दंतेवाड़ा अउ बीजापुर जिला के सीमावर्ती क्षेत्र म आज सुरक्षा बल मनके संग होय मुठभेड़ म तीन माओवादी मारे गेहे। एमा ले एक माओवादी सुधीर उर्फ सुधाकर उपर पच्चीस लाख रूपिया के इनाम घोसित रिहीस।
दंतेवाड़ा जिला के पुलिस अधीक्षक गौरव राय ह बतईन कि गीदम थाना क्षेत्र के गिरसापारा, नेलगोड़ा, बोड़गा अउ इकेली गांव के सीमावर्ती इलाका म माओवादी मनके होय के खुफिया सूचना म सुरक्षा बल के टीम ल रवाना करे गीस। इही दउरान पहिली ले घात लगाके बइठे माओवादी मन ह सुरक्षा बल मन उपर फायरिंग सुरू कर दीन। जवान डहार ले करे गे जवाबी कार्रवाई म तीन माओवादी मारे गेहे, जेखर सव बरामद कर ले गेहे। घटनास्थल ले इंसास रायफल, थ्री नॉट थ्री रायफल, बारह बोर के बंदूक अउ आने विस्फोटक सामान बरामद करे गेहे। इलाका म सर्चिंग बढ़ा दे गेहे।
मुख्यमंत्री विष्णुदेव साय ह ए सफलता म सुरक्षा बल मनके जवान के हौसला बढ़ाय हे। ओमन कहिन कि सुरक्षा बल मनके अदम्य साहस ले नक्सल उन्मूलन अभियान अपन लक्ष्य डहार ले सफलतापूर्वक बाढ़त हे। श्री साय ह कहिन कि ए बछर बस्तर रेंज म होय मुठभेड़ म सौ माओवादी मारे जा चुके हे।
मुख्यमंत्री-पेयजल
मुख्यमंत्री विष्णुदेव साय ह गर्मी के मौसम म पानी के संकट के स्थिति ले निपटे बर अवइया पन्द्रह दिन के अंदर प्रदेसभर म विशेष अभियान चलाके सबो हैंडपंप अउ सार्वजनिक नल मनके मरम्मत करे के निरदेस देहे। श्री साय ह काली रायपुर म लोक स्वास्थ्य यांत्रिकी अउ जल संसाधन विभाग के उच्च स्तरीय समीक्षा बइठका म अधिकारी मन ले कहिन कि ग्रीष्म ऋतु के दउरान प्रदेसभर म पानी के समुचित उपलब्धता सुनिश्चित करे बर प्राथमिकता के संग सबो जरूरी उपाय करे जाय। ओमन ह जल संरक्षण के प्रभावी उपाय जइसे रिचार्ज पिट, रेन वाटर हार्वेस्टिंग अउ सौर ऊर्जा आधारित पंप ल तेजी ले बढ़ावा दे उपर बल दीन। संगेसंग ओमन ह भूजल के अनियंत्रित दोहन उपर सख्त निगरानी राखे अउ कम जल खपत वाले फसल के खेती ल प्रोत्साहन देके घलो निरदेस दीन।
मन की बात
प्रधानमंत्री नरेन्द्र मोदी ह ए महीना के तीस तारीख के आकाशवाणी म होवइया ‘‘मन की बात‘‘ कार्यक्रम बर अपन सुझाव मांगे हे। ए मासिक रेडियो कार्यक्रम के एक सौ बीसवां कड़ी होही। सोशल मीडिया पोस्ट म श्री मोदी ह ए महीना के मन की बात कार्यक्रम बर व्यापक सुझाव मिले म खुसी जतईन। ओमन ह कहिन कि ए सुझाव सामाजिक भलाई बर सामूहिक प्रयास के सक्ती ल देखाथे। कार्यक्रम बर अपन विचार अउ सुझाव टोल-फ्री नंबर – एक आठ शून्य शून्य – एक एक – सात आठ शून्य शून्य के जरिया ले दे जा सकत हे। नरेन्द्र मोदी ऐप या माय जीओवी ओपन फोरम के माध्यम ले घलो ऑनलाइन सुझाव अट्ठाईस तारीख तक साझा करे जा सकत हे।
पंजीयन कार्यालय
प्रदेस म चालू वित्तीय बछर के आखिरी महीना मार्च म सासकीय अवकाश के दिन म घलो सबो पंजीयन कार्यालय खुले रइही। पंजीयन अउ मुद्रांक महानिरीक्षक पुष्पेन्द्र कुमार मीणा ह ए संबंध म सबो जिला कलेक्टर ल पत्र जारी कर देहे। पत्र म केहे गेहे कि पच्चीस, उनतीस, तीस अउ इकतीस मार्च के घलो सबो रजिस्ट्री कार्यालय खुले रइही। एखर अलावा रजिस्ट्री बर पक्षकार मनके अपॉइंटमेंट के समय संझा पांच बजे ले बढ़ाके सात बजे तक कर दे गेहे।
जानबा के मुताबिक काली चौबीस मार्च के रजिस्ट्री विभाग के सॉफ्टवेयर एन.जी.डी.आर.एस. म तकनीकी समस्या आय के कारण सर्वर अस्थायी रूप ले बंद होगे रिहीस, जेखर कारण कुछ समय बर रजिस्ट्री के काम रूक गे रिहीस।
भक्त माता कर्मा जयंती
भक्त माता कर्मा जयंती के अवसर म आज मुख्यमंत्री विष्णुदेव साय ह माता कर्मा के याद म डाक टिकट के विमोचन करीन। रायपुर म छत्तीसगढ़ प्रदेश साहू संघ अउ संत माता कर्मा आश्रम समिति डहार ले आयोजित कार्यक्रम म मुख्यमंत्री ह कहिन कि भक्तमाता कर्मा के डाक टिकट जारी होना गर्व के बात हे। साहू समाज डहार ले लंबा समय ले एखर मांग करे जात रिहीस। श्री साय ह कहिन कि राजिम माता के मूर्ति स्थापना के संग आने विकास काम बर बजट म पांच करोड़ रूपिया के राशि सामिल कर दे गेहे, जेखर ले समाज के धार्मिक जघा के विकास ल नवा रस्ता मिलही।
उहें, केन्द्रीय राज्यमंत्री तोखन साहू ह कहिन कि भक्तमाता कर्मा के सामाजिक योगदान अतुलनीय हे अउ उंखर सम्मान म डाक टिकट जारी करे गेहे। भक्त माता कर्मा जंयती के बेरा म आज प्रदेस म आने-आने कार्यक्रम आयोजित करे जात हे। कार्यक्रम म उपमुख्यमंत्री अरूण साव घलो सामिल होइन।
तपेदिक रोग उन्मूलन
केन्द्रीय स्वास्थ्य मंत्री जे.पी. नड्डा ह देस के सबो जिला म सघन तपेदिक रोग उन्मूलन अभियान चलाय के घोसना करे हे। एखर पहिली ए अभियान चयनित उच्च प्राथमिकता वाले चार सौ पचपन जिला म लागू रिहीस। नई दिल्ली म काली विश्व तपेदिक दिवस शिखर सम्मेलन म श्री नड्डा ह किहीन कि एक सौ दिन के तपेदिक मुक्त भारत अभियान के दउरान लगभग तेरह करोड़ लोगन के जांच घलो करे गीस अउ ए बीमारी ले पीड़ित सात लाख ले जादा नवा रोगी मनके पता चलीस।
विश्व तपेदिक दिवस म काली छत्तीसगढ़ म घलो कतकोन कार्यक्रम आयोजित करे गीस। मुंगेली जिला के कलेक्ट्रेट परिसर म आयोजित कार्यक्रम म कलेक्टर राहुल देव अउ पुलिस अधीक्षक भोजराम पटेल ह टीबी मुक्त ग्राम पंचायत ल सम्मानित करीन। कार्यक्रम म उपस्थित लोगन मन ह ए बछर के आखिरी तक पूरा जिला ल टीबी मुक्त बनाय के सपथ लीन।
आरएसएस-प्रेसवार्ता
राष्ट्रीय स्वयंसेवक संघ-आरएसएस के अखिल भारतीय प्रतिनिधि सभा के बइठका बंगलुरू म इक्कीस ले तेईस मार्च तक आयोजित करे गीस। बइठका म बांग्लादेश म हिन्दू अउ अल्पसंख्यक समुदाय उपर होवत अत्याचार के खिलाफ एक प्रस्ताव पारित करे गीस, जेमा बांग्लादेश के हिन्दू समाज के संग एकजुटता ले खड़े होय के आह्वान करे गेहे।
आरएसएस के मध्य भारत क्षेत्र के संघचालक डॉक्टर पूणेन्दू सक्सेना अउ छत्तीसगढ़ प्रांत संघचालक टोपलाल वर्मा ह आज रायपुर म आयोजित पत्रकारवार्ता म ए जानकारी दीन। ओमन बतईन कि ए बइठका म कतकोन जरूरी निर्णय ले गेहे। आरएसएस के शताब्दी वर्ष के सुरूआत विजयादशमी के अवसर म होही, जेमा गणवेश म स्वयंसेवक के मंडल, खंड अउ नगर स्तर के कार्यक्रम कराय जाही। ओमन ह बतईन कि नवंबर दू हजार पच्चीस ले जनवरी दू हजार छब्बीस तक तीन सप्ताह तक घर-घर संपर्क अभियान चलाय जाही, जेखर बिसय ‘‘हर गांव, हर बस्ती, हर घर‘‘ होही। उहें, सबो मंडल अउ बस्ती मन म हिन्दू सम्मेलन के आयोजन करे जाही। एखर अलावा खंड-नगर स्तर म सामजिक सद्भाव के बइठका घलो करे जाही।
विनोद कुमार शुक्ल-तोखन साहू
केन्द्रीय आवासन अउ शहरी कार्य राज्यमंत्री तोखन साहू ह काली रायपुर म सुप्रसिद्ध कवि अउ उपन्यासकार विनोद कुमार शुक्ल ले भेंट करीन। ए दउरान केन्द्रीय राज्यमंत्री ह श्री शुक्ल ल ज्ञानपीठ पुरस्कार दे जाय के घोसना म बधाई देवत उंखर अभिनंदन करीन। ए अवसर म श्री साहू ह कहिन कि विनोद कुमार शुक्ल के रचना भारतीय साहित्य ल समृद्धि करथे अउ आम जीवन के संवेदना ल सरलता ले जताथे। उंखर लेखनी नवा पीढ़ी के साहित्यकार मन बर प्रेरणा स्त्रोत हे। ओमन कहिन कि केन्द्र अउ राज्य सरकार ह साहित्य सृजन ल प्रोत्साहित करे अउ साहित्यकार मन ल सम्मान दे बर हरसंभव प्रयास करही।
राष्ट्रव्यापी महापरीक्षा अभियान
प्रदेस म पाछु तेईस मार्च के स्कूल सिक्षा विभाग, साक्षरता अउ एनआईओएस डहार ले बुनियादी साक्षरता अउ संख्या ज्ञान आंकलन परीक्षा के आयोजन करे गीस। ए महापरीक्षा अभियान म बुजुर्ग, युवा, माईलोगिन अउ दिव्यांगजन के संग लगभग पांच लाख सिक्षार्थी मन ह भाग लीन।