मुख्यमंत्री विष्णुदेव साय ह आज नई दिल्ली म प्रधानमंत्री नरेन्द्र मोदी ले भेंट करके राज्य के विकास संबंधी मुद्दा म गोठबात करीन। ए दउरान श्री साय ह बस्तर के विकास के मास्टर प्लान प्रधानमंत्री के आगू राखीन, जेमा माओवाद प्रभावित क्षेत्र मन ल बुनियादी सुविधा, उद्योग अउ पर्यटन ल नवा केन्द्र के रूप म विकसित करे के रूपरेखा सामिल हवय। प्रधानमंत्री ह एखर बर राज्य सरकार ल हरसंभव मदद के भरोसा देवईन। भेंट के दउरान मुख्यमंत्री ह प्रधानमंत्री ले राज्य के नवा औद्योगिक नीति अउ निवेसक मनके बाढ़त रूचि म घलो चर्चा करीन।
मुख्यमंत्री ह बस्तर के माईलोगिन मन ल आत्मनिर्भर बनाय के दिसा म राज्य सरकार डहार ले करे जावत प्रयास के जानकारी प्रधानमंत्री ल दीन। ओमन बतईन कि बस्तर के महिला स्व-सहायता समूह के माध्यम ले हजारों माईलोगिन मन ल आर्थिक स्वतंत्रता अउ स्वरोजगार के मउका देवाय जात हे। एखर संगेसंग स्टार्टअप्स अउ छोटे उद्योग के माध्यम ले बस्तर के माईलोगिन मन ल उत्पादन अउ विपणन ले जोड़े के पहल करे जावत हे, जेखर ले ओमन ल आत्मनिर्भर बनके राज्य के आर्थिक प्रगति म योगदान दे सकयं।
बइठका के दउरान मुख्यमंत्री ह प्रधानमंत्री के तीस मार्च के प्रस्तावित छत्तीसगढ़ के दउरा के रूपरेखा साझा करीन। अपन प्रवास के दउरान प्रधानमंत्री ह राज्य म आने-आने विकास परियोजना मनके लोकार्पण करही।
मुख्यमंत्री-केन्द्रीय गृह मंत्री मुलाकात
अपन दिल्ली दौरा के दउरान मुख्यमंत्री विष्णुदेव साय ह काली केन्द्रीय गृह मंत्री अमित शाह ले भेंट करीन। ए दउरान राज्य ले माओवाद ल पूरा तरह ले खतम करे के संगेसंग बस्तर के विकास ल तेजी लाने बर अउ पर्यटन ल बढ़ावा दे बर घलो गोठबात करीन। चर्चा म मुख्यमंत्री ह केन्द्रीय गृह मंत्री ल राज्य सरकार के नवा पुनर्वास अउ आत्मसमर्पण नीति के जानकारी दीन। ओमन कहिन कि सरकार के नवा आत्ससमर्पण अउ पुनर्वास नीति के असर दिखत हे।
मुख्यमंत्री ह बतईन कि बस्तर के युवा मन ल मुख्यधारा ले जोड़े बर कौशल विकास, स्वरोजगार अउ नवा रोजगार के मउका तैयार करे जावत हे। सरकार के लक्ष्य हवय कि बस्तर सिरिफ संघर्ष के भूमि न रहिके सांति, विकास अउ संभावना के नवा केन्द्र बनय।
विस-बहिर्गमन
कांग्रेस विधायक मन ह उपमुख्यमंत्री ले मांग करीन कि सिविल इंजीनियरिंग डिग्रीधारी मन ल घलो उप अभियंता सिविल पद बर मंजूरी दे जाय अउ सुप्रीम कोर्ट के निर्देश के पालन करे जाय। एमा श्री साव ह कहिन कि लोक स्वास्थ्य यांत्रिकी विभाग म उप अभियंता पद म भर्ती प्रक्रिया के नियम के पालन करे जावत हे। उपमुख्यमंत्री के जवाब ले कांग्रेस विधायक मन ह संतुष्ट नइ होइस अउ ओमन नाराबाजी करत सदन ले बाहिर चल दीन।
ध्यानाकर्षण के माध्यम ले आज कांग्रेस विधायक द्वारिकाधीश यादव ह प्रदेस के कृषि सेवा केन्द्र मन म कीटनासक दवा बेचे होय गड़बड़ी के मामला उठईन। ओमन कहिन कि अमानक दवई, बीजा अउ जैविक खातू तय कीमत ले जादा पइसा म बेचे जावत हे। महासमुंद जिला के कीटनाशक दुकान मन म बिना सर्टिफिकेट के एॅमवे कंपनी के दवई बेचत हे। ओमन राज्य सरकार ले मांग करीन कि नियम म संसोधन करके ए दवई के बिक्री म रोक लगाय जाय। जवाब म संसदीय कार्य मंत्री केदार कश्यप ह कहिन कि महासमुंद जिला म एॅमवे कंपनी के कुछेक उत्पाद मन ल कृषि आदान विक्रय केन्द्र म बेचे बर प्रदर्सित करना पाय गेहे। ए उत्पाद अनसूची म सामिल नइ हे। मंत्री के जवाब ले असंतुष्ट कांग्रेस विधायक मन ह सदन ले बहिर्गमन कर दीन।
विस-प्रश्नकाल
राज्य विधानसभा म आज प्रश्नकाल के दउरान भाजपा विधायक अजय चंद्राकर ह नक्सल उन्मूलन बर खरचा करे गे पइसा अउ ओखर प्रावधान ल लेके जानकारी मांगीन। जवाब म गृह मंत्री विजय शर्मा ह बतईन कि माओवाद प्रभावित क्षेत्र बर केन्द्र सरकार ह पांच सौ संतावन करोड़ रूपिया दे रिहीस। फेर, राज्य सरकार ह कुल नौ सौ अंठावने करोड़ रूपिया ले जादा खरचा करे हे।
प्रश्नकाल के दउरान आज सदन म प्रदेस के ग्राम पंचायत म महतारी सदन निर्माण के मामला घलो गूंजीस। नेता प्रतिपक्ष डॉक्टर चरणदास महंत ह जानना चाहिन कि बछर दू हजार चौबीस-पच्चीस म कतका ग्राम पंचायत म महतारी सदन बनाय के मंजूरी दे गेहे अउ एखर बर कतका पइसा जारी होय हे। एमा पंचायत मंत्री विजय शर्मा ह कहिन कि चालू वित्त बछर म प्रदेस के एक सौ चौरानवे ग्राम पंचायत म महतारी सदन बनाय के मंजूरी दे गेहे। एक सौ अड़सठ महतारी सदन बनाय बर पइसा जारी करे गेहे, जेमा ले एक सौ सैंतालीस के काम ह सुरू होगे हे। ओमन बतईन कि एक महतारी सदन के लागत ह उनतीस लाख बीस हजार रूपिया हे।
विधानसभा म आज कांग्रेस विधायक द्वारकाधीश यादव ह पुलिस भर्ती अउ भती प्रक्रिया म गड़बड़ी के मामला उठावत सीबीआई जांच के मांग करीन। एमा गृह मंत्री विजय शर्मा ह कहिन कि वर्तमान म पुलिस भर्ती प्रक्रिया म बिलासपुर जिला ले दू अउ राजनांदगांव म एक सिकायत मिले हे, जेमा कार्रवाई करे जा चुके हे।
सीडी कांड-भूपेश बघेल
कथित सीडी कांड मामला म सीबीआई ह छत्तीसगढ़ के पूर्व मुख्यमंत्री भूपेश बघेल के खिलाफ रिवीजन याचिका दायर करे हे। ए याचिका म चार अप्रैल के सीबीआई के विशेष अदालत म सुनवाई होही। कोर्ट डहार ले जम्मों पक्ष मन ल समन जारी करे जावत हे। सीबीआई ह पाछु ग्यारह मार्च के रायपुर जिला न्यायालय के फैसला ल चुनौती देवत रिवीजन याचिका दाखिल करे रिहीन। सीबीआई ह याचिका म भूपेश बघेल ल आरोपी बनाय के मांग करे हे अउ दावा करे हे कि नवा दस्तावेज साक्ष्य अउ गवाह के आधार म बिसेस जानकारी आगू आय हे, जेखर ले ए मामला के सुनवाई जरूरी होगे हे।
माओवादी आत्मसमर्पण
सुकमा जिला म आज तीन माओवादी मन ह पुलिस के आगू आत्मसमर्पण कर दीन। एमा ले दू माओवादी उपर दू-दू लाख रूपिया के इनाम घोसित रिहीस। ए जम्मों माओवादी मन पामेड़ थाना क्षेत्र म सक्रिय रिहीन। इंखर मन उपर कई ठिन माओवादी घटना म सामिल रेहे के आरोप हे। आत्मसमर्पण करइया सबो माओवादी मन ल राज्य सरकार के पुनर्वास नीति के तहत सहायता रासि अउ आने-आने सुविधा दे जाही।
प्रधानमंत्री इंटर्नशिप योजना
प्रधानमंत्री इंटर्नशिप योजना के तहत दूसर चरण बर आवेदन के प्रक्रिया सुरू होगे हे। ए दउरान युवा इकतीस मार्च तक आवेदन कर सकत हे। ए योजना के उद्देश्य अवइया पांच बछर म इक्कीस ले चौबीस आयु वर्ग के एक करोड़ युवा मन ल इंटर्नशिप के मउका दे जाही।
प्रदेस के उत्तरी भाग म काली उन्नीस मार्च के बरसा होय के संभावना हे। मौसम विभाग के अनुसार एक पश्चिमी विक्षोभ के असर ले बंगाल के खाड़ी ले नमीयुक्त हवा आवत हे। एखर परभाव ले मध्य छत्तीसगढ़ म बीस अउ इक्कीस मार्च, उहें, दक्षिण भाग म बाईस मार्च के बरसा हो सकत हे। ए दउरान जशपुर अउ ओखर ले लगे जिला मन म एक-दू जघा म करा गिरे के संभावना हे।
अउ अब थोरकुन समाचार सार म –
– राज्य के आने-आने जिला म एक सूत्रीय मांग ल लेके पंचायत सचिव मन ह अनिश्चितकालीन हड़ताल म चल देहे।
– बीजापुर जिला म पत्रकार मुकेश चंद्रकार के हत्या के मामला म पुलिस ह ठेकेदार सुरेश चंद्रकार समेत चार आरोपी के खिलाफ आज न्यायालय म केस डायरी और चार्जशीट पेस करीन।
– कोरबा जिला के कटघोरा इलाका म सुतर्रा-रापाखर्रा पुल के तीर पुलिस ह एक ठिन गाड़ी ले पांच सौ किलो गांजा जब्त करे हे। ए मामला म एक झिन आरोपी ल गिरफ्तार करे गेहे।