राष्ट्रपति द्रौपदी मुर्मू काली चौबीस मार्च के छत्तीसगढ़ दउरा म आवत हे। ओमन छत्तीसगढ़ विधानसभा के रजत जयंती समारोह म सामिल होही। राष्ट्रपति ह भारतीय वायु सेना के विमान ले काली बिहनिया साढ़े दस बजे रईपुर के स्वामी विवेकानंद एयरपोर्ट पहुंचही। जिहां राज्यपाल रमेन डेका, मुख्यमंत्री विष्णुदेव साय, विधानसभा अध्यक्ष डॉक्टर रमन सिंह अउ आने गणमान्य लोगन मन उंखर अगुवई करही। एखर बाद राष्ट्रपति राज्य विधानसभा पहुंचही। फेर विधानसभा परिसर म राष्ट्रपति ह पौधा रोपण करही। जेमा ओमन कदम के पौधा लगाही। एखर बाद राष्ट्रपति ह विधानसभा म होवइया रजत जयंती समारोह म सामिल होही। ए समारोह ल राष्ट्रपति ह संबोधित घलो करही। ए मउका म विधानसभा अध्यक्ष डॉक्टर रमन िंसंह सुवागत भाषण दीही। समारोह ल राज्यपाल रमेन डेका, मुख्यमंत्री विष्णुदेव साय अउ नेता प्रतिपक्ष डॉक्टर चरणदास महंत घलो संबोधित करही। समारोह के दउरान सदस्य संदर्भ शीर्षक वाले एक ठिन पुस्तक के विमोचन घलो करे जाही। तहां फेर ए समारोह संपन्न होय बाद राष्ट्रपति काली मंझनिया करीबन साढ़े बारह बजे स्वामी विवेकानंद एयरपोर्ट ले बिसेस विमान ले नई दिल्ली बर रवाना हो जही।
प्रधानमंत्री दौरा-तैयारी
प्रधानमंत्री नरेंद्र मोदी ह अवइया तीस मार्च के बिलासपुर जिला के बोदरी तहसील के गांव मोहभठ्ठा म होवइया कारीकरम म सामिल होही। प्रधानमंत्री के दउरा ल लेके तियारी सुरू हो गेहे। इही बीच, मुख्यमंत्री के सचिव पी.दयानंद ह कारीकरम जघा के जायजा लीन अउ अधिकारी मन ल पचीस मार्च तक सबो तियारी ल पूरा करे के निरदेस घलो दीन। ओमन किहीन कि प्रधानमंत्री के सुरक्षा प्रोटोकाल के पालन करत लोगन मनके सौहलियत ल घलो धियान म राखे जाही।
माओवादी-आत्मसमर्पण
बीजापुर जिला म आज दू झिन माईलोगिन समेत बाईस झिन माओवादी मन पुलिस के आगू म आत्मसमर्पण करे हे। एमा ले छै झिन माओवादी मन उपर कुल ग्यारा लाख रूपिया के इनाम घोसित रिहीस। आत्मसमर्पण करइया माओवादी मन म तेलांगाना स्टेट कमेटी, गंगालूर एरिया कमेटी अउ पामेड़ एरिया कमेटी के सदस्य सामिल हे।
राज्य सरकार के पुनर्वास नीति के तहत ए सबो माओवादी मन ल पच्चीस-पच्चीस हजार रूपिया के प्रोत्साहन रासि दे गीस।
इही बीच, सुकमा जिला म मरकनगुड़ा अउ मेटागुड़ा जंगल के पहाड़ी भीतरी ले सुरक्षा बल मन ह माओवादी मन डहार ले राखे गे करीबन नौ ठिन बंदूक, बीजीएल अउ आने बिस्फोटक जिनिस मरामद करे गेहे।
उपमुख्यमंत्री-बीजापुर
उपमुख्यमंत्री विजय शर्मा ह बीजापुर म राखे गे ‘‘बस्तर पंडुम‘‘ जिला स्तरीय समारोह म सामिल हे। ए मउका म ओमन किहीन कि बस्तर के संस्कृति ह न केवल छत्तीसगढ़ भलूक जम्मों विश्व म अनोखा हे। श्री शर्मा ह बतइन कि एक अप्रैल ले तीन अप्रैल तक संभाग स्तरीय ‘‘बस्तर पंडुम‘‘ प्रतियोगिता दंतेवाड़ा होही, जेमा मुख्यमंत्री समेत केंद्रीय मंत्री अउ देस-विदेस ले विसिष्ट पहुना सामिल होही। ओमन यहू किहीन कि जउन भी पंचायत अपन क्षेत्र ल माओवाद ले मुक्त घोसित करही ओला तुरते एक करोड़ रूपिया तक निर्माण कार्य बर मंजूरी दे जाही। संगे उंहा बिजली, मोबाइल नेटवर्क अउ आने बुनियादी सहूलियत दे जाही।
अपन बीजापुर दउरा बेरा उपमुख्यमंत्री श्री शर्मा ह बीते बीस मार्च के होय मुठभेड़ म सामिल सुरक्षा बल के जवान मनले रक्षित केंद्र म पहुंचके मुलाकात करीन अउ उंखर डहार ले चलाय गे सफल ऑपरेसन ल सहराइन। ए मउका म बस्तर आईजी सुंदरराज पी., डीआईजी कमलोचन कश्यप, कलेक्टर अउ एस.पी. समेत आने पुलिस अधिकारी मौजूद रिहीन।
उहें, श्री शर्मा ह बीजापुर स्थित पुनर्वास केंद्र म आत्मसमर्पित माओवादी मन ले गोठबात घलो करीन। ए दउरान ए आत्मसमर्पित माओवादी मन राज्य सरकार के पुनर्वास नीति के बड़ई मारीन। उपमुख्यमंत्री ह घलो उंखर गोठ ल गंभीरता ले सुनिन। ओमन आत्मसमर्पित माओवादी मनके आधार कार्ड, रासन कार्ड, आयुष्मान कार्ड अउ बैंक खाता समेत जम्मों दस्तावेज पुनर्वासे केंद्र म बनवा के शासन के योजना मनके लाभ देवाय के बात किहीन।
इंहा ए बतादन कि ए पुनर्वास केंद्र म पामेड़, पालागुड़ा, मारूड़बाका अउ भैरमगढ़ के अट्ठाईस झिन आत्मसमर्पित माओवादी मन ल कौसल विकास के चलत राजमिस्त्री अउ आने बर ट्रेनिंग दे जात हे।
मुख्यमंत्री-‘‘बिहार-तिहार स्नेह मिलन‘‘
‘‘एक भारत-श्रेष्ठ भारत‘‘ अभियान के चलत काली भिलाई म बिहार राज्य के स्थापना दिवस के मउका म ‘‘बिहार-तिहार स्नेह मिलन‘‘ कारीकरम राखे गीस, जेमा मुख्यमंत्री विष्णुदेव साय पहुना के रूप सामिल होइन। ए दउरान ओमन किहीन कि बिहार अउ छत्तीसगढ़ के संस्कृति परंपरा अउ पारिवारिक मूल्य एक-दूसर ले गहराई ले जुड़े हवय। एक भारत-श्रेष्ठ भारत अभियान ल सहरावत मुख्यमंत्री ह किहीन कि अइसन आयोजन ले सामाजिक, सांस्कृतिक अउ भाखा वाले दूरी ह कम होथे।
प्याज-निर्यात शुल्क
केंद्र सरकार ह एक अप्रैल ले प्याज निर्यात याने बाहिर पठोय बर बीस प्रतिसत सुल्क वापिस लेके निर्णय लेहे। उपभोक्ता कार्य खाद्य अउ सार्वजनिक वितरण मंत्रालय मुताबिक एखर ले किसान मन ल फायदा देवइया भाव तय होही। उहें, बउरइया मन बर प्याज घलो उपलब्ध रइही। मंत्रालय ह केहे हे कि रबीफसल मन के उपज जादा होय के संभावना बाद थोक अउ चिल्हर कीम्मत ह घटे हे। अनुमान मुताबिक रबीफसल म प्याज समेत आने फसल मनके जादा उपज ले अवइया महिना मन म बाजार भाव ह अउ घट सकत हे।
शहीद दिवस-श्रध्दांजलि
आज सहीद दिवस हरय। ए मउका म मुख्यमंत्री विष्णुदेव साय ह स्वतंत्रता संग्राम सेनानी सहीद भगत सिंह, राजगुरू अउ सुखदेव ल सुरता करत माथ नवाइन। श्री साय ह किहीन कि उंखर सहादत ह स्वतंत्रता संग्राम ल नवा दिसा देके संगे देसभर म क्रांति के अलक जगाइस। उंखर मनके जीवन ह त्याग, साहस अउ राष्ट्र भक्ति के एक ठन मिसाल हे। मुख्यमंत्री ह किहीन कि उंखर जीवन ले प्रेरणा लेके हमन सबो झिन ए संकल्प लेवन की देस हित ल सबकुछ मानत राष्ट्र निर्माण म अपन भागीदारी तय करबो।
संयुक्त विश्वविद्यालय प्रवेश परीक्षा
राष्ट्रीय परीक्षा एजेंसी ह संयुक्त विश्वविद्यालय प्रवेश परीक्षा सीयूईटी बर रजिस्ट्रेसन के तिथि ल बढ़ा देहे। एखर बर आवेदक मन ऑनलाइन आवेदन काली चौबीस मार्च तक जमा कर सकत हे। उहें, परीक्षा फीस जमा करे के लास्ट डेट ल घलो पचीस मार्च रतिहा ग्यारा बजके पचास मिनट तक कर दे गेहे। आवेदक मन अधिकारिक वेबसाइट म एप्लीकेसन के विवरण म संसोधन छब्बीस ले अट्ठाईस मार्च भीतर कर सकत हे। देस के कई ठिन सहर अउ देस ले बाहिर पंद्रह ठिन सहर मन म कम्प्यूटर आधारित सीयूईटी परीक्षा आठ मई ले एक जून भीतर राखे जाही।
दुर्घटना
बलरामपुर जिला म आज होय सड़क हादसा म तीन झिन मनखे के मउत होगे। मिले जानकारी के मुताबिक ए हादसा शंकरगढ़ थाना क्षेत्र के चिरई घाट म ओ बेरा होय हे, जब एक ठिन तेज रफ्तार पिकअप ह फटफटी ले जावत तीन झिन मनखे ल टक्कर मार दीस। हादसा म तीनों झिन के मउकच म मउत होगिस।
अउ अब मौसम के हाल…
मौसम विभाग ह अवइया बेरा म बस्तर, दंतेवाड़ा, धमतरी, गरियाबंद, जशपुर, कोरबा अउ रायगढ़ जिला के कोनो-कोनो जघा म गरजई-चमकई के संगे बरसा होय के बात केहे हे। एखर संगे रईपुर, दुरूग, बेमेतरा, बलरामपुर, बालोद, राजनांदगांव अउ सरगुजा जिला म घलो कहू-कहू थोरबहुत पानी गिर सकत हे। इही बीच, कोरबा जिला के कोसगई गांव म आज गाज गिरे ले चपेट म आय दू झिन मनखे के मउत होगे। उहें, तीन झिन आने मनखे गंभीर रूप ले झुलस गे।