राष्ट्रपति द्रौपदी मुर्मू ह किहीन हे कि वामपंथी उग्रवाद ले प्रभावित लोगन मन ल समाज के मुख्यधारा ले जोड़े के काम आखिरी अउ निर्णायक दउर म पहुंच गेहे। छत्तीसगढ़ के नक्सल प्रभावित क्षेत्र मनके मनखे विकास के रद्दा म आगू बढ़ना चाहथे। आज रईपुर म छत्तीसगढ़ विधानसभा के रजत जयंती समारोह ल संबोधित करत ओमन भरोसा जतइन कि छत्तीसगढ़ ल उग्रवाद ले पूरा मुक्त करे के परयास म राज्य के लोगन मन ल जल्दी ही सफलता मिलही अउ राज्य के इतिहास म एक ठिन स्वर्णिम अध्याय जुड़ही।
राष्ट्रपति ह पर्यावरण संरक्षण के महत्व उपर बल देवत किहीन कि राज्य ल आधुनिक विकास के मार्ग म आगू बढ़े के संगेसंग पर्यावरण के संरक्षण घलो सुनिश्चित करना हे। राज्य के नीति निर्माता मन उपर विकास अउ प्रकृति के बीच संतुलन स्थापित करे के जिम्मेदारी हे। एखरे संग समाज के जम्मों वर्ग ल आधुनिक विकास यात्रा ले जोड़ना घलो जरूरी हे।
राष्ट्रपति ह महिला विधायक मन ले आह्वान करीन हे कि ओमन जीवन के हर क्षेत्र म कार्यरत दूसर महिला मन ल आगू बढ़ाय बर हमेसा तियार रहय। ओमन किहीन कि जब जम्मों महिला एक-दूसर ल शसक्त बनाही, तभे हमर समाज अउ जादा मजबूत अउ संवेदनसील बनही।
समारोह ल संबोधित करत राज्यपाल रमेन डेका ह किहीन कि विधानसभा के रजत जयंती बछर ह हमन ल एक नवा ऊर्जा देहे। ओमन किहीन कि हमर सामूहिक संकल्प होना चाही कि छत्तीसगढ़िया सबले बढ़िया के पहिचान ल बनात राज्य ल समान अवसर, सर्वांगीण विकास अउ सांस्कृतिक गरिमा ले युक्त विकसित छत्तीसगढ़ के रूप म आगू ले जाये।
राष्ट्रपति-छत्तीसगढ़ विधानसभा-02
विधानसभा अध्यक्ष डॉक्टर रमन सिंह ह छत्तीसगढ़ विधानसभा के पच्चीस साल के यात्रा ल लोकतांत्रिक मूल्य के सुदृढ़ता के यात्रा बतइन। ओमन किहीन कि सदन म ‘स्वअनुशासन‘ के परंपरा स्थापित करे गीस, जिहां सदस्य मन खुदे के बनाय नियम के पालन करके पूरा देस बर उदाहरण प्रस्तुत करीन। डॉक्टर सिंह ह बतइन कि छत्तीसगढ़ विधानसभा ह संसदीय गतिविधि के क्षेत्र म राष्ट्रीय अउ अंतर्राष्ट्रीय पहिचान बनाय हे।
मुख्यमंत्री विष्णुदेव साय ह किहीन हे कि बछर दू हजार म भारत रत्न स्वर्गीय अटल बिहारी वाजपेयी के अगुवई म बने छत्तीसगढ़ के रजत बछर संयोग ले ओखर जन्म शताब्दी बछर म पड़त हे, जेला हमन अटल निर्माण बछर के रूप म मनावत हन। मुख्यमंत्री श्री साय ह किहीन कि हमर विधानसभा के पच्चीस साल के यात्रा लोकतंत्र के सुदृढ़ परंपरा के प्रतीक हरय।
नेता प्रतिपक्ष डॉक्टर चरणदास महंत ह राष्ट्रपति के उपस्थिति ल ऐतिहासिक बतात आभार जतइन अउ किहीन कि हमन सब उंखर वचन ले प्रेरणा लेके छत्तीसगढ़ के विकास म एकजुटता ले काम करबो।
समारोह के दउरान ‘‘सदस्य संदर्भ‘‘ सीर्षक वाला एक पुस्तक के घलो विमोचन करे गीस। राष्ट्रपति ह राज्य विधानसभा परिसर म कदम्ब के पउधा रोपण घलो करीन।
रजत जयंती समारोह के मउका म राज्य सरकार के मंत्री अउ विधानसभा के जम्मों सदस्य मौजूद रिहीन।
प्याज-निर्यात शुल्क
केंद्रीय कृषि मंत्री शिवराज सिंह चौहान ह किहीन कि केंद्र सरकार ह प्याज उपर बीस प्रतिसत निर्यात सुल्क समाप्त कर देहे। नई दिल्ली म आज श्री चौहान ह किहीन कि प्याज उपर निर्यात सुल्क खतम होय ले किसान मन के उपज बिना सुल्क के वैश्विक बाजार पहुंच सकही अउ ओमन ल जादा कीमत मिल सकही।
मुख्यमंत्री-समीक्षा बैठक
मुख्यमंत्री विष्णुदेव साय ह आज मंत्रालय म जल संसाधन अउ लोक स्वास्थ्य यांत्रिकी विभाग के कार्य के समीक्षा करीन। बइठका म ओमन अधिकारी मन ल गर्मी ल देखत सहरी अउ ग्रामीण क्षेत्र मन म पिये के पानी के आसान उपलब्धता सुनिश्चित करे ल किहीन। मुख्यमंत्री ह पंद्रह दिन के भीतर अभियान चलाके खराब हैंडपंप अउ सार्वजनिक नल ल सुधारे जाय के निरदेस दीन।
विश्व तपेदिक दिवस
आज विश्व तपेदिक दिवस हरय। टीबी के बारे म जागरूकता लाय अउ वैश्विक स्तर म एखर उन्मूलन के परयास तेज करे बर हरेक साल चौबीस मार्च के ए दिवस मनाय जाथे। ए बछर के थीम हे-‘‘हां, हम क्षय रोग का खात्मा कर सकते हैं- प्रतिबध्दता, निवेश और परिणाम प्रयास‘‘।
केंद्रीय स्वास्थ्य अउ परिवार कल्याण मंत्री जगत प्रकाश नड्डा ह आज विश्व क्षय रोग दिवस के मउका म लोगन मन ले ए रोग ल खतम करे अउ स्वास्थ्य म सुधार बर अपन प्रतिबध्दता के आह्वान करीन हे। एक ठिन सोसल मीडिया पोस्ट म स्वास्थ्य मंत्री ह ए बीमारी ले निपटे म सरकार के परयास के बारे म बतइन। राष्ट्रीय टीबी उन्मूलन कारीकरम के अंतर्गत सौ दिन के टीबी उन्मूलन अभियान अउ निक्षय पोषण योजना के तहत टीबी रोगी मन ल दे जाने वाला वित्तीय सहायता पांच सौ रूपिय प्रतिमाह ले बढ़ाके एक हजार रूपिया प्रतिमाह कर दे गेहे। श्री नड्डा टीबी रोगी मन ल व्यापक सहायता देवइया जम्मों स्वास्थ्य कर्मी मनके प्रति आभार जतइन।
उच्च न्यायालय-बस स्टैंड सुनवाई
कोंडागांव जिला म करोड़ो रूपिया के लागत ले बनाय गे अंतर्राज्यीय बस स्टैंड के बदहाली ल लेके दायर जनहित याचिका उपर आज छत्तीसगढ़ उच्च न्यायालय म सुनवाई होइस। मुख्य न्यायाधीश रमेश कुमार सिन्हा अउ न्यायमूर्ति रविन्द्र कुमार अग्रवाल के खंडपीठ ह बस स्टैंड के दूरदसा उपर नाराजगी जतात नगरीय प्रशासन विभाग के सचिव अउ कोंडागांव नगर निगम आयुक्त ल व्यक्तिगत सपथ पत्र के संग जवाब दाखिल करे के निरदेस दीन। अब ए मामला के अगला सुनवाई सोलह अप्रैल के होही।
बतादन कि राज्य सरकार डहार ले छै करोड़ इंक्यावन लाख रूपिया के लागत ले ए बस स्टैंड बनाय गेहे, फेर ए दू साल ले बिना उपयोग के बंद पड़े हे।
रेरा-बिल्डर जुर्माना
छत्तीसगढ़ रियल स्टेट विनियामक प्राधिकरण-रेरा ह अनियमितता के मामला म एक झिन बिल्डर उपर कड़ा कार्रवाई करत दस लाख रूपिया के आर्थिक दंड लगाय हे। रेरा के नियम के मुताबिक प्रमोटर भू-संपदा के लागत के दस प्रतिसत ले जादा रासि अग्रिम या कोनो फीस के रूप म लिखित करार करे बिना स्वीकार नइ करही। रेरा के जांच म ए पुष्टि होइस के प्रमोटर प्राइम डेव्हलपर्स ह अनुबंध के बिना जमीन खरीदइया वाला मन ले भू-संपदा लागत के दस प्रतिसत ले जादा धन रासि लीस, जउन अधिनियम के प्रावधान मनके स्पष्ट उल्लंघन हे।
तिमेनार-बिजली
बीजापुर जिला के अति सुदूर गांव तिमेनार म मुख्यमंत्री मजरा-टोला विद्युतीकरण योजना के तहत आजादी के सतहत्तर साल बाद पहिली घांव बिजली पहुंचिस। गांव के तिरपन घर मन म सत प्रतिसत विद्युतीकरण पूरा कर ले गेहे। जेखर ले पूरा गांव म खुसी अउ उछाह के माहोल हे। गांव म रहइया मशराम, पंडरू कुंजाम, मंगली अउ प्रमिला वेको ह बतइन कि गांव म पहिली घांव बिजली पहुंचे हे। ओमन किहीन कि बिजली पहुंचे ले अब जंगली-जानवर, सांप-बिच्छी के डर नइ होही। संघरा लइका मनके पढ़ाई-लिखाई घलो अब आसान हो गेहे।
अउ अब मौसम के हाल...
एक द्रोणिका दक्षिण छत्तीसगढ़ ले केरल तक विस्तारित हे। एखर प्रभाव ले प्रदेस के तापमान म हल्का बाढ़े के दउर सुरू होही। मौसम विभाग के मुताबिक तापमान म बढ़ोत्तरी के सरलग बने रेहे के संभावना हे। प्रदेस म काली मौसम सुष्क रइही।
सुरक्षा बल-कैम्प
नारायणपुर जिला के माओवाद प्रभावित अबूझमाड़ क्षेत्र अंतर्गत ‘‘बेड़माकोटी‘‘ म सुरक्षाबल ह नवा सुरक्षा अउ जनसुविधा कैंप स्थापित करे हे। अबूझमाड़ क्षेत्र म एक साल के अंदर ए दसवां सुरक्षा कैंप हे। ए कैंप के खुले ले ए क्षेत्र के तेजी ले विकास होही।
आकाशवाणी कार्यक्रम
आकाशवाणी रईपुर ले काली बिहनिया दस बजे ‘‘छत्तीसगढ़ी लोक गीत म पर्यावरण चेतना‘‘ रूपक के प्रसारण करे जाही। एला आकाशवाणी के एफ.एम. अउ मीडियम वेव म सुने जा सकथे।
अउ अब थोरकुन समाचार सार म –
– दंतेवाड़ा जिला के बैलाडीला क्षेत्र के तीन ठन लौह अयस्क ब्लॉक अउ कांकेर जिला के हाहालद्दी लौह अयस्क ब्लॉक के ई-नीलामी आज ले सुरू होगे हे।