आज दिनभर के खबर ल अपन गुरतुर छत्तीसगढ़ी भाखा म पढ़व

हिन्दी के प्रसिध्द कवि अउ लेखक छत्तीसगढ़ के विनोद कुमार शुक्ल ल ए साल के सबले बड़का साहित्यिक सम्मान ज्ञानपीठ पुरस्कार दे जाही। एखर घोसना आज नई दिल्ली म करे गीस। श्री शुक्ल राजधानी रईपुर म रहिथे अउ ओखर जनम 01 जनवरी उन्नीस सौ सैंतालिस के राजनांदगांव म होइस। ओमन पाछू पचास साल ले साहित्य लेखन म जुटे हे। ओखर पहिली कविता संग्रह ‘‘लगभग जय हिंद‘‘ बछर उन्नीस सौ इकहत्तर म प्रकासित होय रिहीस। उंखर उपन्यास ‘‘नौकर की कमीज‘‘, ‘‘खिलेगा तो देखेंगे‘‘ अउ ‘‘दीवार में एक खिड़की‘‘ हिन्दी के सबले बेहतरीन उपन्यास म गिने जाथे। संघरा उंखर कहानी मन के संग्रह ‘‘पेड़ पर कमरा‘‘ अउ ‘‘महाविद्यालय‘‘ घलो चर्चा म रहे हे। उंखर कविता म ‘‘वह आदमी चला गया, नया गरम कोर्ट पहनकर‘‘, ‘‘आकाश धरती को खटखटाता है‘‘ अउ ‘‘कविता से लंबी कविता‘‘ बहुत लोकप्रिय होय हे। श्री शुक्ल ह लइका मन बर घलो किताब लिखे हे। उंखर किताब मनके कई भाषा म अनुवाद घलो हो चुके हे।
एखर प्रतिक्रिया जतात विनोद कुमार शुक्ल ह किहीन कि ए पुरस्कार बहुत बड़का पुरस्कार हरय अउ संघरा एक बड़का जिम्मेदारी घलो महसूस करथंव।
विनोद कुमार शुक्ल ल एखर पहिली ओखर लेखन बर कई ठिन पुरस्कार मिल चुके हे। एमा गजानन माधव मुक्तिबोध फेलोशिप, रजा पुरस्कार अउ साहित्य अकादमी पुरस्कार सामिल हे।
मुख्यमंत्री विष्णुदेव साय ह विनोद कुमार शुक्ल ल ज्ञानपीठ पुरस्कार दे जाय के घोसना म ओमन ल बधई दीन हे। ओमन किहीन कि ए छत्तीसगढ़ बर गरब के बात हे। श्री शुक्ल ह एक घांव अउ छत्तीसगढ़ ल देस के साहित्यिक पटल म गोरवान्वित होय के मउका दीन हे।

पब्लिक लीडरशिप प्रोग्राम

मुख्यमंत्री विष्णुदेव साय ह आज रईपुर म भारतीय प्रबंध संस्थान-आईआईएम म छत्तीसगढ़ विधानसभा के सदस्य मन बर राखे गे दू दिन के पब्लिक लीडरशिप प्रोग्राम के सुभारंभ करीन। ए मउका म मुख्यमंत्री ह किहीन कि हम सब के बीच मतभेद हो सकत हे। फेर मनभेद नइ होना चाही। छत्तीसगढ़ विधानसभा के सदस्य मन म ए बात हमेसा ले बने हुए हे। छत्तीसगढ़ के विकास हमर मूल उद्देस्य हरय अउ जनप्रतिनिधि के रूप म हमन ल प्रदेसवासी के हित म समर्पित होके काम करना हे। श्री साय ह किहीन कि सरलग सिखे ले ही जनप्रतिनिधि के भूमिका प्रभावी होही। ओमन किहीन कि जनप्रतिनिधि के रूप म आम जन ले व्यवहार सबले बड़का पूंजी हरय अउ ए लोगन मनके मन म संसदीय व्यवस्था के प्रति विस्वास ल अउ जादा मजबूत बनाथे। ओमन किहीन कि ए प्रोग्राम नवा समाधान ल साझा करे के मजबूत मंच हरय अउ विकसित छत्तीसगढ़ दू हजार सैंतालिस के लक्ष्य ल पाय म ए उपयोगी अउ सार्थक सिध्द होही।
विधानसभा अध्यक्ष डॉक्टर रमन सिंह ह किहीन कि चुनई जीते के बाद जनप्रतिनिधि मनके जिम्मेदारी अउ भूमिका बाढ़ जाथे, जेखर सेति सरलग सिखथे रहना चाही। ओमन किहीन कि केवल अपन क्षेत्र बर नइ बल्कि छत्तीसगढ़ के बेहतरी बर काम करना हे।
नेता प्रतिपक्ष डॉक्टर चरणदास महंत किहीन कि विधायक बनते ही लीडर बन जाय के धारणा गलत हे। लीडर बनना एक प्रक्रिया हरय अउ एला सरलग सीखना होही।
कारीकरम म छत्तीसगढ़ विधानसभा के सदस्य, नीति आयोग के सीईओ बीवीआर सुब्रमण्यम, आईआईएम रईपुर के निदेशक रामकुमार समेत संस्थान के प्रोफेसर मौजूद रिहीन।

सीजीएमएससी-अधिकारी गिरफ्तार

प्रदेस के बहुचर्चित छत्तीसगढ़ मेडिकल सर्विसेस कार्पोरेशन सीजीएमएससी के रिएजेंट खरीदी घोटाला मामला म आर्थिक अपराध शाखा-ईओडब्ल्यू ह पांच अधिकारी मन ल गिरफ्तार करे हे, ओखर उपर छै सौ साठ करोड़ रूपिया के रिएजेंट अउ मेडिकल उपकरण मनके खरीद म घोटाला करे के आरोप हे। ईओडब्ल्यू डहार ले गिरफ्तार अधिकारी मन म कार्पोरेशन के दू झिन महाप्रबंधक अउ स्वास्थ्य विभाग के एक झिन उपनिदेसक घलो सामिल हे। गिरफ्तार सबो अधिकारी मन ल आज बिहनिया ईओडब्ल्यू के बिसेस अदालत म पेस करे गीस। कोर्ट ह सुनवाई के बाद जम्मों आरोपी मन ल सात दिन के पुलिस रिमांड म भेज देहे।
बतादन कि ईओडब्ल्यू ह ए मामला म सप्लायर मोक्षित कारर्पोरेशन के डायरेक्टर शशांक शुक्ला ल पहिली ही गिरफ्तार कर चुके हे।

विश्व जल दिवस

आज विश्व जल दिवस हरय। एखर उद्देस्य बछर दू हजार तीस तक जम्मों झन बर पानी अउ स्वच्छता सुनिश्चित करना हे। ए बछर के बिसय हे ग्लेशियर संरक्षण।
ए मउका म प्रधानमंत्री नरेंद्र मोदी ह जल संरक्षण अउ सतत विकास ल बढ़ावा देबर देस के प्रतिबध्दता दोहराइन। सोसल मीडिया पोस्ट म ओमन जल संरक्षण के महत्व उपर प्रकाश डालत एक वीडियो साझा करीन। ओमन ए बात उपर जोर दीन कि जल सभ्यता के जीवन रेखा रेहे हे अउ भविष्य के पीढ़ी बर एला संरक्षित करे के जरूरत हरय।
ऐति, छत्तीसगढ़ के मुख्यमंत्री विष्णुदेव साय ह प्रदेसवासी मनले जल संरक्षण अभियान ल जन-आंदोलन के रूप दे के अपील करीन हे। ओमन किहीन कि जल ही जीवन हे। जीवन के सुरूआत जल ले होय हे, अउ एखर सरलग प्रवाह ही जीवन के निरंतरता के आधार हरय।

विस-बजट सत्र समापन

छत्तीसगढ़ विधानसभा के बजट सत्र काली सिरागे। ए मउका म विधानसभा अध्यक्ष डॉक्टर रमन सिंह ह जुलाई म मानसून सत्र आयोजित करे के घोसना करीन। डॉक्टर सिंह ह विधानसभा के रजत जयंती वर्ष के बारे म किहीन कि अवइया चौबीस मार्च के राष्ट्रपति द्रौपदी मुर्मू छत्तीसगढ़ आही। ए दउरान ओमन विधानसभा म विधायक मन ल संबोधित करही।
विधानसभा अध्यक्ष ह बतइन कि बजट सत्र चौबीस फरवरी के सुरू होय रिहीस। ए दउरान कुल सत्रह बइठका होइस, जेमा एक सौ ग्यारा घंटा चर्चा होइस। सत्र के दउरान छत्तीसगढ़ विनियोग विधेयक समेत चौदह विधेयक पारित करे गीस। विधानसभा अध्यक्ष ह बजट सत्र के सुचारू संचालन बर मुख्यमंत्री विष्णुदेव साय, नेता प्रतिपक्ष डॉक्टर चरणदास महंत, मंत्री, विधायक, विधानसभा सचिवालय के अधिकारी, कर्मचारी अउ सुरक्षाकर्मी मनके प्रति आभार व्यक्त करे हे।

कांग्रेस-जिलाध्यक्ष

अखिल भारतीय कांग्रेस कमेटी ह छत्तीसगढ़ के ग्यारा जिला म नवा जिलाध्यक्ष मनके नियुक्ति कर देहे। पार्टी के महासचिव के.सी.वेणुगोपाल ह एक ठिन विज्ञप्ति जारी करके बतइन कि छत्तीसगढ़ के बालोद ले चंद्रेश हिरवानी, दुरूग ग्रामीण ले राकेश ठाकुर, नारायणपुर ले बिसेल नाग, कोंडागांव ले बुधराम नेताम, कोरबा सहर ले नाथूलाल यादव अउ कोरबा ग्रामीण ले मनोज चौहान ल जिलाध्यक्ष के जिम्मेदारी सौंपी गेहे। अइसने, बलौदाबाजार ले सुमित्रा धृतलहरे, सारंगगढ़ -बिलाईगढ़ ले ताराचंद देवांगन, सरगुजा ले बालकृष्ण पाठक, बलरामपुर ले कृष्ण प्रताप सिंह अउ बेमेतरा ले आशीष छाबड़ा ल जिला कांग्रेस अध्यक्ष बनाय गेहे।

छत्तीसगढ़-हाईकोर्ट न्यायाधीश

सुप्रीम कोर्ट कॉलेजियम ह अपन एक महत्वपूर्ण निर्णय म छत्तीसगढ़ हाईकोर्ट के तीन झन न्यायाधीश न्यायमूर्ति सचिन सिंह राजपूत, न्यायमूर्ति राधा किसन अग्रवाल अउ न्यायमूर्ति संजय कुमार जायसवाल ल एक बछर के नवा अवधि बर छत्तीसगढ़ हाईकोर्ट म ही अतिरिक्त न्यायाधीश के रूप म काम करे के अनुशंसा करे हे। हाईकोर्ट म तीन झन जज पहिली ले पदस्थ हरय।

अग्निवीर भर्ती-परिणाम

छत्त्तीसगढ़ म अग्निवीर भर्ती के परिणाम आज घोसित कर देहे। परीक्षा म सफल अभ्यर्थी ए साल भारतीय सेना म अग्निवीर बनके देस के सेवा करही। अभ्यर्थी परिणाम ल ज्वॉइन इंडियन आर्मी के वेबसाइट-डब्ल्यू.डब्ल्यू.डब्ल्यू. डॉट ज्वॉइन इंडियन आर्मी डॉट एनआईसी डॉट इन म देख सकत हे। परिणाम सेना भर्ती कार्यालय रईपुर के नोटिस बोर्ड म घलो प्रदर्सित करे गेहे।

संपत्ति-फीज

जशपुर पुलिस ह ऑपरेशन ‘‘आघात‘‘ के तहत सफेमा कोर्ट मुंबई के माध्यम ले गांजा तस्कर हीराधर यादव के करोड़ो रूपिया के अवैध संपत्ति फ्रीज कराय हे। जिला के पुलिस अधीक्षक शशिमोहन सिंह ह बतइन कि ग्राम हल्दीझरिया निवासी हीराधर यादव लंबा समय ले गांजा के अवैध व्यापार करत रिहीस। पुलिस ह ओला सत्ताईस किलो ग्राम गांजा के संग गिरफ्तार करे रिहीस।