, मुख्यमंत्री नोनी सशक्तिकरण सहायता योजना अउ मुख्यमंत्री श्रमिक सियान सहायता योजना के तहत पात्र हितग्राही मन ल बीस-बीस हजार रूपिया के चेक दीन।
रामविचार नेताम-मनसुख मांडविया
आदिम जाति विकास मंत्री रामविचार नेताम ह काली नई दिल्ली म केन्द्रीय मंत्री मनसुख मांडविया ले भेंट करीन। ए दउरान श्री नेताम अउ केन्द्रीय मंत्री के बीच छत्तीसगढ़ सरकार डहार ले संचालित केन्द्र अउ राज्य प्रवर्तित योजना मनके क्रियान्वयन के संबंध म चर्चा होइस। भेंट के दउरान श्री नेताम ह केन्द्रीय मंत्री ल छत्तीसगढ़ आय के नेवता घलो दीन।
बस्तर संभाग-डिप्टी कलेक्टर
बस्तर संभाग के आने-आने जिला म आठ नवा डिप्टी कलेक्टर मनके पदस्थापना करे गेहे। सामान्य प्रशासन विभाग डहार ले जारी आदेस के अनुसार रविशंकर वर्मा ल सुकमा, मृणमयी शुक्ला ल कांकेर, नंदनी अउ सत्येन्द्र कुमार बंजारे ल बस्तर, मनीष बघेल ल दंतेवाड़ा, सौरभ दीवान ल नारायणपुर, निधि प्रधान ल बीजापुर अउ लखेश्वर यादव ल कोंडागांव म अस्थाई रूप ले अवइया आदेस तक पदस्थ करे गेहे। ए सबो डिप्टी कलेक्टर कार्यभार ग्रहण करे के तिथि ले तीन बछर के परिवीक्षा अवधि म रइही।
खबर के मुताबिक छत्तीसगढ़ लोक सेवा आयोग डहार ले आयोजित राज्य सेवा प्रारंभिक परीक्षा बछर दू हजार तेईस म संयुक्त प्रतिस्पर्धा परीक्षा के परिणाम के आधार म आठ नवा डिप्टी कलेक्टर मनके पदस्थापना करे गेहे।
बीएलओ-प्रशिक्षण कार्यक्रम
मुख्य निर्वाचन आयुक्त ज्ञानेश कुमार ह काली नई दिल्ली स्थित भारत अंतर्राष्ट्रीय लोकतंत्र अउ निर्वाचन प्रबंधन संस्थान-ट्रिपल आई डी.ई.एम. म बीएलओ बर पहिली बार होवत प्रसिक्षण कार्यक्रम के उद्घाटन करीन। ए मउका म ओमन कहिन कि अवइया कुछेक बछर म अइसने प्रसिक्षण कार्यक्रम के माध्यम ले एक लाख ले जादा बीएलओ ल प्रसिक्षित करे जाही। ए बेरा बिहार, पश्चिम बंगाल, असम, केरल, पुडुचेरी अउ तमिलनाडु के चौबीस ईआरओ अउ तेरह डीईओ संग बिहार, पश्चिम बंगाल अउ असम के एक सौ नौ बीएलओ मन ह ए दू दिन के आवासीय प्रसिक्षण कार्यक्रम म भाग लेवत हे।
विनोद कुमार शुक्ल-साक्षात्कार
हिन्दी के प्रसिद्ध कवि अउ लेखक विनोद कुमार शुक्ल ल ए बछर के सबले बड़का साहित्यिक सम्मान ज्ञानपीठ पुरस्कार बर चुने गेहे। विनोद कुमार शुक्ल से लेगे विशेष भेंटवार्ता के प्रसारण काली बिहनिया साढ़े ग्यारह बजे ले आकाशवाणी केन्द्र रायपुर ले करे जाही। ए कार्यक्रम ल छत्तीसगढ़ स्थित आकाशवाणी के सबो केन्द्र एके संघरा रिले करही। एखर प्रसारण मीडियम वेव अउ एफ.एम. दूनों चैनल होही।
भाजपा अल्पसंख्यक-‘‘सौगात-ए-मोदी
भारतीय जनता पार्टी अल्पसंख्यक मोर्चा के तत्वावधान म काली अट्ठाईस मार्च के रायपुर के एकात्म परिसर स्थित प्रदेस भाजपा कार्यालय म ‘‘सौगात-ए मोदी‘‘ कार्यक्रम के आयोजन करे जाही। कार्यक्रम के मुख्य अतिथि भाजपा अल्पसंख्यक मोर्चा के राष्ट्रीय अध्यक्ष जमाल सिद्दीकी होही। उहें, विशिष्ट अतिथि के रूप म वक्फ बोर्ड के अध्यक्ष डॉक्टर सलीम राज अउ विधायक पुरंदर मिश्रा के संगेसंग भाजपा जिला अध्यक्ष रमेश सिंह ठाकुर अउ मोर्चा के कतकोन पदाधिकारी सामिल होही।
भाजपा अल्पसंख्यक मोर्चा के प्रदेस अध्यक्ष शकील अहमद ह बतईन कि रमजान ल देखत ‘‘सौगात-ए मोदी‘‘ कार्यक्रम म मुस्लिम समाज के गरीब परिवार के लोगन ल सामान बांटे जाही।
भोरमदेव महोत्सव
कबीरधाम जिला म काली ले सुरू होय उनतीसवां भोरमदेव महोत्सव के आज समापन होही।
एखर पहिली, काली महोत्सव के उद्घाटन उपमुख्यमंत्री विजय शर्मा ह करीन। ए मउका म ओमन कहिन कि भोरमदेव महोत्सव छत्तीसगढ़ के सांस्कृतिक धरोहर के प्रतीक हरय। ओमन बतईन कि केन्द्र सरकार ह स्वदेश दर्शन योजना के तहत भोरमदेव मंदिर परिसर संग तीर-तखार के ऐतिहासिक जघा के संरक्षण, संवर्धन अउ सुरक्षा बर एक सौ छियालीस करोड़ रूपिया के स्वीकृति देहे। कार्यक्रम म श्री शर्मा ह प्रतियोगी परीक्षा के तैयारी करत युवा मन बर निःशुल्क कोचिंग के व्यवस्था करे के घोसना करीन। भोरमदेव महोत्सव के पहिली दिन सुप्रसिद्ध कलाकार हंसराज रघुवंशी संग स्थानीय कलाकार मन ह अपन प्रस्तुति दीन।
कृषि विवि-प्रदर्शनी
रायपुर स्थित इंदिरा गांधी कृषि विश्वविद्यालय म काली ले तीन दिन के कृषि उत्पादक संगठन मेला सह-प्रदर्शनी सुरू होगे हे। कृषि विकास अउ किसान कल्याण अउ जैव प्रौद्योगिकी विभाग के संग लघु कृषक, कृषि व्यापार संघ नई दिल्ली के संयुक्त तत्वावधान म आयोजित ए प्रदर्सनी के उद्घाटन धरसीवां विधायक अनुज शर्मा ह करीन। ए मउका म श्री शर्मा ह कहिन कि प्रधानमंत्री नरेन्द्र मोदी डहार ले किसान मनके आय बढ़ाय बर कृषक उत्पादन संगठन के स्थापना उपर जोर दे जात हे अउ देसभर म दस हजार ले जादा एफ.पी.ओ. के गठन के लक्ष्य राखे गेहे।
तीन दिन के ए मेला म प्रदेस के आने-आने कृषक उत्पादक संगठन डहार ले बनाय गे जैविक खाद प्रदर्सनी अउ बिक्री बर उपलब्ध हे। ए प्रदर्सनी म प्रदेस के पचास कृषक उत्पादक संगठन सामिल होवत हे।
फामेश्वरी यादव-अग्निवीर
गरियाबंद जिला के फामेश्वरी यादव के चयन भारतीय सेना म महिला अग्निवीर के रूप म होय हे। फामेश्वरी यादव छत्तीसगढ़ के पहिली महिला हरय, जेखर चयन अग्निवीर भर्ती परीक्षा म होय हे। अग्निवीर महिला सैन्य पुलिस भर्ती के परिणाम चौबीस मार्च के घोसित करे गेहे। फामेश्वरी यादव के चयन म सेना भर्ती कार्यालय रायपुर के अधिकारी मन ह ओखर सम्मान करीन। फामेश्वरी यादव के प्रसिक्षण बेंगलुरू स्थित सेना मिलिट्री पुलिस सेंटर म एक मई ले सुरू होही।
सहायक शिक्षक भर्ती-अंतिम तिथि
लोक शिक्षण संचालनालय ह सरगुजा अउ बस्तर संभाग म सहायक सिक्षक भर्ती के पांचवां चरण के दस्तावेज सत्यापन के आखिरी तिथि बढ़ा देहे। अब अभ्यर्थी तीन अप्रैल तक जिला सिक्षा अधिकारी कार्यालय म अपन दस्तावेज के सत्यापन करा सकथे। एखर पहिली, दस्तावेज सत्यापन के काम उन्नीस ले छब्बीस मार्च तक निर्धारित करे गे रिहीस।
खबर के मुताबिक स्कूल सिक्षा विभाग डहार ले सीधी भर्ती के तहत बस्तर अउ सरगुजा संभाग के जिला मन म सहायक सिक्षक के पद मन बर भर्ती करे जात हे।
रायगढ़ मेडिकल कॉलेज-वाईफाई
रायगढ़ स्थित स्वर्गीय लखीराम अग्रवाल स्मृति शासकीय चिकित्सा महाविद्यालय म फ्री वाई-फाई सुविधा के सुरूआत होगे हे। ए सुविधा राज्य के कोनों भी शासकीय मेडिकल कॉलेज म पहिली बार सुरू करे गेहे। ए सुविधा ल डिजिटल हेल्थ ल बढ़ावा देके दिसा म ठोक कदम के रूप म देखे जात हे। फ्री वाई-फाई सुविधा ले ओपीडी म अवइया मरीज अउ उंखर परिजन ल आभा ऐप के माध्यम ले डिजिटल पंजीयन करे म समस्या नइ होही।