केन्द्र सरकार ह कम मूल्य वाले भीम-यूपीआई लेनदेन ल बढ़ावा दे बर एक प्रोत्साहन योजना ल मंजूरी देहे। ए योजना 1 हजार 500 करोड़ रूपिया के अनुमानित व्यय ले करे जाही। नई दिल्ली म आज मंत्रिमंडल के निर्णय के जानकारी देवत सूचना अउ प्रसारण मंत्री अश्विनी वैष्णव ह बतईन कि ए योजना ले छोटे व्यापारी बिना कोनों अतिरिक्त लागत के यूपीआई सेवा के लाभ ले सकही। ओमन किहीन कि छोटे व्यापारी ल दू हजार रूपिया तक के लेनदेन बर प्रति लेनदेन मूल्य म शून्य दशमलव एक-पांच प्रतिशत के दर ले प्रोत्साहन प्रदान करे जाही।
श्री वैष्णव ह कहिन कि सरकार ह चालू वित्त बछर अउ अवइया वित्तीय बछर बर संशोधित राष्ट्रीय गोकुल मिशन के कार्यान्वयन ल घलो मंजूरी देहे। ओमन कहिन कि ए योजना ले दुग्ध उत्पादन अउ उत्पादकता म बढ़ोतरी होही अउ किसान मनके आय घलो बाढ़ही।
मतदाता पहचान पत्र-आधार कार्ड
सुप्रीम कोर्ट के आदेस के बाद भारत निर्वाचन आयोग ह मतदाता पहचान पत्र ल आधार ले जोड़े के काम सुरू करही। ए संबंध म नई दिल्ली म केन्द्रीय गृह सचिव, विधायी विभाग के सचिव, मिनिस्ट्री ऑफ इलेक्टॉनिक्स एंड इन्फॉरमेशन टेक्नोलॉजी के सचिव अउ सीईओ, य.ूआई.डी.ए.आई. संग निर्वाचन आयोग के तकनीकी विशेषज्ञ मनके बइठका होइस। बइठका म भारत निर्वाचन आयोग के बड़का अधिकारी मन सामिल होइन।
वित्त मंत्री-अनुदान मांग पारित
काली विधानसभा म वित्त मंत्री ओ.पी. चौधरी के विभाग ले जुड़े 12 हजार 389 करोड़ 29 लाख रूपिया ले जादा के अनुदान मांग ल पारित कर दे गीस। अनुदान मांग म चर्चा के बेरा श्री चौधरी ह कहिन कि ए बजट म मुख्य रूप ले सासकीय सेवक मन ल पेंसन अउ आने सेवानिवृत्ति के लाभ जइसे- पेंशन, परिवार पेंशन, पेंशन कम्यूटेशन, ग्रेच्युटी, अवकाश नकदीकरण अउ एनपीएस म नियोक्ता अंशदान मंद के प्रावधान हे। ओमन कहिन कि छत्तीसगढ़ ह पेंशन निधि अधिनियम बनइया देस के पहिली राज्य होही। वित्त मंत्री ह कहिन कि छत्तीसगढ़ राज्य के स्थापना पूर्व प्रधानमंत्री स्वर्गीय अटल बिहारी वाजपेयी के परिकल्पना रिहीस। एखर सेती उंखर सुरता म नवा रायपुर म ‘‘अटल स्मारक अउ संग्रहालय‘‘ के निर्माण कराय जाही।
विस ध्यानाकर्षण
सदन म आज ध्यानाकर्षण के माध्यम ले कांग्रेस विधायक बालेश्वर साहू ह रेडी-टू-ईट वितरण म गड़बड़ी के मामला उठईन। ओमन कहिन कि जांजगीर-चांपा क्षेत्र म बड़ बेरा ले रेडी-टू-ईट के वितरण नइ करे जावत हे। अपन जवाब म महिला अउ बाल विकास मंत्री लक्ष्मी राजवाड़े ह कहिन कि रेडी-टू-ईट के आपूर्ति जम्मों जगह होवत हे अउ एमा कोनों गड़बड़ी नइ मिले हे। एखर बाद सभापति ह मंत्री ले कहिन कि ओमन अधिकारी मन डहार ले ए मामला के जांच करावयं।
विस-प्रश्नकाल
राज्य विधानसभा म आज प्रश्नकाल के दउरान भाजपा सदस्य अउ पंडरिया विधायक भावना बोहरा ह बैगा आदिवासी क्षेत्र म नलकूप खनन म धांधली के मामला उठईन। ओमन कहिन कि बैगा आदिवासी बहुल क्षेत्र म पानी दे बर नलकूप खनन के जे जानकारी विभाग ले मांगे गे रिहीस, ओला बदल दे गेहे। एमा मंत्री केदार कश्यप ह कहिन कि जो प्रश्न सदस्य ह सदन म उठाय हे, ओखर जानकारी सदस्य ल दे दे गेहे। भाजपा सदस्य भावना बोहरा ह नलकूप खनन म धांधली के जांच के मांग करीन, जेमा विभागीय मंत्री ह कार्रवाई के आश्वासन दीन।
प्रश्नकाल म आज कांग्रेस विधायक लखेश्वर बघेल ह बस्तर संभाग के आश्रम अउ छात्रावास म पाछु तीन बछर म होय छात्रा मनके मौत के बारे म जानकारी मांगीन। आदिम जाति विकास मंत्री रामविचार नेताम के जगह संसदीय कार्य मंत्री केदार कश्यप डहार ले दे गे जवाब ले विपक्षी सदस्य संतुष्ट नइ होइन अउ ओमन सदन ले बहिर्गमन कर दीन।
विधेयक-अनुदान मांग चर्चा
वाणिज्यिक कर मंत्री ओ.पी. चौधरी ह आज रजिस्ट्रीकरण छत्तीसगढ़ संशोधन विधेयक अउ छत्तीसगढ़ आकस्मिकता निधि संशोधन विधेयक ल सदन के पटल म रखीन।
सदन म ए बेरा मुख्यमंत्री विष्णुदेव साय के विभाग ले जुड़े अनुदान मांग उपर चर्चा चलत हे। अनुदान मांग म चर्चा के सुरूआत कांग्रेस विधायक दलेश्वर साहू ह करीन। चर्चा म सत्तापक्ष अउ विपक्ष के सदस्य सामिल होवत हे।
अंतरिक्ष यात्री-वापसी
अंतरिक्ष यात्री सुनीता विलियम्स अउ बुच विल्मोर आज बिहनिया स्पेस एक्स क्रू ड्रैगन अंतरिक्ष यान म सवार होके भूईया म वापस आ गेहे। उंखर स्पेस एक्स कैप्शूल ह पैराशूट ले मेक्सिको के खाड़ी बर उड़ान भरीन। फ्लोरिडा पैनहैंडल म तल्हासी के तीर म एक्स कैप्सूल ह लैंड होइस, जेमा दूनो अंतरिक्ष यात्री नौ महीना के बाद भूईया म वापिस लहुटीन। विल्मोर अउ विलियम्स पाछु साल जून म अंतर्राष्ट्रीय अंतरिक्ष स्टेशन म रिहीन। दूनों ह अंतरिक्ष म दू सौ छियासी दिन बितईन, जो अनुमान ले दू सौ अठहत्तर दिन जादा हे।
भारतीय मूल के अंतरिक्ष यात्री सुनीता विलियम्स के वापसी म छत्तीसगढ़ के मुख्यमंत्री विष्णुदेव साय ह सोशल मीडिया म एक पोस्ट के माध्यम ले लिखे हे कि सुनीता विलियम्स उपर हम जम्मों झन ल गरब हे। उंखर धैर्य अउ साहस नारी शक्ति के प्रतीक हे।
हाईकोर्ट-प्राचार्य प्रमोशन
छत्तीसगढ़ म प्राचार्य मनके प्रमोशन के मामला एक घांव फेर उच्च न्यायालय पहुंच गेहे। प्राचार्य बने बर बीएड डिग्री जरूरी करे के मांग करे गेहे। याचिका म केहे गेहे कि सिक्षक मनके भर्ती बर न्यूनतम योग्यता राष्ट्रीय अध्यापक शिक्षा परिषद-एन.सी.टी.ई. ह तय करे हे। उहें, प्राचार्य पदोन्नति फोरम डहार ले ए मामला म हस्तक्षेप याचिका दायर करे गेहे, जेमा केहे गेहे कि प्राचार्य के पद प्रशासनिक हे। अइसन म प्राचार्य पद बर बीएड जरूरी नइ हे।
जंगल-आग
सारंगढ़-बिलाईगढ़ जिला के गोमर्डा अभ्यारण्य म आगी लगइया दू झिन लोगन ल गिरफ्तार करके जेल भेज दे गेहे। ए दूनों आरोपी सराब के नसा म जंगल म तीन-चार जगह म आगी लगा के भाग गे रिहीन। इही दउरान वन विभाग के टीम ह एमन ल घेराबंदी करके पकड़ लीन।
उहें, कोरबा जिला के जोगी पाली स्थित कनकी के जंगल म काली रतिहा आगी लग गे। ए आगी धीरे-धीरे जंगल म फैल गे। आगजनी के घटना म कनकी, जोगी जंगल के संगेसंग तीरतार के कतकोन गांव चपेट म आ गेहे। ग्रामीण मन डहार ले एखर सूचना वन विभाग ल दे दे गेहे।
कवासी लखमा-मुलाकात
कांग्रेस के प्रदेश प्रभारी सचिन पायलट आज पॉलिटिकल अफेयर्स कमेटी के बइठका ले बर रायपुर पहुंचीन। एखर पहिली, ओमन सराब घोटाला मामला म रायपुर सेंट्रल जेल म बंद पूर्व मंत्री कवासी लखमा ले मुलाकात करीन। उंखर संग विधानसभा म नेता प्रतिपक्ष डॉक्टर चरणदास महंत, प्रदेस अध्यक्ष दीपक बैज, विधायक देवेन्द्र यादव अउ कवासी लखमा के बेटा हरीश कवासी घलो मौजूद रिहीन।
फर्जी पत्रकार-गिरफ्तार
कबीरधाम पुलिस ह सरकारी कर्मचारी मन ल ब्लैकमेल करके अवैध वसूली करइया चार फर्जी पत्रकार मनके गिरोह के पर्दाफास करत ओमन ल गिरफ्तार करे हे। ए गिरोह सरकारी कर्मचारी मन उपर झूठा खबर प्रकासित करे के दबाव बनाके ओखर मन ले पइसा वसूलत रिहीन। पुलिस जांच म आगू आय हे कि ए फर्जी पत्रकार मनके पास कोनों अधिकृत प्रमाण-पत्र नइ हे। आरोपी मन ले पूछताछ करे जावत हे।
वेव्स सम्मेलन
वर्ल्ड ऑडियो-विजुअल एंटरटेनमेंट समिट-वेव्स, एक ले चार मई तक मुंबई म होही। ए सम्मेलन उद्यमी, पूंजीपति अउ निवेसक मन ल विकास अउ निवेस बर नवा अवसर पैदा करे बर एक साथ लाही। केन्द्रीय सूचना अउ प्रसारण मंत्रालय डहार ले सुरू करे गे ए पहल के उद्देश्य फंडिंग अउ राष्ट्रीय एक्सपोजर प्रदान करके मीडिया अउ मनोरंजन ले जुड़े स्टार्टअप के समर्थन करना हे।
अऊ अब मौसम के हाल…
बंगाल के खाड़ी ले आवत नमीयुक्त हवा के सेती प्रदेस म सरगुजा अउ बिलासपुर संभाग के कुछ जगह म हल्का बरसा होय या गरज-चमक के संग छींटा पड़े के संभावना हे। मौसम विभाग ह एक-दू जगह म गरज-चमक के संग अंधड़ चले अउ आकाशीय बिजली गिरे के घलो संभावना जताय हे। उहें, कांकेर जिला म घलो अंधड़ चले अउ आकाशीय बिजली गिरे के चेतावनी दे गेहे। एखर असर ले प्रदेस के तापमान म कुछ गिरावट हो सकत हे।