सीबीआई डहार ले जारी विज्ञप्ति के मुताबिक आज छत्तीसगढ़, भोपाल, कोलकाता अउ दिल्ली के साठ जघा म छापा मारिन। एमा राजनेता, प्रशासनिक अउ पुलिस अधिकारी महादेव बुक के प्रमुख अधिकारी अउ मामला म सामिल होय के संदिग्ध आने निजी मनखे ले जुड़े परिसर सामिल हे। तलासी के दउरान डिजिटल अउ दस्तावेजी साक्ष्य पाय गीस, संगेसंग इलेक्ट्रानिक मसीन घलो जब्त करे गेहे। सीबीआई के मुताबिक ए मामला रवि उप्पल अउ सौरभ चंद्राकर डहार ले चलाय जात ऑनलाइन सट्टा महादेव बुक ले जुड़े हे, जउन मन ए बेरा दुबई म राहत हे। जांच ले पता चले हे प्रमोटर ह अपन काम ल चलाय बर अब्बड़ अकन पइसा एमा लगाय हे। विज्ञप्ति म बताय गेहे कि सुरू म आर्थिक अपराध शाखा ईओडब्ल्यू रईपुर डहार ले दर्ज करे गे रिहीस, बाद म मामला ल छत्तीसगढ़ सरकार डहार ले वरिष्ठ सार्वजनिक अधिकारी अउ आने आरोपी मनखे के भूमिका के बड़का जांच बर सीबीआई ल सौंप दे गीस।
कांग्रेस-प्रदर्शन
ऐति, सीबीआई डहार ले पूर्व मुख्यमंत्री भूपेश बघेल, भिलाई विधायक देवेन्द्र यादव के संगेसंग पार्टी के कतकोन कार्यकर्ता मन उपर छापामारी के विरोध म कांग्रेस ह काली सत्ताईस मार्च के प्रदेस के जम्मो जिला मुख्यालय मन म प्रदर्सन करही। कांग्रेस के प्रभारी महामंत्री मलकीत िंसंह गैदू ह प्रेस विज्ञप्ति जारी करके बतइन कि ए प्रदर्सन म कांग्रेस के सांसद, पूर्व सांसद, विधायक, पूर्व विधायक के संगेसंग जम्मों मोर्चा प्रकोष्ठ के पदाधिकारी अउ कार्यकर्ता मन सामिल होही।
माओवादी-आत्मसमर्पण
सुकमा जिला म छै झिन महिला माओवादी के संगेसंग नौ झिन आने माओवादी मन ह पुलिस के आगू आात्मसमर्पण करे हे। ए माओवादी मन ह जिला के पुलिस अधीक्षक किरण चौहान अउ ए.एस.पी. उमेश गुप्ता के संगेसंग सीआरपीएफ के अधिकारी मन के आगू आत्मसमर्पण करीन। इंखर मन उपर छब्बीस लाख रूपिया के ईनाम घोसित करे गे रिहीस। पुलिस अधीक्षक ह बतइन कि कोंटा ब्लॉक म नक्सल संगठन म अब्बड़ बेरा ले सक्रिय वेट्टी कन्नी ह घलो आत्मसमर्पण करे हे।
त ओति, दंतेवाड़ा जिला म तेरह लाख रूपिया के तीन झिन ईनामी के संगेसंग छै झिन माओवादी मन ह आत्मसमर्पण करे हे, जेमा ले महिला माओवादी उपर आठ लाख रूपिया अउ दू झिन आने माओवादी मन उपर तीन अउ दू लाख रूपिया के ईनाम राखे गे रिहीस। ए जम्मों माओवादी मन उपर कतकोन वारदात म सामिल रेहे के आरोप हे।
सौगात-ए-मोदी अभियान
भारतीय जनता पार्टी अल्पसंख्यक मोर्चा ह सौगात-ए-मोदी अभियान के सुरूआत करे हे। एखर उद्देस्य पूरा देस म बत्तीस लाख गरीब मुस्लिम परिवार मन ल ईद के मउका म बिसेस कीट बांटना हे। आकाशवाणी समाचार ले गोठबात म भाजपा अल्पसंख्यक मोर्चा के राष्ट्रीय अध्यक्ष जमाल सिद्दीकी ह किहीन कि रमजान के पवित्र महिना अउ अवइया मउका जइसे नवरेज़ अउ भारतीय नववर्ष के दउरान अल्पसंख्यक मोर्चा ह सौगात-ए-मोदी अभियान के तहत जरूरतमंद मन ल मदद करे के परयास करही।
ओमन किहीन कि ए अभियान म बत्तीस हजार अल्पसंख्यक मोर्चा कार्यकर्ता मन देस भर के बत्तीस हजार मस्जिद मनके संग मिलके जरूरतमंद मन तक मदद पहुंचाही।
बेंगलुरू-इन्वेस्टर कनेक्ट मीट
मुख्यमंत्री विष्णुदेव साय ह बेंगलुरू म होय इन्वेस्टर कनेक्ट मीट म देस के बड़का उद्योगपति अउ बिजनेस लीडर्स मन ले गोठबात करके राज्य म निवेस के संभावना उपर बात करीन। ए दउरान इंजीनियरिंग, टेक्सटाइल, इलेक्ट्रॉनिक्स, आईटी-आईटीएस, खाद्य प्रसंस्करण अउ ग्रीन फ्यूल जइसन क्षेत्र के कतकोन बड़का कंपनी मन ह सैंतीस सौ करोड़ रूपिया के निवेस प्रस्ताव सौंपे हे। संगेसंग छत्तीसगढ़ सरकार ह आईटी अउ इलेक्ट्रॉनिक्स सेक्टर म निवेस ल बढ़ावा देके उद्देस्य ले नैसकॉम, इंडिया इलेक्ट्रॉनिक्स एंड सेमीकंडक्टर एसोसिएसन अउ द इंडस एंटरप्रेन्योर्स बैंगलोर के संग जरूरी एमओयू घलो साइन करे हे।
बेंगलुरू म होय इन्वेस्टर्स कनेक्टर मीट म इंडिया इलेक्ट्रॉनिक्स अउ सेमीकंडक्टर एसोसिएसन के अध्यक्ष अशोक चंडक के संगेसंग कतकोन प्रतिनिधि मन ह बइठका म भाग लीन।
भोरमदेव
कबीरधाम जिला म आज ले भोरमदेव महोत्सव सुरू होवत हे। दू दिन के ए महोत्सव के बेरा देस अउ प्रदेस के कलाकार मन अपन प्रस्तुति दीही। ए महोत्सव के सुभारंभ आज विधानसभा अध्यक्ष डॉक्टर रमन सिंह ह करही। कारीकरम के अध्यक्षता उप मुख्यमंत्री विजय शर्मा ह करही। उप मुख्यमंत्री ह बतइन कि ए समारोह के बेरा आज प्रसिध्द भजन गायक हंसराज रघुवंशी शिव भजन के प्रस्तुति दीही।
महोत्सव के समापन काली होही। जेखर मुख्य अतिथि मुख्यमंत्री विष्णुदेव साय होही।
वेव्स-समिट
एक ले चार मई तक मुंबई म पहिली वर्ल्ड ऑडियो विजुअल एंटरटेनमेंट समिट-वेव्स के आयोजन करे जाही। एखर बर मीडिया प्रतिनिधि मनके पंजीकरण आज ले सुरू होगे हे। एमा सामिल होय बर पत्रकार, फोटोग्राफर, कंटेंट क्रिएटर अउ मीडिया प्रमुख मन ल नेवता दे जात हे।
राज्यपाल-कोरिया
राज्यपाल रमेन डेका आज एक दिन के कोरिया जिला के दउरा म पहुंचीस। ए दउरान जिला के किसान मन डहार बनाय गे ‘‘सोनहत मूंगफली तेल‘‘ अउ सोनहनी जैवित सहद‘‘ के सुभारंभ करीन। ए पहल किसान मनके आय बढ़ाय अउ जैविक उत्पाद ल प्रोत्साहित करे के दिसा म एक ठिन महत्वपूर्ण कदम हरय। ओमन किहीन किम सोनहत मूंगफली तेल के सुद्धता एला खास बनाही अउ एखर ले स्थानीय किसान मन ल आर्थिक मजबूत मिलही।
ए मउका म राज्यपाल ह पर्यटन म आधारित डायरी अउ ब्रोसन के विमोचन घलो करीन।
राज्यपाल ह एक पेड़ मांग के नाम अभियान के तहत पौधा घलो लगईन।
छत्तीसगढ़-सम्मान
विश्व क्षय दिवस के मउका म नई दिल्ली म काली राष्ट्रीय समारोह म छत्तीसगढ़ ल ‘‘टीबी मुक्त ग्राम पंचायत अभियान‘‘ म बढ़िया प्रदर्सन बर पहिली पुरस्कार ले सम्मानित करे गीस। ए सम्मान पचास लाख ले जादा आबादी वाले राज्य मनके श्रेणी म टीबी मुक्त ग्राम पंचायत के सबले जादा अनुपात बर दे गीस। केंद्रीय स्वास्थ्य अउ परिवार कल्याण मंत्रालय डहार ले राखे गे समारोह म केंद्रीय स्वास्थ्य मंत्री जे.पी.नड्डा ह छत्तीसगढ़ राष्ट्रीय स्वास्थ्य मिशन के संचालक विजय दयाराम के. ल ए इनाम दीन। ए दउरान केंद्रीय स्वास्थ्य मंत्री ह छत्तीसगढ़ सरकार के प्रशंसा करत किहीन कि राज्य ह टीबी मुक्त पंचायत के लक्ष्य ल पाय के दिसा म बढ़िया काम करे हे।
मुख्यमंत्री विष्णुदेव साय अउ स्वास्थ्य मंत्री श्याम बिहारी जायसवाल ह प्रदेस ल मिले ए सम्मान उपर खुसी जतावत जम्मों अधिकारी अउ करमचारी मन ल बधाई देहे।